Unut lawna maka ha rlernana la kirkira-ralma rior samomuou
4
Upa-a'nami re!
Mitlina-mitailla ammi yano'oni-yanatnu!
Mtia'wa reria tlinmi la hade totpena mliernana kirkira-ralma rior samomuou.
2 Maka awuatut lia miy di ha samoga
pa yana mpiar nana.
3-4 Yoma lerni pa a kuku' ma't a'u de i'nu a'nani eneknek amueh'a
pa nhi'inde a a'mu de nwatutg a' die niwra:
“Mhuoratreria a nnio'u-nia'tu di!
Yan memmemna mhuoratdoinia la.
Mliernohora maka awuatutu-wuaye'a ri totpena mliernana mormiori-dardiari.
5 Muatu mhuoli-mlieta mhuoratreria a nnio'u-nia'tu
me yan memmemna mhuopliala ameee!
6 Mhi'a-myap die mliernohora kirkira-ralma rior samomuou,
yana muolin doinia.
La'pa emkade emeknekama kirkira-ralma rior samomuou de e nruwun reri o'a.
Ralammu nod rer lia totpena natia'ku pa yana riy rawo'lu.
7 La'pa maka hota o' nanpena ed mak khi'a,
idni de totpa mliernana kirkira-ralma rior samomuou.
La'a hya' ed maka o ralammu nod rer lia de ononni de
totpa ompualia la riy makatu.
8 Mutota-muwawa kirkira-ralma rior samomuou die totpena omliernan walia yatota-yawawa.
Mtiorreri pitpitga totpena hota mliernana ya'uli-yawedi.
9 La'pa mtiorrer kirkira-ralma rior samomuou de,
hota omliernana yatota-yawawa.
Yatota-yawawa hormata-kanala maka omliernan de
emeknekama hadeutu samomuou ida maka rayapia emeka wutmu-laimu.”
10 Mutlina ama!
Mtia'wa reria tlinmu la a lira nnio'u ri
totpena mormiormu naplalahwa.
11 Awuatutu-wuaye'a kirkira-ralma rior samomuou la o'a.
De atiutu-ghoi tiy o'a la'a loi-talan mak kaplollola.
12 Totpena o' edonna mlier la oruli-augewat la loi liawna-talan lawna,
me la'pa muwlari miana edonna mdiunti-mpuetru.
13 Amee!
Mtiorreri pitpitga hya' maka awuatutu-wuaye'a la o'a re me yan memmemna mhuoplial harella.
Mutiak samomuou totpa mliernohora hare yoma la'pa mliernohora wniatutu-wniaye'a re
de hota omliernana mormiormu.
14 Yana mhi'a-myapi emeknekama riy yatyata re hihi'ini-yapyapni.
Yan memmemna mliernohora re.
15 Yana muiwra muat niohora ir hihi'ini re.
Olie'tu la ira,
ne mriu' nian pa muodi liarmu.
16 Riy yatyata re edonna ranin irannu-matni,
yoma ir edonna rhi' nan ma'ta yatyatni-halalli ida.
Matni re edona pre'eta,
yoma ir edonna rwano'a-rwarar ma'ta riy ida.
17 Ir rhi' yatyata-halala wuhura-tekla re
emeknekama ya'ana-yemnu maka ha ra'ana-remnia la' lera-lera.
18-19 Riy yatyata re loini-talanni emeka mel maka kmel'uta-maliena.
Ralala' pa rdunit tar die rhokal gaini ho'mana raplin niohora hya' ed mak karieiniande irtuini.
Mere riy kalwiedweda loini-talanni de emeknekama lera mak matni npah' olekwa
pa hota edon nalo'on wali ne lera nwawuau ro'onni.
20 Mutlin reria a li'ru ama!
Mtia'wa tlinmu.
21 Yana mhuopliala,
mere mkien tiarga la ihramu-ralammu.
22 Yoma la'pa hameni o'tani nta'i nan a li'ru-tu'nu re,
de hota nlernana mormiori-dardiari
me inon tetema mana hota nkalwied la mehrani-maunu.
23 Ononni de mhuoratreria totpena hya' maka ompuarora de naplola me samoga.
Yoma hare honona maka mhi'a-myapia la mormiormu di,
de ha rwatiaga hya' mak kden la ihramu-ralammu.
24 Mukot hadom de naplollola.
Olie'tu la lira-tun muaka kodia ohpa-lahara kdiori-kdieha.
25 Mulola-mula'a de mdien nek la ploi-ple'era ralamni.
Yana mutlin la rira lira yawewalli.
26 Mpuaror samomuoga nanpena mhi'a,
totpena mliola talan mak kaplola.
27 Olie'tu la'a yatyatni-halalli mere muori-mdiar lia plolioini-plele'erni.
Yan memmemna mpir dioin la talan mak kaplola.