Ipopatengkaꞌ moromiꞌ pajamama mampowute Boona Pueꞌ Ala
4
1 Yesu Kerisitu hingkiꞌ mehupaꞌ i duniaꞌ hieꞌe hingkiꞌ mobutusi toaꞌ to tuwuꞌ hante toaꞌ to mahi, hei Io mehupaꞌ moparenta hei mewali Datu. Iomo hinaꞌ kuperapiꞌ mpololeke pe ingko i hinarona Pueꞌ Ala hei hi Yesu Kerisitu: 2 Hangangaa timomoko mpuꞌu mampowute PohawaꞌNa i tempo to moromiꞌ ba i tempo to maporiꞌ. Itiꞌikihi pe to mowali salaꞌ hante ikamorokihi, honiꞌi ipomononto lalire hampepoꞌohimu hingkeꞌna moromiꞌ waliara. Hangangaa sabaraꞌko nturusi mopaguruhi. 3 Alaꞌ hingkiꞌ mehupaꞌ tempone, toaꞌ hamboaꞌmo hingkiꞌ mampehoromua poturuꞌ to moromiꞌ, angkana iohi hingkiꞌ mampaliꞌhi guru-guru motuntuni peleira hingkeꞌna notebuhoꞌi to rokodokoꞌio. 4 Mengkabonoꞌluhi ane pahorihi pepoturuꞌ to tuꞌu-tuꞌu, angkana rolei mampehoromua pepoturuꞌ to nipeꞌoꞌuwaꞌ. 5 Iomo hinaꞌ kuperapiꞌ mpololeke, Timotius, hingkeꞌna ipolebaꞌ lalimu, sabaraꞌko i lali komaporiꞌ. Ipowute nturusi Kareba Moromiꞌ pe toaꞌ to hawaꞌi tene hampiha pahori Kareba Moromiꞌ. Ipololiu moromiꞌ lekiꞌ-lekiꞌna jama to Nopaꞌanikiko Pueꞌ. 6 Alaꞌ kubahaꞌ hamboaꞌi morue kotuwuꞌku i duniaꞌ hieꞌe, hingkiꞌ hupaꞌmo andongka. Kehapoꞌa nirokoꞌ, kupetangekilu kotuwuꞌku hieꞌe Mewali popenombangku pe Pueꞌ Ala. 7 Kupetuntuimo moromiꞌ lala to nopokonontokiꞌa Pueꞌ. Kupotutumo pajamangku. Hawaꞌi tewolihi pepoꞌohingku wute i koꞌukoana. 8 Mewaliꞌ hinewowoꞌena, timomomo harongka i suruga, alaꞌ kupetuntuimo peleihane Pueꞌ Ala. Harongku tiꞌo hingkiꞌ nopaꞌanikiꞌa Pueꞌ i ando pobutusi i koꞌukoana duniaꞌ, i tempona moparesaꞌ waliana lekiꞌ-lekiꞌna toaꞌ i konontoana. Hei handoꞌio akulu to pahua haro tiꞌo. Angkana nopaꞌanikihi woꞌo pe lekiꞌ-lekiꞌna toaꞌ to mangkopundai kohupaꞌNa huliꞌ.Hi Paulu mepaha pe hi Timotius
9 Timotius, humeiꞌa iloloꞌo hohiꞌ, 10 alaꞌ hamboaꞌi uwaꞌ to mampoꞌowoniꞌa i hieꞌe. Nopolihimoꞌa hi Demaꞌ, alaꞌ molaimo nolou pe Tesalonika mampaliꞌlu komasana i duniaꞌ hieꞌe. Hi Karesike nolou pe Galatia. Hi Titus woꞌo nolou pe Dalamatia. 11 Hi Lukas romo to moꞌawa hante aku. Ane humeiko intu Timotius, ipohinalu hi Markus humei iseꞌe, alaꞌ io mampororuiꞌa i lali jamangku. 12 Hi Tikiku kurumbaꞌ nolou pe Epesu. 13 Kuperapiꞌ woꞌo hingkeꞌna ikomikiꞌa humei kumbangku to makamba to kupolihi i kota Troas i tambina hi Kapusi, hante ikomikiꞌa humei suraꞌ-suraꞌka hei inioꞌ woꞌo ikombulihaki suraꞌka to niwali ka koliꞌ alaꞌ kuparaluꞌi mpololeke.
14-15 Majaga-jagako pe hi Alesande, topowali kala. Io moꞌewa poturuꞌta. Woriꞌ waliana to kodake pe aku. Waliana tiꞌo hingkiꞌ nohowoni Pueꞌ Ala.
16 Uluꞌ-uluꞌna i tempoku niparesaꞌ alaꞌ waliangku hampiha, hawaꞌi mpuꞌu howeꞌ haduo mehupaꞌ to mamperoruiꞌa. Lekiꞌ-lekiꞌra ropolihiꞌa. Mekokaeꞌa pe Pueꞌ hingkeꞌna hawaꞌi Nohowoni waliare tiꞌo. 17 Angkana kehapoꞌi hawaꞌi uwaꞌ awangku to mampoꞌawaꞌa, tontonalu Pueꞌ to mampoꞌowoniꞌa nturusi. Io mampaꞌaniꞌa komaroho mampotutu jamangku mampowute Kareba Moromiꞌ, hingkeꞌna lekiꞌ-lekiꞌna toaꞌ to handoꞌiohi toYahudi wadi pahori kareba tiꞌo. Koꞌukoana, Io mampohenteꞌa ka komahia. 18 Hei hinewowoꞌena, bateꞌku nopohente Pueꞌ ka lekiꞌ-lekiꞌna to kodake, hingkiꞌ Nokomiꞌa mekahi i lali kodatuaNa i suruga. Topokodeꞌmo konaꞌNe wute nantolou-louna. Amin!
Tabea hante pebarakati koꞌukoana