Ícétáŋá 7

Ãdróŋá la ꞌbá ĩꞌdi ãni ãlá ꞌdĩ kí tị ụ̃pị̃ cí

¹ Ị́jọ́ ꞌdã ꞌbã ũngúkú gá, ándre mãlãyíkã sụ tu kí pá wókõ ụ̃nọ́kụ́ ãni sụ ꞌdĩ kí agá. Rụ kí ãlụ́kụ́kụ̃ sụ ụ̃nọ́kụ́ drị̃ gá ꞌdĩ kí, umbé kí kí ãngũ li agá vũ drị̃ gá, ị̃yị́ ãmbógó ꞌdĩ kí agá, jõku ife kí agâ sĩ cí. ² Ándre vâ mãlãyíkã ãzíla angá amụ́lé ị̃tụ́ ꞌbã ãfũ agâlé ru, drị́ la gá ícétáŋá Ãdróŋá ídri rú rĩ drị̂ cí. Umve mãlãyíkã sụ ĩꞌbaní ũkpó fẽjó sĩ vũ kí izajó mĩrĩ be rĩ kí ụ́ꞌdụ́kọ́ ụrụgá sĩ. ³ “Ĩmi iza drĩ vũ kí mĩrĩ abe ãzíla ife kî trũ ku, kpere ãmaní ícétáŋá ĩbĩ agá ꞌbá ãtíꞌbó ru Ãdróŋá ãni ꞌdĩ kí androko gá.” ⁴ Má are dó kãlãfe ꞌbá sĩ ícétáŋá Ãdróŋá drị́ ꞌdã ĩbĩjó kí androko gá cí rĩ ꞌbadrị̂ ĩꞌdi 144,000 ^a angájó sụ́rụ́ mụdrị́ drĩ ị̃rị̃ Ịsịrayị́lị̃ drị̂ kí agá. ^5-8 Sụ́rụ́ ãlu-ãlu agá ꞌbá 12,000: sụ́rụ́ Yụ́dã drị̂, Rụ́bẹ̃nị̃ drị̂, Gádĩ drị̂, Ásẹ̃rị̃ drị̂, Nãfũtálĩ drị̂, Mãnásẽ drị̂, Sị̃mọ́nị̃ drị̂, Lẹ́vị̃ drị̂, Ĩsãkárĩ drị̂, Zãbụ̃lọ́nị̃ drị̂, Yụ̃sụ́fụ̃ drị̂, ãzíla Bénzãmĩnĩ drị̂ agá pírí.

ꞌBá ũꞌbí Ãdróŋá ịcụ́lépi rĩ kî

⁹ Ị́jọ́ ꞌdã ꞌbã ũngúkú gá, ándre áma drị̃lẹ́ gá ꞌdâ ꞌbá ũꞌbí wẽwẽ rú, ꞌbá ãzí ꞌbã icólé lãlé ku, angájó sụ́rụ́ tị ndú-ndú gá, ínátị ndú-ndú gá, ꞌbá, ãzíla ꞌbá tị ndú-ndú jọlépi, ꞌdĩ ꞌbaní pá tu agá bõngó imve trũ úmvúke ãmbõgõ ãni Ãdróŋá drị̂ andre gá, ãzíla Kãbĩlõmvá drị̃lẹ́ gá káci bị́ trũ drị́ gá. ¹⁰ Ngo kí úngó ụ́ꞌdụ́kọ́ ụrụgá sĩ;

“Patáŋá la angá Ãdróŋá ãmadrị́,

rilépi úmvúke drị̃ gá rĩ drị́,

ãzíla Kãbĩlõmvá drị́.”

¹¹ Mãlãyíkã pírí utu kí pá, ce kí úmvúke ãmbõgõ ãrĩ andre ꞌbá ĩyõ, ãzíla ãko ãzí ídri rú sụ ꞌdã kí abe trộkị́lịrị. Tị̃ kí ãja vụ̃rụ́ úmvúke ãmbõgõ ãrĩ drị̃lẹ́ gâ sĩ Ãdróŋá ị̃nzị̃jó, ¹² jọjó la:

“Ámĩnã!

Ãdróŋá ịcụ́ŋá, dị̃zã, ũndũwã,

ãwãꞌdĩfô fẽŋá, ãzíla ũkpõ

ꞌbã adru kí Ãdróŋá ãmadrị́ gá rĩ ni jã ꞌdâ.

Ámĩnã!”

¹³ ꞌBá ĩyõ ãlu zị ma, “ꞌBá bõngó imve trũ ꞌdã kí ãꞌdi kî, ãzíla angá (ãfũ) kí íngõlé?”

¹⁴ Má umvi, “Ãmbógó, ánị̃ kí ku, ínị̃ kí rá la mi ꞌi.”

Ãmbógó jọ, “ꞌDĩ kí ꞌbá angálépi ũcõgõ ãmbógó kí ĩcãndĩjó rĩ kí agâ sĩ rĩ kí. Ũjĩ kí ĩꞌbã bõngó kí Kãbĩlõmvá ꞌbã ãrí sĩ imve rú. ¹⁵ Ị́jọ́ ꞌdĩ sĩ,

“Tu kí pá úmvúke ãmbõgõ ãni Ãdróŋá drị̂ drị̃lẹ́ gá,

ãzíla ri kí ĩꞌdiní ãzị́ ngalé ị̃tụ́ kí ị́nị́ be jó ĩꞌdidrị̂ agá;

ãzíla Ãdróŋá rilépi úmvúke ũpĩ ãni ꞌbụ̃ gâlé ꞌdã ꞌbã drị̃ gá rĩ

la kí drị̃ gá hémã ãsõ nĩ.

¹⁶ Ãbị́rị́ icó kí fụlé ị̃dị́ ku,

ị̃yị́ vị́ icó kí fụlé ị̃dị́ ku.

Ị̃tụ́ icó kí ivélé ku,

ị̃tụ́kã icó vâ kí zãlé ku.

¹⁷ Ãꞌdusĩku Kãbĩlõmvá pá tulépi úmvúke ãmbõgõ ãni rĩ ꞌbã drị̃lẹ́ gá rĩ,

la adru ꞌbá kí tãmbalépi rĩ rú nĩ;

ĩꞌdi kí agụ ị̃yị́ ídri drị́ kídí ru rĩ mvụlé.

Ãzíla Ãdróŋá la mị́ndrẹ kí mịfị́ gá rĩ kí ịnị́ nĩ.”