Kolose 1

Suraꞌna Hi Paulu

To Nopokatu Pe ToSarani I Kota

Kolose

Pe jumaꞌa

kota Kolose

1 Suraꞌ hieꞌe ka aku hi Paulu, to noꞌuwiꞌ Pueꞌ Ala mewali surona Yesu Kerisitu motuntuni peleihaNa. Hei halali hampepoꞌohinta hi Timotius mampoꞌawaꞌa. 2 Kipokatu suraꞌ hieꞌe pe ingkei halali hampepoꞌohingki i Kolose to tungkuꞌ mepoꞌohi pe Kerisitu. Tabea moromiꞌ! Hinamo Pueꞌ Ala Umoꞌta Nobarakatikei ka kopopuhiꞌna laliNa hei mampaꞌanikei romiꞌ ngkotuwuꞌ.

Hi Paulu mantiꞌi woriꞌ komoromiꞌ i Pueꞌ Ala nokomi pepoꞌohira hei komarimara toKolose

3 I piha-pihana kipekokaekikei, kitiꞌi woriꞌ komoromiꞌna i Pueꞌ Ala, Umoꞌna Pueꞌta Yesu Kerisitu, 4 alaꞌ kihorimo kareba noniuꞌ komarohona pepoꞌohimi pe Yesu Kerisitu hei komarimami i lekiꞌ-lekiꞌna toaꞌNa. 5 Maroho pepoꞌohimi hei rimami, alaꞌ ipohinarukei mpololeke hapo to nopatimomokikei Pueꞌ Ala i suruga, hibali to ihorimokei ka poturuꞌ to tuꞌu, iomo Boo Mangkolehi. 6 Boo Mangkolehi tiꞌo tekareba i humanele duniaꞌ, horiana koworiꞌ-woriꞌa toaꞌ to mepoꞌohi i Pueꞌ Yesu hei mowalihi hapo to moromiꞌ. Hibali to mewali i ingkei, halali-halali. Ikoꞌihorinakei Boo Mangkolehi tiꞌo, liumokei mepoꞌohi pe Pueꞌ Yesu, horiana ibahaꞌmokei kotuꞌuna kopopuhiꞌna lalina Pueꞌ Ala pe ingkiꞌ. 7 Boo Mangkolehi tiꞌo ihorikei ka hi Epara, awangki majama to kipokarima. Hi Epara tiꞌo, iomo rumbaꞌana Kerisitu to nipoꞌohi majama mosulingikei. 8 Iomo to mampekarebaiki pe ingka hohumbo komarimami alaꞌ perandana Inohaꞌ Mangkolehi.

Hi Paulu mampekokaeki toKolose

9 Mewaliꞌ, halali-halali, ikokihorina kareba noniuꞌ pepoꞌohimi, kipekokaekikei nturusi. Kiperapiꞌ pe Pueꞌ Ala hingkeꞌna Nopokonontokikei peleiNe moliu Inohaꞌ Mangkolehi, hingkeꞌna mobaro lalimi hei ibahaꞌkei mpololeke lekiꞌ-lekiꞌna noniuꞌ Pueꞌ Ala. 10 Mekokaeka hatoꞌo hingkeꞌna tuwuꞌmi hingkiꞌ hintotoꞌ hante peleihana Pueꞌ. Ane watoꞌoꞌi, lekiꞌ-lekiꞌna waliami hingkiꞌ mampomotanaꞌ laliNa hei hingkiꞌ tetambai woꞌo kopobahaꞌmi noniuꞌ Pueꞌ Ala. 11 Kiperapiꞌ pe Pueꞌ Ala hingkeꞌna Nopokaroho lalimi moliu kuasaꞌNa to maroho mpololeke, hingkeꞌna sabaraꞌkei morii hapolu to morumpakei, hei motanaꞌkei nturusi i lalimi. 12 Mekokaeka hingkeꞌna itiꞌikei woriꞌ komoromiꞌ pe Umoꞌta, alaꞌ Iomo to mampopewalikei toaꞌNa, horiana masipatoꞌkei pahua dolaꞌmi moꞌawa hante lekiꞌ-lekiꞌna toaꞌNa i lali kodatua suruga.

13 Pueꞌ Ala mampohentemoki ka kuasaꞌ to mokorindi, hei Nopopewalimokei toaꞌNa i lali poparentana Anaꞌna to Nopokarima. 14 Moliu AnaꞌNa tiꞌo, Nohompoꞌmoki, palaihana, Noꞌampunimo dosante.

Kuasaꞌna hi Yesu meliu ka langkaꞌ-langkaꞌna

15 Pueꞌ Ala hawaꞌi toꞌokiꞌ.

Angkana ane tobahaꞌi pambiarane hei kuasaꞌna hi Yesu,

tobahaꞌ woꞌo pambiarana hei kuasaꞌNa Pueꞌ Ala.

Hi Yesu tiꞌo torekeꞌ hibali AnaꞌNa tokokaꞌ,

hei melobi kuasaꞌNe

ka lekiꞌ-lekiꞌna to nowali Pueꞌ Ala,

16 alaꞌ moliu hi Yesu,

Pueꞌ Ala mowali lekiꞌ-lekiꞌna to uwaꞌ,

moromiꞌ to i suruga hei to i duniaꞌ,

moromiꞌ to niꞌokiꞌ hei to hawaꞌi niꞌokiꞌ,

tepekahi lekiꞌ-lekiꞌna to makuasaꞌ hei to meparenta.

Tungkaihana mampopewali lekiꞌ-lekiꞌna tiꞌo moliu i Kerisitu,

hingkeꞌna lekiꞌ-lekiꞌna tiꞌo mampokodeꞌ Kerisitu.

17 Ikohandoaꞌana tene uwaꞌ lekiꞌ-lekiꞌna,

umbiꞌna uwaꞌmo hi Yesu.

Hei lekiꞌ-lekiꞌna tiꞌo

uwaꞌ i lali komakuasaꞌNa.

18 Ingkiꞌ to mepoꞌohi pe Kerisitu nipandiriꞌ hibali wotaNa, hei Kerisitu iomo tutuꞌta. Winoro tutuꞌ to moparenta wotalokaꞌ, Kerisitu Iomo to moparenta lekiꞌ-lekiꞌna toaꞌ to mepoꞌohi pe Io. Iomo tokokaꞌ, palaihana, to uluꞌ-uluꞌna tuwuꞌ huliꞌ ka komahia, hingkeꞌna Iomo to peꞌoꞌuwaꞌne ka lekiꞌ-lekiꞌna to uwaꞌ. 19 Pueꞌ Ala mampokononto lekiꞌ-lekiꞌna to uwaꞌ i Io uwaꞌ woꞌo i AnaꞌNa, iomo hinaꞌ hawaꞌi uwaꞌ komakuraꞌNa. 20 Pueꞌ Ala morumbaꞌ humei AnaꞌNa hingkeꞌna mahi i loti momehulepe. Tungkaihana mowali hatoꞌo, hingkeꞌna lekiꞌ-lekiꞌna to uwaꞌ Nopohintuwuꞌ huliꞌ hante Io, moromiꞌ to i duniaꞌ, moromiꞌ to i suruga. Komahina hi Yesu^a i loti momehulepe mampohintuwuꞌ lekiꞌ-lekiꞌna hante Pueꞌ Ala.

21 Hampiha, halali-halali, moꞌelakei ka Pueꞌ Ala, hei iponiꞌkei alaꞌ kodake lalimi hante waliami. 22 Angkana hinewowoꞌena, nokomi komahina AnaꞌNa, mohintuwuꞌmokei hante Pueꞌ Ala, hingkeꞌna Nopomangkolehikei wute hawaꞌi uwaꞌ komasalaꞌmi ba komakuraꞌmi i pampeꞌeleNa. 23 Mewaliꞌ, halali-halali, hangangaa maroho pepoꞌohimi, hei hangangaa mepoꞌohikei nturusi i Kareba moromiꞌ. Pokarohokei petuntumi i poturuꞌ to ihorimokei hei inioꞌ ipohentekei pepohinarumi i hapo to nodandikikei Pueꞌ Ala i lali Kareba moromiꞌ. Kareba moromiꞌ tiꞌo nipekarebakimo pe humanele duniaꞌ. Hei aku woꞌo, mewaliꞌa rumbaꞌana Pueꞌ to mampowute Kareba moromiꞌ tiꞌo.

Pajamana hante komaporiꞌna hi Paulu mampowute Kareba Moromiꞌ

24 Motanaꞌa mpololeke alaꞌ wadiꞌa maporiꞌ nokomi pajamangku mosulungikei i lekiꞌ-lekiꞌna toaꞌNa, to nipandiriꞌ hibali wotana Kerisitu. 25 Pueꞌ Ala mohiniꞌa mewali topajamaNa to mosulungi lekiꞌ-lekiꞌna toaꞌ to mepoꞌohi pe Io, hingkeꞌna kupowute lekiꞌ-lekiꞌne karebaNa pe ingkei to handoꞌiokei toYahudi. 26 I natuna ntoꞌa, tungkaihana Pueꞌ Ala tewuni pe lekiꞌ-lekiꞌna toaꞌ. Angkana hinewowoꞌena nipotongawamo pe lekiꞌ-lekiꞌna toaꞌna Pueꞌ Ala. 27 To tewuni tiꞌo, hinewowoꞌena hingkiꞌ nopowute Pueꞌ Ala pe toaꞌNa, iomo hohumbo komoromiꞌne hei komanobaꞌna tungkaihaNa pe ingkei to handoꞌiokei toYahudi. Tungkaihana tiꞌo, iomo Kerisitu uwaꞌ i lalimi, hingkeꞌna mononto kopahuami kotuwuꞌ to wolaꞌ moꞌawa hante Pueꞌ Ala. Tiꞌomo pepohinarunte!

28-29 Mewali, kipekarebaiki pe lekiꞌ-lekiꞌna toaꞌ noniuꞌ i Kerisitu, motuntuni kopebahaꞌki ka Pueꞌ ala. Kipaꞌanihi lolita hei kipoturuꞌhi, hante kirandahi lekiꞌ-lekiꞌra, hingkeꞌna ane mehupaꞌka i hinarona Pueꞌ Ala, wadihi kikomi lekiꞌ-lekiꞌna pe Io hei hawaꞌi uwaꞌ komakuraꞌne, alaꞌ mohaꞌanumohi hante Kerisitu. Iomo horiana modotoꞌa majama. Kuhohiꞌi mampololiu pajamangku motuntuni komaroho to kuhua ka Kerisitu, alaꞌ kodeꞌ mpuꞌu kuasaꞌne i lali kotuwuꞌku.