Rsumbain la susa ralamni
109
Hadi de Daud nhiar ya'ulli-yawedni maka ha rala la mak khi' o'tani la mak kwatunu-kwahniara:
Uplerlawnu mak u'uli-uwed reri!
Yana Mhuerer niohor a'u.
2 Yoma riy yatyata mak kpudi-akla e rler pa rmai wia
pa rwahaur nohora pudi-akla pa rtot a lia yatyatni.
3 Rler temna a' die de rapolu-raliella,
mere rhi' emkade de rakleha nhiakilgeni (nhiapargeni).
4 Rto'on rer a'u mere ukleh do'a-hal la ira.
Ir edonna rhoratnana a nhiol kalwie'du la' ira,
ne la' walia nhi'inde a'g e siumbain reria re.
5 Rala yatyatni ra rwahla a kalwie'du,
me rala gai pietanni ra rwahla a samo'wu.
6 Ndella pa riy yatyata ida netlia riy maka kto'on reri a'u di lirni-tunnu.
Me ndella pa arwalli nto'on reri e'a.
7 Totpena retlia e halli de riwra e nhala,
ne Muolin doinia pa la'pa nsumbain totpa nhi' aplola inonni la Uplerlawna gaini ralamni
mere plollolli de orgahani ntutga do'oni-halli la rira.
8 Muolin doinia pa mormiorni mana yan naplahwa la noh di wawannu
totpena riy dom to' ramtatan la genni-tienni.
9-10 Ndella pa upni-a'nani re ra'a'na riy-rapatyat pa rmeh'a rawakwaka,
yoma patke'eni napal wua.
Upni-a'nani re rwal lia mak kmeh'a kalala' pa rwahaka ya'ana-yemannu
yoma likit waumueheni re de riy rweyat olekwa.
11 Muolin doinia re pa hyonni-hyanni re riy rwarui-rwate'la la otna-arni.
Emkade pede prehenni-maunu re rwal lia hamamuamua.
12 Yan mememna la riy id mana nsaynia
onde npolga a'nani re pa ralla' ra'ana.
13 Emkade totpena duratni-waitni re rmolu-rhelam momuou
totpena kotni-nanni mana tuwli'iru-a'na ga'a re rhoratdoin meman la.
14 Ndella pa upni-tgarni yatni-halli re de Itmatromlawanni ed maka khoratreria.
Me inni nhiolli-lietni mak kler la do'a-hala de Orgahi-Orha'a edonna Nhapua la'a puka ralamni.
15 Emkadella totpena ir do'oni-halli re de Orgahi-Orha'a edonna Namou-nawitna,
ne hota mak kden la nohkerna wawannu de rhoratdoin ir nanni.
16 Yoma la' riy' de de edonna nhoratnan etia sniayanni oke'ela rimormior wialli.
Nhiolli-lietni de sukni namuki-nama'ala riy kleleha-larlara,
me nwunu-nwenna riy maka kakleha mhuakru.
17 Ne sukni nlokra-nhautu.
Muollia pa orgahi nlernana liokra-nhiautnu.
Nhi'inde edonna nwak Uplerlawna pa Nara'a-napalu rira.
Muollia pa rira edonna rwak walia Uplerlawna pa Nara'a-napalu e'a.
18 Hihi'a-yapyapia lera-lera de nlokra-nhautu.
Nhiolli-lietni mak emkade,
de emekwalima pola-raini la inonni mak e nnairi la' ler di,
me repar demade nnair owa'ana.
Rolin doinia totpena liokra-nhiautnu de nape'era-napahia inonni tetema
me emekwalima wu'ru mak kwahi'da la rurni-kliakallu re honona.
19 La' emkade totpena liokra-nhiautnu de nhi'a la nhiekarnu,
ne totpena naniewan la inonni pa emeknekama rewa la nehlani.
20 Matroma!
Muala niukum della'a riy maka kto'on rer a'u,
de la'a he' maka kapolu-kaliel kwohor weyata-ktatra weyat a'u.
21 Mere Matroma!
Mhuoratreria nnio'omu pa Mtiulan la mai a'u.
Matromlawnu ne!
Makdenreri O'a!
Mumori-mulewn a'u yoma la'a O kalwiedmu nora O sniayanmu mak kden pa nodi liarni.
22 Yoma ukleha-uplar wa,
mak la' ta'eni-mai ta'eni a'u.
Pa a ralmu emeknekama ha knioki-tnia'wa.
23 Trema-trema amuol wua,
de emekneka memnu-tatra maka it tamkeka la lera lia'ani mere edon nalo'on wali ne nmol meman wa.
A' die emeknekama kongoha id maka e rkakan doinia la.
24 A to'ru rdiwra-rda'ala yoma utahan lara
me ino'nu npo'ora-npait doin la wa.
25 Riy rahu mak kamkek a'u re honona rdikdik o'tani
me rapolu-raliel a'u.
26 Matromlawnu ne!
Makdenreri O'a!
O' ed mak kla a Uplerlawnu!
O' de sniayni onni O'a pa awuaka tniulan la O'a,
Matrome!
Mtiulan nan a'g e!
Totpena alier la mormiori-lewlewna.
27 Totpena a' arwa'lu re honona ratga de
O hihi'mu-yapyapmu de ed maka ha ramkek nan meman de.
28 La'pa ir rlokra-rhautu a'g ho'mana edonna nla' hadoma,
hornama O' ed maka kala kalwieda la mai a'u.
Mere la'pa ir rler pa rmai pia rnahora-rnala'a a'u ho'mana Muollia pa ramola-rama'a ira.
Mere Mhi' a'u,
hopopanmu a' di pa lier la yamuki-yahepru.
29 Muollia pa totpena la'pa he' ed maka ktutu a lia lira-tunu de hota rler la molmola-mama'a.
Pa mola-ma' de nruwun rer nieka la pa emeknekama nhiekru id la' ira.
30 Mere agiwra u'uli-uwedi reri Itmatromlawanni Makdenreri de,
de aghaun wah'a noh di.
Totpena riy honona la' woka-le'u muaka e rkola tieru-rawur nehla la E' de rat momuoga.
31 Yoma O' ed maka kodniana me kamori-kalewna riy maka kakleha-kaplara mak kla' ta'eni-kmai ta'eni
la'a riy maka rira riwra rukum penna re.