𖼽𖽔 𖼠𖽴𖾑 𖼐𖽺𖾐 𖼽𖽡 𖼺𖽻 𖼷𖽙𖾐 𖼖𖽙𖾐 𖼄𖽡𖽻𖾐
33
1 𖼽𖽔 𖼠𖽴𖾑 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐，𖼽𖽡 𖼺𖽻 𖼷𖽑𖽻𖾐 𖼖𖽡𖾐 𖼦𖽑𖽙𖾐 𖼽𖽚𖾐 𖼦𖽳 𖼂𖽻𖾐 𖼖𖽻𖾐 𖼞𖽳𖾐 𖼄𖽡𖽻𖾐．𖽃𖽔𖾐 𖼺𖽺𖾑，𖼽𖽻 𖽃𖽔𖾐 𖼞𖽶𖾑 𖼀𖽜𖾐 𖼺𖽙𖾐 𖼷𖽪𖾐 𖼂𖽺𖾐，𖼰𖽡𖽻𖾐 𖼖𖽡𖾑 𖼽𖽕𖾑、 𖼖𖽔𖾐 𖼰𖽡𖽦 𖼐𖽺𖾐 𖼄𖽳 𖼖𖽳𖾐 𖼐𖽑𖽡 𖼽𖽚𖾐 𖼊𖽑𖽺 𖼞𖽜． 2 𖼽𖽻 𖼄𖽳 𖼖𖽳𖾐 𖼐𖽑𖽡 𖼽𖽚𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖽃𖽔𖾐 𖼞𖽶𖾑 𖼞𖽜 𖽃𖽙𖾑 𖼄𖽺 𖼺𖽜，𖼖𖽡𖾑 𖼽𖽕𖾑 𖼐𖽺𖾐 𖼽𖽻 𖼞𖽳𖾐 𖽃𖽔𖾐 𖼞𖽶𖾑 𖼞𖽜 𖼠𖽙𖾑 𖼍𖽻𖾐 𖼺𖽜，𖼖𖽔𖾐 𖼰𖽡𖽦 𖼐𖽺𖾐 𖼽𖽱𖾐 𖼺𖽴𖾑 𖼞𖽜 𖼄𖽳𖾑 𖼊𖽺𖾐 𖼺𖽜． 3 𖼽𖽻 𖼺𖽜 𖼽𖽻 𖼈𖽳𖾐 𖽃𖽙𖾑 𖼄𖽺 𖼠𖽚 𖼽𖽡𖾐，𖼳𖽶 𖼂𖽦𖾑 𖼄𖽡𖾐 𖼐𖽦𖾐 𖼀𖽙 𖼂𖽴 𖼹𖽺𖾐 𖼺𖽺𖾑，𖼽𖽻 𖼍𖽕𖾑 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐． 4 𖼽𖽡 𖼺𖽻 𖼰𖽡𖽴 𖼂𖽻𖾐 𖼖𖽻𖾐 𖼽𖽻 𖼊𖽑𖽺 𖼹𖽶𖾐，𖼽𖽻 𖼊𖽑𖽺 𖼈𖽝𖾐 𖼍𖽦𖾐，𖼽𖽻 𖼖𖽺𖾐 𖼀𖽺 𖼈𖽝𖾐 𖼍𖽡 𖼽𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑，𖼐𖽑𖽡 𖼽𖽚𖾐 𖼐𖽺𖾐 𖼣𖽶𖾐 𖼍𖽪𖾐 𖼖𖽻𖾐．5 𖼽𖽡 𖼺𖽻 𖼈𖽪𖾑 𖼊𖽡𖾐 𖼮𖽑𖽳 𖼍𖽪𖾐 𖼐𖽦𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼐𖽺𖾐 𖽃𖽔𖾐 𖼞𖽶𖾑 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼊𖽻 𖼐𖽙𖾐：“𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼦𖽑𖽺𖾑 𖼹𖽻𖾐 𖽃𖽔 𖼺𖽺 𖼣𖽻𖾐 𖼐𖽺𖾑？”
𖼽𖽔 𖼠𖽴𖾑 𖼊𖽻 𖼞𖽑𖽚：“𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼖𖽪 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼞𖽜 𖼺𖽪𖾐 𖽃𖽔𖾐 𖼞𖽶𖾑 𖼣𖽻𖾐．”
6 𖽃𖽔𖾐 𖼺𖽺𖾑，𖼄𖽳 𖼖𖽳𖾐 𖼐𖽑𖽡 𖼽𖽚𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖽃𖽔𖾐 𖼞𖽶𖾑，𖼽𖽡 𖼺𖽻 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐 𖼽𖽻 𖼊𖽑𖽺 𖼊𖽑𖽴． 7 𖼖𖽡𖾑 𖼽𖽕𖾑 𖼐𖽺𖾐 𖼽𖽻 𖼞𖽳𖾐 𖽃𖽔𖾐 𖼞𖽶𖾑 𖼖𖽺𖾑 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐 𖼽𖽻 𖼊𖽑𖽺 𖼊𖽑𖽴．𖼠𖽙𖾑 𖼍𖽻𖾐，𖼽𖽱𖾐 𖼺𖽴𖾑 𖼐𖽺𖾐 𖼖𖽔𖾐 𖼰𖽡𖽦 𖼖𖽺𖾑 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐 𖼽𖽻 𖼊𖽑𖽺 𖼊𖽑𖽴．
8 𖼽𖽡 𖼺𖽻 𖼹𖽦𖾑 𖼊𖽻 𖼐𖽙𖾐：“𖼣𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼮𖽡𖽺 𖼷𖽪𖾐 𖼦𖽑𖽺𖾑 𖼹𖽻𖾐，𖽃𖽔𖾐 𖼊𖽺𖾑 𖼳𖽶 𖼞𖽪𖾐 𖼮𖽡𖽺𖾐 𖼣𖽻𖾐 𖼐𖽺𖾑？”
𖼽𖽔 𖼠𖽴𖾑 𖼊𖽻 𖼞𖽑𖽚：“𖼦𖽑𖽙𖾐 𖼺𖽡 𖼀𖽑𖽙 𖼐𖽑𖽡𖾐 𖼊𖽑𖽺 𖼞𖽜 𖼺𖽺𖾑，𖼐𖽑𖽡𖾐 𖼞𖽳𖾐 𖼮𖽡 𖼽𖽡𖾑 𖽂𖽙𖾐 𖼖𖽡𖾐 𖼖𖽙𖾐 𖼀𖽙𖾐 𖼳𖽶 𖼣𖽻𖾐．”
9 𖼽𖽡 𖼺𖽻 𖼀𖽦𖾐：“𖼐𖽑𖽳𖾐 𖼄𖽻 𖽃𖽔𖾐！ 𖼣𖽙𖾐 𖼦𖽑𖽔𖾐 𖼮𖽶𖾐 𖼀𖽻𖾐 𖼀𖽡𖾐 𖼳𖽶 𖼣𖽻𖾐，𖼐𖽑𖽡𖾐 𖼞𖽳𖾐 𖼐𖽑𖽡𖾐 𖼹𖽺𖾐 𖼍𖽙𖾑 𖼻𖽻𖾐．”
10 𖼽𖽔 𖼠𖽴𖾑 𖼀𖽦𖾐：“𖼦𖽑𖽺𖾑 𖼻𖽻𖾐 𖼄𖽔 𖼣𖽻𖾐，𖼣𖽙𖾐 𖼞𖽜 𖼐𖽑𖽡𖾐 𖼞𖽳𖾐 𖼮𖽡 𖼽𖽡𖾑 𖽂𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼣𖽙𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼮𖽡𖽺 𖼷𖽪𖾐 𖼊𖽑𖽺 𖼷𖽶𖾐 𖼞𖽜 𖼖𖽡𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼐𖽑𖽡𖾐 𖼮𖽑𖽻 𖼄𖽦𖾐 𖼊𖽑𖽺 𖽂𖽙𖾐 𖼄𖽡𖽻𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼖𖽙𖾐 𖼺𖽶𖾑，𖼐𖽑𖽡𖾐 𖼠𖽕𖾐 𖼰𖽶𖾐 𖼮𖽡 𖼽𖽡𖾑 𖼣𖽙𖾐 𖼊𖽑𖽺 𖼞𖽜 𖼦𖽑𖽻𖾐 𖼺𖽪𖾐 𖼣𖽻𖾐． 11 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼦𖽑𖽙𖾐 𖼐𖽑𖽡𖾐 𖼞𖽜 𖼺𖽪𖾐 𖼮𖽡𖽺 𖼷𖽪𖾐 𖼊𖽑𖽺 𖼷𖽶𖾐 𖼞𖽜．𖼞𖽪𖾐 𖼮𖽡𖽺𖾐 𖽂𖽙 𖼺𖽙𖾐 𖼂𖽙𖾐 𖼮𖽡 𖼽𖽡𖾑 𖼖𖽪 𖼞𖽜 𖼺𖽺𖾑，𖼣𖽙𖾐 𖼞𖽑𖽙𖾐 𖼣𖽻𖾐 𖼳𖽶 𖼮𖽻𖾐 𖼍𖽳𖾐 𖼦𖽑𖽻𖾐．” 𖼽𖽔 𖼠𖽴𖾑 𖼐𖽑𖽡 𖼺𖽙𖾐 𖼂𖽦𖾑 𖼽𖽻 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼽𖽻 𖼷𖽶𖾐 𖼹𖽺𖾐 𖼖𖽻𖾐．
12 𖼽𖽡 𖼺𖽻 𖼀𖽦𖾐：“𖽃𖽔 𖼐𖽺𖾑 𖼮𖽨𖾐 𖼺𖽜 𖽃𖽙𖾑 𖼄𖽺 𖼽𖽡𖾐 𖼦𖽻，𖼣𖽙𖾐 𖼐𖽑𖽡𖾐 𖼊𖽑𖽺 𖼮𖽨𖾐 𖼦𖽳．”
13 𖼽𖽔 𖼠𖽴𖾑 𖼽𖽻 𖼖𖽙𖾐 𖼀𖽦𖾐：“𖼺𖽡 𖼀𖽑𖽙 𖼐𖽑𖽡𖾐 𖼺𖽝𖾑，𖽃𖽔𖾐 𖼞𖽶𖾑 𖼦𖽑𖽺𖾑 𖼹𖽻𖾐 𖼞𖽑𖽚 𖼊𖽑𖽙 𖼽𖽳𖾐 𖼺𖽺，𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼖𖽺𖾑 𖼀𖽕𖾑 𖼮𖽸𖾐 𖼍𖽻𖾐 𖼍𖽳𖾐 𖼺𖽺．𖼽𖽻 𖼈𖽳𖾐 𖼊𖽑𖽺 𖼊𖽑𖽡 𖼐𖽑𖽡𖾐 𖼞𖽕 𖼺𖽜 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼮𖽡𖽺 𖼷𖽪𖾐 𖼄𖽳𖾑 𖼄𖽳 𖼳𖽶𖾐 𖼦𖽑𖽙𖾐 𖼠𖽸𖾑 𖼮𖽡𖽮𖾐． 14 𖼺𖽡 𖼀𖽑𖽙 𖼐𖽑𖽡𖾐 𖽃𖽙𖾑 𖼄𖽺 𖼺𖽜 𖼽𖽡𖾐 𖼮𖽑𖽳𖾐，𖼣𖽙𖾐 𖼮𖽡𖽺 𖼷𖽪𖾐 𖼐𖽺𖾐 𖽃𖽔𖾐 𖼞𖽶𖾑 𖼞𖽳𖾐 𖽂𖽙 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼖𖽜𖾐 𖼖𖽜𖾐 𖼺𖽜 𖼺𖽺𖾑，𖼳𖽡𖾐 𖽃𖽳 𖼄𖽡𖾐 𖼊𖽺𖾐 𖼺𖽡 𖼀𖽑𖽙 𖼐𖽑𖽡𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽑𖽡𖾐 𖼊𖽻𖾐．”
15 𖼽𖽡 𖼺𖽻 𖼀𖽦𖾐：“𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽡 𖼹𖽻𖾐 𖼀𖽑𖽨 𖼐𖽑𖽡𖾐 𖼞𖽳𖾐 𖼍𖽙𖾑 𖼍𖽧𖾑 𖼽𖽡𖾐 𖼮𖽑𖽳𖾐．”
𖼽𖽔 𖼠𖽴𖾑 𖼀𖽦𖾐：“𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼄𖽔 𖼻𖽻𖾐，𖼣𖽙𖾐 𖼺𖽡 𖼀𖽑𖽙 𖼐𖽑𖽡𖾐 𖼞𖽳𖾐 𖼮𖽡 𖼽𖽡𖾑 𖽂𖽙𖾐 𖼦𖽑𖽻𖾐．”
16 𖽃𖽔𖾐 𖼺𖽺𖾑，𖼽𖽡 𖼺𖽻 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼀𖽑𖽚𖾐 𖼳𖽡𖾐 𖽃𖽳 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼦𖽑𖽙𖾐． 17 𖼦𖽑𖽻𖾐 𖼊𖽑𖽻𖾐，𖼽𖽔 𖼠𖽴𖾑 𖼀𖽑𖽚𖾐 𖼳𖽪𖾐 𖼠𖽴𖾐 𖼄𖽡𖾐 𖼊𖽺𖾐 𖼽𖽡𖾐，𖼞𖽑𖽶𖾑 𖼠𖽻𖾐 𖼞𖽳𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼦𖽑𖽺𖾐 𖼍𖽡𖾐，𖼦𖽑𖽔𖾐 𖼖𖽺𖾑 𖼮𖽡𖽺 𖼷𖽪𖾐 𖼖𖽙𖾐 𖼀𖽙𖾐 𖼦𖽑𖽺𖾐 𖼠𖽴𖾐 𖼍𖽚．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼞𖽑𖽶𖾑 𖼄𖽡𖾐 𖼊𖽺𖾐 𖼳𖽪𖾐 𖼠𖽴𖾐 \fr 𖼄𖽡𖾐．
18 𖼽𖽔 𖼠𖽴𖾑 𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼺𖽙𖾑 𖼺𖽙𖾐 𖼺𖽜 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼳𖽶𖾑 𖼰𖽡𖽦𖾑 𖼖𖽪𖾐 𖼞𖽳𖾐 𖼮𖽑𖽡𖾐，𖼖𖽪𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 19 𖼽𖽻 𖼦𖽑𖽺𖾐 𖼠𖽴𖾐 𖼍𖽚 𖼺𖽪𖾐 𖼄𖽡𖾐 𖼮𖽑𖽙𖾐，𖼞𖽑𖽶𖾑 𖼽𖽻 𖼀𖽑𖽨𖾐 𖼊𖽑𖽡 𖼦𖽑𖽙𖾐 𖼀𖽑𖽡 𖼻𖽜 𖼺𖽺𖾑，𖼦𖽔𖾐 𖼄𖽚 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐．𖼦𖽔𖾐 𖼄𖽚 𖼦𖽑𖽺𖾑 𖼳𖽶𖾑 𖼰𖽡𖽦𖾑 𖼽𖽻 𖼀𖽙 𖼣𖽻𖾐． 20 𖼽𖽔 𖼠𖽴𖾑 𖼞𖽑𖽶𖾑 𖼠𖽻𖾐 𖼞𖽳𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼺𖽺𖾑，𖼍𖽡𖾐 𖼷𖽻𖾐 𖼊𖽑𖽺 𖼽𖽡𖾐 𖼖𖽡𖾑 𖼽𖽡𖾐 𖼖𖽚 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 \fr 𖼄𖽡𖾐．