Suraꞌna Hi Paulu Korompihana Pe Hi
Timotius
Tabea
1
1-2 Suraꞌ hieꞌe to ka aku hi Paulu, kupokatu pe ingko, Timotius, anaꞌku to kupokarima. Motuntuni peleihana Pueꞌ Ala, Nohinimoꞌa mewali surona Yesu Kerisitu, hingkeꞌna mangkomiꞌa Kareba Moromiꞌ pe toaꞌ. I lali Kareba Moromiꞌ tiꞌo, Pueꞌ Ala modandi waheꞌe: hihimo to mepoꞌohi pe Yesu Kerisitu, bateꞌna pahua kotuwuꞌ to wolaꞌ to hawaꞌi mokoꞌukoa.Mekokaeꞌa pe Pueꞌ Ala Umoꞌta hei pe Pueꞌta Yesu Kerisitu. Kuperapiꞌ hingkeꞌna Nopaꞌaniko rima ngkotuwuꞌ, hei Nopotongawa rimaNe, hei Nopaꞌaniko romiꞌ ngkotuwuꞌ.
Hi Paulu moꞌawerasiꞌ pe Pueꞌ Ala,
3 Kaꞌisaꞌ-isaꞌ, kutiꞌi moꞌawerasiꞌa pe Pueꞌ Ala to kupenombai hante kopopuhiꞌna lalingku hibali penombara tododulungku hampiha. Kutiꞌi woriꞌ poꞌawerasiꞌ pe Pueꞌ Ala, alaꞌ ingko Timotius. Kuponindiko i lali pekokaengku, moromiꞌ ando ba wini. 4 Kuponindi poꞌiline uwai matamu i tempota mokaꞌa. Popundaꞌa pe ingko, iomo hinaꞌ kukodokoꞌi mampohidupaꞌkiko, hingkeꞌna kumotanaꞌ. 5 Kutiꞌi woriꞌ poꞌawerasiꞌ pe Pueꞌ Ala, alaꞌ kubahaꞌ pepoꞌohimu pe Pueꞌ Yesu ka lalimu mpololeke. Uluꞌ-uluꞌna mepoꞌohihi pe Yesu Kerisitu iomo uweꞌmu hi Lois hante inoꞌmu hi Eunike. Hei kubahaꞌ pepoꞌohimu bateꞌna motuntuni pepoꞌohira inoꞌmu hante uweꞌmu.
Hi Paulu mampoturuꞌ hi Timotius hei mampokaroho lalina
6 Mewaliꞌ, Timotius, kutiꞌikiko noniuꞌ i jama to Nopaꞌanikiko Pueꞌ Ala, hingkeꞌna ipopatengkaꞌi nturusi hintotoꞌ hante pebahaꞌ to nopaꞌanikiko Pueꞌ Ala. I tempona kuhini korawengka i tutuꞌmu mampotintoko mewali tadulakora toSarani. Iomo hinaꞌ kuperapiꞌ hingkeꞌna ipokaroho mpololeke lalima. 7 Anioꞌko motehuꞌ mampopatengkaꞌ jamamu tiꞌo, alaꞌ Pueꞌ Ala mampaꞌaniko Inoha' Mangkolehi. Haꞌio Inohaꞌ Mangkolehi to mampoꞌuwaꞌ komotehuꞌ, angkana Inohaꞌ Mangkolehi to mampaꞌaniki komaroho, buhaꞌ komarima hante mosulungiki morii peleihana lalinta to kodake. 8 Iomo hinaꞌ inioꞌko mohili mampololita pe toaꞌ ntaniꞌ noniuꞌ Pueꞌ Yesu, hei inioꞌko woꞌo mohili mantiꞌi koꞌakuna bolemu kehapoꞌa nitarungkuꞌ. Nitarungkuꞌa alaꞌ mampowuteꞌa Kareba Moromiꞌ. Mewaliꞌ ingko woꞌo hangangaa timomoko morii komaporiꞌ alaꞌ pajamamu mampowute Kareba Moromiꞌ. Pueꞌ Ala to hingkiꞌ mampaꞌaniko roho morii komaporiꞌ tiꞌo. 9 Io mamposalamaꞌki hei mowowoiki mewali toaꞌNa to manobaꞌ. Hawaꞌki Noposalamaꞌ hei Nowowoi Pueꞌ Ala nokomi walianta to moromiꞌ, angkana nokomi kopopuhiꞌna laliNa motuntuni tungkaihaNa. Alaꞌ ikohandoaꞌana tene duniaꞌ hieꞌe Nopopewali, uwaꞌmo tungkaihane Pueꞌ Ala mampohintuwuꞌki hante hi Yesu Kerisitu. 10 Hei hinewowoꞌena, Nopotongawamokiki mpuꞌu kopopuhiꞌna laliNa, hante kohupaꞌna hi Yesu Kerisitu Topohompoꞌta. Hi Yesu penani ka komahia. Palaihana: kehapoki mahi, ane mepoꞌohiki pe Kareba Moromiꞌ, hi Yesu hingkiꞌ mampotuwuꞌki huliꞌ hei hingkiꞌ Nopaꞌaniki kotuwuꞌ to hawaꞌi uwaꞌ koꞌukoana.
11 Iomo hinaꞌ Nohinimoꞌa Pueꞌ Ala mewali surona Pueꞌ Yesu, hingkeꞌna kupowute Kareba Moromiꞌ hieꞌe pe toaꞌ hei mampaguruhi hingkeꞌna mepoꞌohihi pe Yesu. 12 Mewaliꞌ, alaꞌ pajamangku mampowute Kareba Moromiꞌ tiꞌo, iomo hinaꞌ pahuaꞌa komaporiꞌ wuteꞌa nitarungkuꞌ. Angkana kehapoꞌi watoꞌo, hawaꞌa mohili. Alaꞌ kubahaꞌ kohihimona to kupoꞌohi, hei kupoꞌohi koꞌIona to hingkiꞌ morewahiꞌa, hei mononto i lalingku komakuasaꞌna morewahiꞌa wute hupaꞌ ando pobutusi i koꞌukoana duniaꞌ. 13 Timotius! Kupaꞌingaꞌiko pepoturuꞌ to ihorimo ka aku. Poturuꞌ to tuꞌu tiꞌo hangangaa ipetuntui. Anioꞌ ipohente pepoꞌohimu pe Yesu Kerisitu. Hangangaa ipokarima hangko awamu alaꞌ pohintuwuꞌmu hante Yesu. 14 Pueꞌ Ala mampoꞌohiki mampowute pepoturuꞌ to tuꞌu. Mewaliꞌ, nokomi kuasaꞌNa Inohaꞌ Mangkolehi to lebaꞌ i lalinta, ipoꞌilali moromiꞌ pepoturuꞌ tiꞌo, anioꞌ ipotedehiꞌi toaꞌ ntaniꞌna mowolihi.
15 Ibahaꞌlu, ka lekiꞌ-lekiꞌna toSarani to i Asia, hamboaꞌi uwaꞌ to moꞌawa-awa hante aku. Awangku mampolihimoꞌa, tekahi hi Pigelu hante hi Hemogene. 16 Angkana hi Onesiporu hantino, haꞌumbora mpihamohi mampomotanaꞌ lalingku. Hinamo Pueꞌ timomo mampetidoꞌki rimaNa pe iohi, alaꞌ kehapoꞌa nitarungkuꞌ hawaꞌi ropohili koꞌuwaꞌangka. 17 Ipehupaꞌnalu i Roma io magega mampaliꞌa wute nopohidupaꞌkiꞌa, 18 hei ibahaꞌlu i tempona io i Epesu woriꞌ mpihamo mosulungiꞌa, hinamo Pueꞌ mampetidoꞌki rimana pe io i ando pebutusi pe lekiꞌna manusiaꞌ i koꞌukoana duniaꞌ.