1 Tị̃mị̃tị́yọ̃ 3

ꞌBá kãnị́sã drị̃lẹ́ ru ꞌdĩ kí

¹ Ị́jọ́ jọlé ꞌdĩ ĩꞌdi ị́jọ́ mgbã la, ꞌbá drĩ ru ásị́ ꞌbã adrujó kãnị́sã ꞌbã drị̃lẹ́ ru, ĩꞌdi ãzị́ ãrútáŋá ru ũnĩ-ambamba la. ² ꞌBá kãnị́sã ꞌbã drị̃lẹ́ ru rĩ ꞌbã adru ị́jộ kóru, ị́jọ́ ꞌbã ndẽlé ku, ũkú trũ ãlu, ásị́ ị̃gbẹ́, ru tãmbalépi, ũndũwã rú, ꞌbá ꞌbaní rụlé rũrũ la. ꞌBa aꞌị́ vâ ãmụ́ kí ĩꞌdidrị́kogá ãyĩkõ sĩ ãzíla ꞌba imbá vâ ꞌbá kí ĩndĩ. ³ ꞌBã ĩmẽrã íwá sĩ ku, ꞌbã co ãcóŋá ku, ꞌbá adru ũmbã kóru. ꞌBã adru ꞌbá ásị́ ị̃gbẹ́ la, ꞌbá ũmbã lẽlépi ku la, vâ ꞌbá séndẽ lẽlépi ambamba ku la. ⁴ ꞌBã adru ꞌbá lị́cọ́ ĩꞌdidrị̂ drị̃ celépi múké la, anzị ꞌbã kí tị arelé vâ rụlé rũrũ la. ⁵ ꞌBá drĩ dó nị̃ lị́cọ́ ĩꞌdidrị̂ drị̃ ce sĩ ku, ĩꞌdi dó kãnị́sã Ãdróŋá drị̂ tãmba íngoní ru?

⁶ ꞌBá drị̃lẹ́ ru rĩ ꞌbã adru ꞌbá ãꞌị̃táŋá agá úꞌdí la ku, ãꞌdusĩku ĩꞌdi mụ acálé ãfó ru ĩꞌdi pẽjó drị̃lẹ́ ru mbẽlẽ rĩ sĩ, ãzíla ĩꞌdi aꞌdé ị́jọ́ lịŋá drị̃ gá cécé Sĩtánĩ drị̂ áni. ⁷ ꞌBã adru ꞌbá ꞌbá ãꞌị̃táŋá agá ku rĩ ꞌbã kí ị́jọ́ jọjó drị̃ la gá múké íni la, ꞌba aꞌdé rú sĩ ímbá Sĩtánĩ drị̂ agâ sĩ ĩꞌdiní drị̃nzá ịsụ́jó ku.

⁸ Gẹ̃rị̃ ãlu ꞌdĩ sĩ, dị́kọ̃nị̃ ꞌbã adru ꞌbá rulé rũrũ ãzíla ꞌbá ị́jọ́ kpị jọlépi la. ꞌBã adru kí ꞌbá ĩmẽrãlépi íwá sĩ ku, ãzíla rọ̃mgbọ́ ru séndẽ sĩ ku la. ⁹ ꞌBã adru kí ꞌbá ásị́ ꞌbãlépi ị́jọ́ ãꞌị̃táŋá ãni iꞌdalé ĩꞌbaní rĩ tãmbalépi ásị́sị́ŋá ãlá sĩ rĩ rú. ¹⁰ ꞌBã adru kí ꞌbá ụ̃ꞌbị̃lé icólépi rá ị́jộ kóru la kî. ꞌBá ãzí drĩ ị́jọ́ ají kí ụrụꞌbá gá ũnzí ku, icó kí dó ãzị́ drị̃lẹ́ drị̂ ngalé rá.

¹¹ Ũkú drị̃lẹ́ ru rĩ ꞌbã adru kí ꞌbá ãrútáŋâ trũ la, ꞌbã ndro kí ꞌbá ãzí kí, kí rụ́ jọjó ũnzí ku. ꞌBã adru kí ꞌbá ru tãmbalépi ãꞌị̃táŋá sĩ ị́jọ́ pírí ĩꞌbaní idélé rĩ kí agá la.

¹² ꞌBá drị̃lẹ́ ru kãnị́sã ãzã kolépi rĩ ꞌbã adru ũkú trũ ãlu, ãzíla ꞌbã ce ꞌbá ĩꞌdidrị́kogá rĩ kí drị̃ anzị ĩꞌdidrị̂ kí abe múké-múké. ¹³ Wó ꞌbá ãzị́ ãzã kolépi drị̃lẹ́ ru múké rĩ ála ĩꞌdi ũfẽ ị̃nzị̃táŋá sĩ, ãzíla ásị́ ꞌbãŋá ĩꞌdidrị́ ãꞌị̃táŋá Kúrísĩtõ Yẹ́sụ̃ drị̃ gá rĩ la zozõ.

Ị́jọ́ ífí mgbã ãꞌị̃táŋá ãmadrị̂ drị́ rĩ

¹⁴ Ásĩ ị́jọ́ ꞌdĩ kí míní úꞌdîꞌda íni la táni mání ásị́ ꞌbã agá cajó mí rụ̂lé mbẽlẽ rú tí, ¹⁵ ádrĩ sĩ ĩcẽ were rú rá, mi sĩ ị́jọ́ ꞌbá (ãꞌị̃táŋá agá rĩ) kí uꞌá jó Ãdróŋá drị̂ agá gbíyã íngõ sĩ yã rĩ nị̃ cé. Kãnị́sã ꞌdĩ Ãdróŋá ídri rĩ drị́ gá rĩ, ĩꞌdi ị́dị́ŋá ágófe rú ị́jọ́ mgbã rĩ ꞌbã sĩ pa tujó rĩ ꞌi.

¹⁶ ꞌBá ãzí icó ãgátã galé ị́jọ́ zị̃lé zị̃-zị̃ ãmbógó ꞌdĩ sĩ ku,

Yẹ́sụ̃ iꞌdá ándrá ụrụꞌbá gá rá,

îꞌda ĩꞌdi ꞌbá ãlá ru la Úríndí sĩ,

mãlãyíkã ndre kí vâ ĩꞌdi rá.

Úlũ vâ ị́jọ́ ĩꞌdidrị̂ mgbọ rú sụ́rụ́ pírí ꞌbaní rá,

ꞌbá ãꞌị̃ kí ị́jọ́ ĩꞌdidrị̂ ãngũ drị̃ gá ꞌdâ rá,

úꞌdụ dó ĩꞌdi ũpĩ nalé Ãdróŋá be ꞌbụ̃ gá.