3 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼀𖽜𖾐 𖼖𖽜𖾐 𖼮𖽻𖾐 𖼖𖽡𖾐！” 𖽃𖽔𖾐 𖼺𖽺𖾑 𖼀𖽜𖾐 𖼖𖽜𖾐 𖼮𖽻𖾐 𖼦𖽑𖽻𖾐． 4 𖽂𖽙 𖼺𖽙𖾐 𖼂𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖼀𖽜𖾐 𖼖𖽜𖾐 𖼦𖽑𖽺𖾑 𖼹𖽳𖾐 𖼳𖽶 𖼣𖽻𖾐，𖽃𖽔𖾐 𖼺𖽺𖾑 𖼀𖽜𖾐 𖼖𖽜𖾐 𖼐𖽺𖾐 𖼐𖽦𖾑 𖼐𖽦𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼦𖽑𖽙𖾐． 5 𖽂𖽙 𖼺𖽙𖾐 𖼂𖽙𖾐 𖼀𖽜𖾐 𖼖𖽜𖾐 𖼊𖽑𖽺 𖼄𖽶 𖼐𖽑𖽡𖾐 𖼄𖽡𖾐，𖼐𖽦𖾑 𖼐𖽦𖾐 𖼊𖽑𖽺 𖼄𖽶 𖼦𖽑𖽦 𖼄𖽡𖾐．

𖼄𖽶 𖼦𖽑𖽦 𖼮𖽻𖾐，𖼄𖽶 𖼐𖽑𖽡𖾐 𖼮𖽻𖾐，𖼦𖽑𖽺𖾑 𖽂𖽙 𖼊𖽺𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼣𖽻𖾐．

6 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖽃𖽔𖾐 𖼮𖽡𖽦𖾐 𖼠𖽻𖾐 𖼊𖽑𖽺 𖼞𖽳𖾐 𖼄𖽶 𖼖𖽙𖾐 𖼀𖽙 𖼮𖽻𖾐 𖼺𖽺𖾑，𖽃𖽔𖾐 𖼮𖽡𖽦𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼖𖽡𖾐！” 𖽃𖽔𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼦𖽑𖽻𖾐． 7 𖽂𖽙 𖼺𖽙𖾐 𖼂𖽙𖾐 𖼄𖽶 𖼖𖽙𖾐 𖼀𖽙 𖼹𖽸𖾑 𖼊𖽑𖽧 𖼖𖽻𖾐，𖼄𖽶 𖼖𖽙𖾐 𖼀𖽙 𖼞𖽕 𖼂𖽻𖾑 𖼞𖽳𖾐 𖽃𖽔𖾐 𖼮𖽡𖽦𖾐 𖼐𖽺𖾐 𖼄𖽶 𖼖𖽙𖾐 𖼀𖽙 𖽂𖽚 𖼞𖽑𖽶𖾐 𖼞𖽳𖾐 𖽃𖽔𖾐 𖼮𖽡𖽦𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼦𖽑𖽙𖾐． 8 𖽂𖽙 𖼺𖽙𖾐 𖼂𖽙𖾐 𖼄𖽶 𖼖𖽙𖾐 𖼀𖽙 𖼊𖽑𖽺 𖼄𖽶 𖼠𖽻𖾐 𖼄𖽡𖾐．

𖼄𖽶 𖼦𖽑𖽦 𖼮𖽻𖾐，𖼄𖽶 𖼐𖽑𖽡𖾐 𖼮𖽻𖾐，𖼦𖽑𖽺𖾑 𖼐𖽑𖽡 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼣𖽻𖾐．

9 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼞𖽳𖾐 𖽃𖽔𖾐 𖼮𖽡𖽦𖾐 𖼞𖽜 𖼷𖽙𖾐 𖼖𖽙𖾐 𖼻𖽶𖾑 𖼊𖽑𖽡 𖼄𖽦𖾐 𖼖𖽻𖾐，𖼦𖽡𖽳𖾑 𖼄𖽡𖾐 𖼞𖽜 𖼊𖽑𖽦 𖼊𖽚𖾐 𖼊𖽑𖽧 𖼖𖽻𖾐 𖼖𖽡𖾐！” 𖽃𖽔𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼦𖽑𖽻𖾐． 10 𖽂𖽙 𖼺𖽙𖾐 𖼂𖽙𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼄𖽡𖾑 𖼐𖽦𖾐 𖼄𖽡𖾐，𖼷𖽙𖾐 𖼖𖽙𖾐 𖼻𖽶𖾑 𖼞𖽳𖾐 𖽃𖽔𖾐 𖼮𖽡𖽦𖾐 𖼊𖽑𖽺 𖼦𖽜𖾐 𖼄𖽙𖾐 𖼄𖽡𖾐．𖽂𖽙 𖼺𖽙𖾐 𖼂𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖼦𖽑𖽺𖾑 𖼹𖽳𖾐 𖼳𖽶 𖼣𖽻𖾐．

11 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽙𖾐 𖼣𖽻𖾐 𖼳𖽶 𖼺𖽧𖾐 𖼷𖽡𖾐 𖼳𖽶𖾑 𖼀𖽺，𖼺𖽳 𖼄𖽙𖾐 𖼊𖽴 𖼺𖽪𖾐 𖼺𖽧𖾐 𖼷𖽡𖾐 𖼐𖽺𖾐 𖼳𖽶𖾑 𖼄𖽙𖾐 𖼊𖽴 𖼺𖽪𖾐 𖼈𖽻 𖼐𖽜 𖼊𖽑𖽧 𖼖𖽻𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐 𖼖𖽡𖾐；𖼺𖽳 𖼄𖽙𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼺𖽳 𖼐𖽑𖽧𖾐 𖼈𖽶 𖼖𖽡𖾐．” 𖽃𖽔𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼦𖽑𖽻𖾐． 12 𖼄𖽡𖾑 𖼐𖽦𖾐 𖼊𖽑𖽺 𖼺𖽧𖾐 𖼷𖽡𖾐 𖼳𖽶𖾑 𖼀𖽺 𖼐𖽺𖾐 𖼳𖽶𖾑 𖼄𖽙𖾐 𖼊𖽴 𖼺𖽪𖾐 𖼈𖽻 𖼐𖽜 𖼊𖽑𖽧 𖼖𖽻𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐；𖼦𖽑𖽔𖾐 𖼖𖽺𖾑 𖼺𖽳 𖼄𖽙𖾐 𖼊𖽴 𖼺𖽪𖾐 𖼺𖽧𖾐 𖼷𖽡𖾐 𖼐𖽜 𖼊𖽑𖽧 𖼖𖽻𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐，𖼺𖽳 𖼄𖽙𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼺𖽳 𖼐𖽑𖽧𖾐 𖼈𖽶．𖽂𖽙 𖼺𖽙𖾐 𖼂𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖼦𖽑𖽺𖾑 𖼹𖽳𖾐 𖼳𖽶 𖼣𖽻𖾐．

13 𖼄𖽶 𖼦𖽑𖽦 𖼮𖽻𖾐，𖼄𖽶 𖼐𖽑𖽡𖾐 𖼮𖽻𖾐，𖼦𖽑𖽺𖾑 𖼺𖽙𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼣𖽻𖾐．

14 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼄𖽶 𖼠𖽻𖾐 𖼊𖽑𖽺 𖼀𖽜𖾐 𖼖𖽜𖾐 𖼊𖽚𖾐 𖼊𖽪𖾐 𖼮𖽻𖾐 𖼺𖽺𖾑，𖼄𖽶 𖼐𖽑𖽡𖾐 𖼐𖽺𖾐 𖼄𖽶 𖼦𖽑𖽦 𖼊𖽑𖽺 𖼀𖽜𖾐 𖼀𖽑𖽪𖾐，𖼽𖽻 𖼈𖽳𖾐 𖼞𖽜 𖼺𖽙 𖼂𖽺𖾐、 𖼊𖽑𖽙 𖼰𖽶𖾐、 𖼐𖽑𖽡𖾐 𖼦𖽑𖽦 𖼐𖽺𖾐 𖼞𖽑𖽚 𖼳𖽨𖾐 𖼊𖽑𖽺 𖼀𖽜𖾐 𖼀𖽑𖽪𖾐 𖼊𖽑𖽧 𖼖𖽻𖾐 𖼖𖽡𖾐． 15 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼞𖽜 𖼄𖽶 𖼠𖽻𖾐 𖼊𖽑𖽺 𖼮𖽻𖾐 𖼀𖽜𖾐 𖼖𖽜𖾐 𖼊𖽚𖾐，𖼄𖽡𖾑 𖼐𖽦𖾐 𖼊𖽑𖽺 𖼄𖽡𖽻𖾐 𖼮𖽨𖾐 𖼖𖽡𖾐！” 𖽃𖽔𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼦𖽑𖽻𖾐． 16 𖽂𖽙 𖼺𖽙𖾐 𖼂𖽙𖾐 𖼀𖽜𖾐 𖼖𖽜𖾐 𖼊𖽚𖾐 𖼊𖽪𖾐 𖼈𖽳 𖼐𖽑𖽡 𖼊𖽝𖾐 𖼹𖽸𖾑 𖼊𖽑𖽧 𖼖𖽻𖾐，𖼈𖽳 𖼺𖽪𖾐 𖼄𖽶 𖼐𖽑𖽡𖾐 𖼞𖽜 𖼀𖽜𖾐 𖼖𖽜𖾐，𖼽𖽳𖾐 𖼺𖽪𖾐 𖼄𖽶 𖼦𖽑𖽦 𖼞𖽜 𖼀𖽜𖾐 𖼖𖽜𖾐，𖼽𖽻 𖼦𖽑𖽔𖾐 𖼖𖽺𖾑 𖼠𖽳𖾐 𖼊𖽑𖽺 𖼹𖽸𖾑 𖼦𖽑𖽻𖾐． 17 𖽂𖽙 𖼺𖽙𖾐 𖼂𖽙𖾐 𖼀𖽜𖾐 𖼖𖽜𖾐 𖼊𖽚𖾐 𖼊𖽪𖾐 𖼦𖽑𖽺𖾑 𖼹𖽻𖾐 𖼀𖽑𖽨 𖼄𖽶 𖼠𖽻𖾐 𖼊𖽑𖽺 𖼍𖽙𖾑，𖼀𖽜𖾐 𖼖𖽜𖾐 𖼊𖽚𖾐 𖼄𖽡𖾑 𖼐𖽦𖾐 𖼊𖽑𖽺 𖼄𖽡𖽻𖾐 𖼮𖽨𖾐， 18 𖼀𖽜𖾐 𖼖𖽜𖾐 𖼐𖽺𖾐 𖼐𖽦𖾑 𖼐𖽦𖾐 𖼊𖽑𖽺 𖼀𖽜𖾐 𖼀𖽑𖽪𖾐，𖽃𖽔𖾑 𖼐𖽑𖽡 𖼞𖽪𖾐 𖽃𖽔𖾑 𖼄𖽶 𖼐𖽑𖽡𖾐 𖼮𖽻𖾐，𖽃𖽔𖾑 𖼄𖽶 𖼮𖽑𖽧 𖼳𖽨𖾐 𖼀𖽙𖾐 𖼮𖽻𖾐．𖽂𖽙 𖼺𖽙𖾐 𖼂𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖼦𖽑𖽺𖾑 𖼹𖽳𖾐 𖼳𖽶 𖼣𖽻𖾐．

19 𖼄𖽶 𖼦𖽑𖽦 𖼮𖽻𖾐，𖼄𖽶 𖼐𖽑𖽡𖾐 𖼮𖽻𖾐，𖼦𖽑𖽺𖾑 𖼖𖽡𖾐 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼣𖽻𖾐．

20 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖽃𖽔𖾐 𖼮𖽡𖽦𖾐 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾑 𖼐𖽺𖾐 𖼠𖽙𖾑 𖼺𖽦 𖼮𖽻𖾐 𖼺𖽪𖾐 𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐 𖼖𖽡𖾐，𖼄𖽶 𖼖𖽙𖾐 𖼀𖽙 𖼊𖽑𖽺 𖼣𖽕𖾐 𖼞𖽜 𖼮𖽻𖾐 𖼺𖽺𖾑 𖼀𖽨𖾐 𖼖𖽡𖾐．” 21 𖽃𖽔𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼣𖽙𖾑 𖼈𖽳 𖼊𖽑𖽺 𖼐𖽺𖾐 𖽃𖽔𖾐 𖼮𖽡𖽦𖾐 𖼠𖽻𖾐 𖼞𖽑𖽶𖾐 𖼞𖽑𖽙𖾐 𖼣𖽻𖾐 𖼳𖽶 𖼠𖽙𖾑 𖼺𖽦 𖼮𖽻𖾐 𖼺𖽪𖾐 𖼊𖽑𖽺 𖼹𖽸𖾑 𖼊𖽑𖽧 𖼖𖽻𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐．𖼦𖽑𖽔𖾐 𖼖𖽺𖾑 𖼞𖽑𖽙𖾐 𖼣𖽻𖾐 𖼳𖽶 𖼣𖽕𖾐 𖼊𖽑𖽺 𖼹𖽸𖾑 𖼊𖽑𖽧 𖼖𖽻𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐．𖽂𖽙 𖼺𖽙𖾐 𖼂𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖼦𖽑𖽺𖾑 𖼹𖽳𖾐 𖼳𖽶 𖼣𖽻𖾐． 22 𖽂𖽙 𖼺𖽙𖾐 𖼂𖽙𖾐 𖼄𖽢 𖼖𖽪 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼊𖽑𖽺 𖼞𖽜，𖼀𖽦𖾐：“𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐，𖼦𖽜𖾐 𖼄𖽙𖾐 𖽃𖽔𖾐 𖼮𖽡𖽦𖾐 𖼮𖽻 𖼀𖽡𖾐 𖼮𖽨𖾐 𖼖𖽡𖾐．𖼣𖽕𖾐 𖼖𖽺𖾑 𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽻𖾐 𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐 𖼖𖽡𖾐．”

23 𖼄𖽶 𖼦𖽑𖽦 𖼮𖽻𖾐，𖼄𖽶 𖼐𖽑𖽡𖾐 𖼮𖽻𖾐，𖼦𖽑𖽺𖾑 𖼣𖽙 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼣𖽻𖾐．

24 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼄𖽡𖾑 𖼐𖽦𖾐 𖼊𖽑𖽺 𖼠𖽙𖾑 𖼺𖽦 𖼮𖽻𖾐 𖼺𖽪𖾐 𖼞𖽜 𖼀𖽑𖽙 𖼊𖽑𖽧 𖼖𖽻𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐 𖼖𖽡𖾐．𖼮𖽡𖽺、 𖼄𖽝𖾐 𖼺𖽜 𖼺𖽪𖾐 𖼀𖽶 𖼊𖽡𖾐 𖼐𖽺𖾐 𖼄𖽡𖾑 𖼐𖽦𖾐 𖼊𖽑𖽺 𖼞𖽳𖾐 𖼐𖽑𖽡𖾑 𖼳𖽶𖾐，𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐 𖼖𖽡𖾐．” 𖽃𖽔𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼦𖽑𖽻𖾐． 25 𖽂𖽙 𖼺𖽙𖾐 𖼂𖽙𖾐 𖼄𖽡𖾑 𖼐𖽦𖾐 𖼊𖽑𖽺 𖼞𖽳𖾐 𖼹𖽸𖾑 𖼊𖽑𖽧 𖼖𖽻𖾐 𖼺𖽪𖾐 𖼐𖽑𖽡𖾑 𖼳𖽶𖾐 𖼞𖽜 𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐，𖼮𖽡𖽺 𖼞𖽜 𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐，𖼄𖽝𖾐 𖼺𖽜 𖼺𖽪𖾐 𖼀𖽶 𖼊𖽡𖾐 𖼞𖽜 𖼽𖽻 𖼄𖽳𖾑 𖼽𖽻 𖼳𖽶 𖼖𖽙𖾐 𖼮𖽑𖽻𖾐．𖽂𖽙 𖼺𖽙𖾐 𖼂𖽙𖾐 𖼐𖽦𖾐 𖼂𖽻𖾐 𖼖𖽻𖾐，𖼦𖽑𖽺𖾑 𖼹𖽳𖾐 𖼳𖽶 𖼣𖽻𖾐．

26 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖽃𖽔 𖼐𖽺𖾑 𖼽𖽚 𖼖𖽙𖾐 𖼮𖽑𖽻𖾐 𖼷𖽑𖽻𖾐 𖼹𖽸𖾑 𖼺𖽺𖾑，𖼽𖽻 𖼈𖽳𖾐 𖼞𖽜 𖽃𖽔 𖼐𖽺𖾑 𖼖𖽙𖾐 𖼺𖽶𖾑 𖼖𖽡𖾐．𖼽𖽻 𖼈𖽳𖾐 𖼞𖽜 𖼦𖽜𖾐 𖼄𖽙𖾐 𖼠𖽻𖾐 𖼞𖽑𖽶𖾐 𖼣𖽙𖾑，𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐，𖼦𖽑𖽔𖾐 𖼖𖽺𖾑 𖼄𖽡𖾑 𖼐𖽦𖾐 𖼊𖽑𖽺 𖼮𖽡𖽺 𖼐𖽺𖾐 𖼞𖽑𖽙𖾐 𖼣𖽻𖾐 𖼳𖽶 𖼄𖽝𖾐 𖼺𖽜 𖼺𖽪𖾐 𖼀𖽶 𖼊𖽡𖾐 𖼊𖽑𖽺 𖼠𖽕 𖼖𖽡𖾐．”

27 𖽃𖽔𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼽𖽻 𖼄𖽳𖾑 𖼽𖽚 𖼖𖽙𖾐 𖼮𖽑𖽻𖾐 𖼷𖽑𖽻𖾐 𖼹𖽸𖾑．

𖼽𖽻 𖼷𖽑𖽻𖾐 𖼹𖽸𖾑 𖼺𖽪𖾐 𖼽𖽻 𖼽𖽚 𖼖𖽙𖾐 𖼮𖽑𖽻𖾐 𖼹𖽸𖾑 𖼳𖽶 𖼣𖽻𖾐，

𖼽𖽻 𖼞𖽑𖽙𖾐 𖼹𖽸𖾑 𖼺𖽪𖾐 𖼻𖽙 𖼐𖽜𖾐 𖼮𖽻𖾐，𖼻𖽙 𖼄𖽳 𖼮𖽻𖾐．

28 𖽂𖽙 𖼺𖽙𖾐 𖼂𖽙𖾐 𖼄𖽢 𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑，𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼀𖽡𖾐 𖼖𖽡𖾐．𖼐𖽑𖽡𖾐 𖼈𖽳𖾐 𖼄𖽡𖾑 𖼐𖽦𖾐 𖼊𖽑𖽺 𖼠𖽕 𖼖𖽡𖾐，𖼦𖽑𖽔𖾐 𖼖𖽺𖾑 𖼄𖽡𖾑 𖼐𖽦𖾐 𖼊𖽑𖽺 𖼄𖽝𖾐 𖼺𖽜 𖼠𖽙𖾑 𖼺𖽦 𖼮𖽻𖾐 𖼺𖽪𖾐，𖼦𖽜𖾐 𖼄𖽙𖾐 𖼠𖽻𖾐 𖼞𖽑𖽶𖾐 𖼣𖽙𖾑 𖼐𖽺𖾐 𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐 𖼄𖽳𖾑 𖼄𖽳 𖼊𖽑𖽺 𖼠𖽕 𖼖𖽡𖾐．”

29 𖽂𖽙 𖼺𖽙𖾐 𖼂𖽙𖾐 𖼀𖽦𖾐：“𖼐𖽦𖾐 𖼄𖽺！ 𖼣𖽙𖾐 𖼄𖽡𖾑 𖼐𖽦𖾐 𖼊𖽑𖽺 𖼳𖽶𖾑 𖼄𖽙𖾐 𖼊𖽴 𖼺𖽪𖾐 𖼞𖽑𖽙𖾐 𖼣𖽻𖾐 𖼳𖽶 𖼈𖽻 𖼐𖽺𖾐 𖼺𖽳 𖼷𖽡𖾐 𖼊𖽑𖽺 𖼺𖽳 𖼐𖽑𖽧𖾐 𖼞𖽑𖽙𖾐 𖼈𖽶 𖼺𖽪𖾐 𖼺𖽳 𖼄𖽙𖾐，𖼄𖽳𖾑 𖼄𖽳 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼷𖽙 𖼊𖽪𖾐 𖼂𖽺𖾐． 30 𖼞𖽑𖽙𖾐 𖼄𖽡𖾑 𖼐𖽦𖾐 𖼊𖽑𖽺 𖼄𖽝𖾐 𖼺𖽜 𖼠𖽙𖾑 𖼺𖽦 𖼮𖽻𖾐 𖼺𖽪𖾐，𖼄𖽡𖾑 𖼐𖽦𖾐 𖼊𖽑𖽺 𖼐𖽑𖽡𖾑 𖼳𖽶𖾐 𖼐𖽺𖾐 𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐，𖼽𖽻 𖼈𖽳𖾐 𖼊𖽑𖽺 𖼣𖽙𖾐 𖼺𖽧𖾐 𖼷𖽡𖾐 𖼳𖽶𖾑 𖼀𖽺 𖼖𖽪 𖼞𖽜 𖼷𖽙 𖼊𖽪𖾐 𖼂𖽺𖾐 𖼊𖽻𖾐．” 𖽃𖽔𖾐 𖼺𖽺𖾑，𖼄𖽡𖽻 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼦𖽑𖽻𖾐．

31 𖽂𖽙 𖼺𖽙𖾐 𖼂𖽙𖾐 𖼽𖽻 𖼞𖽑𖽙𖾐 𖼹𖽸𖾑 𖼊𖽑𖽧 𖼖𖽻𖾐 𖼺𖽪𖾐 𖼊𖽑𖽺 𖼐𖽦𖾐，𖼦𖽑𖽔𖾐 𖼮𖽶𖾐 𖼹𖽳𖾐 𖼳𖽶 𖼣𖽻𖾐．

𖼄𖽶 𖼦𖽑𖽦 𖼮𖽻𖾐，𖼄𖽶 𖼐𖽑𖽡𖾐 𖼮𖽻𖾐，𖼦𖽑𖽺𖾑 𖼮𖽑𖽡𖽚 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼣𖽻𖾐．