Hangangaa mohintuwuꞌkei
2
1 Mewaliꞌ, halali-halali, maroho lalimi alaꞌ pohintuwuꞌmi hante Kerisitu. Dodoli lalimi alaꞌ nopokarimakei Kerisitu. Inohaꞌ Mangkolehi mampoꞌawakei. Momepokarimakei haduo hei haduo. 2 Iomo horiana kuperapiꞌ hingkeꞌna mohituwuꞌkei haduo hei haduo, momepokarimakei mpololeke, ipohaꞌanukei lalimi, hei ipohaꞌanukei tungkaihami. Ane iwalikei hatoꞌo, hingkiꞌ motanaꞌa mpololeke. 3 Inioꞌkei mampekirilu kotuwuꞌmi hadoduomi, inioꞌkei mampokokodeꞌ. Aginamo mengkaꞌiwowoikei, hei hangangaa irekeꞌkei toaꞌ ntaniꞌna meliu ka ingkei. 4 Inioꞌkei mampekirilu wotami hadoduomi, angkana hangangaa isulungikei hangko awami.5 Pambiarami hangangaa hibali waliana Yesu Kerisitu
6 Kehapoꞌi Kerisitu hibali hante Pueꞌ Ala,
Io hawaꞌi motiko kohibaliana hante Pueꞌ Ala,
7 angkana Nopohinte hinangkana tiꞌo,
hei nipoꞌanaꞌki hibali toaꞌ biasa.
TuwuꞌNa i duniaꞌ hieꞌe hibali hante manusiaꞌ,
Io tuwuꞌ hibali hawiꞌ.
8 Io mengkaꞌiwowoiꞌ hei mengkoruꞌ pe Pueꞌ Ala wute mahi,
nirokoꞌ i loti momehulepe
9 Iomo hinaꞌ Pueꞌ Ala mampoꞌiwomboꞌI mpololeke,
hei Nopaꞌani konaꞌ to meliu komakuasaꞌne ka lekiꞌ-lekiꞌna konaꞌ to uwaꞌ,
10 hingkeꞌna lekiꞌ-lekiꞌna to tuwuꞌ hingkiꞌ mampokodeꞌ konaꞌna Yesu,
moromiꞌ to i suruga,
moromiꞌ to i duniaꞌ,
moromiꞌ to i peꞌohaꞌa to mahi.
Lekiꞌ-lekiꞌra hingkiꞌ melingkotuꞌ mengkoruꞌ pe Io,
11 Hei hingkiꞌ ropangakuꞌ, “Yesu Kerisitu iomo Pueꞌ,”
koꞌukoana Pueꞌ Ala Umoꞌta nipokodeꞌ.
Pueꞌ Ala majama i lalinta hingkeꞌna mampetuntuiki peleihaNa
12 Mewaliꞌ, halali-halali to kupokarima. I tempoku tene moꞌawa-awa hante ingkei poko mengkoruꞌkei pe aku, pelumbuꞌna i tempoku moꞌela ka ingkei. Noposalamaꞌmokei Pueꞌ Ala, mewaliꞌ mengkoruꞌmokei pe Io hei iwalimokei nturusi hapo to moromiꞌ, 13 alaꞌ Pueꞌ Ala to majama i lalimi horiana ikodokoꞌikei mampetuntui peleihaNa, hei Io to mampaꞌanikei roho lali hingkeꞌna ibiaꞌkei mampetuntui peleihaNa.
14 I langkaꞌ-langkaꞌna to ijamakei, inioꞌkei monau-nau ba momehoniꞌ-honiꞌ, 15 hingkeꞌna tongawa i lekiꞌ-lekiꞌna toaꞌ koꞌingkeina anaꞌne Pueꞌ Ala, to hawaꞌi uwaꞌ komasalaꞌmi, mangkolehi tuwuꞌmi hei hawaꞌi uwaꞌ tungkaihami to kodake. Meꞌohaꞌkei i lumbura toaꞌ to kodake waliara hei kodake lalire, angkana manakiꞌkei hibali betueꞌ mewanta i lali komokorindi 16 kolentuꞌami mampowute pe iohi Kareba Moromiꞌ to mampoꞌuwaꞌ kotuwuꞌ to hawaꞌi mokoꞌukoa. Mewaliꞌ, halali-halali, ane hatoꞌoꞌi nturusi waliami, i ando kohupaꞌana huliꞌ Kerisitu, hingkiꞌ motanaꞌ lalingka alaꞌ waliami tiꞌo to mampokononto kohawaꞌna langkoꞌ jamangka i lumbumi, hei lekiꞌ-lekiꞌna to kupoturuꞌkikei modumbuꞌ i kotuwuꞌmi. 17 Kehapoꞌi kotuwuꞌku nipewei mewali popenomba hibali anggoroꞌ to nibobo i meja popenomba, Popenomba tiꞌo hibobali hante popenombami woꞌo alaꞌ pepoꞌohimi. Ane hatoꞌoꞌi motanaꞌa moꞌawa ingkei. 18 Kupohinaru woꞌo hingkeꞌna motanaꞌkei moꞌawa hante aku.
Hi Timotius hante hi Eparoditu
19 Ane peleihana Pueꞌ Yesu, uwaꞌ tungkaihangku morumbaꞌ hi Timotius nolou moweoꞌikei, hingkeꞌna ane mahuliꞌi intu humei, hingkiꞌ dodoliꞌa pahori karebami. 20 I lumbura toaꞌ to uwaꞌhi iseꞌe, bateꞌnalu hi Timotius to hampekokiri hante aku, alaꞌ tuꞌu-tuꞌu mpuꞌu nokodokoꞌi pobahaꞌ hohumbo kotuwuꞌmi hinewowoꞌena. 21 To ntaniꞌna mampaliꞌluhi kotuwuꞌra hadoduora, hawaꞌhi mampekiri peleihana Yesu Kerisitu. 22 Angkana mombahamo kotimomone hi Timotius, alaꞌ io majama moꞌawa-awa hante aku mampowute Kareba Moromiꞌ. Hei hi Timotius hieꞌe hibalimo anaꞌku i lali pajamangki. 23 Mewaliꞌ, ane kubahaꞌmo hohumbo konibutusina kara-karangku, io hingkiꞌ kurumbaꞌ nolou moweoꞌikei. 24 Hei kubahaꞌ ala pesulungina Pueꞌ, hamboaꞌmo morue hingkiꞌ nolouꞌa woꞌo moweoꞌikei.
25 Ane halalinta hi Eparoditu, hingkiꞌ kurumbaꞌ medulu mahuliꞌ nolou pe ingkei. Io halali hampepoꞌohingku hei hampajojamangku mampowute Kareba Moromiꞌ, hei nosulungiꞌa i pampowutengku Kareba Moromiꞌ tiꞌo pe toaꞌ to meꞌewa, hei io to irumbaꞌkei mosulungiꞌa i lali koparaluangku. 26 Aginamo kurumbaꞌ mahuliꞌ hinewowoꞌena, alaꞌ io popundamo mpololeke pe ingkei lekiꞌ-lekiꞌmi, hei masusa laline alaꞌ ihorimokei komohakiꞌne. 27 Makaja komohakiꞌne horiana hangkiuꞌmo hingkiꞌ mahi. Angkana koꞌukoana moꞌoriꞌlu mahuliꞌ alaꞌ nopokarimaꞌi Pueꞌ Ala. Hei Pueꞌ Ala mampopebahaꞌ woꞌo komarimana i aku, alaꞌ hi Eparoditu tiꞌo Nopokoꞌoriꞌ. Ane kemahiꞌi, ketetambai kohanondoihangka. 28 Iomo horiana hohiꞌ kurumbaꞌ mahuliꞌ nolou pe ingkei, hingkeꞌna ane mohidupaꞌ womokei, io hingkiꞌ mampododolikei, hei hingkiꞌ lebaꞌ lalingka. 29-30 Mewaliꞌ, kuperapiꞌ hingkeꞌna io itorimokei i komotanaꞌ lali hei iꞌadaꞌikei alaꞌ io hangkiuꞌ woꞌo hingkiꞌ mahi mampopatengkaꞌ jamana Pueꞌ. Hatoꞌo woꞌo lekiꞌ-lekiꞌna toaꞌ to hibali hante hi Eparoditu iꞌadaꞌikei. Io hawaꞌi mampekiri wotana hadoduona alaꞌ nokodokoꞌi morewuꞌa iseꞌe, io mewali sulewotami alaꞌ hawaꞌkei hampaka' morewuꞌa iseꞌe.