𖼰𖽡𖽻𖾐 𖼦𖽑𖽺𖾐 𖼞𖽶𖾐 𖼺𖽪𖾐 𖼷𖽶 𖼄𖽻 𖼐𖽑𖽡 𖼽𖽚𖾐 𖼽𖽦 𖼄𖽦𖾐 𖼞𖽑𖽻𖾐
40
1 𖼄𖽡𖽻 𖼦𖽑𖽺𖾑 𖼹𖽻𖾐 𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼮𖽶𖾐 𖼀𖽳 𖼠𖽕 𖼺𖽪𖾐 𖼐𖽺𖾐 𖼷𖽙 𖼊𖽪𖾐 𖼠𖽕 𖼺𖽪𖾐，𖼽𖽻 𖼈𖽳𖾐 𖼈𖽪𖾐 𖼍𖽦 𖼊𖽑𖽺 𖼮𖽑𖽡𖽺 𖼂𖽚𖾐． 2 𖽃𖽔𖾐 𖼺𖽺𖾑，𖼇𖽕 𖼖𖽻 𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼦𖽑𖽺𖾑 𖼐𖽑𖽡 𖼽𖽚𖾐 𖼊𖽑𖽺 𖼀𖽶 𖼻𖽶， 3 𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼄𖽦 𖼈𖽪𖾑 𖼷𖽪𖾐 𖼠𖽕 𖼞𖽳𖾐 𖼰𖽡𖽻𖾐 𖼦𖽑𖽺𖾐 𖼞𖽑𖽶𖾐 𖼠𖽶𖾐，𖼽𖽱𖾐 𖼺𖽴𖾑 𖼊𖽑𖽺 𖼖𖽺𖾑 𖼞𖽑𖽶𖾑 𖼠𖽻𖾐 𖼠𖽶𖾐 𖼺𖽪𖾐 𖼣𖽻𖾐． 4 𖼄𖽦 𖼈𖽪𖾑 𖼷𖽪𖾐 𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼽𖽱𖾐 𖼺𖽴𖾑 𖼞𖽜 𖼺𖽺𖾑，𖼽𖽱𖾐 𖼺𖽴𖾑 𖼽𖽻 𖼈𖽳𖾐 𖼊𖽑𖽺 𖼠𖽙𖾐 𖼳𖽙𖾐．𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼦𖽑𖽺𖾐 𖼞𖽑𖽶𖾐 𖼊𖽑𖽡 𖼳𖽕𖾐 𖼄𖽙𖾐 𖼠𖽶𖾐 𖼦𖽑𖽙𖾐．
5 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾐 𖼍𖽦 𖼖𖽙𖾐 𖼀𖽙𖾐 𖼮𖽶𖾐 𖼀𖽳 𖼠𖽕 𖼺𖽪𖾐 𖼐𖽺𖾐 𖼷𖽙 𖼊𖽪𖾐 𖼠𖽕 𖼺𖽪𖾐 𖼦𖽑𖽺𖾑 𖼐𖽑𖽡 𖼽𖽚𖾐，𖼽𖽻 𖼈𖽳𖾐 𖼰𖽡𖽻𖾐 𖼦𖽑𖽺𖾐 𖼞𖽶𖾐 𖼄𖽳𖾐，𖼊𖽑𖽡 𖼦𖽑𖽦 𖼠𖽻𖾐 𖼞𖽑𖽶𖾐 𖼐𖽑𖽡 𖼽𖽚𖾐 𖼐𖽺𖾐 𖼽𖽦 𖼄𖽦𖾐 𖼞𖽑𖽻𖾐，𖼽𖽻 𖼈𖽳𖾐 𖼞𖽑𖽻𖾐 𖼺𖽪𖾐 𖼽𖽦 𖼄𖽦𖾐 𖼷𖽙𖾐 𖼖𖽙𖾐 𖼄𖽔 𖼺𖽶𖾑． 6 𖼄𖽶 𖼊𖽑𖽡 𖼮𖽡𖾐 𖼞𖽑𖽶𖾑 𖼮𖽶𖾐，𖼽𖽱𖾐 𖼺𖽴𖾑 𖼽𖽻 𖼈𖽳𖾐 𖼞𖽳𖾐 𖼊𖽡 𖼽𖽡𖾐，𖼽𖽻 𖼈𖽳𖾐 𖼮𖽑𖽻 𖼄𖽦𖾐 𖼮𖽑𖽧𖾐 𖼠𖽴 𖼷𖽚𖾐 𖼞𖽳𖾐 𖼐𖽦𖾐 𖼄𖽡𖽻𖾐． 7 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼖𖽙𖾐 𖼊𖽻 𖼐𖽙𖾐：“𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼮𖽑𖽻 𖼄𖽦𖾐 𖼮𖽑𖽧𖾐 𖼠𖽴 𖼷𖽚𖾐 𖼐𖽺𖾑？”
8 𖼽𖽻 𖼈𖽳𖾐 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼽𖽻 𖼄𖽳𖾑 𖼽𖽦 𖼄𖽦𖾐 𖼊𖽑𖽡 𖼊𖽝𖾐 𖼞𖽑𖽻𖾐，𖼦𖽑𖽻𖾐 𖼊𖽑𖽻𖾐 𖼦𖽑𖽺 𖼀𖽑𖽪𖾐 𖼠𖽸𖾑 𖼺𖽪𖾐 𖼄𖽔 𖼮𖽻𖾐．”
𖼽𖽱𖾐 𖼺𖽴𖾑 𖼀𖽦𖾐：“𖼽𖽦 𖼄𖽦𖾐 𖼦𖽑𖽺 𖼀𖽑𖽪𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼄𖽔 𖼣𖽻𖾐 𖼖𖽔？𖼐𖽑𖽡𖾐 𖼈𖽳𖾐 𖼞𖽑𖽻𖾐 𖼺𖽪𖾐 𖼽𖽦 𖼄𖽦𖾐 𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧 𖼖𖽻𖾐．”
𖼽𖽱𖾐 𖼺𖽴𖾑 𖼷𖽶 𖼄𖽻 𖼐𖽑𖽡 𖼽𖽚𖾐 𖼖𖽙𖾐 𖼀𖽙𖾐 𖼽𖽦 𖼄𖽦𖾐 𖼦𖽑𖽺 𖼀𖽑𖽪𖾐
9 𖽃𖽔𖾐 𖼺𖽺𖾑，𖼮𖽶𖾐 𖼀𖽳 𖼠𖽕 𖼺𖽪𖾐 𖼽𖽻 𖼞𖽑𖽻𖾐 𖼺𖽪𖾐 𖼦𖽑𖽺 𖼽𖽱𖾐 𖼺𖽴𖾑 𖼊𖽑𖽺 𖼰𖽨𖾐，𖼀𖽦𖾐：“𖼣𖽙𖾐 𖼽𖽦 𖼄𖽦𖾐 𖼞𖽑𖽻𖾐 𖼄𖽡𖽻𖾐，𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼺𖽳 𖼖𖽳 𖼊𖽻𖾐 𖼊𖽑𖽡 𖼷𖽡𖾐 𖼮𖽻𖾐． 10 𖼺𖽳 𖼖𖽳 𖼊𖽻𖾐 𖼷𖽡𖾐 𖼊𖽑𖽺 𖼠𖽕𖾑 𖼖𖽦 𖼺𖽙𖾐 𖼠𖽕𖾑 𖼮𖽻𖾐，𖼐𖽜𖾐 𖼊𖽑𖽧 𖼖𖽻𖾐 𖼍𖽺𖾑 𖼺𖽺 𖼈𖽦𖾐 𖼖𖽪𖾐 𖼈𖽦𖾐，𖼺𖽳 𖼖𖽳 𖼊𖽻𖾐 𖼖𖽺𖾑 𖼄𖽡𖾐 𖼦𖽑𖽻𖾐． 11 𖼣𖽙𖾐 𖼇𖽕 𖼖𖽻 𖼞𖽳𖾐 𖼮𖽶𖾐 𖼺𖽡𖾑 𖼈𖽺𖾐 𖼍𖽳𖾐，𖼺𖽳 𖼖𖽳 𖼊𖽻𖾐 𖼈𖽡𖾐 𖼷𖽑𖽸𖾐 𖼮𖽶𖾐 𖼺𖽡𖾑 𖼞𖽑𖽶𖾐 𖼰𖽡𖽺𖾐，𖼷𖽶𖾐 𖼇𖽕 𖼖𖽻 𖼊𖽑𖽺 𖼞𖽜．”
12 𖼽𖽱𖾐 𖼺𖽴𖾑 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽑𖽻𖾐 𖼺𖽪𖾐 𖼽𖽦 𖼄𖽦𖾐 𖼦𖽑𖽺𖾑 𖼻𖽻𖾐 𖼣𖽻𖾐：𖼠𖽕𖾑 𖼖𖽦 𖼺𖽙𖾐 𖼠𖽕𖾑，𖼞𖽑𖽶𖾑 𖼺𖽙𖾐 𖼐𖽑𖽡𖾐 𖼣𖽻𖾐．
13 𖼺𖽙𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐，𖼇𖽕 𖼖𖽻 𖼐𖽑𖽡𖾐 𖼊𖽑𖽺 𖼰𖽡𖽻𖾐 𖼦𖽑𖽺𖾐 𖼞𖽑𖽶𖾐 𖼮𖽑𖽻𖾐 𖼀𖽑𖽨 𖼊𖽑𖽧 𖼽𖽡𖾐，𖼐𖽑𖽡𖾐 𖼞𖽜 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖼷𖽶 𖼄𖽻 𖼂𖽺𖾐，𖼦𖽑𖽔𖾐 𖼖𖽺𖾑 𖼽𖽻 𖼖𖽙𖾐 𖼀𖽙𖾐 𖼮𖽶𖾐 𖼀𖽳 𖼠𖽕，𖼮𖽶𖾐 𖼺𖽡𖾑 𖼷𖽶𖾐 𖼇𖽕 𖼖𖽻 𖼊𖽑𖽺 𖼞𖽜 𖼊𖽻𖾐． 14 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼮𖽻𖾐 𖼺𖽙𖾐 𖽂𖽙𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼊𖽑𖽺 𖼦𖽙𖾑 𖼮𖽑𖽡 𖼖𖽡𖾐，𖼣𖽙𖾐 𖼊𖽑𖽺 𖼮𖽡 𖼽𖽡𖾑 𖼄𖽻𖾑 𖼞𖽜，𖼇𖽕 𖼖𖽻 𖽃𖽙𖾑 𖼄𖽺 𖼮𖽑𖽡𖽺 𖼣𖽙𖾐 𖼖𖽙𖾐 𖼀𖽙𖾐 𖼮𖽑𖽡 𖼮𖽡𖽺𖾐 𖼺𖽺𖾑，𖼣𖽙𖾐 𖼊𖽑𖽺 𖼀𖽑𖽨 𖼊𖽑𖽧 𖼽𖽡𖾐 𖼖𖽡𖾐． 15 𖼣𖽙𖾐 𖼊𖽑𖽺 𖼠𖽕𖾐 𖼰𖽶𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽑𖽻𖾐 𖼈𖽪 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐，𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽑𖽡𖾐 𖼠𖽙𖾑 𖼍𖽻𖾐 𖼖𖽺𖾑 𖼰𖽡𖽻𖾐 𖼦𖽑𖽺𖾐 𖼞𖽶𖾐 𖼷𖽻 𖼞𖽳𖾐 𖼄𖽡𖽻 𖼂𖽺𖾐 𖼄𖽔 𖼠𖽚．”
16 𖼷𖽙 𖼊𖽻𖾐 𖼠𖽕 𖼺𖽪𖾐 𖼞𖽑𖽶𖾑 𖼽𖽚𖾐 𖼄𖽡𖽻𖾐，𖼽𖽱𖾐 𖼺𖽴𖾑 𖼽𖽦 𖼄𖽦𖾐 𖼦𖽑𖽺 𖼀𖽑𖽪𖾐 𖼹𖽳𖾐，𖽃𖽔𖾐 𖼺𖽺𖾑 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼖𖽺𖾑 𖼽𖽦 𖼄𖽦𖾐 𖼊𖽑𖽡 𖼊𖽝𖾐 𖼞𖽑𖽻𖾐，𖼣𖽙𖾐 𖼽𖽦 𖼄𖽦𖾐 𖼞𖽑𖽻𖾐 𖼄𖽡𖽻𖾐，𖼈𖽪𖾑 𖼊𖽡𖾐 𖼞𖽕 𖼂𖽻𖾑 𖽃𖽔𖾑 𖼂𖽻𖾐 𖼺𖽙𖾐 𖼰𖽡𖽻𖾐 𖼖𖽪𖾐 𖼮𖽻𖾐． 17 𖼊𖽦𖾐 𖼖𖽚𖾐 𖼺𖽪𖾐 𖼰𖽡𖽻𖾐 𖼖𖽪𖾐 𖼞𖽑𖽶𖾑 𖼊𖽝𖾐 𖼠𖽻𖾐 𖼞𖽑𖽶𖾐，𖼇𖽕 𖼖𖽻 𖼖𖽙𖾐 𖼀𖽙𖾐 𖼠𖽻𖾐 𖼺𖽪𖾐 𖼞𖽑𖽙𖾐 𖼣𖽻𖾐 𖼳𖽶 𖼷𖽙 𖼊𖽪𖾐 𖼮𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽕𖾐 𖼀𖽨𖾐 𖼂𖽻𖾐 𖼖𖽻𖾐 𖼺𖽺𖾑，𖼣𖽙𖾐 𖼈𖽪𖾑 𖼊𖽡𖾐 𖼞𖽕 𖼂𖽻𖾑 𖼰𖽡𖽻𖾐 𖼖𖽪𖾐 𖼠𖽻𖾐 𖼞𖽑𖽶𖾐 𖼷𖽙𖾐 𖼊𖽻𖾐．”
18 𖼽𖽱𖾐 𖼺𖽴𖾑 𖼀𖽦𖾐：“𖼐𖽑𖽡𖾐 𖼞𖽑𖽻𖾐 𖼺𖽪𖾐 𖼽𖽦 𖼄𖽦𖾐 𖼦𖽑𖽺𖾑 𖼻𖽻𖾐 𖼣𖽻𖾐：𖼰𖽡𖽻𖾐 𖼖𖽪𖾐 𖼺𖽙𖾐 𖼊𖽝𖾐，𖼞𖽑𖽶𖾑 𖼺𖽙𖾐 𖼐𖽑𖽡𖾐 𖼣𖽻𖾐． 19 𖼺𖽙𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐，𖼇𖽕 𖼖𖽻 𖼐𖽑𖽡𖾐 𖼈𖽪𖾑 𖼊𖽡𖾐 𖼊𖽝𖾐 𖼹𖽺𖾐 𖼖𖽻𖾐，𖼀𖽑𖽨 𖼺𖽧𖾐 𖼖𖽜 𖼊𖽑𖽺 𖼠𖽕𖾑 𖼍𖽪𖾐，𖼣𖽕𖾐 𖼀𖽨𖾐 𖼂𖽻𖾐 𖼖𖽻𖾐 𖼺𖽺𖾑，𖼐𖽑𖽡𖾐 𖼦𖽙 𖼊𖽑𖽺 𖼊𖽑𖽚𖾐 𖼊𖽻𖾐．”
20 𖼺𖽙𖾐 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐，𖼇𖽕 𖼖𖽻 𖼞𖽳𖾐 𖼽𖽚𖾐 𖼐𖽑𖽡𖾐 𖼣𖽻𖾐，𖼇𖽕 𖼖𖽻 𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼖𖽙𖾐 𖼀𖽙𖾐 𖼻𖽦 𖼷𖽙𖾐 𖼂𖽺𖾐，𖼽𖽻 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼮𖽶𖾐 𖼀𖽳 𖼠𖽕 𖼺𖽪𖾐 𖼐𖽺𖾐 𖼷𖽙 𖼊𖽪𖾐 𖼠𖽕 𖼺𖽪𖾐 𖼊𖽑𖽺 𖼦𖽳 𖼊𖽑𖽧 𖼖𖽻𖾐． 21 𖼮𖽶𖾐 𖼀𖽳 𖼠𖽕 𖼺𖽪𖾐 𖼞𖽜 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖼄𖽡𖽻 𖼂𖽺𖾐，𖼽𖽻 𖼞𖽜 𖼦𖽑𖽔𖾐 𖼖𖽺𖾑 𖼮𖽶𖾐 𖼺𖽡𖾑 𖼷𖽶𖾐 ，𖼇𖽕 𖼖𖽻 𖼊𖽑𖽺 𖼞𖽜． 22 𖼞𖽚 𖼀𖽑𖽚𖾐 𖼷𖽙 𖼊𖽪𖾐 𖼠𖽕 𖼺𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼀𖽑𖽨 𖼺𖽧𖾐 𖼖𖽜 𖼊𖽑𖽺 𖼠𖽕𖾑 𖼍𖽪𖾐 𖼦𖽑𖽙𖾐，𖼦𖽑𖽺𖾑 𖼽𖽱𖾐 𖼺𖽴𖾑 𖼞𖽑𖽙𖾐 𖼀𖽦𖾐 𖼺𖽪𖾐 𖼖𖽙𖾐 𖼺𖽶𖾑 𖼳𖽶 𖼣𖽻𖾐． 23 𖼦𖽑𖽻𖾐 𖼊𖽑𖽻𖾐，𖼮𖽶𖾐 𖼀𖽳 𖼠𖽕 𖼺𖽪𖾐 𖼞𖽑𖽶𖾑 𖼽𖽚𖾐 𖼽𖽱𖾐 𖼺𖽴𖾑 𖼊𖽑𖽺 𖼄𖽔 𖼊𖽡 𖼮𖽑𖽻，𖼄𖽔 𖼦𖽙𖾑 𖼮𖽑𖽡 𖼦𖽑𖽙𖾐．