Nʉa na lɨvananza kakɨ bogulyini ka ɨngbɔlɔ yidhingi
7
1 Kumbuso yi, Yawe abɨkya Nʉa bɛ : « Gulyo ka ɨngbɔlɔ yidhingi, ɨwɛ na ndabʉ kakʉ yasɨ kyɛ nakaɨna abhɛ ɨwɛ mʉkaka aka nɔ wa wongbingbili lugo ka batʉ ba masyɛ mi nɨma. 2 Lugo ka banyama basɨ nɨbɔ banza, hʉva ka mobhi dhidhidhi bomumu bi madɨya na ɨka na bokokoyi bi madɨya na ɨka gɔnɨ. Luki limoti, lugo ka nɨbɔ bakɛgʉ banza, mʉva mumu yi bemoti na mukokoyi yi bemoti, 3 hʉva gɔnɨ bombu balʉkʉ bi madɨya na ɨka na bokokoyi yi madɨya na ɨka ka mobhi dhidhidhi, kyɛ ɨbʉ bɔ bɨtʉndaga ndɛkɛ ka pa yasɨ ka ɔbɨlɨ. 4 Kyɛ kumbuso wa masyɛ madɨya na ɨka, nakolukiso mbwayɨ ka ɔbɨlɨ kʉsɔ wa masyɛ batɛkɛbɛ bakwanganya bhiti na lɨsyɛ. Na nolumwisogo makpʉmaka masɨ nɨmɔ nagya ndɨ ka ɔbɨlɨ. » 5 Nʉa agya ndɨ masɨ mʉdɔngɔnɨ bɛyɔ Yawe akpamya ndɨ mino.Tumo oumini ɔbɨlɨ wasɨ
6 Nʉa a ndɨ na byanga mɨya madɨya ko ngbingo yi nɨnɔ tumo oumo ndɨ mino ɔbɨlɨ. 7 Nʉa ogulyo ndɨ ka ɨngbɔlɔ yidhingi na bomikakɨ, mukakɨ na boko bomikakɨ kabanga tumo. 8-9 Mobhi maba-maba dhidhidhi ma banyama banza, mumuyi na mukokoyi yi na nɨbɔ bakɛgʉ ndɨ banza bɛgɛyɔ, bombu na banyama nɨbɔ badaga badhulyoku ndɨ Nʉa, bogulyo ndɨ ka ɨngbɔlɔ yidhingi mʉdɔngɔnɨ bɛyɔ Kunzi akpamya ndɨ mino. 10 Kumbuso wa masyɛ madɨya na ɨka, tumo oumo ndɨ ɔbɨlɨ.
11 Ngbingo yi nɨnɔ Nʉa a ndɨ mino na byanga bamɨya madɨya, ka lɨsyɛ la tɛkɛbɛ na madɨya na ɨka wa tɨmba wa maba, ka lɨsyɛ li nɨlɔ libo opumukoku ndɨ katʉkya ka makpakpa masɨ nɨmɔ kusili wa mabyɛ modhudhu na bangala ba ya bɛkʉba ka lɨsyɛ oukwikono ndɨ. 12 Mbwayɨ alʉka ndɨ bihooo ka ɔbɨlɨ masyɛ batɛkɛbɛ bakwanganya bhiti na lɨsyɛ.
13 Ka lɨsyɛ li nɨlɔ aka lɔ, Nʉa na mukakɨ na bomikabʉ bɛyɔ ka Semu, Hamu na Yafeti, pa imoti na bokokabʉ, bogulyo ndɨ kʉsɔ wa ɨngbɔlɔ yidhingi. 14 Bogulyo ndɨ na mobhi masɨ ma banyama bo tutu, mobhi masɨ ma banyama ba mʉsɛngɨ, mobhi masɨ banyama nɨbɔ badaga, mobhi masɨ ma bombu, na mobhi masɨ ka nɨbɔ bawɨwaga. 15 Basɨ nɨbɔ ba ndɨ na muyukumi, baba-baba ka mobhi masɨ badhulyoku ndɨ Nʉa, bogulyo kʉwa ndɨ ka ɨngbɔlɔ yidhingi. 16 Mʉlʉkʉ na mukokoyi ka mobhi masɨ bogulyotʉ ndɨ mʉdɔngɔnɨ bɛyɔ Kunzi akpamya ndɨ mino Nʉa. Kumbuso yi, Yawe ʉdhʉla ndɨ bingbufu.
17 Tumo agya ndɨ masyɛ batɛkɛbɛ bakwanganya ka ɔbɨlɨ. Libo otumo ndɨ, odokiso ɨngbɔlɔ yidhingi, apʉnga kawɨwɨla kʉgʉ wa ɔbɨlɨ. 18 Libo oumo ndɨ, idhukulogo ndɨ kʉgʉ kʉgbɛ na ɨngbɔlɔ yidingi a ndɨ kawɨwɨla. 19 Libo idhukulogo bata ndɨ kayakpa, otikyo ndɨ bangʉpa bayakpʉkpʉ bayasɨ nɨbɔ kusili wa mɔnɨ. 20 Katʉkya ka bamʉ ba ya bangʉpa, libo otumo ndɨ bata bamɛtɛlɛ madɨya na ɨka miso ya kʉgʉ wa lɨsyɛ, na bangʉpa bayasɨ olindo ndɨ. 21 Kʉwa wa makpʉmʉka masɨ nɨmɔ a ndɨ na ɔbɨlɨ olumwogo ndɨ : bombu, banyama ba mʉsɛngɨ, banyama bo tutu, banyama nɨbɔ badaga, na bambanzʉ basɨ.
22 Basɨ nɨbɔ ba muyukumi na nɨbɔ bikogo ndɨ ka lɨtɔmbʉ, bolumwogo ndɨ. 23 Kunzi olumwisogo ndɨ masɨ ka ɔbɨlɨ : Katʉkya ka bambanzʉ adhwɛ ka banyama bo tutu na ba mʉsɛngɨ, banyama nɨbɔ badaga na gʉtʉgʉ bombu aka bolumwogo ndɨ basɨ ka lɨtɔmbʉ. Otigolo ndɨ Nʉa aka na nɨbɔ ba ndɨ na ɨbʉ kʉsɔ wa ɨngbɔlɔ yidhingi.
24 Libo oumo ndɨ ɔbɨlɨ kʉsɔ wa masyɛ mɨya imoti batɛkɛbɛ kubukumuti.