Inioꞌki mampetuntui poturuꞌra toaꞌ to mepokonawuꞌ
4
1 Halali-halali to kupokarima! Inioꞌkei ipoꞌohi lekiꞌ-lekiꞌna toaꞌ to mantiꞌi koꞌuwaꞌne Inohaꞌne Pueꞌ Ala i iohi. Iꞌoꞌelekei duluna, ba tuꞌu-tuꞌu mpuꞌu to ka Pueꞌ Ala ba hawaꞌi. Alaꞌ i umbo-umbolu, uwaꞌhi nabi to mampowewoꞌ. 2 Hieꞌe to mampokonontokiki himo to nokuasaꞌi Inohaꞌna Pueꞌ Ala: lekiꞌ-lekiꞌna toaꞌ to mopangakuꞌ kohiYesuna Datu to Mamposalamaꞌ to mewali manusiaꞌ, toaꞌ tiꞌomohi to nokuasaꞌi Inohaꞌna Pueꞌ Ala. 3 Lekiꞌ-lekiꞌna toaꞌ to hawaꞌi mopangakuꞌ kohiYesuna Datu to Mamposalamaꞌ, iohi tiꞌo hawaꞌhi nokuasaꞌi Inohaꞌna Pueꞌ Ala. Toaꞌ tiꞌo nokuasaꞌihi inohaꞌ to ka poniꞌna Kerisitu. Ihorimokei kohingkiꞌ hupaꞌne poniꞌna Kerisitu, hei hinewowoꞌena uwaꞌmo i lali duniaꞌ.4 Angkana ingkei anaꞌku, anaꞌnamokei Pueꞌ Ala, hei inanimokei nabi-nabi to mepowuli tiꞌo, alaꞌ meliu kuasaꞌNe Inohaꞌ to uwaꞌ i lalimi ka inohaꞌ to uwaꞌ i lalira toaꞌ to hawaꞌi mepoꞌohi pe Pueꞌ. 5 Nabi to mepowuli tiꞌo, ka duniaꞌ to kodake. Iomo horiana poturuꞌra mehupaꞌ woꞌo ka duniaꞌ to kodake. Hei toaꞌ to hawaꞌhi mepoꞌohi pe Pueꞌ, iohi to mampehoromua hei mampetuntui poturuꞌra. 6 Angkana ingkiꞌ, halali-halali, anaꞌnamoki Pueꞌ Ala. Hei toaꞌ to pobahaꞌ Pueꞌ Ala, iohi to mampehoromua hei mampetuntui poturuꞌki. Toaꞌ to hawaꞌhi nopoꞌanaꞌ Pueꞌ Ala, hawaꞌhi mampetuntui poturuꞌki. Io to mampokonontokiki kohihimona to nokuasaꞌi Inohaꞌna Pueꞌ Ala to mampowute poturuꞌ to tuꞌu hei kohihimona to nokuasaꞌi inohaꞌ to mepowewoꞌ.
Pueꞌ Ala iomo rima
7 Halali-halali to kupokarima! Momepokarimamoki haduo hei haduo, alaꞌ komarima tiꞌo mepongka ka Pueꞌ Ala. Lekiꞌ-lekiꞌna toaꞌ to mampokarima hangko awara, iohi anaꞌna Pueꞌ Ala hei pobahaꞌhi Pueꞌ Ala. 8 Toaꞌ to hawaꞌi mampokarima hangko awana, hawaꞌhi pobahaꞌ Pueꞌ Ala, alaꞌ Pueꞌ Ala iomo rima. 9 Hei hieꞌemo lalane Pueꞌ Ala mampotongawa rimaNa pe ingkiꞌ, AnaꞌNa to hadoduona Norumbaꞌ humei pe duniaꞌ, hingkeꞌna ingkiꞌ pahua kotuwuꞌ to wolaꞌ to hawaꞌi mokoꞌukoa moliu i Io. 10 Hieꞌemo to nitiꞌi rima: handoꞌio ingkiꞌ to himpodulu mampokarima Pueꞌ Ala, angkana Pueꞌ Ala wae to mampokarimaki, koꞌukoana morumbaꞌ humei anaꞌNe mewali podame hingkeꞌna tehompoꞌmoki ka dosanta.
11 Halali-halali to kupokarima. Pueꞌ Ala marima i ingkiꞌ, iomo hinaꞌ hangangaa momepokarimaki woꞌo haduo hei haduo. 12 Hawaꞌi uwaꞌ haduo to kahampiha pangkiꞌ Pueꞌ Ala. Angkana kehapoꞌi hatoꞌo, ane momepokarimaki haduo hei haduo, Pueꞌ Ala mohintuwuꞌ nturusi hante ingkiꞌ, hei tetambai rimaNe i lali kotuwuꞌta hante hawaꞌi uwaꞌ komakuraꞌne.
Tobahaꞌ konopokarimante Pueꞌ Ala,
13 Tobahaꞌ mohintuwuꞌmoki hante Pueꞌ Ala hei Pueꞌ Ala woꞌo mohintuwuꞌ hante ingkiꞌ, alaꞌ Nopaꞌaniki InohaꞌNa to Mangkolehi. 14 Ingka to mewali suroNe, kiꞌokiꞌmo Anaꞌne Pueꞌ Ala, hei kipowutemo koꞌIona to Norumbaꞌ Pueꞌ Ala Umoꞌta humei mewali Datu To Mamposalamaꞌ lekiꞌna toaꞌ i duniaꞌ. 15 Himo to mopangakuꞌ kohiYesuna Anaꞌne Pueꞌ Ala, Pueꞌ Ala mohintuwuꞌ hante io, hei io woꞌo mohintuwuꞌ hante Pueꞌ Ala. 16 Iomo horiana tobahaꞌ hei topoꞌohi rimane Pueꞌ Ala i ingkiꞌ.
Pueꞌ Ala iomo rima. Io horiana, himo to mampokarima nturusi halalina, io to mohintuwuꞌ hante Pueꞌ Ala, hei Pueꞌ Ala mohintuwuꞌ hante io. 17 Alaꞌ pohintuwuꞌta tiꞌo, rimanta hawaꞌi uwaꞌ komakuraꞌne hei hawaꞌki hingkiꞌ morokaꞌ mehinaro pe Pueꞌ i ando pobutusi i kotutuana duniaꞌ. Hingkiꞌ podehoꞌki mampomehinoroiki Pueꞌ Ala, alaꞌ i duniaꞌ hieꞌe, ingkiꞌ hibaliki hante Kerisitu. 18 Ane tobahaꞌi mpololeke rimane Pueꞌ Ala i ingkiꞌ, hamboaꞌmoki morokaꞌ pe Pueꞌ Ala. Nokomi rimana Pueꞌ Ala to hawaꞌi uwaꞌ komakuraꞌna, iomo horiana hamboaꞌmoki morokaꞌ. Ane tokorokaꞌ tene kohingkiꞌ nohukunte Pueꞌ Ala, palaihana, handoaꞌi tene tobahaꞌ rimane pe ingkiꞌ.
Ane topokarimaꞌi Pueꞌ Ala, bateꞌna marimaki woꞌo i halalinta
19 Hangangaa momepokarimaki, alaꞌ Pueꞌ Ala to uluꞌ-uluꞌna mampokarimaki. 20 Hihimo to mantiꞌi, “Kupokarima Pueꞌ Ala,” angkana mampokoiꞌ halalinahi, io mowuti. Alaꞌ ane io hawaꞌi mampokarima halalina to noꞌokiꞌlu, hapo tene i Pueꞌ Ala to hawaꞌi noꞌokiꞌ. 21 Mewaliꞌ, hieꞌemo hawaꞌNe pe ingkiꞌ, himo to mampokarima Pueꞌ Ala, hangangaa mampokarima woꞌo halalina.