Jamana hi Paulu i Tesalonika.
2
1 Halali-halali umbiꞌ ibahaꞌlukei hadoduomi kohupaꞌki pe ingkei hawaꞌi modangkeleꞌi. 2 Kohandoaꞌangki hupaꞌ i kotami, ropoperima-rimaka hei ropononaꞌaka i kota Pilipi. Ibahaꞌmokei hapo to mewali pe ingka! Hei kehapoka woꞌo roꞌewa toaꞌ to woriꞌ i kota-kota, Pueꞌta mampokaroho lalingki hingkeꞌna kipodehoꞌ mampowutekikei Kareba Moromiꞌ to ka Pueꞌ Ala.3 Hawaꞌkei kirumbaꞌ mampetuntui poturuꞌ to salaꞌ. Hawaꞌi woꞌo uwaꞌ tungkaihana lalingki to kodake, hei hawaꞌka mangkodokoꞌi motobebea ba hihimolu. 4 Hawaꞌka woꞌo mampowute Kareba Moromiꞌ hingkeꞌnalu nomotanaꞌ laline toaꞌ, angkana mampowuteluka hapo to mampomotanaꞌ Pueꞌ Ala, alaꞌ Io to moparesaꞌ lalingki hei Nopoꞌohika mampowute Kareba Moromiꞌ. 5 Halali-halali, ibahaꞌkei, hawaꞌka mampowute hante wiharo to moꞌowi to motobebeakei. Hawaꞌka mampetomoromiꞌ hingkeꞌna pahuaka ba hapo-hapo ka ingkei. Pueꞌ Ala to mosobiꞌi! 6 Hawaꞌka woꞌo mampaliꞌ konaꞌ pe ingkei ba pe toaꞌ ntaniꞌna. Kotuꞌuana, hawaꞌi woꞌo masalaꞌ ane niperenakika, alaꞌ ingka hieꞌe suronaluka mpuꞌu Kerisitu. 7 Angkana mengkoruꞌka i lumbu-lumbumi, hibali haduo inoꞌ mampotundeꞌ hei morewahi anaꞌna. 8 Alaꞌ komarimangki mpuꞌu, matimomoka mepaꞌani pe ingkei, handoꞌio podo Kareba Moromiꞌ to ka Pueꞌ, angkana kotuwuꞌki woꞌo. Alaꞌ komarimangki mpuꞌu pe ingkei! 9 Halali-halali, bateꞌna ikolowoikei tene hohumbo komawongkoꞌki majama hampiha. Majamaka madori ando wini hingkeꞌna uwaꞌ pangkaki, hei hawaꞌi howeꞌ haduo to kipomasusa kolentuꞌangki mampoturuꞌkei Kareba Moromiꞌ to ka Pueꞌ Ala.
10 Ibahaꞌkei waliangki i hinarona Pueꞌ: waliangki moromiꞌ i pampeꞌelena Pueꞌ Ala, mononto hei hawaꞌi uwaꞌ komasalaꞌangki pe ingkei to mepoꞌohi pe hi Yesu. Ingkei to mewali sabiꞌki moꞌawa hante Pueꞌ Ala. 11 Ibahaꞌkei perewahingki pe ingkei haduo-haduo, hibali haduo umoꞌ to mampoturuꞌ anaꞌna. 12 Kipoturuꞌkei hei kipomaroho lalimi, hingkeꞌna tuwuꞌkei hintotoꞌ hante peleihana Pueꞌ Ala, to mowowoikei pe lali kodatuaNa hei komanobaꞌa. 13 Uwaꞌ woꞌo halangkaꞌ to poko kipoꞌawerasiꞌi pe Pueꞌ Ala. Iomo i tempoki mampowute pohawaꞌna Pueꞌ Ala pe ingkei, ingkei mampehoromua hei mantorimo kareba tiꞌo, hawaꞌi hibali kareba to ka manusiaꞌ angkana kareba to ka Pueꞌ Ala. Io kolentuꞌa majama i lalimi to mepoꞌohi pe hi Yesu. 14 Halali-halali, ingkei woꞌo motuntuni kotuwuꞌna jumaꞌa Yudea to mewali tumpuna Yesu Kerisitu. Ingkei mampolalamokei komaporiꞌ i roboꞌmi hibali to rohori jumaꞌana Pueꞌ Ala i Yudea ka toaꞌ-toaꞌ toYahudi. 15 ToYahudi tiꞌohi to morokoꞌ Pueꞌ Yesu hante nabi-nabi, hei mampopoꞌioꞌioka. Iohi hawaꞌi mantolinei hapo to hintotoꞌ hante peleihana Pueꞌ Ala hei hawaꞌhi palei lekiꞌna toaꞌ, 16 hei mosalemporihi lalangki hingkeꞌna hawaꞌka hohumbo mampowute Kareba Moromiꞌ pe toaꞌ to handoꞌiohi toYahudi, hantaro Kareba Moromiꞌ tiꞌo to mohompoꞌhi ka pehuku dosara. Mewaliꞌ, alaꞌ peliuna waliare to kodake, meliu dosare. Alaꞌ kobukotana Pueꞌ Ala horiana hinewoꞌena nohukumohi.
Hi Paulu dokoꞌ womo mokadoroꞌi toTesalonika
17-18 Halali-halali, hawaꞌi morue ka pokaꞌanta, popundaka mpuꞌu pe ingkei. Kehapoki mokaꞌa moꞌela, angkana lalinta tontona hidupaꞌ. Alaꞌ kopopundangki, kipaliꞌ mpuꞌu lala hingkeꞌna hohumboka nolou mokadoroꞌikei. Hei aku hi Paulu, haꞌumbora mpihamoꞌa dokoꞌ nolou mokadoroꞌikei, angkana datu tokodake mosalemporiꞌa. 19 Kikodokoꞌi mpuꞌu mokadoroꞌikei, alaꞌ ane hupaꞌmo tempo kohupaꞌana hi Yesu Pueꞌta hei hirampuki i hinaroNa, himoreꞌi tene to hingkiꞌ mewali pohinaruangki hei wuaꞌna pajamangki to kipomotanaꞌ? 20 Bateꞌna ingkei mpuꞌu to kipokodeꞌ hei kipomotanaꞌ!