Timomomokei nokohupaꞌi Pueꞌ
5
1 Halali-halali, hawaꞌi paralu kiꞌukiꞌkikei hiwaꞌimbo ando kohupaꞌane Pueꞌ Yesu. 2 Alaꞌ ibahaꞌmokei hadoduomi hante mononto ando kohupaꞌana Pueꞌ, hingkiꞌ hupaꞌ hibali topanako i halumbu wini. 3 Ikohandoaꞌana tene hupaꞌ tempone, toaꞌ to hawaꞌhi mepoꞌohi pe Pueꞌ Ala hingkiꞌ mantiꞌi, “Moromiꞌ mpuꞌu kotuwuꞌte, hawaꞌi uwaꞌ komotehuꞌnte.” Angkana i tempo tiꞌo woꞌo, hangkaꞌ-hangkaꞌlu mehupaꞌ morumpahi komaporiꞌ to monono, hibali haduo towoweꞌe to nokomaporiꞌi hingkiꞌ moꞌanaꞌ. Hawaꞌi uwaꞌ podo haduo mampepoliliꞌi pehukuna Pueꞌ Ala. 4 Angkana hawaꞌkei hibali toaꞌ to tuwuꞌ i lali komokorindi, horiana i ando tiꞌo hokohi hibali to nokohupaꞌi topanako. 5 Ingkei lekiꞌ-lekiꞌmi tuwuꞌ i lali komobaro hante mowalia to moromiꞌ hibali tuwuꞌ i andona, hawaꞌi hibali toaꞌ to tuwuꞌ i lali komokorindi to mowalia ngkodake. 6 Iomo horiana inioꞌkei lembeꞌ toturu hibali toaꞌ to hawaꞌi matimomo, hinamo ingkei tuwuꞌ i lali kosabaraꞌ inioꞌ mowalia ngkodake, 7 alaꞌ i tempo wini toaꞌ lembeꞌluhi toturu hante malanu-lanulu. 8 Angkana ingkiꞌ hieꞌe toaꞌ topobahaꞌ to mobaro, alaꞌ tiꞌo pekirinta hangangaa mobaro. Hangangaa tontoki mepoꞌohi pe Pueꞌ hei marimaki pe toaꞌ ntaniꞌ hei topohinaru Pueꞌ Ala hingkiꞌ mamposalamaꞌki. Iomola laba to topakeꞌ moꞌewa kuasaꞌ to kodake. 9 Alaꞌ Pueꞌ Ala moꞌuwiꞌki handoꞌio hingkiꞌ mohukuki angkana mamposalamaꞌki moliu i Pueꞌta Yesu Kerisitu. 10 Yesu Kerisitu mahi mampohorungaki, hingkeꞌna ane hupaꞌI, moromiꞌ mahi ba tuwuꞌluki tene, i tempo tiꞌo hingkiꞌ tuwuꞌki moꞌawa hante Io. 11 Iomo horiana, halali-halali, hangangaa momepokaroho lali hei momepaguru haduo hei haduo, hibali to iwalimokei hinewowoꞌena.Pepoturuꞌ koꞌukoana hei tabea
12 Halali-halali, kiperapiꞌ hingkeꞌna i lumbu-lumbumi iꞌadaꞌikei toaꞌ to majama madori mampopopatengkaꞌ jamana Pueꞌ, iohi to noꞌuwiꞌmo Pueꞌ hingkeꞌna motadulakoikei hei mokamorokikei. 13 Hei tuꞌu-tuꞌu niꞌadaꞌihi hante rima alaꞌ jamara, hei mohintuwuꞌkei haduo hei haduo.
14 Halali-halali, kiperapiꞌ woꞌo hingkeꞌna ikamorokihi to hawaꞌi hiniꞌ majama. Ipokarohokei toaꞌ to mororangko pepoꞌohire, isulungikei toaꞌ to paralu nisulungi, hangangaa sabaraꞌkei i lekiꞌ-lekiꞌna toaꞌ. 15 Elekei, ane uwaꞌi mowali to kodake pe ingkei, inioꞌ ihowonikei, sangadinareꞌi poko iwalikei to moromiꞌ pe halalimi tiꞌo hei i lekiꞌ-lekiꞌna toaꞌ. 16-18 Alaꞌ pohaꞌanuami hante Yesu Kerisitu, poko motanaꞌkei, hei poko mekokaekei, moꞌawerasiꞌkei i lali hapo-hapo to mewali, alaꞌ tiꞌo peleihana Pueꞌ Ala pe ingkei. 19 Anioꞌkei moꞌopi Inohaꞌ Mangkolehina Pueꞌ Ala to majama i lalimi, 20 hei anioꞌ niroa nangkoꞌ kareba to nopaꞌanikikei Pueꞌ Ala. 21 Hangangaa ipaliꞌkei lekiꞌ kototuꞌuane hei to moromiꞌ ituntunikei. 22 Ipomoꞌelakei lalimi ka langkaꞌ-langkaꞌna to kodake. 23 Hinamo Pueꞌ Ala to mepaꞌani romiꞌ ngkotuwuꞌ mampomangkolehikei lekiꞌna hei hinamo inohaꞌ, tanuanaꞌ hei wotami terewahi moromiꞌ hingkeꞌna hawaꞌi uwaꞌ komakuraꞌ hei komasalaꞌa i pehupaꞌna Yesu Kerisitu Pueꞌta. 24 Pueꞌ Ala to moꞌuwiꞌkei iomo Pueꞌ Ala to tungkuꞌ, hei hapo to Nodandi bateꞌna hingkiꞌ Nopobuhoꞌi. 25 Halali-halali, kiperapiꞌ hingkeꞌna ipekokaekika woꞌo. 26 Ipowute tabeangki hante komarimangki i lekiꞌ-lekiꞌna halali hampepoꞌohinta. 27 I lali konaꞌna Pueꞌ Yesu, kuperapiꞌ mpololeke hingkeꞌna suraꞌ hieꞌe ibasakei i hinarona lekiꞌ-lekiꞌna halalimi hampepoꞌohinta to uwaꞌhi itoꞌo. 28 Hinamo rima ngkotuwuꞌ ka Yesu Kerisitu, Pueꞌta, mampoꞌowonikei.