Uplerlawna ed maka kruwun reri-ka'ahla reria rimormior nohkerna wawannu
90
Musa,
maka khima-kre'a Uplerlawna de,
sniumbaini.
De Musa nsumbain pa niwra:
Matroma!
O' ed maka kruwun reri-ka'ahla reri ami la tuwu pa nerun la' tuwu pa la' tuwu.
2 La'pa O' edon Muohi-mua'ar ma'ta wo'ora-kawru uhu-dari nor wutga nohkerna-rai miaran di,
O' de Uplerlawna-Mempulwatnu makden pa nodi liarni.
Rwe'tu la Ga'ara mak edon kayawuhi,
me Tap miaka edonna kmara.
3 Mere Matroma!
Omhuopna rimormiori rawal lia eni-tani.
Dewade rwal lia enliu'wu-tanmiakmu pa nden owa'an la genni.
4 La'pa anni riwnu ida,
de Omuiwra emeknekama lera id hade
yoma la' O yamkekmu de anni riwnu ida de emeknekama ler wonyira
onde jam ida-woru mak plet pa rlardoinla mela ida.
5 Omkiuh dioinia-mhuo'or doinia am pia emeknekama am die mi'a id mak edon nalo'on wali ne nhorwua.
Rimormior am die emeknekama wewan mak kmori.
6 La' yawyawar de na'uhwu
mere la'pa ler nheri dewade napliau lia genni.
7 Amamta'at pa mdiwdiwra yoma O yawenanmu de.
La' hankeranmu de ed maka ku'uta mkoha-mnanni am lia a gen mamni.
8 Omkienia a do'a-hal mamni la O' gaimu,
nhi'nande a do'a-hal mamni maka yade'a re mana Omumkek eti-lahwa.
9 La a mormior miamni de hoho'a yoma la'a hankeranmu.
A mormior-dardiar mamni de plet pa nhorwua emeknekama aran no'a a irun mamni mak kwarangota.
10 Ammormior niana anni terampwo'itu,
la'pa amaruri,
de amlernana anni terampwo'awa.
Mere anni-anni maka amler la ga'a ho'mana eneknek to'ama yawuhi-yawe'eta,
kropna-krieutu
maka amlernana la'a a mormior miamni la lera ho'ke'eni,
noma ammat mieman wa.
11 He' ed mak kat niohora O yawenanmu de rurni-laini?!
La'pa ramkek memna hankeranmu-ralmha'armu de riy ramta'at wenna.
12 Matroma!
Mhi' am pia amat niohor la a inon mamni de a mormior miamni edon naplahwa,
totpena amat niohora hya' ed mak kaplola pa a mhi' nana
me amlernohor reria talan mak kaplola la' ler maka amden ma'ta la nohkerna wawannu di.
13 Matrome!
Hota O yawenanmu de edon nhor lia tuwu?
Matroma,
Muwal pia ma Mtiulla-msyaini rimormiormu ri owa'ana.
O' de Makdenreri O'a.
14 Mtiutga owa'ana ralam kalwiedmu pa Mtiulla-msiayni am lia'a yawyawar ralamni
totpena mahepur nande mpatunu-mpahniar reri la' a mormior miamni di plahwani.
15 Mual am pia mlernana yahe'i-yahepur la a mormiori-dardiari mamni di
pa nherun doinia lera-lera kropna-krieutu maka amlernana la'a anni-anin maka mto'or la re.
16 Mtiutga hihi'imu-yapyapmu mak kamehi-kayona la'a O rimormiormu ami
me plolmu-mnehemu rurmu-laimu la'a a durit mamni-wait mamni.
17 Matroma!
Uplerlawna-Mempulwatnu mak amkola tieru-mkawur nehla.
Mtiutga ralam kalwiedmu mai am pia Mtiera-mdiem ami,
totpena a tulan mamni-kniar mamni plola pa rla' ga'a.