Hi Paulu mampopangkolowoi tokorintus hingkeꞌna inioꞌhi motuntuni
11
1 Mewaliꞌ halali-halali, kuperapiꞌ hingkeꞌna sabaraꞌkei mampehoromua lolitangku, kehapoꞌa mololita hibali tobebe. Angkana umbiꞌ sabaraꞌmokei mpuꞌu pe aku. 2 Mohiriꞌa alaꞌ uwaꞌhi toaꞌ to mangkodokoꞌi moroakei ka Kerisitu. Angkana komohiriꞌku hieꞌe hintotoꞌ hante peleihana Pueꞌ Ala,a alaꞌ akumo to ulu-uluꞌne mangkomikei mepoꞌohi pe Kerisitu, hibalikei anaꞌntowowalob to hingkiꞌ nipahamoko hante haduo tomaꞌani, hei tomaꞌani tiꞌo iomo Kerisitu. 3 Angkana kuperapiꞌ hingkeꞌna hawaꞌkei nipokonawuꞌ, koꞌukoana hamboaꞌmo ka lalimi mepoꞌohi pe Kerisitu. Hibali ule hampiha to mokeloi hi Hawa hante lolitana to meꞌakokalai. 4 Kutiꞌi hatoꞌo alaꞌ motanaꞌkei mantorimo toaꞌ to hupaꞌ, to mampoturuꞌkei salaꞌ noniuꞌ i hi Yesu, hei poturuꞌra mosisalaꞌ hante hapo to kipoturuꞌkimokei. Mahamporeꞌi horiana ileikei mampehoromua lolitare? Ba ileikeireꞌi mantorimo inohaꞌ ntaniꞌnac to mosisalaꞌ hante Inohaꞌ Mangkolehi to itorimomokei? Ba ileikeireꞌi mantorimo poturuꞌ to mosisalaꞌ hante Kareba Moromiꞌ to ipoꞌohimokei? 5 Toaꞌ to mepoturuꞌ hatoꞌo rotiꞌi, “Suro to meliu komoromiꞌre”, angkana kupekiri aku hawaꞌa woꞌo i wowoiꞌ ka iohi. 6 Kehapoꞌi hawaꞌa mapande mololita, angkana kubahaꞌ mpololeke poturuꞌ to tuꞌu. Hei poturuꞌ tiꞌo ihorikei hei iꞌokiꞌmokei mpuꞌu i lekiꞌna waliangki i lumbumi.Hi Paulu hawaꞌi merapiꞌ harona kolentuꞌana majama
7 I tempoku mampowute Kareba Moromiꞌ pe ingkei hampiha, hawaꞌa merapiꞌ harongku pe ingkei kehapoꞌi hangkiuꞌlu. Mengkaꞌiwowoiꞌa hei majamaꞌa hante korawengkud hingkeꞌna kupowute kareba to mangkomi pebarakati pe ingkei. Ba masalaꞌa, halali-halali, alaꞌ hawaꞌa merapiꞌ harongku pe ingkei? 8 Kolintuꞌaku tene i kotami hampiha, jumaꞌa-jumaꞌa to uwaꞌhi i bolaꞌ ntaniꞌna mampokatuhi doiꞌ pe aku. Wadi kutiꞌi: iohi wae to kupokarugiꞌ, alaꞌ doiꞌra kupakeꞌ i lali pajamangku mampowute Kareba Moromiꞌ pe ingkei. 9 I tempo tiꞌo, uwaꞌ woꞌo komakuraꞌka, angkana hawaꞌkei kupomaporiꞌ, alaꞌ uwaꞌhi halalinte to mehupaꞌ ka woiꞌ Makedonia mangkomi doiꞌ to mampoganai hapo to kuparaluꞌi. Kupaliꞌ nturusi lala, hingkeꞌna hawaꞌkei kupomaporiꞌ, hei tiꞌo to hingkiꞌ kuwali nturusi. 10 Tuꞌu mpololeke hapo to kutiꞌi hieꞌe, hibali kotuꞌuna lolitana Kerisitu iomo, motanaꞌ lalingka alaꞌ hawaꞌa merapiꞌ harongku pe ingkei ba pe hihimolu to meꞌohaꞌ i woiꞌ Akaia. Komotanaꞌna lalingku hieꞌe hawaꞌi hingkiꞌ tewolihi. 11 Mahamporeꞌi hinaꞌ mololitaꞌa hatoꞌo? Ba itiꞌikei hawaꞌkei kupokarima, halali-halali? Pueꞌ Ala pobahaꞌ komarimana lalingku pe ingkei.
12 Hapo to kuwali tiꞌo, hingkiꞌ kuwali nturusi. Hawaꞌa hingkiꞌ merapiꞌ harongku pe ingkei hibali toaꞌ ntaniꞌna to merapiꞌ harora, hingkeꞌna hawaꞌhi wadi mampokokodeꞌ mantiꞌi hibobali pajamangki. 13 Toaꞌ to hatoꞌo, iomohi suro to mepomonawuꞌ alaꞌ mebagiuꞌhi. Iohi majamahi i lumbumi hei rotiꞌi koꞌiora surone Kerisitu, hantaro mowutihi! 14 Waliara tiꞌo hampoliꞌmo topowuli, alaꞌ motuntunihi waliana Belisiꞌe to mowolihi wotana mewali hibali haduo malaꞌeka to mewanta. 15 Iomo horiana hampoliꞌmo nipowuli ane topajamana Belisiꞌ mohobiꞌi waliara to kodake, hingkeꞌna niꞌokiꞌhi hibali hante topajamana Pueꞌ Ala. Angkana koꞌukoana, hingkiꞌ pahuahi howonina to hintotoꞌ hante waliara.
Hi Paulu mampotongawa koꞌiona surone Pueꞌ Yesu
16 Mewaliꞌ, hibali to kutiꞌi hingkeꞌenia, kuperapiꞌ hingkeꞌna nipehoromua mpololeke lolitangka, kehapoꞌi mololitaꞌa hibali tobebe. Inioꞌ ipekirikei aku hieꞌe to bebeꞌa, angkana ane uwaꞌkei tene to mantiꞌi aku hieꞌe to bebeꞌa, sabaraꞌkei dulu hampaiꞌ, hingkeꞌna wadiꞌa mamperenaki wotangku hadoduongku. 17 Kotuꞌuana, lolitangku hieꞌe hawaꞌi motuntuni parentana Pueꞌ Ala, angkana kolentuꞌangku mololita hibali toaꞌ tobebe, alaꞌ kuperenaki wotangka hadoduongku. 18 Woriꞌ toaꞌ mampokokodeꞌ noniuꞌ kotuwuꞌra i duniaꞌ hieꞌe. Mewaliꞌ hinewowoꞌena hingkiꞌ kuwali woꞌo hatoꞌo. 19 Itiꞌikei koꞌingkeina to mapande, angkana ipotanaꞌkei mpololeke poturuꞌre toaꞌ tobebe! 20 Ane uwaꞌhi guru to mampohawiꞌkei, nitorimohi ngkoromiꞌ. Ane uwaꞌhi to mampomonawuꞌkei ba mobagiuꞌkei, nitorimohi woꞌo. Ane uwaꞌhi to mampokokodeꞌ ba motampelekei, iriilukei. 21 Ba itiꞌikeireꞌi hingkiꞌ mohiliꞌa alaꞌ hawaꞌka podehoꞌ mampetuntui waliara tiꞌo?
Angkana ane podehoꞌhi mamperenaki wotara hadoduora, aku woꞌo podehoꞌluꞌa mamperenaki wotangku hadoduongku. (Iponindikei, mololitaꞌa hibali tobebe.) 22 Mamperenakihi koꞌiora toIbarani, aku woꞌo toIbaraniluꞌa! Mamperenakihi koꞌiora toSaraeli,f aku toSaraililuꞌa woꞌo. Mamperenakihi koꞌiora muleꞌne hi Burahima, aku woꞌo muleꞌnaluꞌa hi Burahima. 23 Mamperenakihi koꞌiora topajamane Kerisitu, Peꞌoꞌuwaꞌna tene aku ka iohi! (Pololitangku hieꞌe hibali toaꞌ to magila.) Podotoꞌa tene majama hintina iohi. Wori' mpihaꞌa nitarungkuꞌ,g woriꞌ mpihaꞌa nipoperima-rima makaja,h hei woriꞌ mpihaꞌa woꞌo hingkiꞌ mahi.i 24 Limo mpihamoꞌa rohuku toYahudihi; tolu mpuluꞌ hio mpihamoꞌa nikondo.j 25 Tolu mpihaꞌa woꞌo rohuku toRomahi, robambaꞌa hante laiꞌ.k Hampihamoꞌa rowatuiꞌa toaꞌ to mangkodokoꞌi morokaꞌa.l Tolu mpihamo kapalaꞌ tahiꞌ to kupehindeꞌi mentoriꞌ, heim hampihaꞌa mekononangko i tahiꞌ hamini haꞌando. 26 I lali patengkaꞌangku, woriꞌ mpihaꞌa morumpa komaporiꞌ: kolentuꞌangku mewute noliuꞌa uwai, rorompoꞌiꞌa toperorompoꞌi, ropoperima-rimaꞌa toYahudihi, ropoperima-rima toaꞌ to handoꞌio toYahudihi. Norumpaꞌa kohorewuꞌ i lali kota. Norumpaꞌa kohorewuꞌ i popada. Norumpaꞌa kohorewuꞌ i womboꞌ tahiꞌ. Norumpaꞌa woꞌo kohorewuꞌ ka toaꞌ to mantiꞌi koꞌiora halali hampepoꞌohingku, angkana kotuꞌuana hawaꞌi! 27 I lali pampopatengkaꞌku jamana Pueꞌ, mawongkoꞌa alaꞌ majamaꞌa madori. Woriꞌ mpiha hawaꞌa hohumbo leꞌo, biloraꞌa hei mangkumaroꞌa. Woriꞌ mpiha hawaꞌi uwaꞌ pangkaku, hoholeꞌa hei hawaꞌi ganaꞌ baduꞌka.
28 Peꞌoꞌuwaꞌna tene katoꞌo, to kupomaporiꞌ, ando-ando mampekiriꞌa hohumbo kotuwuꞌre toSarani i jumaꞌa-jumaꞌa. 29 Ane uwaꞌhi halali hampepoꞌohingku to masusa lalire alaꞌ komoledeꞌna i pepoꞌohira, masusa woꞌo lalingka. Ane uwaꞌhi to nipokonawuꞌ i lali dosa, bukotaꞌa pe toaꞌ to mepomonawuꞌ.
30 Ane hangangaa mampokodeꞌa wotangku hadoduongku, mampokokodeꞌa noniuꞌ i komoledeꞌku. 31 Lekiꞌ-lekiꞌna to kutiꞌi hingkeꞌenia, tuꞌu lekiꞌna, hawaꞌa mowuti. Pueꞌ Ala, Umoꞌna Pueꞌ Yesu, Iomo sabiꞌka! Topokodeꞌmo wute nantolou-louna! 32 I tempoku uwaꞌ i kota Damasi, gubenuruꞌ to noparilangkaꞌ Datu Areta morumbaꞌ surodaduna mampoꞌodaꞌ wambaꞌ bente kota hingkeꞌna rohokiꞌa. 33 Angkana nosulungiꞌa awangkuhi. Rokahiꞌa i lali koranda hei roꞌuluꞌa pe howali moliu i salewaꞌ bente kota, iomo horiana himpolohoꞌa.