Anioꞌkei mampekiri wotami hadoduomi
15
1 Ingkiꞌ to maroho pepoꞌohinta pe Pueꞌ Ala, hangangaa mosulungiki hangko awanta to mororangko tene lalire, hingkeꞌna pedeꞌ maroho pepoꞌohire. Inioꞌki mampaliꞌlu komotanaꞌanta hadoduonta. 2 Hangangaa mowaliki walia to moromiꞌ hei to mampomotanaꞌ lalina awanta hingkeꞌna mosulungihi mampokaroho pepoꞌohira. 3 Tohua pandiri' ka Kerisitu, alaꞌ Io woꞌo hawaꞌi mampaliꞌ komotanaꞌaNa hadoduoNa. Hibali to teꞌukiꞌ hampiha i lali Suraꞌ Mangkolehi: “Lekiꞌ-lekiꞌna lolita to mampariwoiꞌKo, noniuꞌmo woꞌo hante i Aku.” 4 Lekiꞌ-lekiꞌna to teꞌukiꞌ hampiha i lali Suraꞌ Mangkolehi, teꞌukiꞌ hingkeꞌna mopaguruki. Ka poturuꞌ to tohua tiꞌo, wadiki mantaha i lali komaporiꞌ, hei dodoli lalinte hingkeꞌna maroho pepohinaruante pe Pueꞌ Ala.5 Hinamo Pueꞌ Ala to mosulungiki hingkeꞌna mantahaki i lali komaporiꞌ, hei Io to mampokaroho lalinta. Io woꞌo to hingkiꞌ mosulungikei hingkeꞌna mohituwuꞌkei haduo hei haduo motuntuni peleihana Yesu Kerisitu, 6 hingkeꞌna hampekokirikei, hei moꞌawa-awakei mampokodeꞌ Pueꞌ Ala Umoꞌna Pueꞌta Yesu Kerisitu.
Kareba Moromiꞌ pe toYahudi hante toaꞌ to handoꞌio toYahudi
7 Mewaliꞌ, halali-halali, iomo horiana Kutiꞌikikei: hangangaa itorimokei moromiꞌ halali hampepoꞌohimi, hibali woꞌo Kerisitu mantorimokei. Ane mowalikei hatoꞌo, Pueꞌ Ala hingkiꞌ nipokodeꞌ. 8 Hangangaa ipoꞌilalikei lolitangka hieꞌe: Kerisitu humei pe duniaꞌ hingkeꞌna mosulungiꞌi toYahudi. Hante tiꞌo Pueꞌ Ala mampobuhoꞌimo dandiNa i tododulungki hampiha. 9 Hei kohupaꞌna hi Yesu mepaꞌani lala hingkeꞌna toaꞌ to handoꞌio toYahudi mampokodeꞌhi woꞌo Pueꞌ Ala alaꞌ kokodeꞌna rimaNa pe iohi. Tiꞌo to notungkai i lali Suraꞌ Mangkolehi to mantiꞌi waheꞌe:
O Pueꞌ Ala, hingkiꞌ kupokodeꞌKo
i lumbura roboꞌ-roboꞌ ntaniꞌna.
Hingkiꞌ molingaꞌa mampokodeꞌ konaꞌMu. \rq (2Sem. 22:50; Mas. 18:50)
10 Uwaꞌ woꞌo lolita to teꞌukiꞌ hampiha i lali Suraꞌ Mangkolehi to mantiꞌi waheꞌe:
Ingkei to handoꞌiokei toYahudi,
motanaꞌkei moꞌawa hante toaꞌNa
to Noꞌuwiꞌmo Pueꞌ Ala hampiha. \rq (Ul. 32:43)
11 Uwaꞌ woꞌo lolita to teꞌukiꞌ waheꞌe:
Ipokodeꞌmokei Pueꞌ, lekiꞌ-lekiꞌmi to handoꞌiokei toYahudi.
Ingkei lekiꞌ-lekiꞌna toaꞌ to tuwuꞌ i duniaꞌ, ipokodeꞌmokei Pueꞌ! \rq (Mas. 117:1)
12 Uwaꞌ woꞌo lolita to noꞌukiꞌ nabi Yesaia hampiha to mantiꞌi waheꞌe:
Ka muleꞌna hi Isai, hingkiꞌ mehupaꞌ Haduo,a
to hingkiꞌ moparenta i toaꞌ to handoꞌiohi toYahudi.
Iomo to hingkiꞌ mewali pepohinaruara. \rq (Yes. 11:10)
13 Pueꞌ Alamo pepohinaruante! Mekokaeꞌa pe Io hingkeꞌna meliu koNopaꞌanimio kotanaꞌ lali hei romiꞌ ngkotuwuꞌ alaꞌ pepoꞌohimi pe Io. Kuperapiꞌ hatoꞌo, hingkeꞌna moliu kuasaꞌna Inohaꞌ Mangkolehi hingkiꞌ pedeꞌ maroho pepohinaruami pe Io.
Tungkaihana hi Paulu moꞌukiꞌ suraꞌ hieꞌe
14 Halali-halali! Kupoꞌohi lekiꞌ-lekiꞌna to iwalikei moromiꞌ mpololeke. Ibahaꞌkei mpololeke poturuꞌ ka pohawaꞌna Pueꞌ, hei ibahaꞌkei momepoturuꞌ haduo hei haduo. 15 Angkana kehapoꞌi hatoꞌo, nopaꞌaniꞌa Pueꞌ Ala kuasaꞌ horiana i lali suraꞌku hieꞌe, wuraniꞌa mampoturuꞌkei haꞌumbora langkaꞌ poturuꞌ. Tungkaihangku hingkeꞌna ikolowoikei huliꞌ poturuꞌ to itorimokei. 16 Pueꞌ Ala mohiniꞌa mewali topajamana Yesu Kerisitu, hei Norumbaꞌa nolou pe toaꞌ to handoꞌiohi toYahudi. Jamangku hieꞌe wadi nipandiriꞌ hibali pajamana tadulako mpenomba, alaꞌ mampowuteꞌa Kareba Moromiꞌ. Hei to handoꞌiohi toYahudi, to mepoꞌohi pe Pueꞌ Yesu alaꞌ pajamangku tiꞌo, kurekeꞌhi hibali popenomba pe Pueꞌ Ala. Hei popenomba tiꞌo, bateꞌna notorimo Pueꞌ Ala, alaꞌ Inohaꞌ Mangkolehi to mampomangkolehihi.
17 Alaꞌ pohintuwuꞌku hante Yesu Kerisitu, motanaꞌ lalingka mampopatengkaꞌ jama to nopaꞌanikiꞌa Pueꞌ Ala. 18-19 Wuraniꞌa mampololita jama to nopopatengkaꞌ Yesu Kerisitu moliu i aku. Hante kuasaꞌna Inohaꞌ Mangkolehi kupopatengkaꞌmo jama tiꞌo hingkeꞌna moliu poturuꞌku hante tandaꞌ kuasaꞌ to kuwali,b toaꞌ to handoꞌiohi toYahudi hingkiꞌ mengkoruꞌhi pe Pueꞌ Ala. Mepongka ka kota Yerusale wute i woiꞌ Iliriku,c kupowutemo Kareba Moromiꞌ pe toaꞌhi. 20 Hieꞌemo tungkaihangka: hawaꞌi kulei mampowute Kareba Moromiꞌ pe toaꞌ to pahorimohi ka toaꞌ ntaniꞌna, alaꞌ tiꞌo hibaliꞌa moꞌaro tambi i watu to noꞌaro toaꞌ ntaniꞌna. Angkana kulei mampowute Kareba Moromiꞌ pe woiꞌ ntaniꞌna i toaꞌ to handoaꞌhi tene pobahaꞌ noniuꞌ Kerisitu. 21 Kukodokoꞌi mampobuhoꞌi lolita i lali Suraꞌ Mangkolehi to mantiꞌi waheꞌe:
Toaꞌ to handoaꞌhi tene nipekarebaiki noniuꞌ i Io,
hingkiꞌ robahaꞌ mpololeke kohihimoNa.
Toaꞌ to handoaꞌhi tene hampiha pahori karebaNa,
hingkiꞌ robahaꞌ mpololeke palaihane kareba tiꞌo. \rq (Yes. 52:15)
Hi Paulu moliwo nolou mokadodoroꞌi
22 Handoaꞌi tene uwaꞌ tempoku nolou mangkohidupaꞌkikei, alaꞌ nohiluꞌa jamangku mampowute Kareba Moromiꞌ pe toaꞌ to handoꞌio toYahudi. 23 Angkana hinewowoꞌena, tutumo jamangka tiꞌo i woiꞌ hieꞌe. Hei hingkiꞌ hohiꞌa pe kotami kota Roma alaꞌ i toꞌanamo kukodokoꞌi hingkiꞌ nolouꞌa pe ingkei. 24 Hei ane nolouꞌa pe woiꞌ Spanyol, bateꞌna hingkiꞌ maweoꞌa i kotami tiꞌo. Io horiana, motanaꞌa kehapoꞌi hawaꞌa morue moꞌawa hante ingkei. Hei kupohinaru hingkiꞌ ipopewotuꞌakei moromiꞌ ane loliuꞌa nolou pe Spanyol. 25 Angkana hingkiꞌ nolouꞌa duluna pe Yerusale mangkomi doiꞌ pesulingira tosarani iseꞌe to ropokatu pe toaꞌna Pueꞌ Ala inoꞌo, 26 alaꞌ tosarani i woiꞌ Makedonia hante Akaia hieꞌe morampuhi doiꞌ hingkeꞌna nipaꞌanikihi toaꞌna Pueꞌ Ala to merima-rima tuwuꞌra i Yerusale. 27 Waliara tiꞌo ka lali-lalira. Hei masipatoꞌ mpololeke toaꞌ to handoꞌio toYahudi mosulungi toYahudi motuntuni pebiaꞌra, alaꞌ pebarakati ka Pueꞌ Ala rohua ka toYahudi. 28 Io horiana, hingkiꞌ nolouꞌa duluna pe Yerusale mangkomi doiꞌ pesulungi to rorampumo, honiꞌi nolouꞌa pe woiꞌ Spanyol, hei hingkiꞌ maweoꞌa i kotami. 29 Kubahaꞌ, ane hupaꞌa itoꞌo i ingkei, woriꞌ pebarakati to ka Kerisitu hingkiꞌ ihuakei moliu i aku.
30 Halali-halali! Mohintuwuꞌmoki hante Pueꞌta Yesu Kerisitu, hei momepokarimaki alaꞌ pajamana Inohaꞌ Mangkolehi i lalinta. Iomo horiana kuperapiꞌ hingkeꞌna modotokei mampekokaekiꞌa pe Pueꞌ Ala. 31 Mekokaeki hingkeꞌna Pueꞌ Ala mampodaꞌa ka toaꞌ to hawaꞌhi mepoꞌohi pe hi Yesu i woiꞌ Yudea. Mekokaeki woꞌo hingkeꞌna toaꞌna Pueꞌ Ala to i kota Yerusale hingkiꞌ mantorimo moromiꞌ doiꞌ pesulungi to kukomi hieꞌe. 32 Ane ukomoꞌi lekiꞌne tiꞌo, hei ane nopoꞌioꞌi Pueꞌ, hingkiꞌ hupaꞌa i kotami kota Roma i lali komotanaꞌ-tanaꞌ, hei hingkiꞌ dodoli lalingka ane uwaꞌa moꞌawa hante ingkei. 33 Hinamo Pueꞌ Ala to mampaꞌaniki romiꞌ ngkotuwuꞌ hingkeꞌna mampoꞌowonikei lekiꞌ-lekiꞌmi. Amin!