Poturuꞌ pe oꞌanaꞌ hante tomotodi
6
1 Pokoꞌonaꞌ, nokomi pohintuwuꞌmi hante Pueꞌ, hangangaa ipetuntuikei hawaꞌne tomotodimi, alaꞌ tiꞌo to masipatoꞌ iwalikei. 2 Hawaꞌ to uluꞌ-uluꞌna i lali Suraꞌ Mangkolehi to uwaꞌ dandina, iomo: “Hangangaa mengkoruꞌkei i inoꞌ umoꞌmi, 3 hingkeꞌna kurauꞌ sungaꞌmi hei moromiꞌ tuwuꞌmi i duniaꞌ hieꞌe.”4 Hei ingkei to nipoꞌumoꞌ, inioꞌkei mampomolalo lalina anaꞌmi. Hangangaa nirewahihi, nipoturuꞌhi hei nipaꞌanihi lolita to masipatoꞌ hante peleihana Pueꞌ.
Poturuꞌ pe toaꞌ to nipohawiꞌ hei pe tonipetua
5 Halalingku to nipohawiꞌ, ipetuntuikei hawaꞌne tuami i womboꞌ duniaꞌ hieꞌe. Iꞌadaꞌikei hei ipengkoruꞌikei ka lalimi mpololeke, hibali pengkoruꞌmi pe Kerisitu. 6 Inioꞌkei mampopeꞌoꞌokiꞌlu i tuami hingkeꞌna niperenakikei. Hangangaa majamakei ka lalimi mpololeke alaꞌ ingkei rumbaꞌanakei Kerisitu to motuntuni peleihana Pueꞌ Ala. 7 Hangangaa majamakei hante lali to motanaꞌ, hibalikei majama i Pueꞌ, hei handoꞌiolu i toaꞌ. 8 Ipoꞌilalikei lolita hieꞌe: lekiꞌ-lekiꞌna toaꞌ to mowalia moromiꞌ, bateꞌra hingkiꞌ pahuahi howonina ka Pueꞌ, moromiꞌ to hawiꞌ tuwuꞌra, moromiꞌ to handoꞌio hawiꞌ tuwuꞌra.
9 Hei ingkei to nipotua, hangangaa moromiꞌ woꞌo waliami pe hawiꞌmi. Inioꞌhi nipototehuꞌ. Hangangaa ikolowoikei: ingkei hante hawiꞌmi, haduolu Pueꞌmi, iomo Pueꞌ i lali suruga to hawaꞌi mampopoꞌoriꞌori toaꞌ.
ToSarani nipandiriꞌ hibali surodadu
10 Koꞌukoana halali-halali, hangangaa marohokei i lali roho kuasaꞌna Pueꞌ, alaꞌ mohaꞌanumokei hante Io. 11 Hangangaa ipakeꞌkei lekiꞌ-lekiꞌna parewa mpoponiꞌ to nopatimomokikei Pueꞌ Ala, hingkeꞌna marohokei moꞌewa akalana Belisiꞌ. 12 Alaꞌ i poponiꞌ hieꞌe, hawaꞌki moꞌewa toaꞌ angkana moꞌewaki kuasaꞌna to hawaꞌi toꞌokiꞌ. Moꞌewaki tadulako-tadulako komokorindi to makuasaꞌ i duniaꞌ. Moꞌewaki hinangkana lomoa ba to kodake to mokuasaꞌi raoha. 13 Iomo horiana, hangangaa ipakeꞌkei lekiꞌ-lekiꞌna parewa mpoponiꞌ to ka Pueꞌ Ala, hingkeꞌna ane hupaꞌmo tempo komaporiꞌ to makaja mpololeke, hingkiꞌ marohokei nturusi i pepoꞌohimi wute i kotutuana komaporiꞌ to morumpakei, hei hawaꞌkei hingkiꞌ maꞌoruꞌ.
14 Hangangaa timomokei, ipakeꞌmokei parewa mpoponiꞌ to ka Pueꞌ Ala.
Hangangaa ipokarohokei petuntumi i poturuꞌ to tuꞌu noniuꞌ Pueꞌ,
hibali salupiꞌ i henaꞌmi.
Hangangaa mononto lalimi hante waliami,
potukaꞌ baduꞌ besi mampoꞌodaꞌ wotami ka poniꞌmi.
15 Hangangaa timomomokei nturusi mampowute Kareba Moromiꞌ,
Alaꞌ tiꞌo to mampohaꞌanu toaꞌ hante Pueꞌ Ala,
hibali sapatuꞌ to ipakeꞌkei matengkaꞌ.
16 Hei hangangaa mepoꞌohikei nturusi pe Pueꞌ Ala.
Pepoꞌohimi tiꞌo, ipolabakei nturusi.
Nokomi pepoꞌohimi, wadikei molabai lekiꞌ-lekiꞌna mata pana api to ka Belisiꞌ.
17 Hangangaa ipohinarukei kosalamaꞌami ka Pueꞌ Ala.
Kosalamaꞌa tiꞌo hibali songko besi,
Hangangaa ipakeꞌkei Boone Pueꞌ Ala
alaꞌ tiꞌo hibali piho to nopaꞌanikikei Inohaꞌ Mangkolehi.
18 Hei i lali poponiꞌmi moꞌewa Belisiꞌ, hangangaa mekokaekei nturusi merapiꞌ roho ka Pueꞌ Ala. I langkaꞌ-langkaꞌna, mekokaekei motuntuni perandana Inohaꞌ Mangkolehi. Inioꞌkei nohehaꞌ mekokae. Hangangaa ipekokaekikei nturusi lekiꞌ-lekiꞌne toaꞌna Pueꞌ Ala.
19 Kuperapiꞌ hingkeꞌna ipekokaekiꞌakei woꞌo, hingkeꞌna i tempoku mololita, Pueꞌ Ala hingkiꞌ mampaꞌaniꞌa lolita to moromiꞌ, hingkeꞌna hawaꞌa morokaꞌ mampowute Kareba Moromiꞌ to tewuni uluꞌana, angkana hinewowoꞌena nopokonontokimoki Pueꞌ Ala. 20 Pueꞌ Yesu mohiniꞌa mewali suroNa mampowute Kareba Moromiꞌ, horiana hinewowoꞌena nitarungkuꞌa. Mewaliꞌ, kuperapiꞌ hingkeꞌna ipekokaekiꞌakei hingkeꞌna wuraniꞌa mampowute Kareba Moromiꞌ, alaꞌ tiꞌo to hangangaa kuwali.
Lolita koꞌukoana
21 Hingkeꞌna ibahaꞌkei hohumbo kotuwuꞌka hinewowoꞌena, kurumbaꞌmo halalinte hi Tikiku nolou moweoꞌikei hei mamponobahaꞌikei lekiꞌ-lekiꞌna to mewali i aku. Hi Tikiku tiꞌo, iomo halalinta to topokarima, to nipoꞌohi mampopatengkaꞌ jamana Pueꞌ Ala. 22 Iomo horiana kurumbaꞌ nolou pe ingkei mamponobahaꞌikei hohumbo koꞌuwaꞌangki iseꞌe, hingkeꞌna tepododoli lalimi.
23 Hinamo Pueꞌ Ala umoꞌta hei Pueꞌ Yesu Kerisitu mampaꞌanikei Romiꞌ Ngkotuwuꞌ pe lekiꞌ-lekiꞌna halali hampepoꞌohingku. Kuperapiꞌ woꞌo hingkeꞌna Pueꞌ Ala hingkiꞌ mampodimbi pomepokarimami hante pepoꞌohimi. 24 Hinamo Pueꞌ mobarakati lekiꞌ-lekiꞌna toaꞌ to mampokarima Pueꞌta Yesu Kerisitu hante rima to hawaꞌi mokoꞌukoa.