Hare honona maka Orgahi-Orha'a Nakoki-nayap niana ra'uli-rawedi E'a
148
Haleluya!
Ya'uli-yawedi la Itmatromlawanni Makdenrer die!
La' Ilyamou-Watyatoha mniotni hononmi,
mmia mi'uli-miwedia Orgahi-Orha'a.
De miy miak kden la gen tiutullu mpiatniar la heyanna pa mi'uli-miwedia E'a.
2 Orgahi-Orha'a hopopanni-lili'irnu (malaikat) hononmi mi'uli-miwedia E'a.
Orgahi-Orha'a hopopanni maka'ara mak kden la Ilyamou-Watyatoha hononmi,
mi'uli-miwedia Orgahi-Orha'a!
3 Lera wolla wtiona mak klipa-ka'ma khita-krepra
mi'uli-miwedia Orgahi-Orha'a la genni-tienni!
4 La'pa lyanit tutul liawna,
me la'pa ger mak kden la lyanti wawannu
mi'uli-miwedia Orgahi-Orha'a Uplerlawna Mempulwatnu!
5 Mi'uli-miwed reria Orgahi-Orha'a kotni-nanni
yoma la miy hononmi re de,
E' ed maka kakota na'nama miy erla!
6 E ed maka ktutga rima-rima genni-tienni,
ne Nhopna hota rden nek la hande pa nodi liarni.
7 Nohkerna wawannu nora mniotni honona mi'uli-miwedia Orgahi-Orha'a.
Hoi,
niy liawna lora miy re la'pa la' hletan lawna-yoir lawna hononmi mi'uli-miwedia Itmatromlawanni.
8 Hoi,
otna tlena mak kwaliernia tah'i muti nor wutga wowta-kakma
la'pa la'a kakmoran lawna mak klernohora Itmatromlawanni lirni,
miy hononmi mi'uli-miwedi E'a.
9 Hei,
wo'ora-kawru mior wutga uhgewta-darliahwa,
la'pa wo'or tutul liawna
hononmi mi'uli-miwedia Orgahi-Orha'a.
La'pa ora-au muaka kawo'a ror wutga ornu-au mnor lalawna re
hononmi mia mi'uli-miwedia E'a la gen tiutullu.
10 Nhiuri-wnia'ana,
makpora-kdawra,
makawrika-kawriai me onu-ma'nu
mia mi'uli-miwedia E'a.
11 O'ta-mata la'pa ray-ray mior wutga limmu-rormu,
marna wuhura me ina-ama la leta ralamni
hononmi mi'uli-miwedia Orgahi-Orha'a makden la heyanna!
12 La'pa mak khamto'a-khape'ewa,
tuwari-laweru
harara-hatrapriapi,
upa-a'na,
kuku'uni-lalawanni
13 honona re mana ra'uli-rawed wialia Orgahi-Orha'a kotni-nanni.
Yoma nanni Natul pua Nareh dioinia nana re honona.
Preheni-mkaini nareh dioinia hare honona mak kdella lyanti nora nohkerna wawannu re honona.
14 Nhi' rimormiorni re pa raruri-ralai wia.
La' hade pede rimormiorni,
de makden Israel mak Nsayn reria re mana,
ra'uli-rawedi reri E'a.
Haleluya!
Ya'uli-yawedi la Itmatromlawanni Makdenrer die!