Rsumbain pa rwaka tniulan la Uplerlawna
88
Korah duratni-waitni nhiarni maka ha rala la mak khi' o'ta la mak kwatunu-kwahniara,
totpa rwahniar de rlernohora Mahalat Leanot (kropna-krieutu lui-nuhru) nhiarni.
De nhiar maka ha rakot nohora Heman,
riy Esrahi de,
wniatutnu-wniaye'eni:
2 Matromlawnu ne!
Makdenreri O'a!
O' de Uplerlawna maka kodi plolli pa orgahamu mak kamori-kalewn a'u.
La'a lelera-melmel de apuolu-wuak tiy O'a.
3 Matrome!
Mhueri tlinmu-mpual miatmu la'a a polpuo'lu!
4 Yoma la' a mormio'ru di de lier nek la yatyatni-halalli yatlorni-yatra'ani,
pa awuarora de matmiati e nherit rer oleka nhiari gaini wa.
5 A'g emeknekama mat miaka kekeneka rhuriernia la tani niahi ralamni wa.
Yoma amuadwie'er rer olekwa.
6 Arie' teman la riy mak kmati olekwa,
de riy' maka ha rwenan nana,
pa ha rwaklolia la'a tani niahi ralamni.
Matro'mu edonna Nkil miat la a'u
pede edonna Mumori-mulewn olek a'u.
7 Omniakul targa a lia'a hu'ula kriawa tniamin matgeni kokio'oni,
mak kmela-kalma.
8 O yawenanmu de nutni-ndahla mkokoh a lia'a a ge'nu.
9 Omhi' a' pua olieta-patoga a lia a talanwa'lu
pa ramkek nana a' die riwra rho' doinia motni la nurnu ralamni (riwra ramot memna).
Udnieh'a la ko'oni pa takenniana liergot wa.
10 A yamke'ku npona-nmah wua yoma alier niek la kropna-krieutu lui-nuhru.
La' lera-ler nekpa apuolga O nanmu agiwra:
“Matrome!
Mtiulan nan a'g e!”
Asiumbain la O' de arian reria a li'mu rora pa apuolu-wuak la O'a.
11 Matrome,
la'pa Muolin doinia a pua amuat die,
hota a'g edonna umkek owa'ana O hihi'imu-yapyapmu mak kamehi-kayona re!
Mak kmati olek wa re ta'enniana ra'uli-rawedia O'a onnila hya' maka Omhi' nana re!
12 Matrome!
Mak kden olek la tani niahi ralamni re edon rlernan owa'an O tniulanmu-sniayanmu la nohkeran di wawannu toh!
La'pa rler olek la'a matmiati-molmuolu de ta'enniana rakot nohor owa'ana riwra Omdien rer lia ira!
13 Matroma!
La'a riy maka kden la melmelli-kalkalamni la tani niahi ralamni e rat niohora hihi'imu-yapyapmu mak kamehi-kayona pa rakot nohora?
Edonna toh!
La' pa rler la noh mati-rai miolu de,
Mhuoratdoin olek ir wa pa hota emkameni owa'an pa rakot nohora hihi'imu-yapyapmu mak kden nek la plol wawna?!
14 Apuol rer tiy O'a,
Matroma.
La'pa yawyawar ma'ta la' lera-ler nekpa awuatniar la heyanan pa apuol rer lia O'a.
15 Nihya' pa Ompuayotlia a'u Matrome?
Nihya' pede Muolin limmu me Mpue'er rormu la a'u?
16 La' kuku'a-keke'a ma'ta a'u la'pa ntutu-nte'ela lera-mela ri,
de lier nek la polpuol inni-wakwak amni.
Lera-ler nekpa matmiati niwra nte'la la mai a'u.
Emeknekama gera nlol olek la a tiernu onnila hare honona maka Omuala pa aliernana re.
17 O yawenan lawanmu de ed maka nku'uta mkoha-mnanni a lia a ge'nu.
Onnila Omlier temna a' die pede alier oleka la yatyatni-halalli yatlorni-yatra'ani.
18 La' lera-ler nekpa hankeranmu mai a' die emolmolla ger wawuau liawan maka kapet reri a'u,
de takenniana hota aliewna.
19 La'pa a talanwa'lu nor wutga a i'nu-na'ru a'mu-hya'lu maka nhi'inde agor wutg ira,
nek de O Muhala mai a'u.
A'ukeh oleka talanwali pa nhi'nande amuehmeha pa wuaho'a-wuahai to' a lia melmelli-kalkalamni.