𖼷𖽑𖽻𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼀𖽑𖽚𖾐 𖼊𖽦
3
1 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼞𖽑𖽙𖾐 𖼹𖽸𖾑 𖼊𖽑𖽧 𖼖𖽻𖾐 𖼺𖽪𖾐 𖼐𖽑𖽡𖾑 𖼻𖽙 𖼣𖽕𖾐 𖼐𖽜𖾐，𖼖𖽙𖾐 𖼳𖽳𖾐 𖼍𖽺𖾑 𖼦𖽑𖽔𖾐 𖼮𖽶𖾐 𖼊𖽝𖾑 𖼞𖽚 𖼳𖽶 𖼣𖽻𖾐．𖼖𖽙𖾐 𖼳𖽳𖾐 𖼻𖽙 𖼄𖽳 𖼖𖽙𖾐 𖼀𖽦𖾐：“𖽂𖽙𖾐 𖼺𖽙𖾐 𖼂𖽙𖾐 𖼠𖽕𖾐 𖼰𖽶𖾐 𖼀𖽦𖾐 𖼠𖽚，𖼐𖽑𖽡𖾐 𖼈𖽳𖾐 𖼞𖽜 𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽻𖾐 𖼞𖽑𖽶𖾐 𖼞𖽑𖽙𖾐 𖼣𖽻𖾐 𖼳𖽶 𖼺𖽧𖾐 𖼷𖽡𖾐 𖼊𖽑𖽺 𖼺𖽳 𖼄𖽙𖾐 𖽂𖽙𖾐 𖼷𖽙 𖼄𖽔 𖼊𖽙𖾐 𖼖𖽔𖾑？”2 𖼻𖽙 𖼄𖽳 𖼖𖽙𖾐 𖼳𖽳𖾐 𖼖𖽙𖾐 𖼀𖽦𖾐：“𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽻𖾐 𖼞𖽑𖽶𖾐 𖼞𖽑𖽙𖾐 𖼣𖽻𖾐 𖼳𖽶 𖼺𖽧𖾐 𖼷𖽡𖾐 𖼊𖽑𖽺 𖼺𖽳 𖼄𖽙𖾐，𖼣𖽙𖾐 𖼈𖽳𖾐 𖽂𖽙𖾐 𖼷𖽙 𖼊𖽙𖾐 𖼍𖽳𖾐． 3 𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽻𖾐 𖼞𖽑𖽶𖾐 𖼺𖽧𖾐 𖼞𖽑𖽶𖾑 𖼷𖽡𖾐 𖼊𖽑𖽺 𖼺𖽳 𖼄𖽙𖾐 𖼍𖽺𖾑 𖽂𖽙 𖼺𖽙𖾐 𖼂𖽙𖾐 𖼀𖽦𖾐 𖼠𖽚：‘ 𖼐𖽑𖽡𖾐 𖼈𖽳𖾐 𖽂𖽙𖾐 𖼷𖽙 𖼄𖽔 𖼊𖽙𖾐，𖽂𖽙𖾐 𖼍𖽪 𖼄𖽔 𖼊𖽙𖾐．𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼞𖽜 𖼳𖽶𖾐 𖼠𖽸𖾑 𖼊𖽻𖾐．’”
4 𖼖𖽙𖾐 𖼳𖽳𖾐 𖼻𖽙 𖼄𖽳 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼳𖽶𖾐 𖼄𖽔 𖼠𖽸𖾑 𖼊𖽻𖾐． 5 𖼞𖽪𖾐 𖼮𖽡𖽺𖾐，𖽂𖽙𖾐 𖼺𖽙𖾐 𖼂𖽙𖾐 𖼺𖽝𖾑，𖼐𖽑𖽡𖾐 𖼈𖽳𖾐 𖼷𖽙 𖼞𖽑𖽶𖾑 𖼮𖽶𖾐 𖼄𖽡𖾐 𖼀𖽻𖾐 𖼦𖽑𖽻𖾐 𖼺𖽺𖾑，𖽂𖽙𖾐 𖼺𖽙𖾐 𖼂𖽙𖾐 𖼖𖽙𖾐 𖼺𖽶𖾑 𖼹𖽳𖾐 𖼊𖽶𖾐 𖼺𖽝𖾑 𖼊𖽻𖾐．”
6 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼐𖽦𖾐 𖼄𖽡𖽻𖾐，𖼺𖽧𖾐 𖼷𖽡𖾐 𖼊𖽑𖽺 𖼺𖽳 𖼄𖽙𖾐 𖼞𖽑𖽶𖾑 𖼦𖽑𖽔𖾐 𖼮𖽶𖾐 𖼷𖽙 𖼄𖽡𖾐 𖼳𖽡𖾐 𖼊𖽙𖾐，𖼄𖽦𖾐 𖼊𖽪 𖼐𖽦𖾐 𖼖𖽺𖾑 𖼹𖽳𖾐 𖼷𖽑𖽚，𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼞𖽜 𖼦𖽑𖽻𖾑 𖼍𖽪𖾐 𖼖𖽻𖾐，𖼷𖽑𖽻𖾐 𖼞𖽜 𖼈𖽪𖾐 𖼺𖽝𖾑 𖽂𖽙𖾐 𖼮𖽻𖾐 𖼊𖽙𖾐．𖽃𖽔𖾐 𖼺𖽺𖾑，𖼽𖽻 𖼺𖽳 𖼄𖽙𖾐 𖼷𖽑𖽝𖾐 𖼹𖽺𖾐 𖼖𖽻𖾐 𖼷𖽙 𖼦𖽑𖽙𖾐，𖼹𖽦𖾑 𖼈𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼀𖽑𖽙 𖼊𖽑𖽺 𖼞𖽜，𖼽𖽻 𖼷𖽑𖽻𖾐 𖼀𖽑𖽙 𖼖𖽺𖾑 𖼷𖽙 𖼦𖽑𖽙𖾐． 7 𖼐𖽕 𖼊𖽺𖾐，𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼄𖽡𖾐 𖼀𖽻𖾐 𖼦𖽑𖽻𖾐 𖼺𖽺𖾑，𖼽𖽻 𖼄𖽳𖾑 𖼞𖽶𖾐 𖼮𖽑𖽶 𖼖𖽜 𖼣𖽻𖾐 𖼺𖽝𖾑．𖽃𖽔𖾐 𖼺𖽺𖾑 𖼮𖽑𖽡 𖼺𖽳 𖼄𖽡 𖼀𖽑𖽦 𖼷𖽑𖽝𖾐 𖼂𖽻𖾐 𖼖𖽻𖾐 𖼐𖽝 𖼈𖽦，𖼽𖽻 𖼄𖽳𖾑 𖼳𖽡𖽦𖾑 𖼍𖽻𖾐 𖼊𖽪𖾐 𖼮𖽑𖽨𖾑．
8 𖼄𖽶 𖼳𖽡𖽺𖾐 𖼮𖽑𖽸𖾑 𖼮𖽑𖽸 𖼮𖽝 𖼍𖽪𖾐 𖼖𖽻𖾐，𖼞𖽑𖽶𖾑 𖼮𖽶𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽻𖾐 𖼞𖽑𖽶𖾐 𖼺𖽜 𖼽𖽡𖾐 𖼖𖽻𖾐．𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼐𖽺𖾐 𖼽𖽻 𖼄𖽳 𖼻𖽙 𖼊𖽻 𖼮𖽨 𖼺𖽺𖾑，𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽻𖾐 𖼊𖽑𖽺 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼀𖽑𖽻𖾐 𖼈𖽜，𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼀𖽑𖽡𖽻 𖼊𖽑𖽺 𖼮𖽡𖽪 𖼂𖽡𖽚𖾐． 9 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖽃𖽶𖾐，𖼀𖽦𖾐：“𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
10 𖼽𖽻 𖼊𖽻 𖼞𖽑𖽚：“𖼣𖽙𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽻𖾐 𖼞𖽑𖽶𖾐 𖼮𖽻𖾐 𖼐𖽑𖽡𖾐 𖼮𖽑𖽡𖽪 𖼀𖽺𖾐 𖼊𖽻 𖼮𖽨 𖼺𖽺𖾑 𖼮𖽡𖽮𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼞𖽶𖾐 𖼮𖽑𖽶 𖼖𖽜 𖼄𖽙𖾐 𖼣𖽻𖾐 𖼺𖽺𖾑，𖼣𖽙𖾐 𖼮𖽡𖽪 𖼂𖽡𖽚𖾐 𖼦𖽑𖽙𖾐．”
11 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼐𖽑𖽡𖾐 𖼞𖽶𖾐 𖼮𖽑𖽶 𖼖𖽜 𖼄𖽙𖾐 𖼮𖽻𖾐 𖼺𖽪𖾐，𖽃𖽔 𖼺𖽺 𖼐𖽑𖽡𖾐 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼣𖽻𖾐 𖼐𖽺𖾑？𖼣𖽙𖾐 𖼐𖽑𖽡𖾐 𖼊𖽑𖽺 𖼞𖽑𖽙𖾐 𖼀𖽦𖾐 𖼄𖽪𖾑 𖽂𖽙𖾐 𖼷𖽙 𖼄𖽔 𖼊𖽙𖾐 𖼺𖽪𖾐 𖼺𖽧𖾐 𖼞𖽑𖽶𖾑 𖼷𖽡𖾐 𖼊𖽑𖽺 𖼞𖽳𖾐 𖼺𖽳 𖼄𖽙𖾐，𖼐𖽑𖽡𖾐 𖼷𖽙 𖼦𖽑𖽙𖾐 𖼺𖽪𖾐 𖼣𖽻𖾐 𖼖𖽔？”
12 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽦𖾐：“𖼐𖽑𖽡𖾐 𖼖𖽪 𖼣𖽙𖾐 𖼊𖽑𖽺 𖼞𖽜，𖼣𖽙𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼺𖽪𖾐 𖼻𖽙 𖼄𖽳 𖼞𖽑𖽶𖾑 𖼽𖽚𖾐，𖼽𖽻 𖼺𖽧𖾐 𖼞𖽑𖽶𖾑 𖼷𖽡𖾐 𖼊𖽑𖽺 𖼞𖽳𖾐 𖼺𖽳 𖼄𖽙𖾐 𖼷𖽑𖽝𖾐 𖼣𖽙𖾐 𖼞𖽜 𖼺𖽺𖾑，𖼣𖽙𖾐 𖼷𖽙 𖼦𖽑𖽙𖾐．”
13 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼻𖽙 𖼄𖽳 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼐𖽺𖾑？” 𖼻𖽙 𖼄𖽳 𖼀𖽦𖾐：“𖼖𖽙𖾐 𖼳𖽳𖾐 𖼣𖽙𖾐 𖼊𖽑𖽺 𖼇𖽪 𖼺𖽺𖾑，𖼣𖽙𖾐 𖼷𖽙 𖼦𖽑𖽙𖾐．”
𖼽𖽺𖾐 𖼮𖽑𖽡𖽪𖾑 𖼖𖽙𖾐 𖼀𖽙𖾐 𖼮𖽙 𖼰𖽪𖾑 𖼄𖽳𖾐
14 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼳𖽳𖾐 𖼊𖽑𖽺 𖼀𖽦𖾐：“𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼂𖽺𖾐 𖼦𖽑𖽙𖾐，𖽃𖽔𖾐 𖼺𖽺𖾑 𖼣𖽙𖾐 𖼐𖽑𖽡𖾐 𖼊𖽑𖽺 𖼳𖽶 𖼊𖽻 𖼐𖽙𖾐，𖼐𖽑𖽡𖾐 𖼞𖽜 𖼞𖽑𖽙𖾐 𖼣𖽻𖾐 𖼳𖽶 𖼮𖽡𖽺 𖼐𖽺𖾐 𖼐𖽑𖽡𖾑 𖼳𖽶𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼮𖽙 𖼰𖽪𖾑 𖼄𖽳𖾐 𖼊𖽻𖾐，𖼐𖽑𖽡𖾐 𖼞𖽜 𖼷𖽑𖽜𖾑 𖼷𖽑𖽜𖾐 𖼦𖽑𖽦 𖼂𖽙𖾐 𖼻𖽜 𖼄𖽡𖾑 𖼐𖽦𖾐 𖼦𖽚𖾐 𖼺𖽜，𖼊𖽑𖽡 𖼻𖽳𖾐 𖼐𖽑𖽡𖾑 𖼦𖽑𖽻 𖼞𖽑𖽶𖾐 𖼖𖽪𖾐 𖼖𖽡𖾐．
15 𖼣𖽙𖾐 𖼐𖽑𖽡𖾐 𖼞𖽜 𖼺𖽺𖾑 𖼻𖽙 𖼄𖽳 𖼖𖽙𖾐 𖼮𖽑𖽻𖾐 𖼮𖽡𖾐 𖼂𖽦𖾐 𖼊𖽑𖽪，𖼐𖽑𖽡𖾐 𖼮𖽑𖽪𖾐 𖼐𖽺𖾐 𖼻𖽙 𖼄𖽳 𖼞𖽳𖾐 𖼻𖽙 𖼖𖽡𖾑 𖼖𖽺𖾑 𖼷𖽙𖾐 𖼖𖽙𖾐 𖼮𖽡𖾐 𖼂𖽦𖾐 𖼊𖽑𖽪，𖼽𖽻 𖼐𖽑𖽡𖾐 𖼈𖽪𖾑 𖼊𖽡𖾐 𖼊𖽑𖽺 𖼊𖽝 𖼊𖽻𖾐，𖼐𖽑𖽡𖾐 𖼽𖽻 𖼮𖽑𖽡𖾐 𖼊𖽻 𖼄𖽳𖾐 𖼊𖽑𖽺 𖼞𖽑𖽴 𖼊𖽻𖾐．”
16 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼻𖽙 𖼄𖽳 𖼖𖽙𖾐 𖼀𖽦𖾐：
“𖼐𖽑𖽡𖾐 𖼞𖽶𖾐 𖼮𖽑𖽶 𖼄𖽺 𖼊𖽦𖾐 𖼞𖽑𖽶𖾑 𖼮𖽶𖾐，
𖼣𖽙𖾐 𖼐𖽑𖽡𖾐 𖼞𖽜 𖼠𖽻𖾐 𖼰𖽡𖽳𖾐 𖼈𖽳 𖼈𖽳 𖼷𖽶𖾐 𖼊𖽻𖾐．
𖼐𖽑𖽡𖾐 𖼻𖽙 𖼄𖽡𖾐 𖼐𖽜𖾐 𖼽𖽚𖾐 𖼞𖽑𖽶𖾑 𖼮𖽶𖾐 𖼳𖽚𖾑 𖼞𖽑𖽪 𖼰𖽡 𖼊𖽻𖾐．
𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼷𖽑𖽻𖾐 𖼀𖽑𖽙 𖼊𖽑𖽺 𖼦𖽑𖽻𖾑 𖼷𖽑𖽚，𖼽𖽻 𖼊𖽑𖽺 𖼮𖽳 𖼍𖽡 𖼊𖽡 𖼮𖽑𖽻．
𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼷𖽑𖽻𖾐 𖼀𖽑𖽙 𖼷𖽑𖽜𖾑 𖼷𖽑𖽜𖾐 𖼀𖽑𖽚𖾐 𖼐𖽑𖽡𖾐 𖼊𖽑𖽺 𖼠𖽕 𖼍𖽡 𖼊𖽻𖾐．”
17 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼽𖽕𖾑 𖼍𖽗𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽑𖽡𖾐 𖼄𖽳 𖼻𖽙 𖼖𖽙𖾐 𖼮𖽻𖾑 𖼊𖽴 𖼺𖽺𖾑，𖼣𖽙𖾐 𖼐𖽑𖽡𖾐 𖼊𖽑𖽺 𖼀𖽦𖾐 𖼄𖽪𖾑 𖽂𖽙𖾐 𖼷𖽙 𖼄𖽔 𖼊𖽙𖾐 𖼺𖽪𖾐 𖼺𖽧𖾐 𖼞𖽑𖽶𖾑 𖼷𖽡𖾐 𖼊𖽑𖽺 𖼞𖽳𖾐 𖼺𖽳 𖼄𖽙𖾐 𖼷𖽙 𖼦𖽑𖽙𖾐．𖽃𖽔𖾐 𖼺𖽺𖾑，𖼄𖽡𖾐 𖼖𖽺𖾑 𖼐𖽑𖽡𖾐 𖼖𖽙𖾐 𖼀𖽙𖾐 𖼮𖽙 𖼰𖽪𖾑 𖼄𖽳𖾐 𖼊𖽻𖾐，𖼐𖽑𖽡𖾐 𖼊𖽑𖽡 𖼻𖽳𖾐 𖼄𖽡𖽻 𖼄𖽪𖾐 𖼳𖽚𖾑 𖼞𖽑𖽪 𖼺𖽺𖾑，𖼄𖽡𖾐 𖼠𖽻𖾐 𖼮𖽑𖽻𖾐 𖼷𖽙 𖼊𖽪𖾐 𖽂𖽙𖾐 𖼊𖽙𖾐．
18 𖼐𖽑𖽡𖾐 𖼖𖽙𖾐 𖼀𖽙𖾐 𖼺𖽺𖾑，𖼄𖽡𖾑 𖼐𖽦𖾐 𖼖𖽺𖾑 𖽃𖽔𖾑 𖼮𖽑𖽪 𖼐𖽺𖾐 𖼖𖽜𖾑 𖼀𖽑𖽜 𖼐𖽜 𖼊𖽑𖽧 𖼖𖽻𖾐 𖼊𖽻𖾐，𖼐𖽑𖽡𖾐 𖼖𖽺𖾑 𖼄𖽡𖾐 𖼠𖽻𖾐 𖼈𖽻 𖼊𖽑𖽺 𖼷𖽙 𖼖𖽡𖾐．
19 𖼐𖽑𖽡𖾐 𖼠𖽳𖾑 𖼐𖽑𖽡𖾐 𖼠𖽳𖾑 𖼷𖽦𖾐 𖼄𖽪𖾐 𖽂𖽙 𖼺𖽺𖾑 𖼷𖽙 𖼊𖽪𖾐 𖽂𖽙𖾐 𖼷𖽙 𖼊𖽙𖾐，𖼀𖽑𖽚𖾐 𖼐𖽑𖽡𖾑 𖼄𖽶𖾐 𖼞𖽑𖽶𖾑 𖼞𖽚 𖼽𖽡𖾐 𖼰𖽶𖾐 𖼮𖽑𖽡𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼦𖽑𖽺𖾑 𖼐𖽑𖽡𖾑 𖼄𖽶𖾐 𖼞𖽑𖽶𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐．𖼐𖽑𖽡𖾐 𖼐𖽑𖽡𖾑 𖼄𖽶𖾐 𖼣𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼀𖽑𖽚𖾐 𖼐𖽑𖽡𖾑 𖼄𖽶𖾐 𖼞𖽑𖽶𖾐 𖼞𖽚 𖼽𖽡𖾐 𖼖𖽡𖾐．”
𖼷𖽑𖽻𖾐 𖼊𖽑𖽺 𖼮𖽑𖽨𖾐 𖼖𖽪𖾐 𖼞𖽪𖾐 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐
20 𖼽𖽕𖾑 𖼍𖽗𖾐 𖼽𖽻 𖼄𖽳 𖼻𖽙 𖼊𖽑𖽺 𖼳𖽡𖽕𖾑 𖽂𖽕 \fr 3．20 \ft 𖼳𖽡𖾐 𖼂𖽚 𖼖𖽦 𖼊𖽻 𖼈𖽪𖾐 “𖼳𖽡𖽕𖾑 𖽂𖽕” 𖼀𖽦𖾐 𖼺𖽪𖾐 “𖼞𖽑𖽙𖾐 𖼣𖽻𖾐 𖼷𖽑𖽻𖾐 𖼞𖽳𖾐 𖽃𖽔 𖼄𖽙𖾐 ” 𖼣𖽻𖾐． 𖼄𖽡𖾐 𖼞𖽜．𖼞𖽪𖾐 𖼮𖽡𖽺𖾐，𖼽𖽻 𖼞𖽑𖽙𖾐 𖼣𖽻𖾐 𖼷𖽑𖽻𖾐 𖼞𖽳𖾐 𖽃𖽔 𖼄𖽙𖾐 𖼣𖽻𖾐． 21 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼮𖽡𖽺 𖼮𖽡𖾐 𖼈𖽺𖾐 𖼽𖽕𖾑 𖼍𖽗𖾐 𖼐𖽺𖾐 𖼽𖽻 𖼄𖽳 𖼻𖽙 𖼖𖽙𖾐 𖼀𖽙𖾐 𖼀𖽑𖽡𖽻𖾐 𖼷𖽑𖽶 𖼂𖽺𖾐，𖼽𖽻 𖼈𖽳𖾐 𖼞𖽜 𖼈𖽦．
22 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽃𖽔 𖼐𖽺𖾑 𖼖𖽙𖾐 𖼺𖽶𖾑，𖼹𖽳𖾐 𖼊𖽶𖾐 𖼺𖽝𖾑 𖼠𖽸𖾑 𖼦𖽑𖽻𖾐．𖽃𖽔𖾑 𖼄𖽳𖾐 𖼽𖽻 𖼹𖽦𖾑 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼺𖽺𖾑，𖼈𖽪𖾑 𖼠𖽻𖾐 𖼀𖽻𖾐 𖼺𖽳 𖼷𖽡𖾐 𖼊𖽑𖽺 𖼺𖽳 𖼄𖽙𖾐 𖼷𖽑𖽝𖾐 𖼷𖽙 𖼊𖽑𖽡𖾑 𖼣𖽻𖾐，𖼽𖽻 𖼻𖽳𖾐 𖼻𖽳𖾐 𖼠𖽙𖾑 𖼍𖽳𖾐 𖼊𖽻𖾐．” 23 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼽𖽡𖾐 𖼍𖽡𖽦𖾑 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽳𖾐 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐，𖼽𖽻 𖼞𖽜 𖼽𖽻 𖼞𖽑𖽙𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼺𖽪𖾐 𖼞𖽳𖾐 𖼐𖽑𖽡𖾑 𖼄𖽶𖾐 𖼠𖽻𖾐 𖼞𖽑𖽶𖾐 𖼄𖽡𖾐 𖼄𖽙 𖼄𖽡𖾐 𖼳𖽶𖾑 𖼽𖽡𖾐． 24 𖼦𖽑𖽺𖾑 𖼖𖽙𖾐 𖼺𖽶𖾑 𖼺𖽺𖾑，𖼽𖽕𖾑 𖼍𖽗𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐．𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼄𖽶 𖼹𖽡𖾐 𖼖𖽦 𖼰𖽡𖾐 𖼖𖽪𖾑 𖼂𖽚 𖼊𖽑𖽺 𖼹𖽡𖾐 𖼽𖽡𖾐 𖼍𖽡𖽦𖾑 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼮𖽻𖾐，𖼦𖽑𖽔𖾐 𖼖𖽺𖾑 𖽃𖽔𖾐 𖼍𖽚𖾑 𖼊𖽚𖾐 𖼰𖽻𖾐 𖼠𖽸𖾑 𖼺𖽪𖾐 𖽃𖽔𖾑 𖼊𖽑𖽙 𖼀𖽑𖽨 𖼺𖽺𖾑，𖼈𖽪𖾑 𖼠𖽻𖾐 𖼀𖽻𖾐 𖼺𖽳 𖼷𖽡𖾐 𖼞𖽳𖾐 𖼽𖽡𖾐 𖼮𖽨𖾐 𖼄𖽙𖾐 𖼊𖽑𖽺 𖼳𖽪𖾐 𖼍𖽡 𖼦𖽑𖽙𖾐．