Daud nsumbain la Itmatromlawanni Makdenrer die yoma riy yatyata re rhokra-rlai e'a
142
Nhiar wniatutu-wniaye'a,
maka kakot nohora Daud la ler ha ndella liena ralamni.
Nhiar di,
de Daud sniumbaini la Itmatromlawanni Makdenreri die:
2 Aghaun matmiat pia apuol lia Itmatromlawanni,
giwra:
“Matrome!
Mtiulla-msiayn nan a'g ee!”
3 Apuolu-wuak la Itmatromlawanni gaini ralamni
pa ukota plele'era a su'su honona la E'a.
4 La' lerni la trema-trema a ino'nu nakleh et miemna ruri-lai lia a te'mu,
de O orgahamu Muat niohora hya'a maka hota aghi'a.
La'a loi-talan maka hota aliola re
de a' arwa'lu re re'er targa dedesu rapra'pa pa npitu-nkora.
5 La'pa a'ukillia wali-wali pa awuahaka riy maka hota rtulan la mai a'u,
mere riy id mana edonna rhe'du nan a'u!
Hota alia uhewu a lia' hanmeni?
6 Dewade aghaun la O nanmu,
agiwra:
“Matroma,
O' ed maka kruwun rer a'u,
Matroma!
Agha'ar reri a ralmu la O'a yoma la' O' nanpena ed maka ktoran reria a mormio'ru-dardia'ru di.”
7 Mutail rer lia a li'ru,
yoma alier olek la klieratni wa.
Mua Mulewna a lia'a arwa'lu ri limni ralamni,
yoma takeni puar nana re.
8 Mua Mulgot a lia roma nhio'la ralamni
totpena alier teman la O wokmu-le'emu
pa wuahaur nohora O kalwieda-paitiotmu maka ha Mhi' oleka la mai a wua,
totpa hota ma'uli-mawedi O'a.