Uplerlawna Nawenan la mak edon ketlia noha wawannu lirni-tunnu la plol wawannu
82
Asaf kieheni-nhiarni:1 Uplerlawna mak kdella Ilyamou-Watyatoha Namtatna pa Ntorna watghudi lokarni.
Mak kre'ela retlia noha wawannu lirni-tunnu er walia.
Ir maka ha rweta la Uplerlawna a'nani.a
2 Dewade Uplerlawna Nakot la ir wa,
Niwra:
“Hoi!
Yana mietlia rira lirni-tunnu de,
mhi'a pa nhala.
Yan mememna miodniana riy yatyata-halala.
3 Mere,
miprir lia a'na riy patyata nor wutga riy mak kla ta'eni-kmai tia'eni.
Mietlia riy mak kakleha-kaplara rora riy mak kler la kropna-krieutu lirni-tunnu la plol wawannu.
4 Minawar doinia riy maka kla ta'eni-kmai tia'eni ror wutga la'a riy maka kakleha-kaplara.
Minawar dodioinia la'a riy yatyata re limni ralamni.
5 Miy die mak kpodku-kpadku o!
Miy e miplin niohor ma'ta hadomdoma.
Emolmolla ponpona-mamuahu,
memetma nwow nana miy matmi,
pa mila' de dudunti-wetwetria hoho'a-hayaya.
Onnila miy (edon mtiulan la riy pa rmori-rdar lia plol wawannu de) pede emeknekama mhi' nohkerna-rai miaran di pa nwaltiri-nwaliakra.
6 A'ukot oleka giwra:
Miy die
Uplerlawna Makdella Tutullu-Lolo'oni upni-a'nani miy.
7 Mere hota miy mmiat wiali emeknekama rimormiori honona mak kmati.
Miy emeknekama o'ta-mat lalawna ho'mana,
hota miy mmiat miemna.”
8 Pleta Matroma!
Mmuai pia orgahamu Mtiorn apitu-mriauti apitga watghudi lokarni me tatiaili lahannu mai noha wawannu,
yoma la' lodna-hairi honona de O gahamu momuoga.