Ray na'uli-nawedia Orgahi-Orha'a yoma nler la unut lawna
144
Daud kieheni-nhiarni:
Mmiai pia ta'uli-tawed reria Itmatromlawanni Makdenreri de
yoma E' ed maka kruwun reri-ka'ahla reria a'u.
Orgahi-Orha'a de ed maka kwatutu-kwaye'a a'u totpena agat niohora lier la unut lawna la ara ralamni.
2 E' wal pia ed maka ktulan pa Nodnian a'u.
Nalewn a' pua ghu'ru tar lia nayanni.
La'pa a'uwlar lia la ara ralamni de,
eneknek to'a a'uwlar lia E'a totpa Nruwun reri a'u.
Nalerun momuoga noha-rai maka kor a' pua ka'ara.
3 Matroma!
Rimormiori die hya'a de,
pede Omiwra Mhuoratreria?!
Rimormiori pa nden la rimormiori,
ne nihya'pa Mhilpai-muanatga e'a?!
4 Rimormior die emekwalima anin larlara,
me hamemnia makwehweti la ha mormiorni de.
5 Matromlawnu ne!
Mhuar dioinia lyanitmu della,
ne Muerun
pa Mho'i tar lia wo'ora re totpena rmokla-rmahu.
6 Mhawlakra layermu pa nwadawra malwiru-malganna totpa arwalmu re knunu-knera re.
Me Mria'pa tuinia re totpena rdudum dodioin la.
7 Mdien la Ilyamou-Watyatoha pa Mumori-mulewn a'u
emeknekama O' e Mtian limmu mai a lia'a ger wawuau liawna ralamni.
Mulewna a lia'a a arwa'lu mak kwatiawua noha-rai dom to'a limni ralamni.
8 A' arwa'lu re rputra-rpalka ra'ohpa-ralahara.
La'pa rwalokra pa raplol nohora lirni-tunnu nek de,
hya' mak irakota de edon naplola.
9 Agiwra wuahniara nhiara warwuaru id la O'a,
Uplerlawnu ne!
Me ulira tiwla-prai pa uhepur nohoru.
10 Yoma O' ed maka kala ray-ray pa rler la unut lawna la' ara ralamni.
Mulewan nana O hopopanmu-lili'irmu ray Daud de,
la wehla gai liokarni!
11 Matroma,
Mulewan doinia a lia'a riy kaplialiahanni wehlani gaini,
de Mumori-mulewna a lia'a arwa'lu mak kwatiawua noha-rai dom to'a limni ralamni.
A' arwa'lu re rputra-rpalka ra'ohpa-ralahara.
La'pa rwalokra pa raplol nohora lirni-tunnu nek de,
hya' mak irakota de edon naplola.
12 Mtiulan nana ami totpena hota a upa-a'na mamni muan trapriapi re emeknekama yawulli-yatniamni mak kpoti-kaduw lalawna.
Me la' walia a upa-a'na mamni pat harara re inonni-gaini mana samomuou muemna
emeknekama rir miaka kliplipa-kamka'ma mak erla istana ralamni.
13 Ne totpena la'a a dudan lalawan mamni re mana pala puenga
la ya'ana-yemnu re honona.
Me la' walia a pipi-dum mamni makden la wewna wawannu re mana
rpeha-rlawan nande rla'a riwnu-rahanu.
14 La' a hayori-orpau mamni re mana rpeha-rlawna
pa id mana edonna nkei-nhala.
Ne hota it edon tatlin lola leta walli-walli de rira koko'a-herera rapolu-ratniani.
15 Nee!
Hota noha-rai mak kler la emkade rlernana unut lawna ee!
La' lodna-hairi mak kola tieru-kawur nehla la Uplerlawna-Mempulwatnu,
de rlernana ir nhiakarni de la ir Matromni Makdenreri.