13
Thuohm Geen Jeruucalem Piny
(Mat 24:1, 2; Luk 21:5, 6)
1 Ge athub ge Jeacuue ke beehn oogo yi laar gihr Wod Juog ni e dhaano acielo kiin jo waahdh giihe apiih ne leej Wod Juog yihr Jeacuu kobe, <<Ngad Puohny! Wod Juog gihn ageer ke leele maa awuob ne cohg. Maanyu kaa ayug wuude ne wuob kii ngo!>>
2 Maa abeehr Jeacuue ngo yihre kejea, <<Gihn e ne ngahyi! Wuud nu awuob ge niidu ge uthuohm piny utoor wong leelo acielo muu udoohng wiih wad gen.>>
3 Gihn nu maa a'aay gene ne ci wiih good Ulihbe. Naa awahnh gene e Jeacuu apiih maano e nyume aloge bang Wod Juog. Kaano e Piihter maa Jeamij kedea Joon maa Andrya, ge athubo ke peehny Jeacuu kar gen keed gen kob gene, 4 <<Ngad puohny teed ngo yihr wan, unahg cahng aweehne e nuu uthuohm Wod Juog piny kedea gihn e nuu unyoadh ngo kejea cahng utiihy giih ni rog gen ngo abeehno.>>
Ka Thub Giih Me Reje Kii Ngo
5 Noono e Jeacuu ake thubo ke rob yihr gen kea, <<Cubu cwihnyu piny beer mee ubahnge rogu be meehgu dwaahngo, 6 bang gihn amahr nyoge me dwaahng wun ke nying giih uyug rog gen ge ubeehn ke batiena e ge rubo kaa nyinga, e ngaa man ukoohbo kea, <A naa Jeacuu Ngad Boadh nyoge.> Yaa nu, thoohdh nyoge urom gene ke dwaahngo. 7 Thiow linye bang gen ulihngu kedea dhog uwahnh bangu ke nying linye mooge me ne kuohn me bahye. Abea yihdhu keá baadh, bang gihn giih nu rog gen kuong gene kaa tiihyo umodho e cahng gug piny poohd kuu awahnho. 8 Paajo yea upahw ne dahg ubeehn yaa tien paajo acielo ukag gene ke rog gen kedea dhaahre giih wiih piny ge ukag ke rog gen. Amahr ayahng ngoom me thoohdh rog gen uyug gene ke bang kuohn me thoohdh wiih piny kedea kahj nyoge ubange ke bang wiih piny. Giih nu ge unahg ka uthub giih reje ge ukuong tuohl abea keehd maano e ge uroomo kaa raahm nyoohdo e thub maahdh batiene e bar maalo ke raahm keraahyo.
9-10 <<Abea Ciig Beer ngo dhiil kaa puohnyo yihr yaa ungoom maano e piny poohd kuu agug. Yugu rogu beere cwihnyu ungahmo ne koar giih reje ge upahdh wudhu. Wu umag ucub wun yi cing ruohdhe giih wuud amaade ke nying gihn nahgu jo'a. Wu upuohd gene yihdh wuud amaade kedea wu ukedh nyum ruohdhe kedea jaah ke nying gihn ayiihu luma. E naa ka uteedu giih alihngu banga yihr gen kedea yihr nyoge me padh yaa Judea. 11 Abea nea wu amag kedea ukedh wun yi lug e wu keá diero ke gihn urobu nyum lug, bang gihn rob urobu unahg Wahy Juog e nuu ucub ngo yihru ne robo.
12 <<Dhaano maa akweer ke luma, umen kedea nyethiine maa ayiih luma ge umaane uwahdhe ka uluome gen unahg gen. Thiow nyethiin maa akweer ke luma, wahn ke men maa ayiih luma ge umaane uwahdhe ka uluome gen unahg gen. 13 Wu thiow, wu umaan nyoge cang ke nyinga. Abea ngaan umag cwihnye teeg uwahdhe guge e ngaan nu e nuu uyoad boadh wahy.
Raahyo Gihn Uyoad Jeruucalem
(Mat 24:15-28; Luk 21:20-24)
14 <<Cahng uniidu giih reje ngo ubeehn, cahng ubeehn Ruohdh atiihb ukeehg ujwaahge Wod Juog gihr Jeruucalem udoohnge ne ka me nyoge Juog be wuor gene yea. (Kaano e nuu ubeehn ngaa kwaahno upare wiihe beer mee) kedea ubeehn yaa beed piny Judea ugoohd gene ke ngweej ne ci ne pahno yihdh bung yihdh goode. 15 Ngaa ayuud gihn nu e ngo ne piny kane, e ngo keá do wod ne cej gihr nyepiny 16 kedea ngaa nii puohdhe e ngo keá do paajo ne kaab waahnye. 17 Gihn nu unahg gihn me raaj keter yihr maahn me yaje kedea maahn dhuohdho bang gihn ge buu urom ngweej ne cohg. 18 Abea kwayu Juog beere gihn nu ree be yuge e piny aboar 19 bang gihn raahm upahdh yihdh nihn nu unahg raahm me raaj me kuu akuong pahdh upiny ke cahng anaa acag Juoge wiih piny uwahnhe awaahn kedea me ree buu ucahge ke bero cahng moogo keehdo. 20 Nea Juog Ruohdh ngo be ne guoe ke gweehgo ne ngol yihdh nihn nu, e dhaano utaahngo me ne bodh ne tooro. Abea ke nying yaae ge akwanye, e nihn nu ge ayuge noog. 21 Teeda teedo yihru thiow kejea nea dhaano ubeehno urube yihru kea, <Arob gihn yihru! Ngad Boadh nyoge abeehno ke ca!> Wale ukoohbe kea, <Ngad Boadh nyoge ngo ne ca!> Giih nu ge keá yiihu ne weey weey naa athere. 22 Bang gihn unud ke nyoge me thoohdh muu ubeehn ke batiena ne dwaahng wun. Ngaa man ukoohbo kea, <A naa Ngad Boadh nyoge> kedea ngaa moogo ukoohbo kea, <A naa agamloohngjuog!> Yaa nu giih me teeg me gaahy nyoge ge urom tiihyo yihr gen. E naa ka uraany gene wudh nyoge uwii gene luma piny, keehd yaa akwany Juoge ne yaae wudh gen uraany gene nea dhe yooh ayoad gene. 23 Giih ni ge aroba yihru beere nea cahng ubeehn giih nu uyug gene rog gen e wu uyuud e rogu agwiiru.
Cahng Ubeehn Jeacuue
(Mat 24:29-31; Luk 21:25-28)
24 <<Yihdh nihn nu, ke batien giih raahm,
<e wong cahng naa lihb
kedea dwaahy buu ugeed maa
25 ciehr ge uthub ke pahdho ke yoohn maalo
kedea giih yea maalo rog gen uyahng gene.>
26 <<Batiene e a ge adoohng ne dhaano utaahngo a uniid e a ubeehno kii lwahd keehd tee mara e wiiha amoar. 27 Kaano e wuohdjuog ge uoohr ne cong jo'a naa akwanya ke bang upiny cang keehd kuohn me baahye.
Cahng Beehna
(Mat 24:32-35; Luk 21:29-33)
28 <<Beehna uroma ke rih dhuuro. Nea ngo uthubo ke lodho e ngahj kejea oohro adoohng cahng. 29 Beehna ngo udoohng cahng nea wong cahng urwaahnyo. Neehn maano thiow nea giih nu rog gen ayug gene e kea ngahyu ngo kejea beehna adoohng cahng. 30 Adiehr e ne roba yihru. Wu yaa nud awaahn ni wu buu uthow cang e giih aroba yihru rog gen poohd kuu atiihy gene. Wu ubodh keehd me yug giih nu ateeda rog gen. 31 Maalo kedea upiny kan ge utooro abea luma ree utiinge kare.
Ngaa Keá Gwaahg
(Mat 24:36-44)
32 <<Abea cahng uduua ngaa me ngahy ngo tooro. Ngo kwihj wuohdjuoge ge nii maalo wale an thiow cahng ngo wale caang ngo kwihya. Juog Wura e keede e nuu ungahy cahng ngo. 33 Koaru rogu, wu keá neno bang gihn kwihyu cahng ngo ubeehn weehne. 34 Ngo uneehn ngaa maa aci ne weel ka me baahr uwiie baahng giihe piny e tiihj apaahnge yihr gen cang. Noono maa arobe ngo yihr ngad koar dhe wod kejea ngo keá neno, koare paajo.