Rsumbain pa rwaka Orgahi-Orha'a Nwe'er doin ir la ir arwalli limni ralamni
126
Nhiar maka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni (Nhiara Ziarah):
La'pa Orgahi-Orha'a Nwe'er doin ita makden Yerusalem pa twali owa'an la riy mak kler la yara'a-yapalu lalawna,a
de itat tio'a de ita tmi'a-tlo'a kennama ha plol toto' memna hadi.
2 It tahepur nande twatunu-twahniar pa tkokna-trarni
pa narieiniande riy makden la noha-rai korni riwra:
“Tkil niek la re me!
La' dodo'ondi wa de Orgahi-Orha'a Nhi'a-nyapia hya'-hya' maka samomuou muemna la' ira!”
3 Meman neka la,
ha naplola!
Itmatromlawanni Makdenrer die Nhi' nan oleka hya' maka samomuou muemna mai ita!
La' hade pede tamuki-tahepru twatunu-twahniara.
4 Matroma!
Mhuerun doinia a kleha-lar mamni re honona totpa ampali owa'an la riy mak kler la yara'a-yapalu lalawna,
totpena emeknekama ger wawuau maka kerna olekwa mere nriwu-nharn owa'an la otna.
5 Riy maka kawuli-katniamni nko'a-nkakur nohora prehenni-maunu la'a nhyi'ini wnial tianni,
mere kaniha-kamali niohora la'a rieiki lerni.
6 La'a riy maka ko'a-kher nohora wetra'ani niamatni yoma rler la susa ralamni
mere la'pa rieki lerni pa rpolan wa de riarni-riarin nohora la nhiara
me rahepur wali yoma rakwara wetra'a kadu-kadu.