Rsumbain pa rwaka Orgahi-Orha'a kruwannu
59
Daud kieheni-nhiarni maka ha rala la mak khi' o'tani la mak kwatunu-kwahniara totpena rwahniar de rlernohora nhiara nialoini maka ha rweta la:
“Yana mpuaye'era-mpuaniawu”.
Hadi de Daud sniumbaini la' ler maka Saul nhopna riy rle'lu reria romni totpena rwenna Daud:
2 Uplerlawnu ne!
Mulewna a lia'a arwa'lu ri.
Muhew reria a lia'a riy mak kiwra kte'la la mai a'u ri.
3 Muolin doini a lia riy mak kholi-kleta yatyatni-halalli.
Mulewna a lia'a mak kwunu-kwenna re.
4 Mumkek la,
rhi' wunwunamnu pa riwra rrana kekni-rautnu re totpa rwenn a'u.
Riy mak kaplialiahana re rawok pa rler temn a'u.
Mere la' hare honona de a'g edonna gheik nana do'a-hala re,
onde a'g e mak khi' nana pniera-dniaiti re,
Matromlawnu ne!
5-6 A'g edonna ghi' do'a-hala hadoma totpa nariei pede rmahrur niohora ohma-niakatni re.
Matrome!
O' de Orgahi-Orha'a Uplerlawna Makodi Plolli la Haneknek Wawannu.a
Mtiulan la mai a'u.
A' u'pu-tga'ru Israel Uplerlawanni O'a.
Orgahamu Mumkek memna.
Mumat la genmu-tienmu pa Mukmua riy makden la noha-rai.
Yana Muolin doinia riy mak rna'ohma yatyatni la ir rimormior wialli.
7 La'pa ramkek nekpa lera niwra ntuinia dewade arwa'lu re rawal pia rmai die
emeknekama ahu muak ktowru
pa rle'lu reria let lawna ralamni.
8 Rmai die rleretniekla rhopil lir pa rapolu-raliella,
de lirni re emeknekama wehla gai ploklokra,
ne la' ir ralma-riorni de ratniekame riy e raplin niohor ira.
9 Mere Matromlawnu ed maka kaniha-kamalia ira,
ne la' mak kden la noha-rai honona re Muhe'i-mumalia re.
10 A ru'ru-la'yu honona re de rwatiawu O'a.
A' arnu e nawniair to'ola O'a.
A yawlarge'nu O'a.
11 La'a Matro'mu kalwiedni pede Nmai pia Ntulla-nsayni a'u.
Enhuri niohor a' pua umkek rer kierkerna arwa'lu re rla' yawa.
12 Yana Mpuenna re,
Matroma,
totpena nohwa'lu re rhoratreria plola pa Omukmua arwalmu re.
Matroma O' ed mak kruwun reri ami.
Muala plolmu-mnehemu pa Mhi' ir pa rawlar lia'a-rawlar miai,
ne Muala ir la' yawa,
Matromlawnu ne!
13 Yoma nhi'inde rwahoiti-rwarenna rwohora-rtatra,
ranur mamain rira.
Muollia la'pa orgahani pen neka rler tar lia'a po'ona-rakni re ralamni.
Yoma ir sukni rlokra-rhautia rira,
me rodia putra-palka ohpa-lahara.
14 Matroma!
Orgahamu Muala hankerna-ralmha'armu ma Mriukit watwatia re
pa rmou-rmo'or la noha wawannu.
Totpena riy honona ratga de Matro'mu ed mak khi' Uplerlawan la riy Israel re,
ne tniorna-riautu nwewar la noheri-lyanti nayanni di.
15 La'pa ramkek nekpa lera niwra ntuinia dewade arwa'lu re rawal pia rmai die
emeknekama ahu muak ktowru
pa rle'lu reria let lawna ralamni.
16 Rmeh'a ralala' pa rwahaka ha yaya'anni.
La'pa edon ra'an ma'ta pa rpeher wa de raro'wa.
17 Mere awuahniar nohora la'a ruri-lai miak kwatiawu O'a.
La' yawyawar ma'ta de la' lera-lera de
upolu-uhaun nohora a wniahnia'ru la'a O sniayanmu mak kdenreri mai a'u,
yoma O' nanpena a yawlari ge'nu la O'a.
Ne la O' nanpena asius wa dewade a tiy ukruwun a lia O nayanmu.
18 Matromlawnu ne!
A ru'ru la'yu ri honona rwatiag O'a.
A wuahniara ya'uli-yawedi la O'a.
Yoma aghoratnana la O' nanpena ed mak kruwun reria
me Ntulla-nsayn rereri a'u.