Rsumbain pa rwaka Uplerlawna Nalewna ir la lodna-hairi dom to'a
79
Asaf sniumbainni:
Uplerlawnu ne!
La'a hairi-hairi mak edonna katg O'a re,
e rdeh'a nan oleka noh di maka ha Mpualir niana.
Rhi'a akdeha-aktiahlia O roma kreimu.
Yerusalem ho'mana rweyata-rwaniaga.
2 O rimormiormu maka nhi'inde ratlin la O lirmu re limni-lakni rurni-kliakallu
de edonna rtamin walia mere knunu-kner neka pa onu-ma'nu rmeh'a ra'an dodioinia.
De inonni re ranietra nekpa ohpora-ahdiawra rma rwaruiya ya'anni.
3 La'a loi liawna-talan lawna mak kden la Yerusalem ho' de O rimormiormu rarni wau liora,
de emeknekama ger wawuaga.
Ne la' riy id mana hadamon olek pa nkilli miat la tniamanni.
4 Lodna-hairi mak kden la noh mamni walli-walli re ho' de
rkeni am lia nurnu tutnu pa rahe'i-ramali ami.
5 Matroma!
Hota yawenanmu mai am di de edonna nhoru mua'ta?
La'a hya' ler nanpena O ralammu nwoki o?
Hota hankeranmu-ralmha'armu emeka ai mak ta'enniana rwarum nana pa nodi liarni?a
O' de emeka muanke' ida mak kaya'a la patke'eni onnila patke'eni naliai.
6 Mere awuak pa Mtio'gernia yawenanmu de
la'a hairi-hairi mak edonna katlin la O'a,
Matroma,
de la' lodna-hairi mak edonna kola tieru-kawur nehla la O'a.
7 Yoma ir maka kwunu-kwenn ahorga O rimormiormu,
de Yakop duratni-waitni ami,
ne la' a gen mamni-tien mamni mana rweyata-rwaniaga momuoga.
8 Uplerlawnu ne!
Yana Mukmua ami yoma la'a up mamni-tgar mamni do'oni-halli wawannu.
Pleta-plet pa Mtiulla-msiayn nan ami Matroma,
yoma am madwie'er olek wa.
9 Uplerlawnu ne!
Mtiulan la mai ami Matroma!
Yoma O' de maka kamori-kalewn ami,
O'a.
Yana Mpuahla a do'a-hal mamni.
Mpue'er doinia am lia'a a arwal miamni,
totpena nanmu yan namdiaru mere hota riy honona ratu ra'unni-ramta'at O'a.
10 Yana Muolin doinia am lia pa lodna-hairi dom to'a ratian am die riwra:
“Hoi,
miy Matromlawanmi etla hanmeni de?!”
Matroma!
Mual memna totpena am mamkek memna la am mat mamni
de Ompuahla nana mak kwunu-kwenna rimormiormu re wniahlani.
11 Mutail to'ola mak ha rtoran nana re yatipnu-yatnianni.
Eee!
Awuak pa la'a riy meni maka reti olek la de hota kmati,
de rollia la'pa rmormiori,
yoma la'a O plolmu-mnehemu.
12 Matroma,
pena Ompuahla lodna-hairi mak kden la noha mamni walli-walli re hihi'ini-yapyapni la O'a,
de Mpuahla nana la tiewra wo'it ralamni yoma hare er maka kapolu-kaliella O'a.
13 Totpena O rimormiormu mak emeknekama O pipmu-dummu
hota ama'uli-mawed reri O' pa nodi liarni
la'pa nerun la'a durit mamni-wait mamni pa nodi liarni.