13
Jeacuu Tien Jo Waahdhe Aluoge
1 Ke wong thiehno, ge ruuwow e naa cahng Yaan Amono, e ngo angahy Jeacuue kejea cahng aaye oogo wiih piny ne dog bang wahn ngo awahnho. Nhyaahro gihre anyoadhe yihr jo waahdhe ke yoohn thone ge ugure ngahy yaadh maa ariihw. 2-3 Kaano anaa apiih Jeacuue maa jo waahdhe ne cam ke thiehno e atiihb ukeehg lubo arobe coon yihr Juudo Yijkaariod waahd Cimoane kejea dewaahy nu e nu uluome Jeacuu. Ngo beehde e ngo ngahy Jeacuue kejea tee acub Juoge yihre ne yug kwaad giih nyepinye cang kedea ngo ngahye kejea e abeehno ke yoohn bang Juog kedea udo bang Juog. 4 Noono e Jeacuu a'aj maalo kedea uthube ke kahl waahny athoohr gihn anaa ree oogo kedea uriiwe waaro moogo yi badhe. 5 Ke batien gihn nu e Jeacuu athubo ke woj piih yi wal noono maa athube ke luog tien jo waahdhe kedea uwuunye tien gen keehd waaro gihn anaa ariiwe yi badhe ni. 6 Naa awahnh Jeacuue bang Cimoane Piihter, e Piihter arubo yihre kea, <<Ruohdh! Tiena romi kaa luogo ne!>>
7 Maa abeehr Jeacuue ngo yihre kea, <<Gihn ni tiihya awaahn ni be ngey ree yihru abea ngo ungahyu cahng moogo.>>
8 Maa abeehr Piihtere ngo yihre kea, <<Bekihde! Tiena be kuongi ke luogo ne weey weey!>>
Maa acahg Jeacuue ngo ke beehro kea, <<Nea tieni be luoga luogo e yihri utoor gihn me nweehd an ke yihn.>>
9 Maa arub Piihtere yihre kea, <<Nea wa maano ruohdh e padh tiena cog ge ne luog abea luog cinga kedea wiiha cang.>>
10 Maa akob Jeacuue ngo yihre, <<Kwaad dhaano maa aluog beehda tiene cog ge ne dihd, udoge gen ke luogo. Wu cang, wu aluog udoohngu ne nyoge me nyooro tooro rogu abea dhaano acielo kiinu e ne ree ne nyooro.>> 11 Ngo beehde e ngo ngahy Jeacuue e ngaan uluom en. E naa lum yea gihn akoohbe kea, <<Dhaano acielo kiinu e ne ree ne nyooro.>>
12 Naa athume ke luog tien gen e waahny athoohr gihre angaabe kedea udoge kare ne piih. Maa apeehnye gen kea, <<Gihn ayuga rogu ni yea angeyu ne? 13 A cuohnu cuohno ne ngad puohny kedea ne ruohdh. Beehda gihn maa kare ucuohnu an ne ngad puohny kedea ne ruohdh bang gihn a ngad puohny gihru kedea ruohdhu adiehr muon. 14 Me neehn kaan ni aluoga tienu abea a beehda ruohdhu kedea ngad puohny gihru kea noono beehn dhaane kiinu luoge tien wad gen. 15 Luog tiel anyoadha yihru beere gihn atiihya yugu yugo wa kaano anyoadha ngo yihru. 16 Athiir e ne roba yihru. Baahng aweehne e ne wiihe ne maalo rih ngaa nahge baahng paare? Wale ngaa e ne wiihe ne maalo, ngaan aoohr wale ngaa aoohr ngo? 17 Awaahn ni adiehj yihdh luub ni ge angeyu. Kea noono tiihyu ke gen beere cwihnyu umihno.
18 <<A be rubo kaa nyingu cang bang gihn yaa anaa akwanya ge ngahya. Abea gihn agweed yi kitaab Juog ngo dhiil pahdh kare ne rihb wa kaa agweede naa,
<Ngaa anywaag wane amono keehde,
e naa adoohng ne ngad mahna.>
19 <<Gihn ni ateeda yihru maano e gihn ngo ree poohd keá tiihyo beere nea ree tiihye tiihyo, e ngo uyiihu kejea beehda an e Juog ke nguda, a naa Ngad Boadh nyoge. 20 Athiir e ne roba yihru. Ngaan ayiih lum ngaa aoohr an e ngo ayiih luma kedea ngaa ayiih luma ayiih lum ngaa aoohr an.>>
Jeacuu Kea E Uluom
(Mat 26:20-25; Mak 14:17-21; Luk 22:21-23)
21 Batiene naa athume ke rob gihn ni e aduune ake ngoan maa arube oogo kea, <<Athiir e ne roba yihru, dhaano acielo kiinu a uluome.>>
22 Kaano e jo waahdhe ge agaahy maa athub gene ke maahnyo ke kiin gen ke ngaan robe. 23 Ngaan nhyaar Jeacuue kiin jo waahdhe anaa apiih buud Jeacuu. 24 Gihn nu e ngo amun Cimoane Piihtere maa ateede ngo yihre kejea peehnye ngaa kiin gen e ne rub Jeacuue ke nyinge.
25 Maa aloge wiih bang Jeacuu maa apeehye kea, <<Ruohdh beehda ngaa?>>
26 Maa abeehr Jeacuue ngo kea, <<Beehda ngaan cuba amono gihn cwinya ke kado yihre.>> Noono maa acwinye amono ke kado kedea ucube ngo yihr Juudo waahd Cimoane. 27 Nye wong kaano akaab Juude amono yi cinge nu, e kuohm Juudo abeehn atiihb ukeehg ne yaahngo cang.
Maa arub Jeacuue yihr ngo kea, <<Gihn daahdi laar ngo ke tiihyo piow piow.>> 28 Yaa anaa anudo wiih cam gihn arub Jeacuue yihre wa gihn nu ngo kuu angey gene. 29 Mar gen cuohn gene kejea ngo caa ne cub ngiihny yihr nyoge maa angoohng bang gihn nahge en naa ngad mag ngiihny.
30 Maa akaab Juudoe amono gihn acwiny kedea e naa waahdhe noono. Kaano piny anaa adoohng ne dewaahr.
Loohng Nyaahn Gihn Awii Jeacuue Piny
31 Batien kaa a'aay Juudo e Jeacuu arubo kea, <<Awaahn ni, a ge adoohng ne dhaano utaahngo wiiha amoar kedea wiih Juog amoar thiow ke nyinga 32 kedea Juog wiiha umoare ka me cahng kan.
33 <<Wu jo waahdha, a ubeehdo ke wun ke nihn me noog mee. Kara udaahdu. Abea roba robo yihru wa kaa anaa aroba ngo yihr yaa Judea. Ka caa yea wu be cidh yea.
34 <<Loohng me nyaahn e man cuba yihru: wa kwaad kaa anhyaara wun, kea dhiilu rogu ke nhyaaro naa acielo acielo. 35 Nea nhyaahro nud kiin nu, e nyoge cang ngo dhiil gene kaa ngeyo kejea wu beehda jo batiena.>>
Jeacuu Dhe Yoohn Ka Upiem Piihtere En Arobe Yihr Jo Waahdhe
(Mat 26:31-35; Mak 14:27-31; Luk 22:31-34)
36 Maa apeehy Cimoane ge cuohn ne Piihter kea, <<Ruohdh yih caa kee?>>
Maa abeehr Jeacuue ngo kea, <<Ka caa yea wu be rom ci yea awaahn ni. Unahg cahng moogo e nuu ubuodhu batiena.>>
37 Maa apeehy Piihtere kea, <<Ruohdh gihn e bahng e batieni be roma ke buodho awaahn ni. Ke nyingi, riha cuba kii thoo.>>
38 Maa abeehr Jeacuue ngo kea, <<Kare tooro yihri uthowi ke nyinga. Gihn maa athiir e ne roba yihri. Maano e uthuonjieno poohd kuu akoohg, e yih upeehmo tiel adahg kejea a kwihyi.>>