Ralma-riorni ra'aw rier lia Orgahi-Orha'a Romni nayanni
84
Korah duratni-waitni nhiar ya'ulli-yawedni maka ha rala la mak khi' o'ta la mak kwatunu-kwahniara.
Rwahniar de rlernohora Gitit nhiarni:
2 Orgahi-Orha'a Uplerlawna-Mempulwatnu Makodi Plolli la Haneknek Wawannu!a
Samounu meman la gen miaka Omdiella Matrome eee!
3 Matroma!
A ralmu na'awnio'on meman la'a O rommu ralamni.
Agala a ralmu tetema pa wuahniar pa uhepur nohor memna
Uplerlawna makodi mormiori-dardiari.
4 La'pa ma'nu nek de rkeni puonni la O rommu
me kliewru-kliewru nek de mno'oni etla hande,
pa radud wualia a'nani de
rehgorgorga katri'ana mak kdella O genmu de,
Matroma!
A Ra'yu O'a,
a Matromlawnu,
Makdenreri O'a.
O' ed Makodi Plolli la Haneknek Wawannu.b
5 Plola!
Riy mak kden la O rommu nayanni de rler la ralam hepueparnu
ne rwatunu-rwahniar nohor mamain O'a.
6 La'a riy maka klernana O rurmu-laimu de ra'unut lalawna,
de la'a riy maka suksukni ralala'a la'a wo'or Sion totpena rmai lia rommu nayanni.
7 La'pa ralala' rer mia'ta la genia Baka lowanni mak kerkeran de,
dewade Omhi' gen die pa nwal lia ger ormata.
Otna yanullu ntur pua ntai lia ger ormat de,
dewade gera nriwu-nharna.
8 La'pa ralala' reria pa rhokria leta Sion,
de ir rurni-laini ra'ititar rer lia.
Riwra rla'awa gen miaka Uplerlawna ha Ndella de,
totpena rmai lia E gaini ralamni.
9 Mutlin reria a sniumbainu Matroma!
Uplerlawna O'a,
Makodi Plolli la Haneknek Wawannu.
Up mamni-tgar mamni Yakopa Uplerlawanni O'a.
10 Awuak pa Muala pripna-fa'ana la ray mak kruwun reri ami,
de la' riy maka Mpualir nian oleka wa pa nhi'a ray.
11 Lera id tutut lia O rommu nayanni,
de narehi mieman la' lera riwnu id la'a geni dom to'a.
Adien to'ola O rommu de tio'orni pa utiaka nhiari de ha samomuou ma'ta,
mere a'uhmen memna agholi wut lia riy yatyata re romni nayanni.
12 Yoma Uplerlawna,
de Itmatromlawanni Makdenreri pede Naruwnu-na'ahla ita,
me Nodia lelerni!
E' ed mak kala it pa tlernana sniayn lawna nora ya'unni-yamta'ata yatota-yawawa.
E' edonna Nwayotil targa ha kalwiedweda hya' to'a
la'a riy mak kakleha do'a-hala.
13 Matromlawnu ne!
O de Makdenreri O'a!
O' ed Makodi Plolli la Haneknek wawannu!
Mak kha'ar reri aranni la O'a re rlernan memna unut lawna.