Yòwánɨ̀ i

Rúbí Tanɨ Yòwánɨ̀ dré tɨsɨ̀le dhɨ

Búkù kònɨ̀dhɨ nɨ tà àndu ngɨ̀le drìdrì dhɨ

Dhya búkù kònɨ̀dhɨ nɨ tɨsɨ̀lepi dhɨ tá Yòwánɨ̀ ꞌɨ. Akódhɨ nda tá àpóstolò kɨ àlo ꞌɨ. Vésè be bǐ, àyɨ Pétèró ɨ́be ɨ̀ndɨ̀ Yàkóbhò be dhɨ ɨ tá ànyɨ Yésu làga. Búkù kònɨ̀dhɨ léna dhɨ, Yòwánɨ̀ adré áyɨ zi «Yésu nɨ lebèlepi dré lèle tò dhɨ» ró. Yòwánɨ̀ nɨ tàndɨ tadhá tà ɨ́ dré búkù kònɨ̀dhɨ nɨ tɨsɨ̀zo ásà dhɨ kònɨ̀nɨ: «Dɨ, à tɨsɨ̀ tà kòdhɨ ɨ, mɨ̀ kòkaꞌìró dhɨ, Yésu Mèsɨ́yà ꞌɨ, ɨ̀ndɨ̀ Gìká nɨ Mváagó ꞌɨ gò, àmɨ kɨ tà kaꞌìkaꞌì nda sè dhɨ, mɨ̀ kàdréró lɨ́drɨ̀ ɨ́be akódhɨ léna be dhɨ bvó.» (À kònò 20:31.)

Búkù Yòwánɨ̀ dré tɨsɨ̀le kònɨ̀dhɨ twá búkù na àruka Rúbí Tanɨ nɨ tà dri dhɨ ɨ rúsè. Kɨdhoma nɨ léna dhɨ, Yòwánɨ̀ adré Gìká nɨ tà àndu ngɨ, adrézó tadhá dhɨ, Yésu Gìká nɨ Kúlí adrélépi tá ngbú túmä́ní Gìká be, ɨ̀ndɨ̀ adrélépi ɨ́na Gìká ro dhɨ ꞌɨ (1:1). Kúlí nda atsá tá móndɨ́ ro gò, dré bhà mòzo àma kòfalé adrézó túmä́ní àma ɨ́be (1:14). Búkù kònɨ̀dhɨ léna dhɨ, Yòwánɨ̀ adré tà twátwa lɨ́ndrɨ́ga ró Yésu dré ꞌòle dhɨ kɨ tɨtɨ́, tadházóá dhɨ, akódhɨ Mèsɨ́yà ꞌɨ, ɨ̀ndɨ̀ Gìká nɨ Mváagó ꞌɨ káyà dhɨ. Yésu adré kpà áyɨ tàndɨ nɨ zi «mápà adrélépi lɨ́drɨ̀ fe dhɨ» ró (6:35, 48), «ngádra adrélépi ngá kazá móndyá bvò àdhya ɨ dré dhɨ» ró (8:12; 9:5), «kábilígyà lɨkɨ́lépi dóro dhɨ» ró (10:11, 14), «dhya adrélépi móndɨ́ kɨ tɨngá dràdrà lésè, ɨ̀ndɨ̀ adrélépi lɨ́drɨ̀ fe àyɨ dré dhɨ» ró (11:25), «láti» ró, «tà bàti» ró, ɨ̀ndɨ̀ «lɨ́drɨ̀» ro (14:6). Dɨ Yòwánɨ̀ adré móndɨ́ zyandre dhɨ ɨ̀ kaꞌì tá Yésu atsázó akódhɨ nɨ lebèbhá ɨ ró ngɨ́nɨ ya dhɨ nɨ tɨtɨ́. Dɨ, móndɨ́ àruka ɨ̀ gà àyɨkya akódhɨ nɨ kaꞌìma.

Yòwánɨ̀ adré tà bǐ Yésu dré ꞌòle ɨ̀ndɨ̀ tàle áyɨ lebèbhá kɨ kodzózó ɨ̀ndɨ̀ àyɨ kɨ togó tɨndrɨ̀zo ngátsi áyɨ dràma kandrá dhɨ sè dhɨ kɨ tɨtɨ́ (13-16). Adré kpà tà Yésu dré zìle Gìká tí áyɨ tàndɨ dré ɨ̀ndɨ̀ áyɨ lebèbhá ɨ dré dhɨ kɨ tɨtɨ́ (17).

Yòwánɨ̀ adré tadhá ngádra ꞌá dhɨ, Gìká adré móndyá títí adrébhá Yésu nɨ kaꞌì dhɨ kɨ tɨdrɨ́, ɨ̀ kàdréró lɨ́drɨ̀ kóná vésè kólyá dhɨ ɨ́be. Kòdhɨ adré tàá dhɨ, àyɨ nda ɨ dré dhɨ, lɨ́drɨ̀ kóná vésè kólyá nda kɨdhó dre.

Tà kàdrɨ̀kàdrɨ̀ búkù kònɨ̀dhɨ léna dhɨ kɨ atìma

1) Yésu Krísto, Gìká nɨ Kúlí ꞌɨ (1:1-18)

2) Yòwánɨ̀ Bàtísimò fèlepi, ɨ̀ndɨ̀ Yésu nɨ lebèbhá drìdrì dhɨ ɨ (1:19-51)

3) Yésu nɨ àzí móndɨ́ ɨ kòfalé dhɨ (2:1–12:50)

4) Yésu nɨ pósò kùdù, ɨ̀ndɨ̀ akódhɨ nɨ dràma (13:1–19:42)

5) Yésu nɨ ngàma dràdrà ꞌásè dhɨ, ɨ̀ndɨ̀ akódhɨ nɨ agama akódhɨ nɨ lebèbhá ɨ kandrá dhɨ (20:1–21:25)