𖼄𖽚 𖼳𖽡𖾐 𖼽𖽚𖾐
2
1 𖼖𖽡𖾑 𖼈𖽡𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽡 𖼽𖽚𖾐 𖼽𖽡𖾐 𖼽𖽻 𖼄𖽳𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼻𖽙 𖼄𖽳 𖼊𖽑𖽺 𖼹𖽶𖾐 𖼄𖽳 𖼻𖽙 𖼰𖽕𖾐， 2 𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼄𖽺 𖼊𖽦𖾐，𖼻𖽙 𖼊𖽑𖽡 𖼽𖽚𖾐 𖼽𖽚𖾐． 𖼦𖽑𖽔𖾐 𖼮𖽶𖾐 𖼐𖽦𖾐 𖼹𖽳𖾐，𖽃𖽔𖾐 𖼺𖽺𖾑 𖽃𖽔𖾐 𖼞𖽶𖾑 𖼊𖽑𖽺 𖼳𖽨𖾐 𖼀𖽙𖾐 𖼺𖽙𖾐 𖼊𖽝𖾐 𖼰𖽳𖾐 𖼍𖽪𖾐 𖼦𖽑𖽙𖾐． 3 𖼠𖽙𖾑 𖼍𖽻𖾐，𖽃𖽔𖾐 𖼞𖽶𖾑 𖼊𖽑𖽺 𖼰𖽳𖾐 𖼮𖽨𖾐 𖼄𖽔 𖼊𖽙𖾐 𖼺𖽺𖾑，𖼻𖽝𖾐 𖼀𖽧 𖼳𖽶𖾑 𖼷𖽝 𖼺𖽪𖾐 𖼰𖽡𖽻𖾐 𖼖𖽪𖾐 𖼊𖽑𖽡 𖼊𖽝𖾐 𖼈𖽺𖾐 𖼂𖽻𖾐 𖼖𖽻𖾐，𖼖𖽚𖾐 𖼷𖽑𖽳𖾐 𖼈𖽺𖾐 𖼐𖽝 𖼍𖽪𖾐，𖽃𖽔𖾐 𖼞𖽶𖾑 𖼊𖽑𖽺 𖼀𖽑𖽨 𖼰𖽡𖽻𖾐 𖼖𖽪𖾐 𖼞𖽑𖽶𖾐 𖼰𖽡𖽺𖾐，𖼈𖽺𖾐 𖼖𖽻𖾐 𖼮𖽻 𖼦𖽜 𖼞𖽳𖾐 𖼳𖽨𖾐 𖼄𖽸 𖼠𖽶𖾑 𖼖𖽶𖾑 𖼞𖽑𖽶𖾐 𖼍𖽙𖾑． 4 𖽃𖽔𖾐 𖼞𖽶𖾑 𖼽𖽻 𖼷𖽡𖾐 𖼄𖽡𖾐 𖼈𖽡 𖼈𖽡 𖼦𖽑𖽡𖽚 𖼍𖽳𖾐，𖽃𖽔𖾐 𖼞𖽶𖾑 𖼞𖽑𖽶𖾑 𖽃𖽔 𖼊𖽺𖾐 𖼀𖽑𖽢 𖼊𖽻𖾐 𖼐𖽦𖾐．5 𖼞𖽑𖽶𖾑 𖼮𖽶𖾐，𖼇𖽕 𖼖𖽻 𖼞𖽳𖾐 𖼻𖽙 𖼄𖽳 𖼖𖽻𖾐 𖼺𖽺𖾑，𖼖𖽻𖾐 𖼮𖽻 𖼞𖽑𖽶𖾐 𖼞𖽶𖾐 𖼮𖽑𖽶 𖼷𖽑𖽡，𖼽𖽻 𖼮𖽜𖾐 𖼄𖽙𖾐 𖼖𖽻𖾐 𖼮𖽻 𖼦𖽜 𖼮𖽨𖾐 𖼺𖽜，𖼽𖽻 𖼳𖽨𖾐 𖼄𖽸 𖼠𖽶𖾑 𖼖𖽶𖾑 𖼞𖽑𖽶𖾐 𖼰𖽡𖽻𖾐 𖼖𖽪𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽻 𖼮𖽜𖾐 𖼄𖽙𖾐 𖼊𖽑𖽺 𖼹𖽡𖾐 𖼂𖽡𖾐 𖼽𖽡𖾐 𖼰𖽡𖽻𖾐 𖼖𖽪𖾐 𖼈𖽺𖾐 𖼂𖽻𖾐 𖼖𖽻𖾐． 6 𖼽𖽻 𖼀𖽚𖾐 𖼮𖽡𖽺 𖼀𖽑𖽪𖾐 𖼦𖽑𖽙𖾐 𖽃𖽔𖾐 𖼞𖽶𖾑 𖼊𖽑𖽺 𖼐𖽦𖾐 𖼄𖽡𖽻𖾐，𖽃𖽔𖾐 𖼞𖽶𖾑 𖼣𖽶𖾐 𖼍𖽪𖾐 𖼖𖽻𖾐，𖼽𖽻 𖼐𖽑𖽧𖾐 𖼮𖽡𖽻𖾐 𖼺𖽺𖾑，𖼀𖽦𖾐：“𖼦𖽑𖽺𖾑 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖽃𖽔𖾐 𖼞𖽶𖾑 𖼣𖽻𖾐． ”
7 𖽃𖽔𖾐 𖼞𖽶𖾑 𖼽𖽻 𖼷𖽡𖾐 𖼖𖽻𖾐 𖼇𖽕 𖼖𖽻 𖼞𖽳𖾐 𖼻𖽙 𖼄𖽳 𖼖𖽙𖾐 𖼀𖽦𖾐：“𖼣𖽙𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼽𖽚 𖼰𖽙𖾐 𖼺𖽺𖾑 ，𖼐𖽑𖽡𖾐 𖼖𖽙𖾐 𖼂𖽻𖾐 𖽃𖽔𖾐 𖼞𖽶𖾑 𖼊𖽑𖽺 𖼀𖽕𖾑 𖼮𖽸𖾐 𖼍𖽻𖾐 𖼀𖽑𖽢 𖼊𖽙𖾐 𖼊𖽙𖾐？”
8 𖼇𖽕 𖼖𖽻 𖼞𖽳𖾐 𖼻𖽙 𖼄𖽳 𖼊𖽻 𖼞𖽑𖽚：“𖼐𖽑𖽡𖾐 𖼰𖽙𖾐 𖼽𖽡𖾐 𖼄𖽺!” 𖽃𖽔𖾐 𖼞𖽶𖾑 𖼽𖽻 𖼷𖽡𖾐 𖼽𖽡𖾐 𖼺𖽺𖾑，𖽃𖽔𖾐 𖼞𖽶𖾑 𖼽𖽻 𖼄𖽙𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐．
9 𖼇𖽕 𖼖𖽻 𖼞𖽳𖾐 𖼻𖽙 𖼄𖽳 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼞𖽶𖾑 𖼦𖽑𖽺𖾑 𖼍𖽦𖾐 𖼂𖽡𖾐 𖼽𖽡𖾐，𖼣𖽙𖾐 𖼊𖽑𖽡𖾑 𖼮𖽪 𖼽𖽻 𖼊𖽑𖽺 𖼀𖽕𖾑 𖼮𖽸𖾐 𖼍𖽻𖾐 𖼞𖽜，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖽂𖽙 𖼀𖽑𖽶 𖼞𖽜 𖼊𖽻𖾐．” 𖽃𖽔𖾐 𖼺𖽺𖾑，𖼽𖽻 𖽃𖽔𖾐 𖼞𖽶𖾑 𖼊𖽑𖽺 𖼍𖽦𖾐 𖼂𖽡𖾐 𖼽𖽡𖾐 𖼀𖽕𖾑 𖼮𖽸𖾐 𖼍𖽻𖾐．
10 𖽃𖽔𖾐 𖼞𖽶𖾑 𖼖𖽜𖾐 𖼖𖽜𖾐 𖼈𖽳 𖼍𖽪𖾐 𖼖𖽻𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖽃𖽔𖾐 𖼞𖽶𖾑 𖼊𖽑𖽺 𖼦𖽳 𖼇𖽕 𖼖𖽻 𖼻𖽙 𖼄𖽳 𖼞𖽳𖾐 𖼖𖽻𖾐，𖼽𖽻 𖼞𖽜 𖼇𖽕 𖼖𖽻 𖼻𖽙 𖼄𖽳 𖼞𖽳𖾐 𖼻𖽙 𖼰𖽕𖾐，𖼇𖽕 𖼖𖽻 𖼻𖽙 𖼄𖽳 𖽃𖽔𖾐 𖼞𖽶𖾑 𖼊𖽑𖽺 𖼄𖽚 𖼳𖽡𖾐 𖼄𖽡𖾐 𖼞𖽜． 𖼇𖽕 𖼖𖽻 𖼞𖽳𖾐 𖼻𖽙 𖼄𖽳 𖼀𖽦𖾐：“𖼞𖽪𖾐 𖼮𖽡𖽺𖾐，𖼣𖽙𖾐 𖼽𖽻 𖼊𖽑𖽺 𖽃𖽔𖾐 𖼮𖽡𖽦𖾐 𖼞𖽑𖽶𖾐 𖼮𖽑𖽻𖾐 𖼺𖽶𖾐 𖼊𖽑𖽧 𖼖𖽻𖾐 𖼳𖽶 𖼣𖽻𖾐．”
𖼄𖽚 𖼳𖽡𖾐 𖼮𖽡𖽪 𖼀𖽑𖽻𖾐 𖼄𖽡 𖼍𖽡𖽦𖾑 𖼄𖽡𖾐 𖼊𖽺𖾐 𖼽𖽡𖾐
11 𖼠𖽙𖾑 𖼍𖽻𖾐，𖼄𖽚 𖼳𖽡𖾐 𖼈𖽳 𖼍𖽪𖾐 𖼖𖽻𖾐． 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽻 𖼽𖽡𖾐 𖼺𖽺𖾑 𖼽𖽻 𖼈𖽧 𖼐𖽑𖽳𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼽𖽻 𖼈𖽳𖾐 𖼞𖽳𖾐 𖼳𖽚𖾑 𖼞𖽑𖽪 𖼈𖽺𖾐 𖼖𖽡 𖼊𖽑𖽺 𖼐𖽦𖾐 𖼄𖽡𖽻𖾐，𖼹𖽦𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽻𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼊𖽝 𖼞𖽳𖾐 𖼄𖽡𖽻𖾐， 12 𖼄𖽚 𖼳𖽡𖾐 𖼞𖽕 𖼞𖽕 𖼰𖽡𖽺𖾐 𖼰𖽡𖽺𖾐 𖼊𖽑𖽡 𖼠𖽙𖾐 𖼐𖽦𖾐，𖼠𖽳𖾐 𖼖𖽪𖾐 𖼷𖽑𖽻𖾐 𖼄𖽡𖽻𖾐 𖼺𖽪𖾐 𖼄𖽔 𖼮𖽻𖾐 𖼺𖽺𖾑，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐，𖼀𖽑𖽨 𖼦𖽳 𖼐𖽑𖽡 𖼂𖽜𖾐 𖼞𖽑𖽶𖾐 𖼦𖽸𖾐．
13 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐 𖼽𖽻 𖼹𖽦𖾑 𖼊𖽚𖾐 𖼖𖽻𖾐，𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼐𖽑𖽡 𖼽𖽚𖾐 𖼷𖽙𖾐 𖼖𖽙𖾐 𖼊𖽝 𖼊𖽦 𖼞𖽳𖾐 𖼄𖽡𖽻𖾐 𖼺𖽺𖾑，𖼄𖽚 𖼳𖽡𖾐 𖼈𖽧 𖼐𖽑𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽪𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼽𖽻 𖼄𖽳𖾑 𖼈𖽧 𖼐𖽑𖽳𖾐 𖼊𖽑𖽺 𖼊𖽝 𖼐𖽺𖾑？
14 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽻 𖼞𖽑𖽚 𖼀𖽦𖾐：“𖽃𖽔 𖼺𖽺 𖼐𖽑𖽡𖾐 𖼊𖽑𖽺 𖼹𖽡𖾐 𖼣𖽙𖾐 𖼈𖽳𖾐 𖼞𖽳𖾐 𖼈𖽪𖾑 𖼷𖽪𖾐 𖼐𖽺𖾐 𖼄𖽡𖽻 𖼦𖽺 𖼺𖽪𖾐 𖼷𖽶 𖼄𖽻 𖼂𖽺𖾐 𖼐𖽺𖾑？ 𖼐𖽑𖽡𖾐 𖼞𖽑𖽻𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐 𖼖𖽙𖾐 𖼺𖽶𖾑，𖼣𖽙𖾐 𖼊𖽑𖽺 𖼖𖽺𖾑 𖼺𖽦 𖼊𖽑𖽡 𖼮𖽑𖽻 𖼖𖽔𖾑？” 𖽃𖽔𖾐 𖼺𖽺𖾑，
𖼄𖽚 𖼳𖽡𖾐 𖼮𖽡𖽮𖾐 𖼍𖽪𖾐 𖼖𖽻𖾐，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼄𖽡𖽻 𖼦𖽑𖽺𖾑 𖼮𖽨𖾐 𖼠𖽕𖾐 𖼰𖽶𖾐 𖼺𖽙𖾐 𖼮𖽑𖽢𖾑 𖼺𖽝𖾑 𖼦𖽑𖽻𖾐．” 15 𖼇𖽕 𖼖𖽻 𖼄𖽡𖽻 𖼦𖽑𖽺𖾑 𖼊𖽻 𖼮𖽨 𖼦𖽑𖽻𖾐 𖼺𖽺𖾑，𖼄𖽪𖾐 𖼊𖽪𖾐 𖼻𖽜 𖼄𖽚 𖼳𖽡𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽡 𖼮𖽑𖽻．
𖼄𖽚 𖼳𖽡𖾐 𖼇𖽕 𖼖𖽻 𖼊𖽑𖽺 𖼮𖽡𖽪 𖼀𖽑𖽻𖾐，𖼄𖽡 𖼍𖽡𖽦𖾑 𖼄𖽡𖾐 𖼊𖽺𖾐 𖼮𖽻𖾐 𖼽𖽡𖾐． 16 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽻 𖼈𖽡𖾐 𖼊𖽪 𖼀𖽙 𖼮𖽑𖽶𖾐 𖼊𖽡𖾐． 𖼄𖽡 𖼍𖽡𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼍𖽡𖾐 𖼄𖽻 𖼞𖽑𖽶𖾑 𖼻𖽙 𖼄𖽳 𖼳𖽶 𖼽𖽚𖾐 𖼮𖽻𖾐，𖼽𖽻 𖼈𖽳𖾐 𖼖𖽻𖾐 𖽃𖽔𖾐 𖼮𖽡𖽦𖾐 𖼊𖽑𖽜，𖼈𖽡𖾐 𖼖𖽻 𖼞𖽑𖽶𖾐 𖼰𖽡𖽺𖾐，𖼈𖽡𖾐 𖼖𖽻 𖽃𖽔𖾐 𖼮𖽡𖽦𖾐 𖼰𖽡𖽺𖾐 𖼀𖽡𖾐 𖼦𖽑𖽻𖾐 𖼺𖽺𖾑，𖼽𖽻 𖼀𖽙 𖼞𖽳𖾐 𖽃𖽔𖾑 𖼮𖽑𖽸 𖼽𖽻𖾐 𖼊𖽑𖽺 𖼍𖽻𖾐 𖼊𖽻𖾐． 17 𖼦𖽑𖽻𖾐 𖼊𖽑𖽻𖾐，𖼖𖽚𖾑 𖼀𖽑𖽙 𖼊𖽑𖽡 𖼹𖽻𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼦𖽑𖽙𖾐． 𖼄𖽚 𖼳𖽡𖾐 𖼍𖽪𖾐 𖼖𖽻𖾐 𖼺𖽺𖾑 𖼽𖽻 𖼈𖽳𖾐 𖼖𖽙𖾐 𖼂𖽻𖾐 𖼮𖽨𖾐，𖼽𖽻 𖼈𖽳𖾐 𖼞𖽳𖾐 𖽃𖽔𖾑 𖼮𖽑𖽸 𖼽𖽻𖾐 𖼞𖽜 𖼖𖽺𖾑 𖽃𖽔𖾐 𖼮𖽡𖽦𖾐 𖽂𖽙𖾐 𖼊𖽻𖾐．
18 𖼽𖽻 𖼈𖽳𖾐 𖼀𖽑𖽚𖾐 𖼺𖽺𖾑 𖼽𖽻 𖼀𖽙 𖼖𖽡𖽚 𖽃𖽳 𖼞𖽳𖾐 𖼞𖽚 𖼮𖽑𖽡𖾐，𖼽𖽻 𖼀𖽙 𖼊𖽻 𖼐𖽙𖾐：“𖽃𖽙𖾑 𖼐𖽑𖽡𖾐 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼞𖽚 𖼖𖽻𖾐 𖼐𖽦 𖼐𖽺𖾑？ ”
19 𖼽𖽻 𖼈𖽳𖾐 𖼊𖽻 𖼞𖽑𖽚：“𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽙𖾐 𖼈𖽳𖾐 𖼖𖽙𖾐 𖼂𖽻𖾐 𖼮𖽨𖾐 𖼺𖽺𖾑，𖼣𖽙𖾐 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽪𖾐 𖼖𖽚𖾑 𖼀𖽑𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼞𖽕 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼣𖽙𖾐 𖼈𖽳𖾐 𖼖𖽙𖾐 𖼂𖽻𖾐 𖽃𖽔𖾐 𖼮𖽡𖽦𖾐 𖼊𖽑𖽜 𖽃𖽔𖾑 𖼮𖽑𖽸 𖼽𖽻𖾐 𖼊𖽑𖽺 𖼍𖽻𖾐．
20 𖼽𖽻 𖼀𖽙 𖼽𖽻 𖼻𖽙 𖼄𖽳 𖼞𖽑𖽶𖾑 𖼹𖽻𖾐 𖼖𖽙𖾐 𖼀𖽦𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？ 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼽𖽻 𖼊𖽑𖽺 𖼰𖽡𖾑 𖼍𖽙𖾑 𖼍𖽧𖾑 𖼐𖽺𖾑 ？ 𖼽𖽡𖾐 𖼺𖽺𖾑 𖼽𖽻 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐 𖼷𖽙𖾐 𖼷𖽙 𖼖𖽡𖾐．
21 𖼄𖽚 𖼳𖽡𖾐 𖼐𖽑𖽧𖾐 𖼺𖽳 𖼄𖽙𖾐 𖼍𖽡𖾐 𖼄𖽻 𖼞𖽑𖽶𖾑 𖼽𖽚𖾐 𖼖𖽙𖾐 𖼮𖽑𖽻𖾐 𖼮𖽻𖾐，𖼍𖽡𖾐 𖼄𖽻 𖼞𖽑𖽶𖾑 𖼽𖽚𖾐 𖼽𖽻 𖼻𖽙 𖼄𖽳 𖼳𖽡𖾐 𖼀𖽑𖽙𖾐 𖼖𖽔𖾐 𖼊𖽑𖽺 𖼀𖽑𖽨 𖼄𖽚 𖼳𖽡𖾐 𖼖𖽙𖾐 𖼇𖽪𖾐． 22 𖼳𖽡𖾐 𖼀𖽑𖽙𖾐 𖼖𖽔𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐，𖼄𖽚 𖼳𖽡𖾐 𖽃𖽔𖾐 𖼞𖽑𖽶𖾑 𖼊𖽑𖽺 𖼠𖽴 𖼳𖽱𖾑 𖼄𖽡𖾐． 𖼞𖽪𖾐 𖼮𖽡𖽺𖾐 𖼽𖽻 𖼀𖽦𖾐：“𖼣𖽙𖾐 𖼺𖽙𖾐 𖼄𖽡𖾐 𖼊𖽺𖾐 𖼺𖽙𖾐 𖼈𖽡𖾐 𖼂𖽺𖾐 𖼳𖽶 𖼣𖽻𖾐．”
23 𖼐𖽑𖽡𖾐 𖼦𖽑𖽦 𖼊𖽑𖽡 𖼳𖽕𖾐 𖼄𖽙𖾐 𖼠𖽚 𖼦𖽑𖽙𖾐，𖽃𖽦𖾐 𖼰𖽧 𖼠𖽚 𖼞𖽳𖾐 𖼇𖽕 𖼖𖽻 𖼳𖽶𖾐 𖼦𖽑𖽙𖾐． 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖽻 𖼖𖽡 𖼄𖽪𖾐 𖼷𖽳𖾑 𖼳𖽚𖾑 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽻 𖼈𖽳𖾐 𖼞𖽳𖾐 𖼮𖽑𖽡𖽪 𖼀𖽺𖾐 𖽂𖽙 𖼺𖽙𖾐 𖼂𖽙𖾐 𖼊𖽻 𖼮𖽨 𖼦𖽑𖽻𖾐． 24 𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼮𖽑𖽡 𖼮𖽡𖽺𖾐 𖼮𖽑𖽡𖽪 𖼀𖽺𖾐 𖼊𖽑𖽺 𖼊𖽻 𖼮𖽨 𖼦𖽑𖽻𖾐，𖽃𖽔𖾐 𖼺𖽺𖾑 𖼽𖽻 𖼽𖽕𖾑 𖼂𖽚 𖼖𖽔𖾐 𖼦𖽕、 𖼽𖽡 𖼺𖽔 𖼐𖽺𖾐 𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼊𖽑𖽺 𖼦𖽙𖾑 𖼮𖽑𖽡． 25 𖽂𖽙 𖼺𖽙𖾐 𖼂𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽦𖾐 𖼳𖽪𖾐，𖼽𖽻 𖼈𖽳𖾐 𖼞𖽳𖾐 𖼠𖽻𖾐 𖼰𖽡𖾐𖽳𖾐 𖼊𖽑𖽺 𖼖𖽺𖾑 𖼺𖽝𖾑．