4
Jeacuu Atum Atiihb Ukeehge
(Mak 1:12, 13; Luk 4:1-13)
1 Batien kaa acub luogwahy yihr Jeacuu ke Piih Juog kedea kaa akoohb Juoge kea Jeacuu beehda waahde, e Wahy Juog a'aay keehde ne ci yi ukang maa awiie ngo kare keede. Ngo akedhe kare keede beer e ngo tum atiihb ukeehge tumo ke dwaahngo. 2 Jeacuu abeehdo yi ukang ke kar nihn jiehariow ne roang roang e cam be gweele. Gihn nu e abeehn kahje ke ne bango ne cohg. 3 Ge abang kahje Jeacuu e naa abeehn atiihb ukeehge ne tum ngo ke dwaahngo kobe, <<Nea yih beehda Waahd Juog ne cohg, kea log leele giih ni naa amune.>>
4 Maa abeehr Jeacuue ngo yihre kea, <<Bekihde! Wa ngo agweed yi kitaab Juog naa,
<Padh amono cog e ne bodh nyoge keehde
abea gihn boadh nyoge ne cohg
beehda kwaad gihn rob Juoge.> >>
5 Jeacuu acahg atiihb ukeehge ke kaabo ucube ngo alidh Wod Juog gihr Jeruucalem. 6 Maa arube yihre kobe, <<Nea yih Waahd Juog ne cohg kea thoohr rihi piny bang gihn ngo agweed yi kitaab Juog naa,
<Juog wuohdjuog giihe ge uoohre bangi
urihng gene ukoal gene yihn beer mee.
Yih uboam gene uthaang gene yihn kii cing gen
beer mee utoor leele me cwaany tieni.> >>
7 Maa arob Jeacuue ngo yihre kea, <<Gahng! Ka me tuma Juog tooro ne weey weey. Ngo agweed yi kitaab Juog naa,
<Juog ge e naa Juog Ruohdhi ngo keá tum now ke dhieny.> >>
8 Maa acahg atiihb ukeehge ngo ke kaabo ukedhe ngo alidh good me duohng unyoadhe kwaad giih nud upiny cang yihre ke kwaan gen kedea ke kaa awuohb gene kii ngo. Maa arobe ngo yihre kea, 9 <<Awaahn kan, nea congi arungi piny uwuori an ne Juog, e alwaa amahr giih aniidi cang ge cuba cubo yihri kedea unahgi ruohdh wiih ngoom.>>
10 Maa arob Jeacuue ngo yihre kobe, <<Atiihb ukeehg! Kaa coohr rihi oogo buuda! Agweed yi kitaab Juog naa,
<Nahge Juog keede e ne wuor kedea e ne gihre tiihj.> >>
11 Kaano e atiihb ukeehg a'aay kedea uguo wuohnjuoge beehno ne gwiir gihn daahde.
Jeacuu Athubo Ke Puohny Ciig Beer
(Mak 1:14, 15; Luk 4:14, 15)
12 Naa alihng Jeacuue ngo kejea Joon akedh yi thijin e ngo a'aay udoge piny Gaalili. 13 Jeacuu a'aay Naajaread kaa abeede ubeehne ne piih geen Kaparnaam. Kaparnaam beehda geew me ne dieng naam duohng me guge be niid kedea beehda geew me ne wudh pinye giih Jebulun maa Neptaali. 14 E naa kaa abeehn gihn anaa arob Juoge ke leeb agamloohngjuog me nyinge Yicaaya upahdhe kare. Anaa akob Juoge kea,
15 <<Wu yaa Jebulun maa yaa Neptaali
ge beed buud naam duohng
kedea wu yaa buud naam Joohrdoan
maa yaa padh Judea ge beed piny Gaalili,
Ciig Beer ngo ulihngu.
16 Noono e yaa padh Judea gihn maa adiehr ke nying Juog ulihng gene
thiow kedea udoohng gene ne nyoge maa ayiih lum Juog.
Ge udoohng wa nyoge maa anaa yi muudho ke nying lwahy thoo.
Naa ameeny gen e ge ake niido.>>
17 Anahg Kaparnaam e naa athub Jeacuue ke puohny nyoge yea e ge puohnye puohnyo kobe, <<Maan dhaane anyoohne giihe naa atiihye bang gihn kar beehn Juog ne mag nyoge ne joe ngo adoohng cahng.>>
Jo Waahdh Giih Acuohn Jeacuue Umodho
(Mak 1:16-20; Luk 5:1-11)
18 Cahng man e Jeacuu anaa ake caahdho ke dieng naam duohng gihr Gaalili e nyoge ariow ge aniide, dhaano ge kuu umen. Cimoane, me nying tuode Piihter maa Andrya umen. Ge anaa ke mahyo ke rej e booy thoohr gene kii naam duohng bang gihn ge anahg yaa maay. 19 Maa acuohn Jeacuue gen bange ukobe ngo yihr gen kea, <<Beehnu unahgu yaa waahdha. Adaahd udoohngu ne yaa kahl nyoge yihra wa kwaad kaano kahlu rej oogo nu.>> 20 Ke wong kaano e booy giih gen awii gene piny ubuodh gene batiene.
21 Naa abar Jeacuue wong maalo e nyoge ariow mooge ge acahge kaa niido. Nyoge maa wuud meehe thiow, Jeamij waahd Jebeade kedea Joon umen. Ge anaa yi baabuur keehd wur gen e ge tuohj thool giih acoohd. Maa acuohn Jeacuue gen bange. 22 Ke wong kaano, e yaa ni wur ge awiihw gene kedea uwii gene baabuur gihr gen yihr wur gen. Maa abuodh gene batien Jeacuu.
Jeacuu Apuohnyo Kedea Nyoge Athiehdhe Gaalili
(Luk 6:17-19)
23 Kaano arumo, e Jeacuu nu ucaahdho e wen bang yi Gaalili e ngo puohny Ciig Beer yihr nyoge ke bang yihdh wuud amaad giih Judea, kedea e ngo thiehdh nyoge me rog gen anaa kwaad atwaanye me thoohdh. 24 Gihn nu e nyinge awiihj kaano yi piny Ciihrya. Noono uwaahd nyoge bange ne kahl yaa tuu beere ge thiehdhe thiehdho. Nyoge mooge rog gen anaa atwaanye me ledh, e mooge koohm gen anaa atiihb ukeehg. Mooge dahng wudh gen anaa pol e mooge thiow ge nyoge maa adwaany. Amahr yaa nu cang ge athiehdhe. 25 Amahr yaa abeehno ke yoohn Gaalili kedea amahr muu abeehno ke yoohn Geedhe Apaar maa Jeruucalem kedea piny Judea maa amahr muu abeehno ke yoohn miehr loog naam Joohrdoan, alwaa amahr akuud yaa nu cang ge ake caahdho ke batien Jeacuu.