Peponobuhoꞌi i lali mohinoroi guru-guru
4
1 Inohaꞌ Mangkolehi mampokononto: i ando to hingkiꞌ mehupaꞌ, uwaꞌhi toaꞌ to hingkiꞌ maꞌoruꞌ ka pepoꞌohira. Hingkiꞌ mengkoruꞌhi pe kuasaꞌ to mepomonawuꞌ hei motuntunihi pepoturuꞌ to ka lomoa. 2 Poturuꞌ tiꞌo ropowute toaꞌ to mepomonawuꞌ. Lolitara hawaꞌi hibali hante waliara. Mokorindi lalire, hawaꞌi robahaꞌ mohili ane mowalihi walia to kodake. 3 Mampoturuꞌhi toaꞌ hingkeꞌna hawaꞌhi hamoko hei moꞌopihi toaꞌ mangka haꞌumbora langkaꞌ to niꞌoka to nopoꞌuwaꞌ Pueꞌ Ala, hantaro Pueꞌ Ala mampoꞌuwaꞌ to niꞌoka hingkeꞌna to mepoꞌohi wadi mangka hante poꞌawerasiꞌ pe Io. Toaꞌ to mepoꞌohi tiꞌo iomo to pobahaꞌ poturuꞌ to tuꞌu. 4 Lekiꞌna to nopoꞌuwaꞌ Pueꞌ Ala moromiꞌ hei hawaꞌi uwaꞌ halangkaꞌ to kodake, ane totorimoꞌi i lali poꞌawerasiꞌ pe Pueꞌ Ala. 5 Alaꞌ Pohawaꞌna Pueꞌ Ala hante pekokae to mampomangkolehi hapo to toꞌoka.Hawiꞌna Yesu Kerisitu to moromiꞌ
6 Ane ipagurukihi lekiꞌ-lekiꞌne hieꞌe pe halali hampepoꞌohinta, hingkiꞌ mewaliko hawiꞌna Yesu Kerisitu to moromiꞌ. Hei hingkiꞌ maroho mpuꞌu pepoꞌohimu alaꞌ Boona Pueꞌ Ala to topoꞌohi hei pepoturuꞌ to moromiꞌ to moruemo ipetuntui. 7 Ipomoꞌelamo wotama ka lolita tota modumbuꞌ ba lolita tota tuꞌu, ipobiasamo wotama mengkoruꞌ nturusi pe Pueꞌ Ala. 8 Mampomaroho wota hangkiuꞌlu podumbuꞌane, angkana ane topokaroho lalinte mengkoruꞌ pe Pueꞌ Ala, woriꞌ podumbuꞌane, alaꞌ mangkomi pebarakati i lali kotuwuꞌta i duniaꞌ hei koꞌukonta mampolala komahia. 9 Tuꞌu mpuꞌu lolita hieꞌe hei hangangaa topoꞌohi mpololeke. 10 Iomo hinaꞌ majamaki mpololeke, alaꞌ mepoꞌohiki pe Pueꞌ Ala to tuwuꞌ wute nantolou-louna hei Topohompoꞌ lekiꞌ-lekiꞌna toaꞌ, pelumbuꞌnamo toaꞌ to mepoꞌohi.
11 Ipagurukihi lekiꞌ-lekiꞌna to ka kutiꞌikimoko, hei ihowoꞌikihi hingkeꞌna ropetuntuiꞌi. 12 Anioꞌ haduo toaꞌ mopariwoiꞌko alaꞌ moleaꞌluko tene. Hangangaa mewaliko pandiri' i halali hampepoꞌohinta i lali pololitamu, waliamu, komarimamu i awamu, pepoꞌohimu pe Pueꞌ, hei kotuwuꞌmu to mangkolehi. 13 Ikohandoaꞌangku mehupaꞌ, hangangaa ibasa nturusi Boo Mangkolehi pe halali hampepoꞌohinta. Hangangaa ipokaroho nturusi lalire hante ipoturuꞌkihi. 14 Anioꞌ ipohinteꞌi jamama to hangangaa ipopatengkaꞌ motuntuni kopobahaꞌ to noweikiko Inohaꞌ Mangkolehi. Nipaꞌaniko kopobahaꞌ i tempora hawiꞌna Pueꞌ i jumaꞌara toSarani mohini korawera i tutuꞌmu mampowute lolita ka Pueꞌ Ala noniuꞌ i ingko. 15 Lekiꞌ-lekiꞌna jamamu hangangaa ipopatengkaꞌ mpuꞌu ka lali-lalimu, hingkeꞌna pedeꞌ tongawa komoromiꞌna pajamamu pe Pueꞌ.
16 Moromiꞌko i waliamu hei i pepoturuꞌmu. Ijama nturusi lekiꞌ-lekiꞌna hieꞌe, ala ane iwaliꞌi watoꞌo, ingko mamposalamaꞌko wotamu hei toaꞌ to mampehoromua poturuꞌmu.