1 Kòrítòbhá Ɨ 12

Tà tanɨ Tɨrɨ́ Lólo dré adrélé fèle dhɨ ɨ

1 Áma adrúpi ɨ, kàdré tà tanɨ Tɨrɨ́ Lólo dré adrélé fèle dhɨ kɨ tà sè dhɨ, má adré lèá mɨ̀ kònì tà bàti tà nda ɨ dri be. 2 Mɨ̀ nì tàle dhɨ, mɨ̀ dré tá adréràꞌa pàgánò ɨ ró dhɨ ꞌá dhɨ, mɨ̀ tayɨ́ tá àmɨ adrélé tatsílé gìká tàko kɨtswábhá kúlí ta bwà ko dhɨ ɨ vésè dhɨ be. 3 Ásà dhɨ, má adré tà bàti ta àmɨ dré: Dhya àlo adrélépi tà ta Gìká nɨ Tɨrɨ́ nɨ rìnyí sè dhɨ kɨtswá tàá dhɨ «Tátrɨ́trɨ́ kàdré Yésu dri!» dhɨ bwà ko. Kòdhɨ ɨ́be dhɨ, dhya àlo kɨtswá tàá dhɨ «Yésu Mírì ꞌɨ!» dhɨ bwà ko, kàdré ngbà ꞌí Tɨrɨ́ Lólo nɨ rìnyí sè ko dhɨ.

4 Tà tanɨ Tɨrɨ́ Lólo dré adrélé fèle dhɨ ɨ twátwa. Dɨ, Tɨrɨ́ àlo nda adré ɨ́na fèá nɨ̀. 5 Láti adrézó Mírì nɨ àzí ꞌo dhɨ ɨ twátwa. Dɨ, à adré àzí nda kɨ ꞌo Mírì àlo nda dré. 6 Tà Gìká dré adrélé ꞌòle móndɨ́ ɨ ꞌásè dhɨ ɨ twátwa. Dɨ, Gìká àlo nda adré tà títí nda kɨ ꞌo móndyá títí dhɨ ɨ ꞌásè dhɨ nɨ̀.

7 Gìká adré áyɨ Tɨrɨ́ nɨ rìnyí tadhá móndyá kaꞌìbhá àlo àlo títí dhɨ ɨ rú, adrézó tà dóro ꞌo àyɨ títí nda ɨ dré. 8 Dhya àlo dré dhɨ, Tɨrɨ́ nda adré rìnyí adrézó kúlí ta tògyá sè dhɨ nɨ fe kòdhya. Dhya àzya dré dhɨ, Tɨrɨ́ àlo nda adré rìnyí adrézó kúlí ta tà nìnì sè dhɨ nɨ fe kòdhya. 9 Àzya nɨ dré dhɨ, Tɨrɨ́ àlo nda adré rìnyí adrézó Gìká nɨ kaꞌì togó wä́yi sè dhɨ nɨ fe kòdhya. Àzya nɨ dré dhɨ, Tɨrɨ́ àlo nda adré rìnyí adrézó móndɨ́ kɨ drà tɨdrɨ́ dhɨ nɨ fe kòdhya. 10 Àzya nɨ dré dhɨ, adré rìnyí adrézó tà lɨ́ndrɨ́ga ró dhɨ kɨ ꞌo dhɨ nɨ fe kòdhya. Àzya nɨ dré dhɨ, adré rìnyí adrézó Gìká nɨ kúlí longó pròfétà àdhya tɨ́nɨ dhɨ nɨ fe kòdhya. Àzya nɨ dré dhɨ, adré rìnyí adrézó tɨrɨ́ twátwa dhɨ kɨ ni lanzɨ́lé dhɨ nɨ fe kòdhya. Àzya nɨ dré dhɨ, adré rìnyí adrézó ti twátwa kɨ ta dhɨ nɨ fe kòdhya. Àzya nɨ dré dhɨ, adré rìnyí adrézó ti twátwa nda kɨ kúlí àndu ngɨ dhɨ nɨ fe kòdhya. 11 Tɨrɨ́ àlo kwákwá nda adré tà títí nda kɨ ꞌo nɨ̀. Adré rìnyí twátwa nda kɨ lanzɨ́ móndɨ́ àlo àlo títí ɨ dré, ngóró ɨ́ dré adrélé lèle ꞌòle dhɨ tɨ́nɨ.

Rúbhá àlo kɨ̀gá nɨ ɨ́be bǐ dhɨ

12 Dhyá kɨ rúbhá ngá àlo dhɨ ꞌɨ, gba dré adrézó kɨ̀gá ɨ́be bǐ dhɨ. Krísto nɨ tà kókpà kòdhɨ tɨ́nɨ. Gba rúbhá nɨ nɨ kɨ̀gá ɨ̀ dré adrézó bǐ dhɨ, rúbhá nda ngbà ꞌí àlo. 13 Tàko ko, à fè bàtísimò àma títí dhɨ ɨ dré Tɨrɨ́ Lólo àlo dhɨ nɨ rìnyí sè, mà kàdréró rúbhá àlo ró, gba mà kàdré Yúdà ànzɨ ꞌɨ yà, móndɨ́ súrú twá ro dhɨ ꞌɨ yà, màrábà ꞌɨ yà, kó ngalè móndɨ́ màrábà ro ko dhɨ ꞌɨ yà dhɨ. Gìká bhà Tɨrɨ́ àlo nda adrélé àma títí dhɨ ɨ léna.

14 Rúbhá nda nɨ kɨ̀gá ngbà ꞌí àlo ko. Be ró dhɨ, rúbhá nda kɨ̀gá ɨ́be bǐ. 15 Tágba rúbhá nda nɨ pá kòtà tá dhɨ «Má dré adrélé drɨ́gá ꞌɨ ko dhɨ sè dhɨ, ma rúbhá nɨ kɨ̀gá ꞌɨ ko» dhɨ, pá nda nɨ tá adré ngbú rè rúbhá nda nɨ kɨ̀ga ró. 16 Kó ngalè, bí nɨ kòtà tá dhɨ «Má dré adrélé mì ꞌɨ ko dhɨ sè dhɨ, ma rúbhá nɨ kɨ̀gá ꞌɨ ko» dhɨ, bí nda nɨ tá adré ngbú rè rúbhá nda nɨ kɨ̀ga ró. 17 Kònò rúbhá wä́yi dhɨ kàdré tá mì ꞌɨ yà dhɨ, a nɨ tá kɨtswá tà yi ngɨ́nɨ? Kó ngalè, rúbhá wä́yi dhɨ kàdré tá bí ꞌɨ yà dhɨ, a nɨ tá kɨtswá ngá tàdzí ngu ngɨ́nɨ? 18 Tà bàti ró dhɨ, Gìká tobhà kɨ̀gá àlo àlo títí dhɨ ɨ rúbhá léna ngóró ɨ́ dré tá lèle ꞌòle dhɨ tɨ́nɨ. 19 Kɨ̀gá nda ɨ̀ kàdré tá ngbà ꞌí àlo dhɨ, kònò rúbhá nda kɨtswá tá adrélé ko. 20 Tà bàti ró dhɨ, rúbhá nɨ kɨ̀gá ɨ bǐ. Dɨ, rúbhá nda ɨ́na ngbà ꞌí àlo.

21 Rúbhá nda nɨ mì kɨtswá ɨ́na tàá drɨ́gá dré dhɨ «Ámɨ lovó má rú yó!» dhɨ bwà ko. Kó ngalè, drì nɨ kɨtswá ɨ́na tàá pá dré dhɨ «Ámɨ lovó má rú yó!» dhɨ bwà ko. 22 Tàko ko, rúbhá nɨ kɨ̀gá adrélé nòle yàyà dhɨ ɨ̀ kàdré tá yó dhɨ, kònò rúbhá nda kɨtswá tá tà ꞌo bwà ko. 23 Rúbhá nɨ kɨ̀gá mà dré adrélé nòle lɨndrɨ̀ àko ró dhɨ ɨ, mà adré àyɨ nda kɨ lɨndrɨ̀ bha kɨ̀gá àruka títí dhɨ kya kɨ lavú. Rúbhá nɨ kɨ̀gá kɨtswábhá adrélé nòle ko dhɨ ɨ, mà adré àyɨ nda kɨ lɨkɨ́ kɨ̀gá àruka títí dhɨ kɨ lavú. 24 Dɨ, mà adré ꞌòá kònɨ̀nɨ rúbhá nɨ kɨ̀gá kɨtswábhá adrélé nòle dhɨ kɨ tà sè ko. Dɨ, Gìká amú ɨ́na rúbhá nɨ kɨ̀gá ɨ títí, lɨndrɨ̀ fèzo kɨ̀gá adrébhá tá lɨndrɨ̀ àko dhɨ ɨ dré, 25 tà adrézó ru lanzɨ́ dhɨ kàdréró rúbhá nda na yó, be ró dhɨ, kɨ̀gá nda ɨ̀ kàdréró àyɨ kɨ àzya kɨ tà kisù. 26 Ásà dhɨ, kɨ̀gá àlo dhɨ kàdré kɨzà nya dhɨ, kɨ̀gá àruka títí dhɨ ɨ̀ adré kókpà kɨzà nya túmä́ní akódhɨ be. Kɨ̀gá àlo dhɨ kàdré rúku kisú dhɨ, kɨ̀gá àruka títí dhɨ ɨ̀ adré lenzélé túmä́ní akódhɨ be.

27 Àmɨ ró dhɨ, àmɨ Krísto nɨ rúbhá ꞌɨ. Àmɨ àlo àlo títí dhɨ ɨ rúbhá nda nɨ kɨ̀gá ꞌɨ. 28 Gìká bhà tá rè zyà àpóstolò ɨ adrélé drìdrì Èkèlézyà na gò, pròfétà kɨ bhàzo àyɨ àmvolésè gò, dhya adrébhá tà tadhá dhɨ kɨ bhàzo àyɨ àmvolésè. Àmvolásà dhɨ, bhà tá dhya adrébhá tà lɨ́ndrɨ́ga ró dhɨ kɨ ꞌo dhɨ ɨ, dhya adrébhá móndɨ́ kɨ drà tɨdrɨ́ dhɨ ɨ́be, dhya adrébhá móndɨ́ kɨ ledé dhɨ ɨ́be, dhya adrébhá móndɨ́ kɨ drì ko dhɨ ɨ́be, tsàle dhya adrébhá ti twátwa kɨ ta dhɨ ɨ́be. 29 Dɨ móndyá títí dhɨ ɨ àpóstolò ꞌɨ ko. Àyɨ títí dhɨ ɨ pròfétà ꞌɨ ko. Àyɨ títí dhɨ ɨ tà tadhábhá ꞌɨ ko. Àyɨ títí dhɨ ɨ rìnyí ɨ́be adrézó tà lɨ́ndrɨ́ga ró dhɨ kɨ ꞌo ko, 30 adrézó móndɨ́ kɨ drà tɨdrɨ́ ko, adrézó ti twátwa kɨ ta ko, adrézó ti twátwa nda kɨ kúlí àndu ngɨ ko. 31 Dɨ, àmɨ kɨ togó kàdré ɨ́na àtsɨ ró, kɨtswázó tà tanɨ lavúlé Tɨrɨ́ Lólo dré adrélé fèle dhɨ kɨ kisú.

Nyànomvá dhɨ, má nɨ láti dóro láti àruka títí dhɨ kɨ lavúlépi dhɨ nɨ tadhá àmɨ dré kòdhya.