Itmatromlawanni Makdenrer die Nwalir nian Daud pa nwal lia ray me Sion pa nwal lia genni-tienni
132
Nhiar maka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni (Nhiara Ziarah):
Matromlawnu ne!
Mhuoratreria Daud
mak lera nlernana yawuhi-yawe'eta tututu-wawuau.
2 Matroma,
O' di de Yakop Uplerlawanni,
de Orgahi-Orha'a Uplerlawna-Mempulwatnu Makaruri-kalai.
Yana Mhuoratdoinia la' emkameni la Daud nlokra nnio'oni la' O'a,
3-4 niwra:
“A'g edonna rien eti a lia'a a ro'mu nayanni
onde unin a lia'a a ge'nu,
5 la'pa a'g edonna uriri mia'ta roma krei id la Yakopa Uplerlawanni,
de Orgahi-Orha'a Uplerlawna-Mempulwatnu Makaruri-kalai die.”
6 La'a Efrata de it tatlin nana rwahaur nohora luwuau-koplahu maka Uplerlawna riorni-liaini genni
noma tla tlernana la wo'or-kawru (padang) Yaar pa amodi mmai.
7 Mmiai pia tla'a Orgahi-Orha'a roma kreini.
Mmiai pia tru'u-towar la E liwan genni gaini.
8 Matromlawnu ne!
Ampakwak pa Mdien nek la genmu-tienmu di,
Omuor wutga gen miaka luwuau-koplahu maka O riormu-liaimu genni,
mak ktutga O rurmu-laimu de.
9 Ampakwak pa riy makpolu-makwak la O'a la rimormiorni rerieini (imam-imam) rden rer niek la plol wawannu
ne rimormiormu mana ramuki-rahepru,
rwatunu-rwahniara.
10 Matroma,
la'a O hopopanmu Daud de rerieini de,
yana Mpuanikli-mpuayotlia ray miaka ha Mpualir nian de.
11 Itmatromlawanni Makdenreri de Nlokr' olek la Daud
ne hota E' edonna Nhoratdoinia E nnio'oni la.
Niwra hota la Daud a'nani ida de
Itmatromlawanni Nala pa nhi' ray,
totpena ntorna-nraut pa nhernu-nwaga Daud.
12 “Hornama upmu-a'namu re rlernohora la'a hya' maka Ukot taru re pa rlernohora,
de hota duratni-waitni re rhernu-rwauga o' pa rhi' ray.”
13 Yoma Itmatromlawanni Makdenrer die,
Nwalir nian oleka Sion
onnila E' ed maka sukni pa Nhi'a la genni-tienni.
14 Niwra:
“Aghol lia handi wa pa nodi liarni.
Agiwra godi plolli la gen di wa.
15 Pena Agala ra'a-palu pripanni-fa'anni la Sion (Yerusalem) de.
La'pa rimormiorni mak kakleha-kaplara nekane A gala yamanna pa ra'ana.
16 La'a riy makpolu-makwak la A'u (imam-imam) re rtutga talan totpa rler la yamori-yalewna.
Ne rimormio'ru re honona neniehu-terter nohora yamukni-yaheparnu.
17 La' Sion di hota Agala Daud duratni-waitni id pa nhi' ray.
Lodanni-hairni hota Agala pa naruri-na'orta la'pa nodi liarni.
18 Lodanni-hairni nler la pripanni-fa'anni,
mere la'pa arwalli re rmola-rma'a yoma ral ir la' yawa.”