𖼽𖽕𖾑 𖼂𖽚 𖼖𖽔𖾐 𖼦𖽗 𖼄𖽳 𖼖𖽳𖾐 𖼄𖽙𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐
25
1 𖼽𖽕𖾑 𖼂𖽚 𖼖𖽔𖾐 𖼦𖽗 𖼹𖽦𖾑 𖼄𖽳 𖼖𖽳𖾐 𖼊𖽑𖽡 𖼽𖽚𖾐 𖼹𖽶𖾐，𖼰𖽡𖾐 𖼊𖽑𖽪 𖼖𖽔𖾐 𖼄𖽡𖾐． 2 𖼰𖽡𖾐 𖼊𖽑𖽪 𖼖𖽔𖾐 𖼽𖽚𖾐 𖼺𖽪𖾐：𖼳𖽡𖽺𖾐 𖼖𖽕、 𖼽𖽱𖾐 𖼳𖽗𖾐、 𖼄𖽡 𖼍𖽗𖾑、 𖼄𖽡 𖼍𖽡𖽦𖾑、 𖼽𖽡𖾐 𖼳𖽶𖾐 𖼂𖽔𖾐 𖼐𖽺𖾐 𖼳𖽪𖾐 𖼽𖽕𖾑 𖼣𖽻𖾐． 3 𖼽𖽱𖾐 𖼳𖽗𖾐 𖼞𖽳𖾐 𖼻𖽙：𖼳𖽶𖾑 𖼂𖽔𖾐 𖼐𖽺𖾐 𖼍𖽡 𖼍𖽗𖾑 𖼣𖽻𖾐．𖼍𖽡 𖼍𖽗𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐：𖼽𖽕𖾑 𖼳𖽪𖾐 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼖𖽡𖾑 𖼍𖽪𖾐 𖼳𖽶𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼖𖽡𖾑 𖼈𖽪𖾐 𖼄𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼣𖽻𖾐． 4 𖼄𖽡 𖼍𖽡𖽦𖾑 𖼞𖽳𖾐 𖼻𖽙：𖼽𖽡 𖼇𖽕、 𖼽𖽡 𖼇𖽮、 𖼦𖽔𖾐 𖼐𖽚𖾑、 𖼽𖽕𖾑 𖼂𖽡 𖼍𖽕𖾑 𖼐𖽺𖾐 𖼽𖽡 𖼖𖽴𖾑 𖼍𖽕𖾑 𖼣𖽻𖾐．𖼽𖽻 𖼈𖽳𖾐 𖼰𖽡𖾐 𖼊𖽑𖽪 𖼖𖽔𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐．5 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽑𖽙𖾐 𖼮𖽻𖾐 𖼺𖽪𖾐 𖼀𖽑𖽨 𖼽𖽻 𖼻𖽙 𖼽𖽡 𖼺𖽔 𖼊𖽑𖽺 𖼞𖽜 𖼦𖽑𖽙𖾐． 6 𖼽𖽕𖾑 𖼂𖽚 𖼖𖽔𖾐 𖼦𖽗 𖼠𖽙𖾑 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼄𖽡𖽻 𖼐𖽑𖽡 𖼮𖽡 𖼷𖽙𖾐 𖼈𖽴 𖼀𖽜𖾐 𖼽𖽻 𖼄𖽳 𖼖𖽳𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼻𖽙 𖼊𖽑𖽺 𖼄𖽻𖾑，𖼽𖽻 𖼈𖽳𖾐 𖼞𖽜 𖼽𖽻 𖼻𖽙 𖼽𖽡 𖼺𖽔 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼽𖽡𖾐．
𖼽𖽕𖾑 𖼂𖽚 𖼖𖽔𖾐 𖼦𖽗 𖼳𖽶𖾐 𖼦𖽑𖽙𖾐
7 𖼽𖽕𖾑 𖼂𖽚 𖼖𖽔𖾐 𖼦𖽗 𖼊𖽑𖽡 𖼦𖽑𖽙𖾐 𖼳𖽶 𖼷𖽑𖽡𖾐 𖼣𖽙 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐， 8 𖼞𖽑𖽚 𖼊𖽑𖽙 𖼄𖽻 𖼰𖽡，𖼐𖽑𖽡𖾐 𖼦𖽑𖽦 𖼮𖽻𖾐 𖼀𖽡𖾐 𖼺𖽺𖾑，𖼺𖽦 𖼷𖽑𖽦𖾐 𖼳𖽶𖾐 𖼦𖽑𖽙𖾐，𖼀𖽑𖽚𖾐 𖼽𖽻 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼞𖽚 𖼽𖽡𖾐． 9 𖼽𖽻 𖼻𖽙 𖼽𖽡 𖼺𖽔 𖼐𖽺𖾐 𖼽𖽡 𖼳𖽸 𖼄𖽔 𖼖𖽡𖾑 𖼽𖽻 𖼊𖽑𖽺 𖼀𖽑𖽨 𖼄𖽦𖾑 𖼂𖽡 𖼖𖽔𖾐 𖼄𖽡𖾐 𖼊𖽪 𖼳𖽡𖽪𖾐 𖼞𖽑𖽶𖾐 𖼍𖽡𖾑 𖼦𖽑𖽙𖾐．𖼄𖽡𖾐 𖼊𖽪 𖼳𖽡𖽪𖾐 𖼦𖽑𖽺𖾑 𖼄𖽕𖾑 𖼖𖽡𖾑 𖼄𖽡𖾐 𖼊𖽺𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳，𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼺𖽙 𖼳𖽡𖽕 𖼻𖽙 𖼽𖽡 𖼇𖽮 𖼖𖽪𖽦 𖼞𖽳𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼣𖽻𖾐． 10 𖼽𖽕𖾑 𖼂𖽚 𖼖𖽔𖾐 𖼦𖽗 𖽃𖽙𖾑 𖼄𖽺 𖼊𖽑𖽙 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼮𖽑𖽻𖾐，𖼄𖽡𖾐 𖼮𖽑𖽙𖾐 𖼦𖽑𖽺𖾑 𖼈𖽳𖾐 𖼷𖽑𖽦𖾐 𖼖𖽧 𖼀𖽳𖾐 𖼄𖽡𖾐 𖼂𖽺𖾐．𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽻 𖼄𖽳 𖼻𖽙 𖼺𖽔 𖼖𖽔𖾐 𖼊𖽑𖽺 𖼀𖽑𖽨 𖼞𖽑𖽶𖾑 𖼠𖽻𖾐 𖼍𖽡𖾑． 11 𖼽𖽕𖾑 𖼂𖽚 𖼖𖽔𖾐 𖼦𖽗 𖼳𖽶𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽺𖾐 𖼦𖽴 𖼦𖽫 𖼄𖽢 𖼖𖽪 𖼽𖽡 𖼺𖽔 𖼊𖽑𖽺 𖼄𖽻𖾑．𖼞𖽑𖽶𖾑 𖼮𖽶𖾐，𖼽𖽡 𖼺𖽔 𖼂𖽧𖾑 𖽃𖽳 𖼖𖽔𖾐 𖼦𖽺 𖼖𖽦 𖼄𖽡𖾐 𖼊𖽺𖾐 𖼞𖽕 𖼰𖽡𖽺𖾐 𖼮𖽻𖾐．
𖼽𖽡 𖼳𖽸 𖼄𖽔 𖼖𖽡𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐
12 𖼺𖽔 𖼖𖽔𖾐 𖼞𖽳𖾐 𖼮𖽜𖾐 𖼄𖽙𖾐 𖽃𖽦𖾐 𖼰𖽧 𖼺𖽪𖾐 𖼻𖽙 𖼄𖽳 𖼳𖽡𖽕𖾑 𖼰𖽡𖽕 ，𖼽𖽻 𖼽𖽕𖾑 𖼂𖽚 𖼖𖽔𖾐 𖼦𖽗 𖼖𖽙𖾐 𖼀𖽙𖾐 𖼽𖽡 𖼳𖽸 𖼄𖽔 𖼖𖽡𖾑 𖼊𖽑𖽺 𖼽𖽚𖾐．𖼈𖽝 𖼍𖽕𖾑 𖽂𖽚 𖼍𖽙𖾑 𖼺𖽪𖾐 𖼽𖽡 𖼳𖽸 𖼄𖽔 𖼖𖽡𖾑 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽳𖾐 𖼞𖽪𖾐 𖼮𖽡𖽺𖾐 𖼣𖽻𖾐．
13 𖼽𖽡 𖼳𖽸 𖼄𖽔 𖼖𖽡𖾑 𖼞𖽳𖾐 𖼻𖽙，𖼈𖽳 𖼮𖽑𖽻𖾐 𖼽𖽳𖾐 𖼖𖽙𖾐 𖼮𖽑𖽡𖾐，𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼈𖽝 𖼍𖽕𖾑 𖽂𖽚 𖼍𖽙𖾑：𖼻𖽙 𖼈𖽳 𖼐𖽑𖽧 𖼂𖽦𖾑 𖼽𖽱𖾐 𖼣𖽻𖾐，𖼽𖽻 𖼐𖽑𖽳𖾐 𖼄𖽻 𖼰𖽡𖾐 𖼍𖽕、 𖼽𖽔𖾐 𖼍𖽴 𖼂𖽡𖽦、 𖼄𖽡 𖼂𖽡 𖼳𖽔𖾐、 14 𖼄𖽡 𖼳𖽶𖾐 𖼄𖽔、 𖼍𖽪𖾑 𖼄𖽔、 𖼄𖽔 𖼺𖽔、 15 𖼦𖽔𖾐 𖼍𖽕𖾑、 𖼊𖽑𖽧 𖼄𖽔、 𖼽𖽡𖾐 𖼊𖽑𖽪𖾐、 𖼐𖽕 𖼇𖽺𖾐 𖼳𖽶𖾐 𖼐𖽺𖾐 𖼰𖽡𖾐 𖼍𖽡 𖼄𖽔 𖼣𖽻𖾐． 16 𖼽𖽻 𖼈𖽳𖾐 𖼽𖽡 𖼳𖽸 𖼄𖽔 𖼖𖽡𖾑 𖼞𖽳𖾐 𖼻𖽙 𖼣𖽻𖾐，𖼽𖽻 𖼈𖽳𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖼂𖽺𖾐．𖼽𖽻 𖼈𖽳𖾐 𖼞𖽳𖾐 𖼮𖽑𖽡𖽦𖾐 𖼠𖽻𖾐 𖼐𖽺𖾐 𖼄𖽦 𖼀𖽑𖽙 𖼳𖽪𖾐 𖼞𖽳𖾐 𖼄𖽡𖾐 𖼊𖽺𖾐，𖼽𖽻 𖼈𖽳𖾐 𖼄𖽡𖾐 𖼖𖽙𖾐 𖼮𖽑𖽻𖾐 𖼄𖽡𖾐．
17 𖼽𖽡 𖼳𖽸 𖼄𖽔 𖼖𖽡𖾑 𖼊𖽑𖽡 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼳𖽶 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼺𖽦 𖼷𖽑𖽦𖾐 𖼳𖽶𖾐 𖼦𖽑𖽙𖾐，𖼀𖽑𖽚𖾐 𖼽𖽻 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼞𖽚 𖼽𖽡𖾐． 18 𖼽𖽡 𖼳𖽸 𖼄𖽔 𖼖𖽡𖾑 𖼽𖽻 𖼐𖽑𖽳𖾐 𖼄𖽻 𖼞𖽑𖽶𖾑 𖼹𖽻𖾐 𖼮𖽻𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼮𖽻𖾐．𖼽𖽻 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼈𖽧 𖼐𖽑𖽳𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼦𖽔𖾐 𖼇𖽺𖾐 𖼖𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼍𖽪𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼀𖽑𖽡𖽻 𖼳𖽪𖾐 𖽃𖽳 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐 𖼞𖽳𖾐 𖼮𖽻𖾐，𖼦𖽑𖽺𖾑 𖼽𖽕𖾑 𖼳𖽪𖾑 𖼄𖽡𖾐 𖼊𖽺𖾐 𖼽𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼣𖽻𖾐．
𖼽𖽡 𖼺𖽻 𖼐𖽺𖾐 𖼽𖽔 𖼠𖽴𖾑 𖼊𖽑𖽺 𖼽𖽚𖾐
19 𖼽𖽕𖾑 𖼂𖽚 𖼖𖽔𖾐 𖼦𖽗 𖼻𖽙 𖼽𖽡 𖼺𖽔 𖼣𖽻𖾐．𖼽𖽡 𖼺𖽔 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽡𖾐 𖼈𖽝 𖼍𖽕𖾑 𖽂𖽚 𖼍𖽙𖾑： 20 𖼽𖽡 𖼺𖽔 𖼽𖽻 𖼄𖽳 𖼻𖽙 𖼖𖽡𖾑 𖼂𖽦 𖼰𖽡𖽔𖾐 𖼊𖽑𖽺 𖼹𖽶𖾐 𖼞𖽑𖽶𖾑 𖼮𖽶𖾐，𖼖𖽡𖾐 𖼷𖽑𖽡𖾐 𖼞𖽑𖽚 𖼖𖽚．𖼖𖽡𖾑 𖼂𖽦 𖼰𖽡𖽔𖾐 𖼞𖽑𖽶𖾑 𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼽𖽕𖾑 𖼖𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼂𖽡 𖼊𖽑𖽪 𖼖𖽡𖾑 𖼞𖽳𖾐 𖼻𖽙 𖼄𖽳 𖼣𖽻𖾐，𖼽𖽻 𖼍𖽕𖾑 𖼊𖽑𖽺 𖼖𖽔𖾐 𖼂𖽔𖾐 𖼄𖽡𖾐．
21 𖼽𖽡 𖼺𖽔 𖼄𖽳 𖼻𖽙 𖼻𖽙 𖼄𖽡𖾐 𖼐𖽜𖾐 𖼮𖽻𖾐 𖼄𖽔 𖼠𖽸𖾑 𖼺𖽺𖾑，𖼽𖽡 𖼺𖽔 𖼽𖽻 𖼖𖽙𖾐 𖼀𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐．𖼽𖽺𖾐 𖼦𖽴 𖼦𖽫 𖼽𖽻 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚，𖼖𖽡𖾑 𖼂𖽦 𖼰𖽡𖽔𖾐 𖼞𖽜 𖼄𖽺 𖼊𖽦𖾐 𖼦𖽑𖽙𖾐． 22 𖼣𖽜𖾐 𖼷𖽜𖾐 𖼽𖽻 𖼦𖽑𖽦 𖼂𖽙𖾐 𖼞𖽑𖽶𖾐 𖼮𖽻𖾐 𖼷𖽙𖾐 𖼖𖽙𖾐 𖼊𖽜 𖼐𖽑𖽡𖽚𖾐 𖼺𖽺𖾑，𖼽𖽻 𖼀𖽦𖾐：“𖼣𖽙𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼳𖽚𖾑 𖼞𖽑𖽪 𖼐𖽺𖾑？” 𖽃𖽔𖾐 𖼺𖽺𖾑，𖼽𖽻 𖼽𖽡𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼊𖽻 𖼐𖽙𖾐．
23 𖼽𖽺𖾐 𖼦𖽴 𖼦𖽫 𖼽𖽻 𖼊𖽑𖽺 𖼊𖽻 𖼞𖽑𖽚：
“𖼠𖽚 𖼐𖽑𖽡 𖼊𖽝𖾐 𖼐𖽑𖽡𖾐 𖼦𖽑𖽦 𖼂𖽙𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐，𖼀𖽑𖽙 𖼐𖽑𖽡 𖼳𖽶 𖼐𖽑𖽡𖾐 𖼞𖽶𖾐 𖼮𖽑𖽶 𖼞𖽳𖾐 𖼮𖽑𖽻𖾐 𖼽𖽚𖾐 𖼊𖽻𖾐．𖽃𖽔𖾑 𖼞𖽶𖾐 𖼦𖽑𖽺𖾑 𖼳𖽶 𖼀𖽑𖽙 𖼷𖽑𖽜𖾑 𖼷𖽑𖽜𖾐 𖼞𖽑𖽶𖾑 𖼳𖽶 𖼀𖽑𖽙 𖼊𖽑𖽺 𖼠𖽳𖾐，𖼈𖽳 𖼺𖽪𖾐 𖼀𖽑𖽚𖾐 𖼽𖽳𖾐 𖼺𖽪𖾐 𖼞𖽳𖾐 𖼮𖽜𖾐 𖼀𖽑𖽙 𖼀𖽑𖽢 𖼊𖽻𖾐．”
24 𖼳𖽨𖾐 𖼄𖽪𖾐 𖼰𖽶𖾐 𖼮𖽑𖽡𖾐，𖼖𖽡𖾑 𖼂𖽦 𖼰𖽡𖽔𖾐 𖼣𖽜𖾐 𖼷𖽜𖾐 𖼽𖽚𖾐． 25 𖼻𖽙 𖼈𖽳 𖼊𖽑𖽡 𖼞𖽶𖾐 𖼮𖽑𖽶 𖼐𖽑𖽡𖾑 𖼐𖽑𖽡𖾐 𖼮𖽻𖾐，𖼄𖽶𖾐 𖼐𖽜 𖼮𖽡𖾐 𖼀𖽑𖽡𖽻𖾐 𖼖𖽙𖾐 𖼺𖽶𖾑 𖼺𖽺𖾑，𖼽𖽻 𖼊𖽑𖽺 𖼽𖽡 𖼺𖽻 𖼄𖽡𖾐． 26 𖼻𖽙 𖼽𖽳𖾐 𖼽𖽻 𖼠𖽙𖾑 𖼍𖽻𖾐 𖼄𖽳𖾐 𖼄𖽳𖾐 𖼽𖽚𖾐 𖼊𖽑𖽧 𖼖𖽻𖾐，𖼽𖽻 𖼖𖽦 𖼀𖽑𖽦𖾐 𖼽𖽡 𖼺𖽻 𖼮𖽑𖽡𖾐 𖼊𖽻 𖼄𖽳𖾐 𖼵𖽪𖾐 𖼍𖽳𖾐 𖼺𖽺𖾑，𖼽𖽻 𖼊𖽑𖽺 𖼽𖽔 𖼠𖽴𖾑 𖼄𖽡𖾐．𖼖𖽡𖾑 𖼂𖽦 𖼰𖽡𖽔𖾐 𖼻𖽙 𖼣𖽜𖾐 𖼷𖽜𖾐 𖼽𖽚𖾐 𖼞𖽑𖽶𖾑 𖼮𖽶𖾐，𖼽𖽡 𖼺𖽔 𖼮𖽑𖽡𖽚 𖼷𖽑𖽡𖾐 𖼞𖽑𖽚 𖼖𖽚．
27 𖽃𖽔𖾐 𖼞𖽶𖾑 𖼐𖽑𖽡 𖼽𖽚𖾐 𖼖𖽜𖾐 𖼖𖽜𖾐 𖼽𖽚𖾐 𖼈𖽳 𖼍𖽪𖾐 𖼖𖽻𖾐．𖼽𖽡 𖼺𖽻 𖼐𖽑𖽡𖾑 𖼀𖽝𖾐 𖼐𖽑𖽡𖾑 𖼞𖽕 𖼖𖽕𖾐，𖼄𖽡𖾐 𖼳𖽡𖽻𖾐 𖼀𖽙 𖼮𖽻𖾐 𖼺𖽳．𖼽𖽔 𖼠𖽴𖾑 𖼍𖽧𖾑 𖼊𖽧𖾐 𖼊𖽧𖾐 𖼮𖽻𖾐，𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼈𖽶 𖼺𖽳． 28 𖼽𖽡 𖼺𖽔 𖼽𖽻 𖼻𖽙 𖼈𖽳 𖼽𖽡 𖼺𖽻 𖼊𖽑𖽺 𖼮𖽨，𖼞𖽪𖾐 𖼮𖽡𖽺𖾐 𖼄𖽔 𖼐𖽙 𖼄𖽙𖾐 𖼽𖽻 𖼞𖽳𖾐 𖼐𖽑𖽡𖾑 𖼦𖽙 𖼷𖽙．𖼦𖽑𖽻𖾐 𖼊𖽑𖽻𖾐，𖼖𖽡𖾑 𖼂𖽦 𖼰𖽡𖽔𖾐 𖼽𖽻 𖼻𖽙 𖼽𖽳𖾐 𖼽𖽔 𖼠𖽴𖾑 𖼊𖽑𖽺 𖼮𖽨．
29 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽔 𖼠𖽴𖾑 𖼐𖽚𖾐 𖼐𖽑𖽡𖾐 𖼰𖽡𖽦𖾑 𖼞𖽑𖽶𖾑 𖼮𖽶𖾐，𖼽𖽡 𖼺𖽻 𖼄𖽡𖾐 𖼳𖽡𖽻𖾐 𖼀𖽙 𖼮𖽑𖽻𖾐 𖼞𖽚 𖼖𖽻𖾐，𖼦𖽑𖽦 𖼄𖽦 𖽂𖽙 𖼞𖽶𖾐 𖼰𖽡． 30 𖼽𖽡 𖼺𖽻 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼦𖽑𖽦 𖼄𖽦 𖽂𖽙 𖼞𖽶𖾐 𖼰𖽡，𖼐𖽑𖽡𖾐 𖼐𖽚𖾐 𖼰𖽡𖽦𖾑 𖼈𖽡𖾐 𖼣𖽙𖾐 𖼞𖽜 𖼊𖽻𖾐 𖼄𖽺！” 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽡 𖼺𖽻 𖼊𖽑𖽺 𖼽𖽡 𖼍𖽙𖾐 𖼄𖽡𖾐．
31 𖼽𖽔 𖼠𖽴𖾑 𖼀𖽦𖾐：“𖼐𖽑𖽡𖾐 𖽃𖽙𖾑 𖼄𖽺 𖼻𖽙 𖼈𖽳 𖼄𖽡𖾐 𖼊𖽻 𖼈𖽪 𖼣𖽙𖾐 𖼊𖽑𖽺 𖼞𖽜 𖼖𖽡𖾐．”
32 𖼽𖽡 𖼺𖽻 𖼀𖽦𖾐：“𖼣𖽙𖾐 𖼳𖽶𖾐 𖼖𖽻𖾐 𖼮𖽻𖾐 𖼺𖽺𖾑，𖼻𖽙 𖼈𖽳 𖼄𖽡𖾐 𖼊𖽻 𖼦𖽑𖽺𖾑 𖼖𖽡𖾐 𖽃𖽔 𖼊𖽺𖾑 𖼳𖽶 𖼷𖽻 𖼀𖽜𖾐 𖼮𖽻𖾐 𖼐𖽺𖾑？”
33 𖼽𖽔 𖼠𖽴𖾑 𖼀𖽦𖾐：“𖼐𖽑𖽡𖾐 𖽃𖽙𖾑 𖼄𖽺 𖼣𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼖𖽡𖾐．” 𖽃𖽔𖾐 𖼺𖽺𖾑，𖼽𖽡 𖼺𖽻 𖼽𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼻𖽙 𖼈𖽳 𖼄𖽡𖾐 𖼊𖽻 𖼈𖽪 𖼽𖽔 𖼠𖽴𖾑 𖼊𖽑𖽺 𖼞𖽜 𖼦𖽑𖽙𖾐．
34 𖼽𖽔 𖼠𖽴𖾑 𖽃𖽔𖾑 𖼂𖽻𖾐 𖼐𖽺𖾐 𖼐𖽚𖾐 𖼐𖽑𖽡𖾐 𖼰𖽡𖽦𖾑 𖼈𖽡𖾐 𖼈𖽺𖾐 𖼽𖽡 𖼺𖽻 𖼊𖽑𖽺 𖼞𖽜，𖼽𖽻 𖼷𖽙 𖼊𖽻𖾐 𖼦𖽑𖽙𖾐 𖼺𖽺𖾑，𖼍𖽪𖾐 𖼖𖽻𖾐 𖼺𖽜 𖼽𖽡𖾐．𖼽𖽡 𖼺𖽻 𖼦𖽑𖽺𖾑 𖼻𖽻𖾐 𖼻𖽙 𖼈𖽳 𖼄𖽡𖾐 𖼊𖽻 𖼊𖽑𖽺 𖼐𖽦𖾐 𖼄𖽔 𖼍𖽪𖾐．