Sniumbain maka rwak pa rlernana tniulla-sniayni
86
Daud sniumbainni:
Matromlawnu ne!
Mhueri tlinmu la a sniumbainu pa Mpuahla nan a'u!
Yoma a' di de riy mak ksusa,
mak kla ta'eni-kmai tia'enia a'u.
2 Mutiak samomuog a'u Matroma!
Yoma aliernohor reri O'a.
Mumori-mulewna tniutmu-nhianmu nhieli-liarmu a' di.
Yoma a'g e gha'ar to'a a mormio'ru la' O'a.
3 A Uplerlawnu O'a,
pede yana Muolin limmu la mai a'u.
Yoma la' lelera-melmel de a'g e siumbain to'ola O'a.
4 Matroma!
Mhi'a tniutmu-nhianmu nhieli-liarmu a' di pa a ralmu nahepru
yoma nhi'inde arian a ralmu pa siumbain tiy O'a.
5 Samomuounu ed rer lia O'a,
Matroma pede O nhiolmu de sukmu Mumou-muwitna do'a-hal mamni.
La'pa he' ed maka ksumbain la O'a,
de Omtiutga sniayanmu mak kodi liarni la' ira.
6 Matromlawnu ne!
O' de Makdenreri O'a!
Mutlin rer lia a sniumbainu,
Mutail rer lia'a hya' maka a'ukotkota,
totpena Mtiulan la mai a'u.
7 La'pa alier la kropna-krieutu asiumbain rer lia O'a.
Yoma Ompuahla nan a li'ru.
8 Matroma,
uplera-upmati maka lodna-hairi dom to'a rhoi-rtania edon emek O'a.
La' id mana ta'enniana nhi' nana hya' maka nhi'inde Omhi'a.
9 Hairi-hairi maka ha Mhi' nana re hota la' emkameni ho'mana hare honona rmai lia O' de
pa rhu'ru-rhelam la O nayanmu,
pa ra'uli-rawedia O prehemu-mkaimu.
10 Yoma la O' inponmu me la O hihi'imu-yapyapmu mak kamehi-kayona,
yoma la O' nanpena ed maka ha rweta la Uplerlawna-Mempulwatnu.
11 Matromlawnu ne!
Makdenreri O'a.
Orgahamu Mpuatutu-mpuaye' a lia'a O ralma-riormu,
totpena agala a ralmu tetema ga liernohora O loimu-talanmu mak kaplollola.
Mhi' a' pua a gal toto' a ralmu pa a ga' upali nia'nu
totpa u'uli-uwedi O nanmu totpena nanmu nden rer niek la tutullu-lolo'oni.
12 Matroma!
O' de a Uplerlawnu O'a.
La' a ralmu tetema de agiwra u'uli-uwedia
O prehemu-O mkaimu pa nodia liarni.
13 Yoma O kalwiedmu-paitiotmu,
la'pa tniulanmu-sniayanmu mai a' die namehi-nayon rehia,
O' ed maka kanawar doinia a lia matmia'tu la'a hu'ula liena-hoi kietra ralamni.
14 Uplerlawnu ne!
Riy mak kpo'ona-kraka rwatikil pa riwra rler temna a'u.
Riy maklekla-makdiaini re rawok pa riwra rwenn a'u.
Ir edonna rwadan nohor O'a.
15 Mere onnila O' de Orgahi-Orha'a Uplerlawna-Mempulwatnu mak kmori-kdar lia tniulla-sniayanni,
pede O Mdien rer lia ralma-rior mak edonna plet pa kwahla rira yatni-halli,
yoma la'a O kalwiedmu maka penpuenu-tetem de nodia pa nodi liarni.
16 Matroma!
Mlin reri-muat rer a' pua yana ralammu werta la tniulanmu-sniayanmu mai a'u.
Mual a' pua ururi-ulai,
totpena Mumori-mulewn a'u.
A' di,
tniutmu-nhianmu nhieli-liarmu emekwalima a i'nu la' ler ululu.
17 Mual a' pua aliernana O kalwiedmu Matroma!
Totpena la'a riy maka nhi'inde ralamni sukni tia'ala mai a'u re ramkek reria de
Matro'mu Makdenrer die,
ed mak ktulan la mai a'u ne Nhi' a ralmu pa namtiertiernu,
dewade rmola-rma'a la'a hya' maka ha rhi'a re.