Tsumbain pa twaka yamori-yalewan la' Itmatromlawanni Makdenrer die
140
Hadi de Daud nhiar ya'ulli-yawedni maka ha rala la mak khi' o'ta la mak kwatunu-kwahniara:
2 Munawar doinia a lia la'a riy yatyata re limni ralamni Matroma!
Mutiak reri a' totpena yana riy maklekla-makdiaini re rhi'a yotyotni-yatyatni mai a'u.
3 Yoma la'a ira ralma-riorni de sukni rwarora-rwalai nieka yatyata-halala.
La' lera-lera nekpa rhi' nande riy rahuri-rawo'or mamaini.
4 Namni re rwalawar de emeknekama niy miaka namni khena.
Nurnu rage'a yapupu-yaheri emeknekama niy miaka kodi nhienni.
5 La' hade pede Matromlawnu ne!
O' de Makdenreri O'a!
Orgahamu Mriuwun reri-Mu'ahla reria a'u totpena yana lier tar lia riy yatyata-halala nnia'ohma-nniakatni re honona.
Mutiak alia'a riy maklekla-makdiaini re mak kiwra ral a lia yawa.
6 Mak kpo'ona-kraka re,
e rherier tio'a mere e rhi' wutwutga dedesu la' mai a'u.
Re'er targa dari nieh'a pa riwra ra rtorn a'u.
La' talan mak lol meni-meni to' pa e rtan targa totota-wudwiudi mai a'u.
7 Mere aghaun pa puol lia O' de giwra:
“A Matromlawnu O'a,
maka a'ukola tieru-gawur nehla la de.
Mhueri tlinmu la a polpuo'lu-wakwa'ku di!”
8 Matroma!
O' ed mak kodi plolli la haneknek wawannu.
O' de ed maka kal a pua liernana mormiori-lewlewna onnila rurmu-laimu plolmu-mnehemu.
La' O' de aliernana kruwun lawna la'a yawunu-ya'ara lerni.
9 Matroma!
Yana Muolin doinia pa riy yatyata re rlernohora wniarorni-wnialaini re!
Yan memmemna Mhur dioinia pa rhi' nana hya' ed maka rna'ohma-rnakatia mai a'u.
10 Yan memmemna Muala arwa'lu re pa ra'unut nan a'u.
Muolin doinia pa lirni-tunnu mak kyata-khala re
pa rutin wenn owa'ana orgahani la genni.
11 Ndella pa ai kwiari ntuin la ir o'tani wawannu onnila ir wniarorni-wnialaini maka kyata-khala re.
Ndella pa rhopli-rnaklia ir la hu'ula-liena matmiati-molmuolu ralamni totpena yana rawrikgot la genni.
12 Riy maka suksukni rapupu-raheri de yana rmori-rdar lia noha-rai di wawannu.
Ne riy maklekla-makdiaini re rler la yatlorni-yatra'ani.
13 Agatga de Matro'mu Muodniana riy mak kler la kleha-lara.
14 Riy maka kwehwa ploi-ple'era de plola pa hota ra'uli-rawed reria O'a.
Mak khi' mak kaplollola la O yamkekmu de hota ror O' la'a geni-tiena ida.