2
1 A daahd ungahyu ngo ne cohg kejea a ubuohj ke tiihj ke nyingu kedea ke nying yaa geen Loadiihcya maa ke nying yaaj mooge me poohd kuu aniid an. 2 A ubuohj ke tiihj beere wu cang aduunu magu maa kedea uteehngu ke dhe yoohn beehdo e wu nhyaar rogu. A ubuohj ke tiihj beere lum yi Ciig Beer ge anyoadh Juoge ngo ngeyu ngeyo beer mee kejea ngo beehda Ngad Boadh nyoge. 3 Ngad Boadh nyoge e ne meehg wun ngey ngo kejea e ne ngahy luube kedea e ne ngahy dead yihdh nyepinye ne cohg. 4 Giih ni ge aroba yihru beere ngaa me dwaahng wun tooro keehd maa adoohng gene wa ge rob giih me beeye. 5 Keehd me toora buudu e a nud ke wun kedea cwihnya med bang gihn wu ucuung tiehd beere Ngad Boadh nyoge yiihu yiiho ke cwihnyu cang.
Beehdu E Wu Anweehd Keehd Jeacuu
6 Me neehn maano ayiihu Jeacuu Kriihjto ne ruohdhu, kea noono kaahnu rogu wa mar nyoge maa anweehd keehde. 7 Baru maalo ke yiiho kedea ke tiihj giih apuohny yihru umodho ke nying Jeacuu. Baru maalo ujwagu yi yiiho gihru beere cwihnyu be diiw ke nying giih apuohny yihru cang kedea baru maalo ke muohj koohr Juog.
8 Cubu nyingu piny beer mee utoor ngaa me yug wun ne yaa batiene ke dhe yoohn puohny giih toohd ke nying Juog. Giih puohny ngaan nu ge giih toohd me en e naa apar gen, noono e gihr nying gen tooro. Gihr nying gen tooro bang gihn ge rubo kaa nying giih wiih upiny kan me be room ke giih adiehr ge apuohny ke nying Ngad Boadh nyoge.
9 Magu wudh luube giih anaa apuohny yihru ke nying Ngad Boadh nyoge bang gihn Ngad Boadh nyoge ge abeehdo wiih piny e dhaano utaahngo ngo beehda Juog ne cohg, 10 kedea dhiilu giih nu ke maa bang gihn wu anweehd keehd Ngad Boadh nyoge. Kaano e dooj gihr Juog yoadu yoado. Ngad Boadh nyoge en ne ruohdhe wiihe ne maalo rog ruohdh acag Juoge cang. 11 Me neehn kaa anweehdu keehde, e wu uroomo wa nyoge maa athoam ke dhe yoohn mar Ngad Boadh nyoge. Padh thoam mar dhaano utaahngo e ne roba, abea a rob ngo kejea ngaa anweehd keehd Ngad Boadh nyoge aduune be meehge yuohd ne tiihy giih me reje. 12 Naa anaa amuoj wudhu ke piih luogwahy e wu anaa adoohng wa wu athow ukoany wun tiehd keehd Ngad Boadh nyoge. Kedea naa amuoj wudhu ke piih luogwahy e wu adoohng thiow wa wu acahr tiehd keehd Ngad Boadh nyoge. Wu acahr keehde bang naa ayiihu ngo kejea Ngad Boadh nyoge ameehg Juog Aciehge cahro kiin yaa athow.
13 Wu anahg nyoge maa athow ke nying adhemuohme giihu. Kedea giih reje ge na tiihyu ge kuu anaa angolu oogo wa gihr ngaa maa athoam. Ngaa maa athoam wa mar yaa Judea ge thoam ne nyoadh ngo kejea ge tiihy kaa loohng Juog. Abea naa abeehn Juog uwiie adhemuohme giihu piny e wu ameehge doohng ne nyoge me kuow keehdo me nywaag ka beehd Ngad Boadh nyoge kii ngo. 14 Kedea uwuunye giih reje naa atiihyo oogo ge anaa adhahlo loohnge giihe. Noono udoohnge wa ge angaabe maalo wiih yaadh gihn agure wiihe beere gihn me rob ke nying gen tooro bang gihn Ngad Boadh nyoge wudho awaare ke gihn apahdh wiihe. 15 Ke dhe yoohn nu e naa abeehn Juoge utaaje atiihb ukeehg maa jo atiihb ukeehg utoor adhemuohme me yoad gene me meehg gen luom wun. Maa abeehn Juoge thiow unyoadhe kaa ayaahr Ngad Boadh nyoge wudh gen ngahy yaadh maa ariihw kaa angaabe adhemuohme yea.
16 Wa maano toor adhemuohme e rogu keá meehgu cayo yihr yaa Judea ke nying gihn camu wale gihn maadhu wale ke nying yaaye giih gen wale giih yug gene yi paahr dwaahy wale ke nying cahng Cabadh. 17 Rogu keá meehgu cayo bang gihn giih nu ge anahg loohnge me tiihyo ke gen uwahdhe cahng beehn Ngad Boadh nyoge. Naa abeehne e tiihj ke gen ngo acuungo. Ge anahg giih maa arom rih Ngad Boadh nyoge e beehda liil ke ngude. 18 Ngaa cay wun lume keá cubu yi wudhu bang gihn bahnge Juog be wuoru ke dhe yoohn akobe kejea dhiilu Juog ke wuoro kii ngo. Ngaa me koohbo kejea rogu be yugu ne kwad kwad kedea wuohdjuog ge be wuoru e giihe noono robe ge keá yiihu, bang gihn ngo rubo kaa nying giih maa alahge. Wii ngo unhyaame ke nying gihn me gihr nyinge tooro. Bang gihn kwaad ngaa me wa gihn nu par giih me reje, 19 kedea ree apoje oogo bang Jeacuu ke dhe yoohn puohny giih maa toohd ke nying Jeacuu. Jeacuu ngaa nahg akuud yaa yiihoe yi cinge kedea e ne meehg akuud doohng ne nyoge maa abar maalo yi lum Juog ne cohg.
20 Wu adoohng ne nyoge me be tiihyo ke loohnge giih rubo ke nying giih nu wa ngaa maa athow e yihre toor loohnge me tiihye ke gen, bang gihn wu anweehd keehd Ngad Boadh nyoge ge athow. Naa athowe ke nyingu e wu ayuge ne nyoge me be tiihyo ke loohng rubo ke nying giih daahd kuohm dhaane. Nea maano e wu keá tiihy ke loohnge giih nu, 21 me neehn mahn caame mooge kejea ge keá cam wale keehd gweel e ge keá gweel ke cing. 22 Kwaad loohng nu ge loohng dhaan utaahngo ge rubo ke nying cam. Cam gihn me nea ngo acam, e ngo athum. 23 Adiehr muon, loohng nu ge adoohng wa ge beeye bang kwaad loohnge me wa giih nu ge daahd ngaa maa acub cwihnye ne wuohdo ne cohg. Thiow, ne tiihj ke gen, dhaano ree cube ke ne guum giih me teeg kedea ree yuge yugo ne ngaa me ne yahng. Abea nud loohng nu, dhaano be meehg gene mag cwihnye ubahnge be pahdh yihdh giih adhemuohm ge pare wale ge daahde ke cwihnye. Beehda nhyaam e ne cub loohng nu yihre.