Rómàbhá Ɨ 12

Àma kɨ fèma mòbòmà ro Gìká dré dhɨ

1 Dɨ ásà dhɨ, áma adrúpi ɨ, má adré àmɨ kɨ kodzó kònɨ̀nɨ: Gìká dré áyɨ togó dóro tadhálé àmɨ dré dhɨ sè dhɨ, mɨ̀ kàdré àmɨ kɨ rúbhá kɨ fe akódhɨ dré ngóró mòbòmà lólo lɨ́drɨ̀ ro kɨtswábhá akódhɨ mìlésè dhɨ ɨ ró. Kòdhɨ lɨ̀sámbò bàti mɨ̀ dré adrélé ꞌòle akódhɨ nɨ rú sè dhɨ ꞌɨ. 2 Mɨ̀ kòfè àmɨ adrélé ru su tà móndyá bvò kòndɨ àdhya ɨ̀ dré adrélé ꞌòle dhɨ ɨ́be ko. Be ró dhɨ, mɨ̀ kòtayɨ́ àmɨ Gìká dré adrélé ladzálé, dré adrélé àmɨ kɨ tà kisùkisù ꞌo atsálé tɨ́dhɨ́ ro dhɨ sè. Mɨ̀ kòꞌo kònɨ̀nɨ dhɨ, mɨ̀ nɨ dɨ kɨtswá tà kɨ kòfalé ni lanzɨ́lé, adrézó tà Gìká dré adrélé lèle mɨ̀ kòꞌo dhɨ kɨ kaꞌì ꞌòle. Tà dré adrélé lèle mɨ̀ kòꞌo nda kòdhɨ ɨ, tà dóro kɨtswábhá títí akódhɨ mìlésè dhɨ ꞌɨ.

3 Gìká nɨ togó tanɨ bhàle má rú dhɨ sè dhɨ, má adré tàá àmɨ àlo àlo títí dhɨ ɨ dré dhɨ: Mɨ̀ kàdré àmɨ kɨ tà kisù tà kàdrɨ̀ ro ngóró dré kɨtswálé àmɨ sè ko dhɨ tɨ́nɨ ko. Be ró dhɨ, mɨ̀ kàdré àmɨ kɨ tà kisù tògyá sè, ngóró Gìká dré tà kaꞌìkaꞌì fèle àmɨ àlo àlo títí dhɨ ɨ dré dhɨ tɨ́nɨ. 4 Àma àlo àlo títí dhɨ ɨ rúbhá ɨ́be àlo. Dɨ, rúbhá nda ɨ́na kɨ̀gá ɨ́be bǐ, ɨ̀ndɨ̀ kɨ̀gá nda ɨ̀ adré àzí twátwa dhɨ kɨ ꞌo. 5 Kókpà kòdhɨ tɨ́nɨ, àma zyandre dhɨ ɨ, mà amú ru atsálé rúbhá àlo ró Krísto na, ɨ̀ndɨ̀ àma títí dhɨ ɨ rúbhá àlo nda nɨ kɨ̀gá ꞌɨ. 6 Àma àlo àlo títí dhɨ ɨ, mà kisú rìnyí twátwa dhɨ ɨ, ngóró Gìká dré áyɨ togó tanɨ bhàle àma rú dhɨ tɨ́nɨ. Dɨ dhya àlo kòkisú rìnyí adrézó Gìká nɨ kúlí longó pròfétà àdhya tɨ́nɨ dhɨ, kàdré kúlí nda nɨ longó ngóró Gìká dré tà kaꞌìkaꞌì fèle drá dhɨ tɨ́nɨ. 7 Dhya àzya kòkisú ɨ́na rìnyí adrézó tà ꞌo móndɨ́ ɨ dré dhɨ, kàdré áyɨ fe adrélé tà nda kɨ ꞌo. Dhya àzya kòkisú ɨ́na rìnyí adrézó móndɨ́ kɨ tadhá dhɨ, kàdré áyɨ fe adrélé àyɨ nda kɨ tadhá. 8 Dhya àzya kàdré ɨ́na móndɨ́ kɨ kodzó dhɨ, kàdré áyɨ fe adrélé àyɨ nda kɨ kodzó. Dhya àzya kàdré ɨ́na ngá fe móndɨ́ ɨ dré dhɨ, kàdré ngá nda kɨ fe togó dóro sè. Dhya àzya kàdré ɨ́na móndɨ́ kɨ drì ko dhɨ, kàdré àyɨ nda kɨ drì ko togó wä́yi sè. Dhya àzya kàdré ɨ́na móndɨ́ kɨ kɨzà bha dhɨ, kàdré àyɨ nda kɨ kɨzà bha togó kɨ̀nɨ́ sè.

Lèle nɨ tà

9 Lè mɨ̀ kàdré móndɨ́ kɨ le togó wä́yi sè, túrúpfú àko. Mɨ̀ kàdré tà kònzɨ ga, adrézó tròle tà dóro rú. 10 Mɨ̀ kàdré ru le àmɨ kòfalésè ngóró adrúpi ɨ tɨ́nɨ. Mɨ̀ kàdré láti nda adrézó àmɨ kɨ adrúpi kɨ lɨndrɨ̀ bha àmɨ kòfalésè. 11 Mɨ̀ kàdré tà ꞌo togó wä́yi sè, adrézó tòbvo ró ko. Be ró dhɨ, àmɨ kɨ togó kàdré ɨ́na àtsɨ ró adrézó tà ꞌo Mírì dré akódhɨ nɨ màrábà tɨ́nɨ. 12 Mɨ̀ kàdré lenzélé, adrézó mì bha Gìká véna. Mɨ̀ kàdré togó tsɨ, mɨ̀ dré adréràꞌa kɨzà nya dhɨ ꞌá. Mɨ̀ kàdré àmɨ kɨ fe adrélé tà zi Gìká tí landè àko ró. 13 Mɨ̀ kàdré àmɨ kɨ ngá lanzɨ́ móndyá Gìká àdhya adrébhá lemerè ro dhɨ ɨ dré. Mɨ̀ kàdré móndɨ́ kɨ kaꞌì dòle àmɨ véna togó dóro sè.

14 Mɨ̀ kàdré tà tanɨ zi Gìká tí móndyá adrébhá àmɨ kɨ mì pfo dhɨ ɨ dri. Àyíya, mɨ̀ kàdré tà tanɨ zi àyɨ nda ɨ dri, mɨ̀ kòtatrɨ́ àyɨ ko. 15 Mɨ̀ kàdré lenzélé túmä́ní móndyá adrébhá lenzélé dhɨ ɨ́be. Mɨ̀ kàdré kpà àwó ngo túmä́ní móndyá adrébhá àwó ngo dhɨ ɨ́be. 16 Mɨ̀ kàdré àmɨ kɨ adrúpi kɨ tà kisù, adrézó ngá àlo ró àmɨ kòfalésè. Mɨ̀ kàdré drìkàdrɨ̀ ro ko. Be ró dhɨ, mɨ̀ kàdré àmɨkya ru su móndɨ́ tàko ɨ́be. Mɨ̀ kàdré kpà àmɨ kɨ no tògyabhá ro ko.

17 Mɨ̀ kàdré tà kònzɨ logó tà kònzɨ ꞌòle àmɨ rú dhɨ tí ko. Mɨ̀ kàdré tà adrébhá dóro móndyá títí ɨ mìlésè dhɨ kɨ nda ꞌòle. 18 Kòkɨtswá dhɨ, tà títí mɨ̀ dré adrélé ꞌòle dhɨ ɨ sè dhɨ, mɨ̀ kàdré tà kɨ̀drɨ́kɨ̀drɨ lɨkɨ́ àmɨ kòfalé móndyá títí dhɨ ɨ́be. 19 Áma arúpi má dré lèle tò nɨ ɨ, dhya àlo kòꞌo tà kònzɨ àmɨ rú dhɨ, mɨ̀ kòlogó tà kònzɨ nda nɨ vúdrì drá ko. Be ró dhɨ, mɨ̀ kòtayɨ́ láti Gìká dré adrézó áyɨ kombà tadhá. Tàko ko, Mírì adré tàá áyɨ Kúlí na dhɨ: «Má nɨ móndɨ́ kɨ tà kònzɨ kɨ vúdrì logó àyɨ dré dhɨ ma. Má nɨ tà logó àyɨ dré tà ɨ̀ dré ꞌòle dhɨ ɨ tí dhɨ ma.»^a 20 Dɨ, ngóró Gìká nɨ Kúlí dré adrélé tàle dhɨ tɨ́nɨ:

«Ámɨ kàrɨbhá kàdré tàbirí ɨ́be dhɨ, mɨ́ kàdré ngá fe akódhɨ dré nyàle.

Akódhɨ kàdré yǐ lovó ɨ́be dhɨ, mɨ́ kàdré yǐ fe akódhɨ dré mvùle.

Tàko ko, mɨ́ kàdré ꞌòá kònɨ̀nɨ dhɨ, mɨ́ nɨ kanyò fe akódhɨ dré ngóró àtsɨ́kèle dàle akódhɨ dri dhɨ tɨ́nɨ.»^b

21 Dɨ mɨ́ kòtayɨ́ mɨ tà kònzɨ dré adrélé lavúlé dhɨ ko. Be ró dhɨ, mɨ́ kàdré mɨ́na tà kònzɨ lavú tà dóro mɨ́ dré adrélé ꞌòle dhɨ ɨ sè.