Nyaraga cĩ ẽẽn Iyyio cĩ ẽhẽẽd
Yoanẽ
Thawinet cĩ õkkõ ĩcĩ Gauthi
1
Aneeta Yoanẽ makayyioit cĩ lemnyiowu, cĩ keheedi Nyaraga coo. Keheedi na gõõna cannĩ Gauth, et cĩ kamĩnani õrrõt thõõtha cĩ ẽẽn dĩdĩ.2 Gõõna cannĩ cĩ kamĩnani, kalayyie na kathĩ ne, abũnna woccia ngĩ aavẽ niia jurrung, ĩthõng abũnna ma ngĩ aatĩ kaala vẽlẽk ĩcunni jurrung, kõdẽ kĩ ngĩ abũnna ririwacĩ cunnie buu. 3 Katali balna õrrõt ngatĩ kathĩknẽ ĩcĩ gotoonogiet õõgĩ cĩk avvu aduwacca etheca ne, athũnnẽ niia thõõth cĩ Nyekuco jurrung, ĩthõng gõõ owobu thõõth cĩ ẽẽn dĩdĩ. 4 Katali na õrrõt ngatĩ kathĩknẽ athĩ ne, athũnnĩ doolia cĩganniek thõõth cĩ ẽẽn dĩdĩ.
Gõõl cĩ kathũnnĩ ticcianniok cĩk Makayyioktak
5 Gõõna cannĩ cĩ thĩnĩnu, abũnna õrrõt ngatĩ athũnnẽ niia thõõth cĩ Nyekuco dõõkĩthĩ gõõla cĩ ẽẽlẽ lemnyiok, kõdẽ woyyia ngĩ ẽẽn nẽẽgẽ eet cĩk kĩrẽẽng ĩcunni. 6 Uduktiak nẽẽgẽ meelitin cĩ lemnyiok cĩk kelethiawaka mĩnan cunni. Ĩthõng abũnna katĩ ngĩ itioni niia ĩnõõgõ kõõt tiica cĩnĩng, gõõla cĩ woccia itioninie ticcianniowa cĩk Nyekucak. 7 Ma balna ngĩ ĩtĩngathõ nẽẽgẽ, õõt uduktiak eet õõgĩ thõõth cĩ Kiristo, abũrĩ balna nẽẽgẽ ngatĩ ẽlẽmĩ elinit ĩmma ĩcĩ eet cĩk athii cĩ ẽẽn lemnyiok. 8 Kadiim woccia thẽk naaga kẽẽl eet cĩk õgõõn kĩ nẽẽgẽ, kĩĩ katĩ woccia kiticantõy kõdõwẽ kĩ ĩnõõgõ gõõla cĩ kalimanẽcĩ eet thõõth cĩ ẽẽn dĩdĩ.
9 Ketehedĩha balna na meelitin cĩk lemnyiok cĩk kelethiawak nyaraga ĩmma, ĩthõng thĩ, balna kẽnnẽ atarnanĩ Dioterevothĩb ngatĩ adiim thẽk ngĩ ẽẽn makayyioit, ĩthõng athii cĩ adiim nẽ ngĩ athĩknet ageeta. 10 Ma ngĩ kikiyyia na, kakuni katĩ kaduwai thoothonniok cĩk adĩman nẽ, kĩ thoothonniok cĩk gerthek cĩk othoothiet nẽ ageeta eetĩnẽy gwantĩk. Ĩthõng ũtũbũr nẽ ngatĩ ẽlẽmĩ lemnyiok. Ĩthõng naboo, alaam lemnyiok cĩk adiim thẽk ngĩ ẽẽl ĩnõõgõ, ĩthõng itingka ĩnõõgõ meelitina cĩ lemnyiok cĩk kelethiawak.
11 Gõõna cannĩ cĩ thĩnĩnu, nyĩ eyehethi niia thoothonniok cĩk gerthek, ĩthõng thĩ, yẽhẽth thoothonniok cĩk abũnna. Eeti ĩmma cĩ atican thoothonniok cĩk abũnna, aku Nyekuca. Ĩthõng eeti ĩmma cĩ atican thoothonniok cĩk gerthek, athii nẽ cĩ aga Nyekuc. 12 Ẽkẽb eeta vẽlẽk bũnnathĩt cĩ Demetiriothĩ, ĩthõng aduwa thõõth wũ ẽẽn dĩdĩ buu. Kõthõõththa naaga buu ĩnõõnõ jurrung, ĩthõng aga niia ngatĩ ẽẽn thõõth cĩ kaduwana naaga wo dĩdĩ.
Thawinet cĩ aturna
13 Kayai thõõth cobbi õrrõt cĩ kadiimi ngĩ kaduwaci aniitia, ĩthõng thĩ kẽnnẽ, athii cĩ kadiimi ngĩ kẽhẽdaci nyaragawa. 14 Kamui kakuni katĩ kacinni aniitia tamanoko, ĩthõng nẽnnẽ katĩ kivitia kothoothiõy kĩcĩntõy nguumti.
15 Kalayyie na kathĩ ne, anyĩk Nyekuc kagatani aniitia ganõna! Ĩthayyi goonogu cĩk aatĩ ngato. Thaa goonogiet natẽ codoi codoi.