7
1 Mewaliꞌ, halalingku to kupokarima, alaꞌ ingkiꞌ hieꞌe to nodandimoki Pueꞌ Ala hatoꞌo, iomo horiana hangangaa ikoꞌelakei lekiꞌne to kodake, moromiꞌ to i wotanta, moromiꞌ to i lalinta. Hei hangangaa pedeꞌ mowaliki hapolu to hintotoꞌ hante peleihaNa, wuteki moromiꞌ i pampeꞌeleNa. Towali hatoꞌo alaꞌ mengkoruꞌki pe Pueꞌ Ala.2 Halali-halali! Kuperapiꞌ hingkeꞌna itorimoka ka lalimi mpololeke! Hawaꞌi uwaꞌ salaꞌki pe hihimolu. Hawaꞌka mampomonawuꞌ toaꞌ, hawaꞌka moꞌakalai toaꞌ hingkeꞌna kipahua rasiꞌ. 3 Tungkaihangku, hawaꞌkei kusalaꞌi, alaꞌ hibalimo to kutiꞌi, makaja komarimangki pe ingkei. Tuwuꞌka ba mahika, bateꞌna kipokarimakei. 4 Halali-halali, hawaꞌi uwaꞌ to kuwowuni pe ingkei alaꞌ kupoꞌohikei hei kuperenakikei woꞌo. Kehapoꞌi woriꞌ komaporiꞌ to morumpaka, dodoliꞌa hei motanaꞌa alaꞌ koꞌingkeina.
Motanaꞌ hi Paulu alaꞌ hi Titus
5 I tempoki hupaꞌ iseꞌe i poropensi Makedonia, hawaꞌi uwaꞌ tempoki meꞌoꞌohaꞌ. I umbolu koꞌakoangki, norumpaka woriꞌ komaporiꞌ. Rosalaꞌika toaꞌ woriꞌ. Masusa lalingkio mampekirikei tempo tiꞌo. 6 Angkana kutiꞌi woriꞌ komoromiꞌna pe Pueꞌ Ala to mampododoli toaꞌ to masusa lalira, alaꞌ Io mampododolika woꞌo. I tempo tiꞌo, hupaꞌmo hi Titus mampowute kareba ka ingkei. Mewaliꞌ, lalingki to masusa nopododoli Pueꞌ Ala. 7 Hei meliu katoꞌo, motanaꞌka pahori lolitana hi Titus noniuꞌ ingkei. Nopowute pe ingka hohumbo koꞌipododolinekei lalina kolentuꞌana meꞌohaꞌ i lumbumi. Notiꞌi makaja kopundami pe aku, hei ikodokoꞌikei hingkeꞌna hupaꞌa pe ingkei. Notiꞌi woꞌo: tewolihi lalimi hei merapiꞌkei ampu pe aku alaꞌ ikodokoꞌikei mohintuwuꞌ huliꞌ hante aku ka lalimi mpololeke. Halali-halali, kokuhorinalu kareba tiꞌo, tetambaimo komotanaꞌka.
8 Kehapoꞌi ohina suraꞌku hampihaa mampomolalo lalimi, angkana hawaꞌa nohohoꞌ moꞌukiꞌ suraꞌ tiꞌo. Uluꞌ-uluꞌna maporiꞌ mpololeke kuhori, alaꞌ kubahaꞌ bateꞌna masusa lalimi ane mobasakei suraꞌ tiꞌo. Angkana komasusana lalimi tiꞌo hampaiꞌlu. 9 Hinewowoꞌena motanaꞌa alaꞌ kuꞌukiꞌkikei suraꞌ tiꞌo. Hawaꞌa motanaꞌ alaꞌ komasusami, angkana motanaꞌa alaꞌ komasusami tiꞌo mangkomikei hingkeꞌna nohohoꞌkei ka waliami to hawaꞌi moromiꞌ. Alaꞌ kehapoꞌi masusa lalimi mobasa suraꞌku tiꞌo, komasusana lalimi mewali lalana Pueꞌ Ala mangkomi pebarakati pe ingkei. Mewaliꞌ, lolitangku i lali suraꞌ tiꞌo kotuꞌuana handoꞌio hingkeꞌna marugiꞌkei. 10 Uwaꞌ komasusa lali to hintotoꞌ hante peleihana Pueꞌ Ala, hei komasusa tiꞌo mangkomiki hingkeꞌna nohohoꞌki ka walianta to kodake, alana Pueꞌ Ala mohompoꞌki ka pehuku dosanta. Hei hawaꞌi uwaꞌ toaꞌ to masusa lalina nokomi koNoꞌampunina! Angkana komasusana lalira toaꞌ to hawaꞌi mepoꞌohi pe Pueꞌ Ala mangkomihi pe komahia to mokaꞌahi ka Pueꞌ Ala.
11 Ipondindikei komasusana lalimi tempomi mobasa suraꞌku hampiha, iomo komasusa to motuntuni peleihana Pueꞌ Ala. Ipekirikei moromiꞌ ba hapo wuaꞌne komasusami tiꞌo. Nokomi komasusami tiꞌo, dokoꞌkei mowali hapo to mononto. Ipomombahakei kotanakei ilei mohintuwuꞌ hante toaꞌ to mosapuakaka. Ipokoiꞌkei dosare toaꞌ to masalaꞌ, hei morokaꞌkei mampetuntui waliara. Popundakei pe aku, ipetuntuikei mpololeke hawaꞌka, hei timomokei mohuku toaꞌ to masalaꞌ. Alaꞌ koꞌiwalinakei lekiꞌ-lekiꞌna tiꞌo, tongawamo hamboaꞌmo uwaꞌ komasalaꞌami.
12 Halali-halali, i lali suraꞌku hampiha to kuꞌukiꞌkikei, hawaꞌi uwaꞌ tungkaihangkaꞌ hingkeꞌna mosalaꞌi haduo toaꞌ to masalaꞌ tiꞌo. Hawaꞌi woꞌo tungkaihangkaꞌ mosulungi toaꞌ to pahua kohorewuꞌ ka toaꞌ to masalaꞌ tiꞌo. Tungkaihangku moꞌukiꞌ suraꞌ tiꞌo, hingkeꞌna ipomombahakei i pampeꞌelena Pueꞌ Ala hohumbo kokodeꞌne rimami pe ingka. 13 Mewaliꞌ, maroho mpololeke lalingki alaꞌ iwalikei hatoꞌo!
Hei peꞌoꞌuwaꞌna katoꞌo, motanaꞌka woꞌo pangkiꞌ komotanaꞌna hi Titus. Himpononohaꞌ laline pangkiꞌ waliami to moromiꞌ kolentuꞌana meꞌohaꞌ i lumbumi. 14 Ikohandoaꞌanaꞌ tene kurumbaꞌ nolou pe ingkei, kuperenakikei, kupowutemo umbiꞌ hohumbo komoromiꞌne lalimi. Morasiꞌa halali-halali, hawaꞌa ipokohilikei. Lekiꞌ-lekiꞌna to kutiꞌikikei, tuꞌu mpololeke. Hatoꞌo woꞌo lekiꞌ-lekiꞌna to kupowuteki hi Titus noniuꞌ i ingkei, hawaꞌi uwaꞌ to salaꞌ, lekiꞌ-lekiꞌna tiꞌo tuꞌu. 15 Hei io woꞌo, tetambai rimane pe ingkei, alaꞌ noponindimo hohumbo pampetuntuimi pe hawaꞌna. Itorimokei moromiꞌ hei ipengkoruꞌikei mpololeke.
16 Mewaliꞌ halali-halali, hampiha tene kutiꞌi: motanaꞌa mpololeke hinewowoꞌena, alaꞌ kupoꞌohimokei i langkaꞌ-langkaꞌna.