16
1 Ɔbɔɔkɛ hɩɩr wire kanɩ pɩ, Marɩɩkɛ thɛnɩ Magɩdala, Salome, na Marɩɩkɛ dʋɔnnɩ Jakɩɩ nɩ kɔɔ ther niinikɛ n hʋnanɩ daʋ, a jalna wɩ thir Jejuu forra.
2 Sɩ duuro phiphi wire makonyɔɔ caca wi, wɩ kɔɔ jaal kaara wi phã bɔɔ.
3 Sɩ wɩ-n mɩɩrɛ khasɔ ayɩ: Amɛ na ba kpurone sar bokaar ka nʋɔra na faa ya fɛ?
4 Dɩ ɔbɔɔkɛ wɩ gbanɩ wɩ hɩɩn, wɩ yɩrɛ bokaar dɩɩ kpuro a khokhɩa, sɩ ga do bokaar gɩ a wabɩ kpãkpalã ga.
5 Dɩ wɩ kɔɔ lʋʋn kaʋ a yɩ daɓolbir dɩ too mɔ̃ wa-n lonɩ a pɛr nyɔ̃bɔɔ, a to kẽkẽ gbã bulo, dɩ nʋɔ kɔɔ kpaa wɛr.
6 Sɩ a so warɛ: Na-n do nʋɔ n kpaa na'; mee Najarɛtɩ Jejuukɛ wɩ kɔɔ kpanɩ kʋkʋ thɩrʋra nɩ-n ƴaal. A ɩɩrɛ a the khirera, aa ha kɛka'; nɩ yɛ ka wɩ kɔɔ pɩɛnɩ.
7 Sɩ nɩ jala a sɔ ɔɔ kpãkpãadarara nakha Pɩɛrra ayɛ: A kʋʋl nɛr ƴɩɛ da-n jal Galile, dɩ le na yɩɩ mɔ̃kɛ a kɔɔ so narnɩ.
8 Dɩ mɛ̃ khɛraale kɔɔ the kaʋ a caalɛ gɩdonɩ nʋɔ kpaa wɛr dɩ wa-n jẽ, sɩ wa kɔɔ so tibillə thɩ̃a', gɩdonɩ maar fʋlɛnɛ wɩ.
9 [Ɔbɔɔkɛ Jeju kɔɔ ɩɩrnɩ khirera pɩ, wire makonyɔɔ caca wi duuro phiphi, Magɩdala Marɩɩkɛ a kɔɔ weeronɩ kɔ̃tɛɛbii makonyɔ a faa a kɔɔ nɩna dɩbara ɓo.
10 Ɔr kɔɔ jala a mɩɩ mɔ̃ thɩ̃ɛ hanɩ wɩrɛraakɛ n kɔɔ hananɩ kha Jeju, kɛ n bɩɛnnɩ dɩ wa-n khɩɩna.
11 Sɩ ɔbɔɔkɛ wɩ nɩɛnɩ Jeju hananɛ yire dɩ ɩnɛrɛɛ thɛthɛ yɩɩ, wa kɔɔ pɛr haara'.
12 Agɩpɩ tɩbɩla yenyɔ wɛrra kɔɔ ha hʋɛra dɩ wa-n jal kõgoso, dɩ Jeju kɔɔ nɩna wɩ dɩbara a ha kpɩɩ.
13 Dɩ wɛr dakha kɔɔ jaal a mɩɩ wɩrɛɛkɛ sɛnɩ, sɩ wa kɔɔ pɛr haar dakha wera'.
14 A gele pɩ, a kɔɔ nɩnanɛ ɔɔbara kpãkpãadara yʋɔr bɩɛl, ɔbɔɔkɛ wɩ hanɩ dɩko kho paar, a kɔɔ phaan wɛr awɩ ha pɛ ɓɔrra na mɔ̃kɛ awɩda khɩɩrnɩ, gɩdonɩ wa kɔɔ pɛr wɩrɛɛkɛ yɩɛnɩ na yireeda haara'.
15 Agɩpɩ a so warɛ: Nɩ jala thɩɩra fɛʋ a na mɩa Thãgbaa tutugo bʋɔɔ thɩmɩɩ tɩbɩlala fɛʋ.
16 Ʋrɛɛkɛ pɩɛrnɩ haar dɩ wa kpɛgʋʋ nyʋɔnɔ a na 'lɛr taarɛ, sɩ ʋrɛɛkɛ na pɩɛrnɩ haara', sor na heenuune.
17 Nɩ yɛ gɩrɛ dɔnɩ jenaakɛ na kpaanɛnɩ wɩrɛraakɛ na-n pɩɛrnɩ haar: Wa gbaar ɩ̃ i wa-n weena kɔ̃tɛɛbiisɔ, wa-n mɩɩrɛ thɩmɩɩ kpɩɩsɔ;
18 wa fʋrɛ siisɔ; a wɩ yɔ kpalʋ, ga pɛ war thɩlkɩɩr fɩɩʋraka'; wa dɛɛnɛ khodarara nyɛ̃ɛ dɩ wa kpɛɛ.
19 Ɔbɔɔkɛ Jeju Kɔ̃tɩn kɔɔ mɩɩ wɩnɩ pɩ, Thãgba kɔɔ khəsuure da-n jʋʋn Thãgbaa dʋɔ a too ɔɔ nyɔ̃bɔra.
20 Dɩ kpãkpãadara jaal dɩ wa-n mɩɩ Thãgbaa thɩmɩɩ paar fɛʋ, dɩ Kɔ̃tɩn n dona wɛr kha thɔma, dɩ gba jenaakɛ n kpaanɛnɩ Thãgbaa thɩmɩɩra da-n nɩna dɩ sobɔr gɩ do.]