5
Jo Waahdh Acuohn Jeacuue Umodho
(Mat 4:18-22; Mak 1:16-20)
1 Cahng man Jeacuu anaa ke cuungo dieng agan baaw gihr Geneajared maano e nyoge ge anaa doohng ne yong yong buude e ge lihng lum Juog bange. 2 Kaano, e naa aniide baabuure ariow maa amag piny dhe waadh abea ge anahg baabuure giih yaa maay me luog booy giih gen. 3 Maa apaahre yi baabuur acielo. Baabuun ngo anahg gihr Cimoane. E Jeacuue ake rubo yihre kea, <<Kiiw baabuur ka me thiin oogo dhe waadh.>> Kaano e apiih upuohnye nyoge e nii baabuur.
4 Naa athume ke puohny e arobe robo yihr Cimoane kea, <<Kiiw baabuur yi diehr kud, uyoadi booy uthoohri gen yi baaw ne maay.>>
5 Gihn nu e ngo abeehn Cimoane ke ne beehro yihr Jeacuu kejea, <<Ruohdh! Wa abuohj ke maay keraahyo ke bang dewaahr ke kare. Abea kihd wong reehyo acielo now maa amag wane tooro. Abea bang gihn nahge yihn e naa arob ngo wa maano e booy ge uthoohra yi kud.>>
6 Arumo maa athoohr gene booy maa amag gene amahr rej me thoohdh ne cohg, me booy apud gene ke ne yiey piny. 7 Muudhe yaa gen mooge maa anaa ka me lied keehd gen, acuohn gene beere ge ubeehno ne kony gen. Maa apaahng gene baabuure giih ariow ni keehd rej upud baabuure ne diihr piny.
8 Naa aniid Cimoane gihn ni arumo, e ngo apahdh wudh conge nyum Jeacuu urube yihre kobe, <<Aay oogo buuda kan, Ruohdh! Bang gihn a beehda ngad adhemuohm now.>> 9 Cimoane keehd yaae naa adiehno ge abeehn ne cwaahng keter ke nying alwaa amahr rej giih amag ni. 10 Keehd waahd Jebeade, Jeamij ge keehd Joon umen thiow, ge abeehn ne cwaahng. Ge noono ariow ge anahg yaa Cimoane tiehd.
Batiene maa arob Jeacuue ngo yihr Cimoane kobe, <<Cimoane gihn me tudi ke nyinge tooro! Ngahy ngo kejea ne thube ke wa awaahn ni, unahg nyoge ge naa giih udaahdi daahdo ukahli gen banga wa kwaad gihr rej ge amagi ni.>> 11 Batiene e baabuure giih gen ateehl gene ke oogo dhe agala uwii gene giih nyepinye piny cang, ubuodh gene batien Jeacuu.
Jeacuu Ngad Dhoobo Athiehdhe
(Mat 8:1-4; Mak 1:40-45)
12 Maano e Jeacuu anaa yi geew kiin geedhe e nyin me ree anaa dhoobo abeehno. Kaa aniid nyine Jeacuu niido e ree ariedhe ke piny thaahdh tien Jeacuu, uthube ke kwaj wonge e urubo yihre kejea, <<Ruohdh nea cwihnyi ne bange kea yug kuohma kwel.>>
13 Kaano e Jeacuu cinge arwaage bang ngo maa agweele nyin kedea urube kea, <<Cwihnya ne bange! Beehn kuohmi doohnge kwel.>> Nye wong kaano arumo e dhoobo ake aay ree.
14 Maa arob Jeacuue ngo yihre kea, <<Lihng gihn roba. Gihn ayug ree rihi awaahn ni kan ngo keá waay yihr ngaa moogo. Abea aay awaahn ni ne nyoadho rihi yihr ngad lam giih kweehr umaanye kuohmi. Nea kuohmi amaany, kea yug giih kweehr wa kaa anaa arob loohng Moaje ngo bang ne nyoadh ngo yihr nyoge kejea dhoobo tooro rihi.>>
15 Abea keehd maano, nying Jeacuu abeehn ne wiihj ubare. Noono e alwaa nyoge ake waahdo bange beere ge beehn ne lihng giihe ne robe kedea beere yaa rog gen naa atwaanye ge thiehdhe thiehdho. 16 Abea Jeacuu ne kwaay aay ucea ke kar keede ne kway Juog yea.
Jeacuu Ngaa Maa Abab Piny Athiehdhe
(Mat 9:1-8; Mak 2:1-12)
17 Cahng man, maano e Jeacuu anaa ke puohnyo e nyoge mooge kiin yaa Paarijea kedea yaa loohng, ge anaa apiih thiow ne lihng. Ge anaa abeehno ke wudh miehr mooge giih Gaalili cang kedea bang yi piny Judea maa ke bang yi geen Jeruucalem. Teeg Juog anaa rih Jeacuu ne cohg ne thiehdh amahr yaa atwaanye. 18 Kaano e nyoge mooge ake beehno e ge bien ngaa maa abab piny maa apiehle yi belo. Yaa ni cwihny ge anaa bange beere nyin kedh gene ke wod bang Jeacuu. 19 Abea naa atoor dhe yooh yihr gen me kedh gene nyin abab piny wod bang Jeacuu, ke nying thoohdh nyoge, e ge ayedh maalo ungaany gene wiih wod maa alwaay gene nyin piny yi wod ke belo gihre keew nyoge kedea ucub gene ngo ke nye kaa apiih Jeacuue yea.
20 Naa aniid Jeacuue kaa ayiih gene kii ngo, e ake rubo kea, <<Nyieh! Adhemuohme giihi ge awiia piny yihri.>>
21 Batien lum nu e yaa loohng kedea yaa Paarijea naa anudo kaano, ge ake thubo ke ngoan kii cwihny gen kob gene, <<Beehda ngad gihn noono dhahl Juog wa maan ni? Dhaano utaahngo me rom anyoohne ke wii piny nud ne nea padh Juog keede?>>
22 Gihn nu angoan gene kii cwihny gen ke nying ngo aguo Jeacuue ke ngeyo maa apeehnye gen kobe, <<Nye yaage! Gihn e ne ngoanu ke nyinge yaa aduunu? 23 Maa aweehne e ne teeg ke tiihyo, ne rob ngo kejea, <Adhemuohme giihi ge awii piny yihri ne,> wale ne rob ngo kejea, <Yedh maalo ucaahdhi!> 24 Awaahn ni, a ge adoohng ne dhaano utaahngo, a utiihyo ke gihr nyepiny kedea uniidu ngo, gihn me be rom ree tiihyo yihr dhaano utaahngo ne nyoadh ngo yihru kedea ungahyu ngo kejea yihra ne tee wiih ngoom me wiia adhemuohme giih nyoge piny.>> Batiene urobe ngo yihr nyin abab piny arumo kejea, <<Ateeda yihri, kaa yedh maalo ukaabi belo gihri uci paajo!>> 25 Ke wong kaano, e nyin a'aj maalo nyum nyoge cang, ukaabe belo gihre uaaye ne kew e ngo puoj Juog. 26 Nyoge ge acwaahng maa apuoj gene Juog e ge urubo kob gene, <<Wa kwaad giih me teeg ge aniido tihn ne cohg!>>
Leabi Acuohn Jeacuue
(Mat 9:9-13; Mak 2:13-17)
27 Batiene e Jeacuu anaa ake caahdho ke waahdhe maa ayoade ngad gwaay cuol me nyinge Leabi e ngo apiih ne gwaay cuol. Maa arob Jeacuue ngo yihre kea, <<A daahd udoohngi ne ngad waahdha!>> 28 Maa ayedhe maalo, uwiie giihe ke kaano, uaay tiehd ke Jeacuu.
29 Kaano e Leabi cam abeehne ke ne gwiiro paare ke nying Jeacuu. Nyoge me thoohdh maa yaa gwaay cuol kedea nyoge mooge maa now ge anudo kar cam. Noono maa apiih Jeacuue ne cam tiehd keehd yaa nu. 30 Gihn nu e yaa Paarijea maa yaa loohng me ne kur Paarijea, jo waahdh Jeacuu apeehny gene peehnyo kob gene, <<Ke nying gihn e ne cahmu kedea umahdhu keehd yaa gwaay cuol kedea nyoge maa awaadh paaje?>>
31 Maa abeehr Jeacuue ngo yihr gen kobe, <<Padh yaa rog gen tooro atwaany ge ne daahd akiihm abea beehda nyoge me tuu, gen ne daahd akiihm. 32 A kuu abeehno kaa nying yaa koohbo kejea ge abiohgrwaale. A abeehno kaa nying yaa ayiih ngo kejea ge yaa adhemuohm uwii gene tiihy adhemuohme.>>
Lubo Ke Nying Kweehr Cam
(Mat 9:14-17; Mak 2:18-22)
33 Kaano maa akob gene ngo yihr Jeacuu, <<Jo waahdh Joon ge beehde cam kweehr gene kweehro kedea ge ukwahyo. Thiow jo waahdh Paarijea ge utiihyo wa gihn nu abea jo waahdhi ge beehd kaa cam kedea ke maadh.>>
34 Maa abeehr Jeacuue ngo yihr gen kea, <<Kare nud umeehg yaa acuohn athiehge yi nyuohme kweehr cam abea athiehg nud bang gen ne? 35 Abea cahng ukaab athiehg oogo bang gen ubeehn. Yihdh nihn nu e nuu ukweehr gene cam.>>
Ucaale Ke Nying Puohny Jeacuu
36 Maa ateede ucaal ni yihr gen, <<Kare tooro uyiej dhaane waaro me nyaahn udhahbe ngo rih jwaahd waaro maa ayiej. Nea ngo yug dhaane yugo wa gihn nu, e waahr nyaahn e naa araany kedea waaro gihn nyaahn ge be roohm keehd jwaahd waaro gihn acoon. 37 Thiow kare tooro yihr dhaano uyoade koongo me poohd kuu ayaahnyo upege ngo yi keej maa acoon maa akuoj. Bang gihn nea koongo caa ne yaahnyo e yi keej gihn akuoj ucoohdo ubeehn koongo naa tudo uwoje piny cang. 38 Nea kare ne cohg, e koongo me poohd kuu ayaahnyo dhiil kaa peg yi keej me nyaahn! 39 Dhaano maa amahdho ke koongo me keej be cahg yiiho ulyaahbe ngo ke koongo me waj keehdo, bang gihn me keej e ne med yi dhee.>>