𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼂𖽺𖾐 𖼂𖽚𖾐
34
1 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼖𖽚𖾐 𖼀𖽑𖽡 𖽃𖽙𖾑 𖼄𖽺 𖼞𖽑𖽶𖾑 𖼖𖽙𖾐 𖼺𖽡𖾑 𖼐𖽑𖽡 𖼀𖽑𖽡 𖼊𖽝 𖼖𖽡𖾐，𖼐𖽑𖽡𖾐 𖼷𖽴𖾐 𖼮𖽑𖽡𖽦 𖼦𖽑𖽙𖾐 𖼺𖽪𖾐 𖼖𖽚𖾐 𖼀𖽑𖽡 𖼊𖽑𖽺 𖼺𖽪𖾑 𖼄𖽙𖾐，𖼞𖽑𖽶𖾑 𖼣𖽙𖾐 𖼹𖽦𖾑 𖼈𖽝 𖼖𖽚𖾐 𖼀𖽑𖽡 𖼦𖽑𖽺𖾑 𖼐𖽑𖽡 𖼀𖽑𖽡 𖼊𖽑𖽺 𖼍𖽦𖾐 𖼊𖽻𖾐． 2 𖼐𖽑𖽡𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼺𖽺𖾑，𖽃𖽔𖾑 𖼞𖽶𖾐 𖼐𖽑𖽡𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼖𖽻𖾐，𖽂𖽙 𖼰𖽡𖽺𖾐 𖼈𖽪𖾑 𖼖𖽚𖾐 𖼞𖽳𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚． 3 𖼊𖽑𖽡 𖼽𖽚𖾐 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼊𖽦𖾐 𖼖𖽻𖾐 𖼄𖽔 𖼊𖽙𖾐，𖽂𖽙 𖼰𖽡𖽺𖾐 𖼊𖽑𖽡 𖼰𖽡𖽺𖾐 𖼐𖽺𖾐 𖼷𖽑𖽻𖾐 𖽂𖽙𖾐 𖼮𖽻𖾐 𖼄𖽔 𖼊𖽙𖾐，𖽂𖽙 𖼰𖽡𖽺𖾐 𖼮𖽑𖽡𖾐 𖼞𖽑𖽶𖾐 𖼖𖽺𖾑 𖼮𖽡𖽺 𖽂𖽙𖾐 𖼖𖽚𖾑 𖼄𖽔 𖼊𖽙𖾐． ”4 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼺𖽪𖾐 𖼖𖽚𖾐 𖼀𖽑𖽡 𖼐𖽑𖽡 𖼀𖽑𖽡 𖼊𖽝 𖼀𖽑𖽢，𖼄𖽶 𖼊𖽑𖽡 𖼍𖽪𖾐 𖼖𖽻𖾐，𖼽𖽻 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽦𖾐 𖼽𖽡𖾐，𖼖𖽦 𖼀𖽑𖽦𖾐 𖼞𖽑𖽶𖾐 𖼖𖽚𖾐 𖼀𖽑𖽡 𖼈𖽺𖾐 𖼍𖽳𖾐．
5 𖼽𖽺𖾐 𖼦𖽴 𖼦𖽫 𖼍𖽡𖾐 𖼮𖽑𖽙𖾐 𖼖𖽙𖾐 𖼮𖽑𖽻𖾐 𖼹𖽺𖾐 𖼖𖽻𖾐，𖼄𖽚 𖼳𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽶𖾑 𖼠𖽻𖾐 𖼦𖽑𖽡𖽚，𖼦𖽑𖽔𖾐 𖼖𖽺𖾑 𖼀𖽦𖾐 𖼊𖽑𖽧 𖼽𖽻 𖼄𖽡𖾐 𖼽𖽺𖾐 𖼦𖽴 𖼦𖽫 𖼣𖽻𖾐． 6 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖽃𖽙𖾑 𖼄𖽺 𖼠𖽚 𖼽𖽡𖾐 ，𖼀𖽦𖾐：
“𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐! 𖼣𖽙𖾐 𖼽𖽺𖾐 𖼦𖽴 𖼦𖽫 𖼣𖽻𖾐!
𖼣𖽙𖾐 𖼦𖽑𖽺𖾑 𖼐𖽑𖽧𖾐 𖼮𖽡𖽻𖾐 𖼮𖽻𖾐，𖼮𖽡 𖼽𖽡𖾑 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，
𖼖𖽳𖾐 𖼮𖽡𖽺 𖼀𖽶 𖼻𖽶 𖼄𖽔 𖼠𖽸𖾑，
𖼣𖽙𖾐 𖼦𖽑𖽔𖾐 𖼖𖽺𖾑 𖼐𖽙𖾑 𖼣𖽜 𖼀𖽻𖾐 𖼀𖽡𖾐 𖼄𖽙𖾐 𖼮𖽻𖾐，𖼣𖽙𖾐 𖼊𖽑𖽺 𖼣𖽜𖾐 𖼻𖽺𖾐 𖼊𖽙𖾐 𖼺𖽪𖾐 𖼣𖽻𖾐，
7 𖼣𖽙𖾐 𖼍𖽪𖾐 𖼄𖽺 𖼷𖽑𖽻𖾐 𖼊𖽑𖽺 𖼐𖽙𖾑 𖼣𖽜 𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐，
𖼽𖽻 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑、 𖼦𖽑𖽙 𖼊𖽪 𖼐𖽺𖾐 𖼊𖽶𖾐 𖼮𖽑𖽪 𖼊𖽑𖽺 𖼄𖽡𖽺 𖼦𖽑𖽙𖾐 𖼊𖽻𖾐．
𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼀𖽳𖾐 𖼈𖽡𖾐 𖼮𖽻𖾐，𖼺𖽡 𖼮𖽡𖾐 𖼖𖽺𖾑 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．
𖽃𖽔𖾐 𖼺𖽺𖾑，𖼣𖽙𖾐 𖼽𖽻 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖽃𖽔 𖼀𖽙 𖼞𖽳𖾐 𖼮𖽑𖽻𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼺𖽙𖾐 𖼖𖽡𖾐 𖼹𖽦𖾐 𖼖𖽙𖾐 𖼮𖽑𖽡𖾐，
𖼽𖽻 𖼈𖽳𖾐 𖼊𖽑𖽺 𖽂𖽙 𖼇𖽕 𖼳𖽶 𖼊𖽻𖾐． ”
8 𖼄𖽚 𖼳𖽡𖾐 𖼐𖽕 𖼊𖽺𖾐 𖼂𖽴𖾐 𖼄𖽡𖾑 𖼐𖽦𖾐 𖼀𖽙 𖼹𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽑𖽴， 9 𖼀𖽦𖾐：“𖼺𖽡 𖼀𖽑𖽙 𖽃𖽔𖾐! 𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼺𖽜 𖼽𖽡𖾐 𖼞𖽜! 𖼷𖽑𖽻𖾐 𖼀𖽺 𖼦𖽑𖽺𖾑 𖼐𖽑𖽧𖾐 𖼠𖽴𖾐 𖼖𖽺𖾐 𖼈𖽳𖾑 𖼺𖽪𖾐 𖼣𖽻𖾐 𖼊𖽑𖽻𖾐． 𖼣𖽙𖾐 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼐𖽺𖾐 𖼊𖽶𖾐 𖼮𖽑𖽪 𖼊𖽑𖽺 𖼄𖽡𖽺 𖼦𖽑𖽙𖾐 𖼞𖽜! 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼞𖽜 𖼐𖽑𖽡𖾐 𖼞𖽳𖾐 𖼄𖽡𖾐 𖼳𖽡𖽪 𖼂𖽺𖾐 𖼞𖽜． ”
𖼄𖽳𖾐 𖼷𖽑𖽦𖾐 𖼂𖽚𖾐 (𖼂𖽚𖾐 7： 1-5，16： 1-17；𖼊𖽚𖾐 23： 14-19)
10 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽦𖾐 𖼄𖽺! 𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼣𖽙𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼣𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼞𖽑𖽙 𖼣𖽝 𖼄𖽡𖽻 𖼂𖽺𖾐 𖼊𖽻𖾐，𖼞𖽑𖽶𖾑 𖼄𖽶 𖼊𖽑𖽡 𖼊𖽺𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼠𖽻𖾐 𖼞𖽑𖽶𖾐 𖼂𖽺𖾐 𖼄𖽔 𖼠𖽚 𖼺𖽪𖾐 𖼄𖽡𖽻 𖼣𖽻𖾐，𖼐𖽑𖽡𖾐 𖼞𖽕 𖼞𖽕 𖼰𖽡𖽺𖾐 𖼰𖽡𖽺𖾐 𖼞𖽳𖾐 𖼍𖽪𖾐 𖼄𖽺 𖼷𖽑𖽻𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼦𖽑𖽺𖾑 𖼮𖽡𖽮𖾐 𖼷𖽑𖽚 𖼊𖽪𖾐 𖼣𖽻𖾐． 11 𖼣𖽙𖾐 𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐，𖼐𖽑𖽡𖾐 𖼹𖽳𖾐 𖼄𖽙𖾐 𖼳𖽪𖾐 𖼖𖽡𖾐． 𖼐𖽦𖾐 𖼄𖽺! 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐、 𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐 𖼊𖽻𖾐．
12 𖼐𖽑𖽡𖾐 𖼷𖽜𖾐 𖼍𖽳𖾐 𖼖𖽡𖾐，𖼐𖽑𖽡𖾐 𖼞𖽑𖽙𖾐 𖼽𖽡𖾐 𖼊𖽻𖾐 𖼞𖽳𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖽂𖽙𖾐 𖼄𖽳𖾐 𖼷𖽑𖽦𖾐 𖼄𖽔 𖼊𖽙𖾐，𖽃𖽔𖾑 𖼽𖽪𖾐 𖼽𖽻 𖼈𖽳𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼈𖽪𖾐 𖼂𖽝𖾐 𖼀𖽑𖽢 𖼠𖽸𖾑． 13 𖼐𖽑𖽡𖾐 𖼽𖽻 𖼈𖽳𖾐 𖼞𖽳𖾐 𖼍𖽡𖾐 𖼷𖽻𖾐 𖼣𖽢𖾑 𖼦𖽑𖽙𖾐 𖼖𖽡𖾐，𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼊𖽴 𖼺𖽪𖾐 𖼠𖽻𖾐 𖼻𖽶𖾐 𖼊𖽝 𖼮𖽑𖽡𖽦 𖼦𖽑𖽙𖾐 𖼖𖽡𖾐，𖼽𖽻 𖼈𖽳𖾐 𖼞𖽳𖾐 𖼽𖽕𖾑 𖼳𖽴𖾑 𖼖𖽔𖾐 \fr 34．13 \ft “𖼽𖽕𖾑 𖼳𖽴𖾑 𖼖𖽔𖾐” 𖼦𖽑𖽺𖾑 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼄𖽳 𖼺𖽡𖾐 𖼮𖽑𖽡𖽻𖾐 𖼣𖽻𖾐． 𖼺𖽡𖾐 𖼮𖽑𖽡𖽻𖾐 𖼊𖽑𖽝 𖼦𖽑𖽙𖾐 𖼖𖽡𖾐． 14 𖼐𖽑𖽡𖾐 𖼠𖽳𖾐 𖼖𖽪𖾐 𖼺𖽡𖾐 𖽂𖽙𖾐 𖼊𖽑𖽴 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼊𖽶𖾐 𖼮𖽑𖽪 𖼊𖽑𖽺 𖼐𖽑𖽧𖾐 𖼷𖽚𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼽𖽻 𖼄𖽡𖾐 “𖼊𖽶𖾐 𖼮𖽑𖽪 𖼊𖽑𖽺 𖼐𖽑𖽧𖾐 𖼷𖽚𖾐 ” 𖼐𖽺𖾐 𖼄𖽡𖾐．
15 𖼐𖽑𖽡𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼀𖽺 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼖𖽙𖾐 𖼮𖽑𖽻𖾐 𖼊𖽑𖽙𖾑 𖼄𖽡𖽻 𖼂𖽺𖾐，𖼽𖽻 𖼈𖽳𖾐 𖼺𖽡𖾐 𖼊𖽑𖽺 𖼍𖽡𖾐 𖼮𖽡𖽺𖾐 𖼂𖽺𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼐𖽑𖽡𖾐 𖼊𖽑𖽺 𖽃𖽶𖾐 𖼺𖽪𖾐 𖼮𖽻𖾐 𖼺𖽺𖾑，𖼐𖽑𖽡𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼍𖽡𖾐 𖼦𖽙 𖼷𖽙 𖼊𖽻𖾐． 16 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼻𖽙 𖼖𖽙𖾐 𖼀𖽙𖾐 𖼽𖽻 𖼈𖽳𖾐 𖼞𖽳𖾐 𖼻𖽙 𖼄𖽳 𖼊𖽑𖽺 𖼹𖽶𖾐 𖼺𖽺𖾑，𖼽𖽻 𖼈𖽳𖾐 𖼞𖽳𖾐 𖼻𖽙 𖼄𖽳 𖼊𖽑𖽙𖾑 𖼄𖽡𖽻 𖼂𖽺𖾐 \fr 34．16 \ft 𖼞𖽪𖾐 𖼮𖽡𖽺𖾐 𖼞𖽑𖽶𖾑 𖼮𖽶𖾐 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼊𖽑𖽺 𖼊𖽑𖽴 𖼞𖽑𖽶𖾑 𖼮𖽶𖾐，𖼀𖽸𖾐 𖼦𖽑𖽺𖾐 𖼞𖽑𖽶𖾐 𖼊𖽑𖽙𖾑 𖼄𖽡𖽻 𖼂𖽺𖾐． 𖼖𖽙𖾐 𖼺𖽶𖾑，𖼞𖽑𖽙𖾐 𖼣𖽻𖾐 𖼳𖽶 𖼺𖽡𖾐 𖼊𖽑𖽺 𖼊𖽑𖽴 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼞𖽳𖾐 𖼻𖽙 𖼖𖽺𖾑 𖼊𖽑𖽙𖾑 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼄𖽳 𖼖𖽙𖾐 𖼺𖽶𖾑，𖼽𖽡𖾐 𖼽𖽻 𖼈𖽳𖾐 𖼞𖽳𖾐 𖼞𖽑𖽙𖾐 𖼣𖽻𖾐 𖼳𖽶 𖼺𖽡𖾐 𖼊𖽑𖽺 𖼊𖽑𖽴 𖼊𖽻𖾐． 17 𖼐𖽑𖽡𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼺𖽡𖾐 𖼮𖽑𖽡𖽻𖾐 𖼹𖽸𖾑 𖼄𖽔 𖼊𖽙𖾐．
18 𖼐𖽑𖽡𖾐 𖼇𖽝𖾐 𖼄𖽶𖾐 𖼷𖽜𖾐 𖼐𖽑𖽡𖾐 𖼦𖽑𖽦 𖼳𖽪𖾐 𖼖𖽡𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐，𖼞𖽑𖽚 𖼳𖽸 𖼳𖽨𖾐 𖼞𖽑𖽙𖾐 𖼍𖽧𖾑 𖼞𖽳𖾐 𖼐𖽑𖽡𖾐 𖼦𖽑𖽦 𖼞𖽑𖽶𖾐，𖼇𖽝𖾐 𖼄𖽔 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼳𖽶 𖼐𖽑𖽡𖾐 𖼷𖽙 𖼖𖽡𖾐，𖼞𖽪𖾐 𖼮𖽡𖽺𖾐 𖼞𖽑𖽚 𖼳𖽸 𖼳𖽨𖾐 𖼐𖽑𖽡𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼳𖽶 𖼣𖽻𖾐．
19 𖼮𖽑𖽡 𖼈𖽪𖾑 𖼻𖽙 𖼞𖽑𖽶𖾑 𖼣𖽙𖾐 𖼞𖽳𖾐 𖼣𖽻𖾐，𖼐𖽑𖽡 𖼣𖽻𖾐 𖼦𖽻，𖽃𖽔𖾑 𖼮𖽑𖽸 𖼽𖽻𖾐 𖼣𖽻𖾐 𖼦𖽻，𖽂𖽙 𖼊𖽺𖾐 𖼦𖽳 𖼺𖽪𖾐 𖼮𖽡𖽺 𖼂𖽙𖾑，𖼄𖽳𖾑 𖼄𖽳 𖼣𖽙𖾐 𖼷𖽺𖾐 𖼣𖽻𖾐． 20 𖽂𖽙 𖼊𖽺𖾐 𖼦𖽳 𖼺𖽪𖾐 𖼊𖽑𖽳 𖼖𖽳𖾐 𖼄𖽪 𖼊𖽑𖽺 𖼽𖽻𖾐 𖼻𖽙 𖼻𖽜 𖼈𖽳 𖼞𖽑𖽚 𖼖𖽡𖾐，𖼄𖽔 𖼈𖽳 𖼞𖽑𖽚 𖼊𖽑𖽡𖾑 𖼣𖽻𖾐，𖼊𖽑𖽳 𖼖𖽳𖾐 𖼄𖽪 𖼖𖽺𖾐 𖼹𖽧𖾑 𖼊𖽝 𖼳𖽡𖽪 𖼖𖽡𖾐，𖼐𖽑𖽡𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼮𖽑𖽡 𖼈𖽪𖾑 𖼻𖽙 𖼖𖽺𖾑 𖼈𖽳 𖼞𖽑𖽚 𖼖𖽡𖾐，𖼷𖽑𖽻𖾐 𖼣𖽙𖾐 𖼊𖽑𖽺 𖼄𖽡𖽻𖾐 𖼖𖽻𖾐 𖼖𖽦 𖼞𖽻 𖼄𖽔 𖼊𖽙𖾐．
21 𖼐𖽑𖽡𖾐 𖼮𖽑𖽡𖽚 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼄𖽡𖽻 𖼄𖽪𖾐，𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼳𖽡𖽻𖾐 𖼖𖽡𖾐，𖼹𖽚 𖼳𖽶𖾑 𖼠𖽜𖾐 𖼷𖽑𖽳 𖼰𖽶𖾐 𖼣𖽻𖾐 𖼀𖽦𖾐 𖼖𖽺𖾑 𖼳𖽡𖽻𖾐 𖼖𖽡𖾐．
22 𖼳𖽙𖾐 𖼻𖽪𖾐 𖼠𖽜𖾐 𖼊𖽙𖾐 𖼞𖽑𖽶𖾑 𖼮𖽶𖾐，“𖼳𖽶 𖼊𖽝𖾐 𖼳𖽶 𖼻𖽦 𖼐𖽑𖽡𖾐 ” \fr 34．22 \ft “𖼳𖽶 𖼊𖽝𖾐 𖼳𖽶 𖼻𖽦 𖼐𖽑𖽡𖾐 ” 𖼦𖽑𖽺𖾑 𖼳𖽶 𖼖𖽡 𖼂𖽦𖾑 𖼠𖽚 𖼦𖽑𖽻𖾐 𖼞𖽳𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖼣𖽻𖾐，“𖼠𖽜𖾐 𖼷𖽑𖽳 𖼻𖽦 𖼐𖽑𖽡𖾐 ” 𖼐𖽺𖾐 “𖼣𖽙 𖼷𖽑𖽡𖾐 𖼻𖽦 𖼐𖽑𖽡𖾐 ” 𖼞𖽑𖽶𖾑 𖼖𖽺𖾑 𖼦𖽑𖽺𖾑 𖼣𖽻𖾐． 𖼳𖽪𖾐 𖼖𖽡𖾐；𖼞𖽑𖽚 𖼞𖽶𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，“𖼰𖽳𖾐 𖼍𖽙𖾑 𖼻𖽦 𖼐𖽑𖽡𖾐 ” 𖼳𖽪𖾐 𖼖𖽡𖾐． 23 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼐𖽜𖾐 𖼞𖽑𖽙𖾐 𖼣𖽻𖾐，𖼊𖽑𖽡 𖼞𖽑𖽚 𖼺𖽙𖾐 𖼂𖽦𖾑，𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖼊𖽑𖽺 𖼄𖽡𖽻𖾐 𖼖𖽡𖾐． 24 𖼣𖽙𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼊𖽑𖽺 𖼞𖽕 𖼊𖽑𖽧 𖼽𖽡𖾐，𖼐𖽑𖽡𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽴𖾐 𖼈𖽳 𖼊𖽻𖾐． 𖼐𖽑𖽡𖾐 𖼊𖽑𖽡 𖼞𖽑𖽚 𖼺𖽙𖾐 𖼂𖽦𖾑 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐，𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼄𖽡𖽻𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼐𖽑𖽡𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼊𖽑𖽺 𖼦𖽑𖽻𖾑 𖼺𖽺𖾑 𖼖𖽻𖾐 𖼐𖽻𖾑 𖼮𖽴𖾐 𖼺𖽪𖾐 𖼄𖽔 𖼮𖽻𖾐 𖼊𖽻𖾐．
25 𖼐𖽑𖽡𖾐 𖼇𖽝𖾐 𖼠𖽚 𖼺𖽪𖾐 𖽃𖽔𖾑 𖼂𖽻𖾐 𖼻𖽜 𖼍𖽡𖾐 𖼮𖽡𖽺 𖼞𖽳𖾐 𖼺𖽶 𖼖𖽙𖾐 𖼮𖽑𖽻𖾐 𖽂𖽙𖾐 𖼍𖽡𖾐 𖼄𖽔 𖼊𖽙𖾐，𖼖𖽻𖾑 𖼠𖽚 𖼽𖽡𖾐 𖼻𖽦 𖼐𖽑𖽡𖾐 𖼞𖽳𖾐 𖼍𖽡𖾐 𖼦𖽙 𖼖𖽺𖾑 𖼹𖽺𖾐 𖼠𖽙𖾑 𖼍𖽻𖾐 𖼊𖽑𖽡 𖼐𖽜𖾐 𖽂𖽙𖾐 𖼮𖽑𖽡𖾐 𖼄𖽔 𖼊𖽙𖾐．
26 𖼐𖽑𖽡𖾐 𖼄𖽡𖾐 𖼠𖽻𖾐 𖽃𖽙𖾑 𖼄𖽺 𖼄𖽡𖾐 𖼺𖽪𖾐 𖼖𖽚𖾑 𖼄𖽚 𖼦𖽑𖽙𖾐 𖼺𖽺𖾑，𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽑𖽶𖾐 𖼰𖽡𖽺𖾐 𖼖𖽡𖾐．
𖽃𖽔𖾑 𖼮𖽑𖽸 𖼄𖽙𖾐 𖼀𖽕𖾑 𖼮𖽸𖾐 𖼈𖽡𖾐 𖼻𖽜 𖽃𖽔𖾑 𖼮𖽑𖽸 𖼻𖽙 𖼦𖽙 𖽂𖽙𖾐 𖼰𖽡𖽦𖾑 𖼄𖽔 𖼊𖽙𖾐．
27 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼐𖽑𖽡𖾐 𖼈𖽝 𖼺𖽪𖾑 𖼊𖽑𖽺 𖼍𖽦𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼐𖽑𖽡𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼳𖽶 𖼣𖽻𖾐．”
28 𖼄𖽚 𖼳𖽡𖾐 𖼞𖽑𖽶𖾑 𖼠𖽻𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽑𖽻𖾐 𖼖𖽡𖾐 𖼷𖽑𖽡𖾐 𖼐𖽑𖽡𖾐 𖼖𖽡𖾐 𖼷𖽑𖽡𖾐 𖼦𖽑𖽦 𖼮𖽻𖾐 𖼦𖽑𖽙𖾐，𖼽𖽻 𖼄𖽔 𖼷𖽙 𖼄𖽔 𖼊𖽻𖾐，𖼽𖽻 𖼄𖽳𖾐 𖼷𖽑𖽦𖾐 𖼊𖽻 𖼂𖽪𖾑 𖼦𖽑𖽺𖾑 𖼈𖽝 𖼖𖽚𖾐 𖼀𖽑𖽡 𖼐𖽑𖽡 𖼀𖽑𖽡 𖼊𖽑𖽺 𖼍𖽴𖾑，𖼦𖽑𖽺𖾑 𖼷𖽑𖽦𖾐 𖼮𖽡𖽺𖾐 𖼷𖽑𖽡𖾐 𖼮𖽨𖾐 𖼣𖽻𖾐．
𖼄𖽚 𖼳𖽡𖾐 𖽂𖽙 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼹𖽺𖾐 𖼖𖽻𖾐
29 𖼄𖽚 𖼳𖽡𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼮𖽑𖽻𖾐 𖼹𖽺𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼐𖽑𖽡𖾐 𖼀𖽑𖽡 𖼈𖽺𖾐 𖼍𖽳𖾐． 𖽂𖽙 𖼺𖽙𖾐 𖼂𖽙𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼠𖽚 𖼺𖽺𖾑，𖼽𖽻 𖼮𖽑𖽻 𖼄𖽦𖾐 𖼀𖽜𖾐 𖼖𖽜𖾐 𖼊𖽚𖾐 𖼊𖽑𖽧 𖼖𖽻𖾐，𖼦𖽑𖽻𖾐 𖼊𖽑𖽻𖾐 𖼽𖽻 𖼄𖽔 𖼺𖽝𖾑． 30 𖼽𖽕𖾑 𖼖𖽪𖽦 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼄𖽚 𖼳𖽡𖾐 𖼮𖽑𖽻 𖼄𖽦𖾐 𖼀𖽜𖾐 𖼖𖽜𖾐 𖼊𖽚𖾐 𖼺𖽺𖾑，𖼽𖽻 𖼖𖽙𖾐 𖼐𖽳 𖼽𖽡𖾐 𖼄𖽔 𖼂𖽡𖾑．
31 𖼄𖽚 𖼳𖽡𖾐 𖼽𖽻 𖼈𖽳𖾐 𖼊𖽑𖽺 𖽃𖽶𖾐 𖼺𖽺𖾑，𖼽𖽕𖾑 𖼖𖽪𖽦 𖼐𖽺𖾐 𖼷𖽑𖽻𖾐 𖼀𖽺 𖼞𖽳𖾐 𖼈𖽪𖾑 𖼷𖽪𖾐 𖼄𖽳𖾑 𖼄𖽳 𖼄𖽚 𖼳𖽡𖾐 𖼞𖽳𖾐 𖼞𖽑𖽻𖾑 𖼖𖽻𖾐，𖼄𖽚 𖼳𖽡𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐． 32 𖼠𖽙𖾑 𖼍𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼞𖽑𖽻𖾑 𖼖𖽻𖾐 𖼺𖽺𖾑，𖼄𖽚 𖼳𖽡𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼊𖽻 𖼂𖽪𖾑，𖼄𖽳𖾑 𖼄𖽳 𖼀𖽦𖾐 𖼽𖽻 𖼈𖽳𖾐 𖼊𖽑𖽺 𖼰𖽨𖾐． 33 𖼄𖽚 𖼳𖽡𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼄𖽳𖾐 𖼮𖽑𖽙𖾐 𖼈𖽺𖾐 𖼽𖽻 𖼮𖽑𖽻 𖼄𖽦𖾐 𖼊𖽑𖽺 𖼀𖽜𖾐 𖼍𖽡． 34 𖼦𖽑𖽻𖾐 𖼊𖽑𖽻𖾐，𖼄𖽚 𖼳𖽡𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼮𖽑𖽻 𖼄𖽦𖾐 𖼀𖽜𖾐 𖼺𖽪𖾐 𖼄𖽳𖾐 𖼮𖽑𖽙𖾐 𖼀𖽑𖽪𖾐 𖼦𖽑𖽙𖾐 𖼺𖽺𖾑，𖼊𖽚𖾐 𖼖𖽻𖾐 𖼰𖽶𖾐 𖼮𖽑𖽡𖾐． 𖼽𖽻 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼺𖽪𖾐 𖼊𖽻 𖼂𖽪𖾑 𖼀𖽦𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾐． 35 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽚 𖼳𖽡𖾐 𖼞𖽳𖾐 𖼮𖽑𖽻 𖼄𖽦𖾐 𖼀𖽜𖾐 𖼖𖽜𖾐 𖼊𖽑𖽺 𖼐𖽦𖾐 𖼄𖽡𖽻𖾐，𖼄𖽚 𖼳𖽡𖾐 𖼹𖽦𖾑 𖼄𖽳𖾐 𖼮𖽑𖽙𖾐 𖼈𖽺𖾐 𖼽𖽻 𖼮𖽑𖽻 𖼄𖽦𖾐 𖼀𖽜𖾐 𖼍𖽡，𖼽𖽻 𖼊𖽡 𖼽𖽡𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐 𖼺𖽺𖾑 𖼀𖽑𖽪𖾐 𖼦𖽑𖽙𖾐．