Itmatromlawanni Makdenrer die ed mak kolin doin ir la ir arwalli limni ralamni
129
Nhiar maka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni (Nhiara Ziarah):
Noha-rai Israel emeknekama riy id maka ha radunti-rawetria rwatei-rwahapra
la' ler maka nden ma'ta la tuwari lewatni la'pa ntut lia la' ler maka hamto' olekwa.
Pede makden Israel miy re!
La'pa arwalmi re radunti-rawetria miy emkade,
de emkameni nor miy?
Mikot teka!
2 Na'nama makden Israel re rwahla riwra:
“La' ler maka am tuwarwiar mia'ta pa la'pa la' dodo'ondi,
de a' arwal miamni re radunti-rawetria ami,
mere ta'enniana ra'unut nan ami!
3 Rwano'a-rwarara kdieldelam nana a to'ora tenan mamni,
de emekwalima ora nhyi'a mak khi' ger talan lola nhyi' awrieha letgarni pa nla nwau lia nhyi'a walli-walli.
4 Mere Orgahi-Orha'a mak kden rer niek la plola-mneha wawannu
ed maka kolin doinia am lia wnia'ata-wnia'ara re.”
5 Matroma!
Muolin doinia pa mamkek nan memna riy maka kagai pietan rer lia a letlawan mamni Sion,
hota rmola-rma'a onnila Omual ir la' yawa.
6 La'pa hota tamkek la re de emeknekama yawuli-yatniamni mak kmor lia'a gen miaka tani oke' to'a,
pede pleta-plet pa nkeran wa.
7 La' hade pede mak kreiki-kwo'ora mana
hota edonna rtetia pa rewat walia.
8 Riy maka klereti pia ramkek nana ir mana
edonna rwak la Itmatromlawanni Makdenrer die totpa Nara'a-napalga ira.
Edonna rwak pa ir rlernana Itmatromni ra'ani-pallu.