Kunzi apini Nʉa agɔmɛ
9
1 Kunzi adukulyo ndɨ Nʉa na bomikakɨ bʉbʉnga, ʉbɨkya bɛ : « Bukutogoni, mɨtʉndaga, matumiso ɔbɨlɨ. 2 Katʉkya mbɨya wanʉ, banyama basɨ ba lɨtɔmbʉ, bombu, banyama nɨbɔ badaga na bosi biko kamʉbanga kʉgbɛ na biko kusili kunu. 3 Makwanana kaʉlya banyama basɨ mʉdɔngɔnɨ bɛyɔ namʉpá ndɨ mino malɨlɨ ma botiko. 4 Luki limoti, makolyonitɔgʉ makɔlɔ nɨ makonyugʉ bangʉ yi, kyɛ ɔbɨlɨ a kʉsɔ wa bangʉ. 5 Na bata, bangʉ kunu a ɔbɨlɨ kunu inga-inga. Kinili nyama ikanɨ mʉmbanzʉ kamwɔ bɛngɛnɨ, nakʉnga ɔbɨlɨ kakɨ yapʉ gɔnɨ.6 Mʉtʉ yi nɨnɔ odukusogo bangʉ ka bɛngɛnɨ,
bangʉ kakɨ adukaga ndɛkɛ ka mabɔkʉ ka mʉtʉ nagɔgɔ,
kyɛ Kunzi agya ndɨ mʉmbanzʉ ka likingyosi kakɨ.
7 Na ibunu, bukutogoni, mɨtʉndaga, wikoni ka ɔbɨlɨ na matumiso. »
8 Kumbuso yi, Kunzi abɨkya ndɨ Nʉa na bomikakɨ bɛ : 9 « Nakamʉpá agɔmɛ kamɨ ka bomikunu, na ka bomiko mikunu, 10 na masɨ nɨmɔ a na ɔbɨlɨ pa imoti na ibunu: banyama basɨ, bombu, banyama basɨ ba mʉsɛngɨ na bo tutu, na nɨbɔ mopupi na ɨbʉ basɨ ka ɨngbɔlɔ yidhingi. 11 Namupini agɔmɛ kamɨ : masɨ nɨmɔ a na ɔbɨlɨ kolumwogɨgʉ ndɛkɛ bata no tumo na tumo koumigʉ ndɛkɛ bata kolumwisogo ɔbɨlɨ. »
12 Kunzi abɨkya bata bɛ : « Winoni likingyosi la agɔmɛ nɨnɔ napí lugo kunu na ɨmɨ, na lugo wa masɨ nɨmɔ a na ɔbɨlɨ pa imoti na ibunu na ka bɛvananza bayasɨ nɨbayɔ ɨbʉkʉta ndɛkɛ : 13 Nobhisi isibe ka bɛkʉba, na iko ndɛkɛ likingyosi la agɔmɛ lugo kamɨ na ɔbɨlɨ. 14 Ngbingo yi nɨnɔ namʉmʉla ndɛkɛ mino bɛkʉba kʉgʉ wa lɨsyɛ, isibe ipupiso ndɛkɛ ka bɛkʉba, 15 na natamana ndɛkɛ agɔmɛ lugo kamɨ na ibunu, na masɨ nɨmɔ a ka ɔbɨlɨ. Tumo koumigʉ ndɛkɛ bata kolumwisogo masɨ ka ɔbɨlɨ. 16 Ngbingo yi nɨnɔ isibe iko ndɛkɛ mino kainisonogo ka bɛkʉba, nika ndɛkɛ katamanaga agɔmɛ nɨnɔ wa bɛnzɛ na bɛnzɛ lugo kamɨ Kunzi na masɨ nɨmɔ a na ɔbɨlɨ ka lɨtɔmbʉ. » 17 Kunzi abɨkya Nʉa bɛ : « Nɨyɔ a likingyosi la agɔmɛ nɨnɔ napí lugo kamɨ na masɨ nɨmɔ a ka ɔbɨlɨ. »
Bomika Nʉa
18 Bomika Nʉa nɨbɔ bopupo ka ɨngbɔlɔ yidhingi ndɨ nɨ Semu, Hamu na Yafeti. Hamua ndɨ abhakɨ Kanana. 19 Ɨbʉ basaa bɔ ba ndɨ bomika Nʉa na lɨtɔmbʉ lasɨ otumo ndɨ na bambanzʉ katʉkya ko puponogo kabʉ.
20 Nʉa ɨɨta ndɨ mʉdhɨma botiko, akʉna ndɨ muzabhibhu. 21 Lɨsyɛ limoti, amwo ndɨ vinya, adhamʉa. Kumbuso yi, anga kʉwa ndɨ ndumbu ka ndabʉ. 22 Hamu, abhakɨ Kanana, ɨna ndɨ ndumbu ka abhabʉ, opupoku na ʉtʉmbʉlyaga ndɨ bamamakɨ. 23 Luki limoti, Semu na Yafeti bava ndɨ kutuko ka Nʉa, bobhiso ka mambɨga kabʉ, bapʉnga ndɨ kaɨga na mʉgɔngʉ nɨ bananda ngbingbili kambwa kabʉ kyɛ bakinonitɔgʉ ndumbu ka abhabʉ, batikyo ndɨ.
24 Nɨyɔ lɨbhʉma awayaga ndɨ Nʉa, ʉkana lɨkpʉmʉka nɨlɔ mikakɨ yi nɨnɔ miki agya ndɨ. 25 Kʉwa wa, abɨkya bɛ : « Kanana igbongisisini ! Iko ndɛkɛ musunzu ka bosunzu ka bamamakɨ ! » 26 Abɨkya bata bɛ :
« Lino ka Yawe avɨ ɨbhɨbha ! Kunzi ka Semu!
Na Kanana iki musunzu ka Semu!
27 Kunzi atundisogi Yafeti !
Biki pa imoti na Semu ka bandabʉ kakɨ,
na kanana iki musunzu kakɨ ! »