Íꞌdóŋá 5

Drị̃lẹ́ Ádãmũ drị̂ kî

¹ ꞌDĩ ãwí Ádãmũ drị́ gá sĩlé bụ́kụ̃ agá drị̃lẹ́ ĩꞌdidrị̂ abe rĩ. Ãdróŋá la mụ ꞌbá ꞌbãlé ꞌbo, ꞌbã ĩꞌdi gbíyã ĩꞌdidrị́ gá rĩ sĩ. ² ꞌBã ágọ́bị́ kí ũkú be, wi sụ̃sụ́ ĩꞌbanî. ꞌDa dó ĩꞌbaní rụ́ umve kí ‘ꞌBá.’ ³ Ádãmũ la mụ calé ílí túrú ãlu kãlị́ na ꞌbo, tị ngọ́tị́ ágọ́bị́ gbíyã ĩꞌdidrị̂ sĩ ꞌda rụ́ la Sétĩ ꞌi. ⁴ Ála mụ Sétĩ tịlé ꞌbo, Ádãmũ uꞌá ílí túrú ãrõ ꞌdĩ agá ꞌdâ tị anzị ãgọbị kí izonzi abe. ⁵ Ádãmũ uꞌá ãngũ drị̃ gá ꞌdâ ídrirú pírí rĩ gá ílí túrú úrômĩ kãlị́ na, drã dó ĩndõ. ⁶ Sétĩ la mụ calé ílí túrú ãlu drị̃ la tõwú tị dó Ínõsĩ ꞌi. ⁷ Ínõsĩ átẹ́pị uꞌá dó ílí túrú ãrõ drị̃ la ázị̂rị̃, tị dó anzị ãgọbị kí izonzi abe. ⁸ Sétĩ uꞌá ãngũ drị̃ gá ídrirú pírí rĩ gá ílí túrú úrômĩ mụdrị́ drị̃ la ị̃rị̃ drã dó ĩndõ.

⁹ Ínõsĩ la mụ calé ílí kãlị́ úrômĩ tị Kénãnĩ ꞌi. ¹⁰ Kénãnĩ átẹ́pị Ínõsĩ uꞌá ílí túrú ãrõ mụdrị́ drị̃ la tõwú tị dó anzị ãgọbị kí izonzi abe. ¹¹ Ínõsĩ uꞌá ãngũ drị̃ gá ídrirú rĩ gá ílí túrú úrômĩ drị̃ la tõwú drã dó ĩndõ. ¹² Kénãnĩ la mụ calé ílí kãlị́ ázị̂rị̃ tị Mãhãlãlélĩ ꞌi. ¹³ Mãhãlãlélĩ átẹ́pị Kénãnĩ uꞌá ílí túrú ãrõ kãlị́ sụ, tị anzị ãgọbị kí izonzi abe. ¹⁴ Kénãnĩ uꞌá ãngũ drị̃ gá ídrirú rĩ gá ílí túrú úrômĩ drị̃ la mụdrị́ drã dó ĩndõ. ¹⁵ Mãhãlãlélĩ la mụ calé ílí kãlị́ ázíyá drị̃ tõwú tị Yãrẹ́dị̃ ꞌi, ¹⁶ Mãhãlãlélĩ uꞌá ílí túrú ãrõ kãlị́ na tị anzị ãgọbị kí izonzi kí abe, ¹⁷ Mãhãlãlélĩ uꞌá ãngũ drị̃ gá ídrirú ílí túrú ãrõ kãlị́ úrômĩ drị̃ tõwú drã dó ĩndõ. ¹⁸ Yãrẹ́dị̃ la mụ calé ílí túrú ãlu kãlị́ ázíyá drị̃ ị̃rị̃ ꞌbo, tị Ínõkã ꞌi. ¹⁹ Yãrẹ́dị̃ uꞌá ílí túrú ãrõ tị anzị kí izonzi abe.

²⁰ Yãrẹ́dị̃ uꞌá ãngũ drị̃ gá ídrirú ílí túrú úrômĩ kãlị́ ázíyá drị̃ ị̃rị̃ drã dó ĩndõ. ²¹ Ínõkã la mụ calé ílí kãlị́ ázíyá drị̃ tõwú ꞌbo tị Mẽtũsélã ꞌi. ²² Mẽtũsélã átẹ́pị Ínõkã icíru Ãdróŋá be ãrútáŋá sĩ ílí túrú na, tị anzị ãgọbị kí izonzi abe. ²³ Ínõkã uꞌá ílí túrú na kãlị́ ázíyá drị̃ tõwú. ²⁴ Ínõkã icíru Ãdróŋá be ị́jọ́ ꞌdĩ sĩ, Ãdróŋá ꞌdụ dó ĩꞌdi ídrirú ꞌbụ̃ gâlé ãvĩ rá indré dó ị̃dị́ ku. ²⁵ Mẽtũsélã la mụ calé ílí trũ túrú ãlu kãlị́ ãrõ drị̃ ázíyá tị Lãmékĩ ꞌi. ²⁶ Lãmékĩ átẹ́pị Mẽtũsélã uꞌá ílí túrú ázị̂rị̃ kãlị́ ãrõ drị̃ ị̃rị̃, tị ãgọbị anzị kí izonzi abe. ²⁷ Mẽtũsélã uꞌá ãngũ drị̃ gá ídrirú ílí túrú úrômĩ kãlị́ ázíyá drị̃ úrômĩ drã dó ĩndõ.

²⁸ Lãmékĩ la mụ calé ílí túrú ãlu kãlị́ ãrõ drị̃ ị̃rị̃ tị ngọ́tị́. ²⁹ ꞌDa rụ́ la Núwã ꞌi ífí la ĩꞌdirú ãma ásị́ ũmĩ ãzị́ ngalé ũkpó sĩ ụ̃nọ́kụ́ Ãdróŋâ ꞌbã wãlé rá ꞌdĩ drị̃ gá ꞌdâ. Núwã átẹ́pị ³⁰ Lãmékĩ uꞌá ídrirú ílí túrú tõwú kãlị́ úrômĩ drị̃ la tõwú tị anzị ãgọbị kí izonzi abe. ³¹ Lãmékĩ uꞌá ídrirú ílí túrú ázị̂rị̃ kãlị́ ázị̂rị̃ drị̃ ázị̂rị̃. ³² Núwã ílí la mụ calé túrú tõwú tị ãgọbị anzị kí na Sẹ̃mị̃ ꞌi, Hámũ ꞌi ãzíla Yáfẽtĩ ꞌi.